Mey-maaya-mawiya masa
Matiye
ma wuzlala
Mey da ray
Mey-maaya-mawiya masa Matiye ma wuzlala
Matiye a wuzlala Mey-maaya-mawiya na, gweegwe letek ta masa Mark leŋ Luk ma wuzlalamara. Ata tabiya a wuzlalam:
• mey da ray Jaŋ-Baptis ma zəlta ndəhay ŋga mbəɗdamara menjey ata
• mey da ray baptem ŋga Yesu
• mey da ray bay-malula ma wuɗey ŋga bata Yesu daa masa aŋga fa key daliyam da wuzlah-ley
• mey da ray Yesu ma zla sləra aŋga daa hwayak ŋgab Galile
• mey da ray Yesu ma daw aa berney ŋga Jeruzelem
• mey da ray meməcey ŋga Yesu da Jeruzelem
• mey da ray masləkɗawa ŋga Yesu daa meməcey
Matiye na, aŋga ndaw ma cakala budaw ŋga ŋgwamna ŋga Rawm. Ama Yesu a zəla ŋga səpa. Da ray ŋgene, ta’, a mbəkda sləra aŋga, a daw asiya. Ara ndaw da wuzlah gula hay ŋga Yesu kuraw a ray a cew.
Matiye a wuzlala ɗerewel aŋga na, ŋgada ndəhay Jəwif hay. A zla ɗerewel aŋga na, ta mezəley ŋga ndəhay daa səkway ŋga Yesu amba a wuzda Yesu aa daa səkway ŋga Abəraham. Aa guzley da ray mayawa ŋga Yesu. A wuɗey amba Jəwif hay a sərmara fara fara Yesu na, ara ndaw masa Gazlavay ma wala ŋga ləhdata ndəhay daa mebərey, asaya, amba a sərmara ara aŋga masa ndəhay maa guzlam da ray a daa Mejəwey-mey Magurma.
Matiye ta wuzleley mey la ga masa Yesu maa guzlda. Daa fasəlawal 5 haa 7 na, ara mey masa Yesu ma wuzda da aŋgwa. Daa fasəlawal 13 mey-meŋgey hay daha ta meesərkedey hay mekele mekele da ray mewey ŋga Gazlavay da ray ndəhay. Daa fasəlawal 24 ta 25 ara mey da ray menjey ŋga ndəhay ŋga Yesu daa masa ata fa səkwmara aŋga ma da vəhwa ŋga zəma bay aŋga.
Daa mezley ŋga ɗerewel e, mey mawuzlalakaya da ray Yesu daha, a ləvey: «A da zəlmara Emanəwel, anda meləvey, Gazlavay aa ta aləkwa.» (1.23) Daa mendəvey a, Matiye a wuzleley mey da ray Yesu ma ləvey: «Sərmara, yah na, yah ta akwar mandaw mandaw haa mendəvey ŋga bəla.» (28.20)
Daa ɗerewel e keɗe na, mey mekele mekele daha ŋga vəley gədaŋ a ndəhay:
Mey da ray maaya ŋga Gazlavay da ray ndəhay (5.3-10)
Sləra masa Yesu ma vəldatara a gula aŋga hay ŋga key (28.19-20)
1
Mezley ŋga səkway ŋga Yesu Kəriste
(Luk 3.23-38)
1 *Yesu *Kəriste na, ara səkway ŋga Bay *Davit. Davit e may, a yawa daa səkway ŋga *Abəraham. Ndəhay daa səkway ŋga Yesu Kəriste he na, a zley ta Abəraham. 1.1 Rm 1.3-4; 2Tm 2.8; Mt 20.30-31
2 Abəraham a na, aŋga papaŋ ŋga *Izak.
Izak may, papaŋ ŋga Jakwap.
Jakwap, papaŋ ŋga ata Juda ta məlmaha hay. 1.2 MC 21.2-3; 25.26; 29.32–30.24
3 Juda, papaŋ ŋga ata Fares ta Zerah ma yatərwa ta ŋgwas aŋga mezəley Tamar.
Fares, papaŋ ŋga Esraŋw.
Esraŋw, papaŋ ŋga Aram. 1.3 MC 38.29-30; Rut 4.18-22
4 Aram, papaŋ ŋga Aminadap.
Aminadap, papaŋ ŋga Naasaŋw.
Naasaŋw, papaŋ ŋga Salmaŋ.
5 Salmaŋ, papaŋ ŋga Bəwaz ma yarawa ta ŋgwas aŋga *Rahap.
Bəwaz, papaŋ ŋga Awbet ma yarawa ta ŋgwas aŋga Rut.
Awbet, papaŋ ŋga Jese. 1.5 Rahap: Jes 2.1-24; Rut ta Bəwaz: Rut 1–4
6 Jese, papaŋ ŋga Bay Davit.
Davit e na, aŋga papaŋ ŋga Salamaŋw. Mamaha ta key ŋgwas ŋga Uri la. 1.6 2Sam 11–12
7 *Salamaŋw, papaŋ ŋga Rabəwam.
Rabəwam, papaŋ ŋga Abiyah.
Abiyah, papaŋ ŋga Asaf. 1.7 1Mev 11.31–13.23
8 Asaf, papaŋ ŋga Jawzafat.
Jawzafat, papaŋ ŋga Jəwaram.
Jəwaram, papaŋ ŋga Awziyas. 1.8 2Mev 13.23–21.20; 26.1
9 Awziyas, papaŋ ŋga Jəwatam.
Jəwatam, papaŋ ŋga Akaz.
