Lɔɔ 'ba vo Lïtuwë
Komo 'ba vo Lïtuwë 'ba Yësu, mandere Lɔɔ 'ba vo Lïtuwë
Rayada kö'du 'ba buku nenye
Luka, vo buku 'ba Luka yöru nenye, ayöru buku ma rïyö Laka nenye, ru mo Komo 'ba vo lïtuwë 'ba Yësu, mandere Lɔɔ 'ba vo lïtuwë. Kö'du Yöyö Laka 'ba Yësu ma Luka ayada zi ze wa mati Yësu o'dɔ mï lima 'bɔmo mï dakaŋo. Buku ma rïyö Laka nenye, ayeto ta bi mati ndundu 'ba buku ne inde rë nï. Ayada zi ze wa mati vo lö'böwë 'ba Yësu ehe biya vo lïtu 'bɔmowe o'dɔnnï here ï'dï kö'du yëtï 'ba Yësu apere rë nï kpuru biya mï damöku nenye.
Gba Yësu ï'dï lɔɔ dë zi vo lö'bö 'bëyïyë zi me'do 'bënï yëtï mï damöku nenye biya, mo ovo Lawo Laka 'ba Wïrï mï zë here zi zë tëdïnnï kyigɔ aba zi lɔɔ 'bɔmo ne ko'dɔ. Mati zë ïrïnnï Lawo Laka ku, zë ayetonnï zi kö'du yëtï mï Yerusalema. Vïdï kayo omannï mï kö'du yëtï 'bëzë ehe ayinnï na vo lö'böwë 'ba Yësu. Kö'du koro kayo o'dɔ rë nï, here zi vïdï koma mï kö'du yëtï 'ba vo lö'böwë 'ba Yësu.
Mati kö'du yëtï nenye ëdï ku kyigɔ mï Yerusalema, vo wehee 'ba Yësu ayetonnï yaza vo lö'böwë zi tëdï na riti. Tïnyö vo lö'böwë 'ba Yësu ore yaga tëmï Yerusalema ehe na rapere. Zë ilannï, kö'du yëtï mï dakaŋo 'ba Yudiya ehe Samariya. Komo 'ba lɔɔ nenye ayada tëmï kapita 1 zi kapita 'butë dɔmorïyö. Petero alaya laya kyedre mï komo nenye.
Tapëtï ma nenye, Wïrï ako'jo kya vo lö'bö maako, ru mo Pawolo. Gba mati Wïrï ako'jo mo dë, mo ëdï ko'dɔ zë mati alö'bönnï ga Yësu na riti mï ru yënï 'ba Yude. Mora Yësu ayada rë nï zi Pawolo ehe utu mo mï lɔɔ zi dakaŋo maakowe. Mï gërï nenye, kö'du yëtï 'ba Yësu ï'bë le kafo maga 'ba dakaŋo 'ba Yiserele zi dakaŋo maakowe, bi mati vïdï maakowe alimannï 'dɔmo.
Pawolo o'dɔ lɔɔ nenye mï bi kayowe, tëmï Yerusalema zi Roma. Yude o'dɔnnï mo riti kyedre ki'ja, mora zë a'dannï mo dë. Mo ayëtï kö'du mï bi 'ba mötu, bi 'ba mötu 'ba Yude, ehe mï bi naniye 'ba vïdï maakowe kpa. Kö'du laka 'ba lɔɔ 'bɔmo ëdï zi yada zi vïdï 'ba damöku nenye wa mati Yësu o'dɔ ko'dɔ zë.
Tëmï nenye biya, vo kome 'ba ndenye atɔ'bɔ yɔlɔnnï gërï mati vo lö'böwë 'ba Yësu alimannï mï dakaŋo. Here lɔɔ 'bëzë mëdï kaa ga kö'du yada ma laka kö'du ze zi lö'bö gɔ mo. Here Wïrï ma kɔnyi ze zi ki'ja kö'du yɔlɔ kpuru Buku Laka nenye. Amini.
1
Luka ayöru zi Tïyöpïyölö
1 Mï dagba buku 'bama, ma yöru zi yï Tïyöpïyölö biya wa mati Yësu o'dɔ yandi mo aba, tëmï kadra mati mo ayeto lɔɔ 'bënï, 2 le mï ko'do mati oba mo komorïyë, tapëtï mo ï'dï kö'du ku kpuru Lawo Laka aba zi vo lïtuwë mati mo inzi. 3 Tapëtï koli 'bɔmo, mo ayada rë nï zi zë mo ëdï na dïdï. Zë ongɔnnï mo ko'do 'butësowɔ aba, mo ame'donnï zë ëtï kö'du Damöku 'ba Wïrï. 4 Mati mo gba zë ëtï mo iya zi zë henye, “Ile Yerusalema dë, isiye kinye bi Lawo Laka zi 'Bu kï'dï kaa mati ma yada zi ye mo alömu zi ko'dɔ. 5 Yowani ï'dï bapatisi wini aba, ko'do tisi aba akï'dïyë bapatisi Lawo Laka aba.”
