1 Mwerin Sabbath‑o, Mary mihn Magdala, Salome, apel Mary inen James, irai dupukda le karahdin pwi irai en inla salipki palwoaroan Jesus. 2 Oh inminjoang in rehnin Joarwi anjoauwo ma joauwo dakda, irai inla in joaujoauwo. 3-4 Nehn irai allaluhlahng in joaujoauwo irai pwahpene nehn pwungarai, “Inje pirin jeuweje kisai kasahpwroahjang sakaiho in oawoan joaujoauwo.” (Pwa ausoapoan sakaihoau.) Nehn irai lel wijahu irai kapangda pwa sakaiho ne kasahpwroahkjang. 5 Irai ken dilda nehn joaujoauwo kapangda mwahnkapw men, ma mwindi loap moaunin joaujoauwo robe korohrohioau ma — kanuhla irai.

6 Mwahnkappwo pwehng irai, “Kamwai joah majpwehk, ngoahi kidal pwa kamwai raprapahki Jesus mihn Nazareth ma ne kalohpwuhla. Joh Ih me — Ih ne iejda! Kamwai kadehde, me ioar wijahwa Ih liklikdi. 7 Kamwai alwe padahkihoang Nah sohnpadahkkok, a mehlel Peter. ‘Ih pirin inla Galilee mwohn kamwai; ioar wijahwa kamwai pirin kapang Ih, doahr Ah ne inoaukihoang kamwai.’ ”

8 Lihok diljang nehn joaujoauwo, irai ken kau pwa irai inenin majpwehkda apel jalohda. Irai pel johpwa pwehng armaj men mehkij, pwa irai majpwehkda.

[ 9 Mwerin Jesus iejda oh inminjoang in rehnin Joarwi, keiou, Ih pwokkoang Mary mihn Magdala, liho ma Ih kajroahjang ipoa ngen jaus ijimen. 10 Mary ken inla padahkihoang iraihok ma kin pwilpwilihjili Jesus ma injinjuwed apel joangjoangjoang. 11 Anjoauwo irai rong Mary pwa Jesus mour a ih pel kapang Jesus, irai johpwa kamehlele ih.

12 Mwerin me Jesus pel pwokkoang Nah sohnpadahk roahmen in oaujoangoan mwomw anjoauwo ira allaluhlahng in umwara likin kahnihmmwo. 13 Ira japahldo pel padahkihoang epwi irai, a irai ma rong johpwa kamehlele.

14 In koarjoahklahu Jesus pwokkoang Nah sohnpadahk eijek emenno anjoauwo ma irai mwingmwinge. Jesus koapwung oang irai doahr arai joah pwojon apel koapsakai in kamehlele iraihok ma ne kapang Ih mwerin Ah iejda. 15 Ih pwehng irai, “Kamwai alwe wija ohroj nehn jampah padahkihoang armaj ohroj Rongmwehuwo. 16  Inje ma pwojon apel poapdaijla, pirin mourla; a inje ma joah pwojon, pirin kerpwihekla. 17  Manman pwiai pirin aluhwoang iraihok ma kin pwojonla; irai en kin kajroahjang ngen jaus kan ipen armaj in oadoaioa; irai pirin lalki lalin japwen likin kan; 18  ma irai pwoakda sinek kan, ke pel nimla mehkij ma pwoaisin, irai jehpirin moadoakla; irai pirin kihdahng poahraiok pohn armaj johmwehuwok a ihr pirin mwehula.”

19 Mwerin en Koaun Jesus sikesikkoang irai, Ih pwoakpwoakdahla nehnloannge Ih mwindi loap moaunin Koahs. 20 Sohnpadahkkok ken japahlla padpadahkjili wija ohroj; Koaunno kin pel pwilpwili irai nehn arai doadoahkkok pwa en kadehdehda pwa arai padahkkok mehlel jang in manmannok ma irai wiahda.] * Epwi iren puk joarwi mehj pwi ma kawoahwoahda iroa siksik 18-20, epwi mwerin iroa siksik 20: Lihok ken kijoula ipen Peter apel pwilihoahk pel padahkihoang me ohroj ma irai ne rong. Mwerin me, Jesus doadoahkki nah sohnpadahkkok pwa irai en kalohkihpijoang ah kaweidin koamoaur joh imwinno jang palimese lel palikapi in jampah.