Akaz, papaŋ ŋga Ezekiyas. 1.9 2Mev 26.1–28.27
10 Ezekiyas, papaŋ ŋga Manase.
Manase, papaŋ ŋga Amaŋw.
Amaŋw, papaŋ ŋga Jawziyas. 1.10 2Mev 29.1–33.25
11 Jawziyas, papaŋ ŋga ata Yekwaniya ta məlmaha hay,
a yatərwa daa masa ndəhay daa hwayak ŋga *Babilaŋw
ma həlmata *Israyel hay aa hwayak ata. 1.11 2Mev 34.1–36.21
12 Fa dəɓa ha masa ata ma həlmata la a Babilaŋw a na,
Yekwaniya a yawa Salatiyel.
Salatiyel, papaŋ ŋga Zarubaabel.
13 Zarubaabel, papaŋ ŋga Abiyut.
Abiyut, papaŋ ŋga Eliyakim.
Eliyakim, papaŋ ŋga Azawr.
14 Azawr, papaŋ ŋga Sadakw.
Sadakw, papaŋ ŋga Akim.
Akim, papaŋ ŋga Eliyut.
15 Eliyut, papaŋ ŋga Eliyazar.
Eliyazar, papaŋ ŋga Mataŋ.
Mataŋ, papaŋ ŋga Jakwap.
16 *Jakwap, papaŋ ŋga *Jawzef, zel ŋga *Mari
ma yarawa Yesu ma zəlmara Kəriste, anda meləvey,
ndaw masa Bay *Gazlavay ma wala ŋga ləhdata ndəhay. 1.16 Lk 1.27
17 Anda keɗe, dəga fa Abəraham haa kasl fa Davit na, dedeŋ ŋga dedeŋ hay kuraw a ray a məfaɗ. Dəga fa Davit e may haa kasl ta pas masa ata ma həlmata Israyel hay a Babilaŋw na, dedeŋ ŋga dedeŋ hay kuraw a ray a məfaɗ. Yaw, dəga ta pas a ŋgene kasl fa mayawa ŋga Kəriste na, dedeŋ ŋga dedeŋ hay kuraw a ray a məfaɗ saya.
Mey da ray mayawa ŋga Yesu Kəriste
(Luk 2.1-7)
18 Ehe cəndamara mey da ray mayawa ŋga Yesu *Kəriste. *Mari mamaha na, ara kwakwa ŋga *Jawzef. Daa masa Jawzef ta la Mari a way aŋga daa ba araŋ na, Mari ta key hwaɗ sem ta gədaŋ ŋga *Mesəfney ŋga Gazlavay. 1.18 Lk 1.35 19 Jawzef, maŋgasl ŋga Mari na, ara ndaw maaya ta leŋgesl. Daa masa aa ma cənda Mari ta key ta hwaɗ sem na, a wuɗey a par hwaray fa dey ŋga ndəhay ba. Da ray ŋgene, a wulkey ŋga mbəkda kwakwa aŋga, ama a wuɗey ŋga mbəkda na, kwa ndaw a səra mey a ba. 20 Daa masa Jawzef fa wulkey da ray mey a na, *maslaŋ ŋga Bay Gazlavay da vaɗ ta’, a sawa a ray a, aa guzlar daa mesəfney, a ləvar: «Jawzef, səkway ŋga *Davit, ka da zlurey ŋga la kwakwa akah Mari ba, maja a key ta hwaɗ ŋgene na, ara ta gədaŋ ŋga Mesəfney ŋga Gazlavay. 21 A yawa bəzey mezəle la, ka da par mezəley Yesu, maja a da ləhdata ndəhay aŋga hay daa mebərey ata hay.» 1.21 Ps 130.7; Mt 1.25; Lk 1.31; SNM 4.12
22 Cek aha keɗe cəpa ta key la anda Gazlavay maa guzlwa zleezle ta mey *ndaw ma təla mey aŋga, ma ləvey:
23 «Nəka taw! dam-saɓara a key ta hwaɗ la manjar zel,
a da yawa bəzey mezəle.
A da zəlmara Emanəwel»,
anda meləvey, Gazlavay aa ta aləkwa. 1.23 Iz 7.14
24 Jawzef a sləkɗey daa ɗar, fa dəɓa ha a ka anda maslaŋ ŋga Bay Gazlavay ma ləvar heyey. Leŋ! a la kwakwa aŋga Mari a way, 25 ama ta cəmam cew e daa ba, haa kasl mayawa ŋga bəzey a. Jawzef a par mezəley Yesu. 1.25 1.21
1:1 1.1 Rm 1.3-4; 2Tm 2.8; Mt 20.30-31
1:2 1.2 MC 21.2-3; 25.26; 29.32–30.24
1:3 1.3 MC 38.29-30; Rut 4.18-22
1:5 1.5 Rahap: Jes 2.1-24; Rut ta Bəwaz: Rut 1–4
1:6 1.6 2Sam 11–12
1:7 1.7 1Mev 11.31–13.23
1:8 1.8 2Mev 13.23–21.20; 26.1
1:9 1.9 2Mev 26.1–28.27
1:10 1.10 2Mev 29.1–33.25
1:11 1.11 2Mev 34.1–36.21
1:16 1.16 Lk 1.27
1:18 1.18 Lk 1.35
1:21 1.21 Ps 130.7; Mt 1.25; Lk 1.31; SNM 4.12
1:23 1.23 Iz 7.14
1:25 1.25 1.21