Oba Yësu komorïyë
(Mk 16:19-20; Lk 24:50-53)
6 Mati vo lïtuwë gba Yësu aba, ako'jonnï hɔ mo iyannï henye, “Yere, yaanya aba omba kï'dï damöku zi Yiserele hulëhu löhu?” 7 Yësu iya zi zë henye, “Omba dë zi ye yɔlɔ kadra 'ba kö'du mati o'dɔ rë nï nani, nje 'Bu ra ayɔlɔ. 8 Mora Lawo Laka atayi de ehe akï'dï kyigɔ zi ye. Here, akayade kö'du ma zi vïdï mï Yerusalema, mï Yudiya biya, mï Samariya, ehe mï damöku ne biya.”
9 Tapëtï kö'du kiya 'ba Yësu nenye, ehe mati zë ëdïnnï bi kongɔ, oba mo rïyë mï fɔli. Zë ɔ'bɔnnï dekpe mo kongɔ. 10 Mora mati mo ëdï tï'bë ku rïyë, zë nduwë bi kongɔ komorïyë. Kandi kora rïyö usunnï bɔngɔ kanyi ëdï tɔrɔnnï dakapa zë. 11 Zë iyannï henye, “Kö'du a'di kora 'ba Galilaya ëdï tɔre kinye bi kongɔ komorïyë? Oba Yësu ku komorïyë. Mora mo ata'ba hulëhu tëmï gërï kölö mati onge mo tï'bë.”
Vïdï maako zi kïrï pëtï Yudasi
(Mt 27:3-10)
12 Vo lïtu a'bannï ta Döku 'ba Olivo zi Yerusalema. Döku 'ba Olivo ëdï lasi 'ba wiṛi kölö ta ra Yerusalema. Vo lïtu mati ï'bënnï ani ne, 13 zë ra Petero, Yowani, Yemisi, Anderiya, Pilipo, Toma, Baratolomoya, Matayo, Yemisi wisi 'ba Alipayo, Simona mati o'dɔ lɔvɔ dakaŋo 'bënï, ehe Yudasi wisi 'ba Yemisi. Mati vo lïtuwë a'bannï ku gawo, zë ï'bënnï rïyë mï loko tɔrɔ ma ëdïnnï 'dɔmo. 14 Vo lïtuwë 'duwï rë nnï tɔtɔ amötu na radrɔko, vïdï mbare, ehe Mariya ma 'ba Yësu, öndu mo ëtï. 15 Kadra naniye aba, vo lö'bö 'ba Yere ëdïnnï biya lamikölö 'butërïyö mï ratɔtɔ bi kölö, ehe Petero ënyï rïyë ame'do zi zë. 16 Mo iya henye, “Aboka me, kyigɔ 'ba Lawo Laka aba, Dawidi iya kö'du 'ba Yudasi, mora kö'du mati mo iya ne o'dɔ rë nï ku. 17 Yudasi mo kölö tëmï ze o'dɔ lɔɔ ze aba, mora mo ika vïdïyë zi Yësu kïrï. 18 Here, Yudasi ogo kaŋo kɔhi ma ï'dï zi mo ga kö'du kyënyë ko'dɔ 'bɔmo ne. Mati mo alëpï ta rïyë akaŋo mï yaka, ida rɔ mo api. 19 Mati vïdï 'ba Yerusalema ayɔlɔnnï kö'du nenye, zë ako'jonnï yaka nani Akeledama, kö'du ya'ba aba mï ha 'bëzë, ‘Yaka 'ba Yama.’ 20 Mï buku Wayeto 'ba Dawidi iya henye,
‘Mila loko 'bɔmo na mbiya,
ehe mila vïdï maako dë lima ani.’
Iya kpa henye,
‘Vïdï maako mïrï lɔɔ 'bɔmo ne.’
21-22 “Here, domba vïdï maako kpa zi kɔnyi ze yada zi vïdï maakowe henye, Yësu ënyï ku tëmï koli. Mo mëdï tëmï vïdï kora kölö ma ëdï ze aba tëmï biyeto. Mo mëdï ze aba tëmï kadra mati Yowani abapatisi Yere Yësu, le ko'do ma oba mo komorïyë.”
23 Zë inzinnï vïdï kora rïyö. Ma kölö tëmï zë Yosepa, ako'jo Barasaba, ako'jo kpa Jusitusu, ehe agamo Matiyasi. 24 Here, zë biya amötunnï, iyannï henye, “Yere, ayɔlɔ kö'du sösu mï di'di 'ba vïdï biya. Ayada zi ze ma kölö ma inzi ku 25 zi tëdï na vo lïtu ehe zi lɔɔ pëtï Yudasi ko'dɔ.” 26 Zë u'dunnï födö, ehe inzi Matiyasi zi drɔko mï gboko 'ba vo lïtuwë 'butë dɔmokölö ne.