14
Jesus, ioar Alwa oang Jahm
1 Doari, Jesus pwehng irai, “Kamwai joah pwunod apel injinjuwed. Kamwai pwojon Koahs apel pwojon Ngoahi. 2 Pere dir mine nehn umwen Joamoaiho; ma joh, Ngoahi jehpirin pwehng kamwai pwa Ngoahi pirin inla koaunopdahng kamwai dohiamwai. 3 Ngoahi pirin inla koaunopda dohiamwai, Ngoahi pirin pwurdo uk kamwai dohng ipoai, pwa kamwai en mine wijahu ma Ngoahi kin mine. 4 Kamwai kidal allo ma inlahng wijahu ma Ngoahi allaluhlahng.”
5 Thomas pwehng Ih, “Maing Koaun, kamai jehjoa wijahu ma Koawoa pirin inlahng. A imdoahr amai en kak kidal allo ma inlahng wijahu?”
6 Jesus pwehng ih, “Ngoahi ma alwa, Ngoahi ma mehlelwa, Ngoahi ma mourwa; joh emen kak inla ipen Joamoaiho ma joh Ngoahi.” 7 Ih pel pwehng irai, “Apkas kamwai ne kidal Ngoahi, kamwai pirin pel kidal Joamoaiho; jang apkas inla kamwai ne kidal Ih apel kapang Ih.”
8 Philip pwehng Ih, “Maing Koaun, kajalehioang kamai Jahm, ioarroar ma kamai anahne.”
9 Jesus pwa, “Imdoahr, Philip, anjoau roairoai ma Ngoahi kin pwilpwilihki kamwai, a kamwai kahjikkoar kidal Ngoahi? Inje ma ne kapang Ngoahi, ne pel kapang Jahm. Doari, dahkij koawoa pwahki, ‘Kajalehioang kamai Jahm?’ 10 Philip, koawoa joah kamehlele ma Ngoahi kin minmine nehn Jahm, a Jahm kin minmine nehn Ngoahi?” Jesus pel pwehnglahng Nah sohnpadahkkok, “Lal kan ma Ngoahi ne padahkihoang kamwai jaudi pein Oai. A Jahmmo ma minmine Ipoai, ioar Ih ma wihwia Ah doadoahk kan. 11 Kamwai kamehlele nehn Oai pwa ma Ngoahi kin minmine ipen Jahm, a Jahm kin minmine Ipoai; a ma joah, kamwai kamehlele ki doadoahk pwiai ma Ngoahi wihwia. 12 Ngoahi pwehng kamwai in mehlel: ma emen ma pwojon Ngoahi pirin wia doadoahk kan ma Ngoahi kin wia. Eh, ih pirin wia doadoahk koalikjang, pwa Ngoahi allaluhlahng ipen Jahm. 13 A Ngoahi pirin kapwaihahda joang ohroj ma kamwai poaki in oadoaioa, pwa ling in Jahm en janjalda ipen Nah. 14 Ma kamwai pirin poaki Ipoai mehkij in oadoaioa, Ngoahi uhdahn pirin kapwaihahda.”
Inoaupoan Ngen Joarwi
15 “Ma kamwai ipwilki Ngoahi, a kamwai pirin kapwaihahda Oai kojonned kan. 16 Ngoahi pirin poaki ipen Jahm, a Ih pirin kioang kamwai pel emen Jounjauwaj, pwa en pwilpwili kamwai anjoau ohroj. 17 Ih Ngenwa ma kin kajalehda mehlelin Koahs. Sohn jampah oauwe johkak oaloa, pwa ihr johkak kapang apel johkak kidal Ih. A kamwai kidal Ih, pwa Ih kin minmine ipamwai apel nehn kamwai.
18 “Ngoahi johkak en kihdi kamwai kalahpwukla, a Ngoahi pirin japahldohng kamwai. 19 Mwerin anjoau kij jampah oauwe pirin johla kapang Ngoahi, a kamwai pirin kapang Ngoahi. Pwa Ngoahi mour, kamwai pirin pel mour. 20 Nehn rehnno pirin leldo, kamwai pirin kidal pwa Ngoahi kin mine nehn Joamoaiho, a kamwai kin minmine nehn Ngoahi, doahroar Ngoahi kin minmine nehn kamwai.
21 “Emen ma kin rong apel kapwaihahda Oai kojonned kan, ioar ih ma kin ipwilki Ngoahi. Joamoaiho pirin ipwilki emen ma kin ipwilki Ngoahi; Ngoahi pirin pel ipwilki ih, apel kajalehioang ih pein Ngoahi.”
22 Judas (jaudi Judas Iscariot) pwehng Ih, “Maing Koaun, mindoahr Oamw pirin kajalehioang kamai pein Koawoa, a jaudi oang jampah?”
23 Jesus japoang, “Emen ma ipwilki Ngoahi pirin kapwaihahda Oai padahk kan. Joamoaiho pirin ipwilki ih; Joamoaiho apel Ngoahi pirin indoa ipoa apel minmine ipoa. 24 Emen ma johkin ipwilki Ngoahi johkin kapwaihahda Oai padahk kan. Padahk kan ma kamwai ne rong, jaudi pein Oai, a pwen indoahjang ipen Joamoaiho, ma kadardo Ngoahi.
25 “Ngoahi ne padahkihoang kamwai mehpwiai nehn Oai minmine ipamwai. 26 A Jounjauwajjo, Ngen Joarwi, ma Joamoaiho pirin kadardo in oadoaioa, ioar Ih ma pirin padahkihoang kamwai, apel kasmankihoang kamwai mehkan ohroj ma Ngoahi ne pwehng kamwai.
27 “Ngoahi kioang kamwai popohl, pein Oai popohl ma Ngoahi kioang kamwai. Ngoahi johpwa kioang kamwai doahroar en jampah kin kioang kamwai. Kamwai joah injinjuwed, pwunod, apel majpwehk. 28 Kamwai ne rong Oai pwehng kamwai, ‘Ngoahi pirin inlahjang kamwai, a Ngoahi pirin japahldohng kamwai.’ Ma kamwai ipwilki Ngoahi, kamwai nen perenki Oai inlahng ipen Jahm, pwa Ih ma laplapjang Ngoahi. 29 Ngoahi pwehng kamwai apkas mehpwiai mwohn ahr pirin wiawi, pwa nehn ahr pirin pwoaida, kamwai en kamehlele. 30 Ngoahi ne johkak sikesikkoang kamwai anjoau roairoai, pwa koaun in jampah oauwe ne allaluhdo, joh ah manman pohn Ngoahi; 31 a sohn jampah en uhdahn kidal pwa Ngoahi ipwilki Jahm. Ioar kahrehda Ngoahi kin wiahda joang ohroj ma Ih pwehng Ngoahi.
“Kisai ken inlahjang wijahkije!”
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.