25
ពោល អុចអ៝ន់កោរាញកាដាច់ផាតទោយ្សពាង់
1 ផេសតុស ត៝ត់តាប៝នឆេឆារា គែសពែនារ ជេសរីពាង់លោសឞើសប៝ននៃហាន់អាប៝នយេរូឆាលឹម ។ 2 តានៃមពោលកោរាញជានឞ្រាស នទ្រែលមាមពោលកោរាញឞ្រីយូដា ហាន់ម៝ប់ផេសតុស គៃមានតោនពោល ។ ផូងនៃឞ៝ញផេសតុស * ២៥:២-៣៖ ការ ២៣:១២-១៥ 3 ទាន់ពាង់អ៝ន់ឞូញជុនពោល តាប៝នយេរូឆាលឹម គៃមាអ៝ន់ពាង់ញហើនូយ្សនហ៝ម់អ្វែសពាង់មាកោរាញឞ្រីយូដា ។ យើនមាខាន់ពាង់លែៈតឹមទីទូនតោរនាវក៝ប់ងខឹតពោល រ៝ៈត្រ៝ង។ 4 ផេសតុស អើសមាផូងនៃ៖ “ពោល លែៈឞូក្រុងពាង់តាប៝នឆេឆារា ជេសរីគ៝ប់ព្លឹឆឹតគើញតាប៝ននៃដ៝ង់។ 5 លាសនទ្រីអ៝ន់ខាន់មៃដាៈកោរាញអាបាៈហាន់នទ្រែលគ៝ប់អារី ជេសរីលាសគែសតីសតាពាង់ នតោនពាង់ទោ”។ 6 ផេសតុស គុតាប៝នយេរូឆាលឹម គែសឆឹន ជឹតនារ ជេសរីពាង់ព្លឹឆឹតតាប៝នឆេឆារា ។ ត៝ត់អោយតៃពាង់គុតារានើលផាតទោយ្ស ដាៈឞូលែវពោល តារី។ 7 ត៝ត់ពាង់តារី មពោលកោរាញឞ្រីយូដា អីតាៈឞើសប៝នយេរូឆាលឹម គុញជោមជុមពាង់ ជេសរីនតោនអោឞាល់ទោយ្សជ្រូៗអ៝ក់ងាន់ តីសមាមោអោសឆៃមឞើសនហេលនាវតីសអីនៃ។ 8 ពោល អើស៖ “គ៝ប់មោអោសព្រ៝តជានតីសដាសនាវវៃផូងអីឆ្រាអែល ដាសញីសជានឞ្រាសមាកោរាញឞ្រាស មោលាសដាសកោរាញកាដាច់ប៝នរោម ”។* ២៥:៨៖ ការ ២៤:១០-២១ 9 យ៝រមាផេសតុស ពាង់អុចញហើនូយ្សនហ៝ម់អ្វែសមាមពោលកោរាញឞ្រីយូដា ពាង់លាសមាពោល កើតនអា៖ “មៃអុចដ៝ង់ហាន់តាប៝នយេរូឆាលឹម រីនទ្រែលគ៝ប់ គៃមាគ៝ប់ផាតទោយ្សនាវអ្យា?”* ២៥:៩៖ ការ ២៤:២៧ 10 ពោល អើស៖ “តាអ្យាជេងនតុកផាតទោយ្សកោរាញកាដាច់ប៝នរោម ទីមាផាតទោយ្សគ៝ប់តាអ្យា។ គ៝ប់មោអោសព្រ៝តជានតីសដាសមាផូងអីឆ្រាអែល កើតមៃលែៈគឹតនហេលជេសនាវអ្យា។ 11 លាសគ៝ប់ម៝ប់ជានក្វែមោលាសជានតីស គែសទោយ្សជ្រូត៝ត់មាខឹតឆាក់ គ៝ប់មោអោសរាលាច់ខឹត យើនមាលាសនាវខាន់ពាង់នតោនគ៝ប់នៃមោងាន់ លាសនទ្រីមោអោសទីញជុនគ៝ប់អ៝ន់មាខាន់ពាង់។ គ៝ប់អុចហាវនាវអ្យាត៝ត់អាកោរាញកាដាច់តាប៝នរោម រី”។* ២៥:១១-១២៖ ការ ២៥:២៥; ២៦:៣១-៣២ 12 ជេសរីផេសតុស តឹមញច្រាៈដាសមាផូងកោរាញកើលពាង់តានៃ ពាង់លាសមាពោល ៖ “មៃទាន់ហាវនាវមៃអាកោរាញកាដាច់រី លាសនទ្រីមៃហាន់អាពាង់ទោ”។
ផេសតុស ងក៝ចទោយ្សពោល អ៝ន់មាកាដាច់អាគ្រឹពា គឹត
13 ត៝ត់ឆឹន ជឹតនារឞើសកើយនៃ ត៝ត់ឞ្រោៈកាដាច់អាគ្រឹពា * ២៥:១៣៖ កាដាច់អាគ្រឹពា អ្យាអីក៝នកាដាច់ហេរោត-អាគ្រឹពា អីគែសងក៝ចតា ការ ១២:១-២៤។ នទ្រែលមាអ៝សឞូអូរពាង់រាញាបេរេនីស ខាន់ពាង់ហាន់តាប៝នឆេឆារា គៃមាហាន់ខ៝ល់អោបអ្វែសលាង់ផេសតុស ។ 14 កាដាច់គុតាប៝ននៃជ៝ៈនារ ជេសរីផេសតុស ងក៝ចនាវពោល អ៝ន់មាកាដាច់នៃគឹត ពាង់លាស៖ “គែសទូហ្វេឞូនុយ្សទោយ្សតាត្រោមនទ្រូងអីផេលិច អេហ៝ៈផាតទោយ្សហោមរ៝ងតានៃ។* ២៥:១៤៖ ការ ២៤:២៧ 15 ទោលគ៝ប់ហាន់តាប៝នយេរូឆាលឹម គែសមពោលកោរាញជានឞ្រាស នទ្រែលមាមពោលកោរាញឞ្រីយូដា នតោនពាង់ ទាន់អ៝ន់គ៝ប់តេៈទោយ្សពាង់។* ២៥:១៥៖ ការ ២៥:២ 16 គ៝ប់លាសមាខាន់ពាង់ តាផូងរោម មោវៃគែសអោសញជុនទូហ្វេអ៝ន់ឞូតេៈទោយ្ស លាសនើមអីតើមទោយ្សអេហ៝ៈគុតឹមម៝ប់ងើយឞើសត៝ឞើសអ្យាដាសមានើមអីតើមនតោនល៝រ។ 17 ត៝ត់ផូងអីនៃតាអ្យានើស កាសនារអោយតៃគ៝ប់គុតានតុកផាតទោយ្ស នទ្រែលមាដាៈឞូលែវពោល រ៝ មោអោសក៝ប់ជ៝ៈ។ 18 ផូងអីតើមនតោនពាង់គុតានតុកផាតទោយ្សរីទាទេដ៝ង់ យើនមាមោអោសឆៃនតោនទូនតីលនទើតីសក្វ៝ង់កើតនាវគ៝ប់មឹនល៝រ។* ២៥:១៨-២០៖ ការ ១៨:១៤-១៥; ២៣:២៩ 19 ខាន់ពាង់មានមាតឹមរាលាច់តានាវវៃផូងខាន់ពាង់នើម នទ្រែលមានាវទូហ្វេឞូនុយ្សរាញាយេឆូ លែៈខឹត យើនមាពោល លាសហោមរេសទូរីទើម។ 20 យ៝រលាសគ៝ប់មោវៃផាតទោយ្សនាវតឹមរាលាច់កើតអីនៃ នទ្រីទឹងគ៝ប់អោបពោល លាសពាង់អុចហាន់តាប៝នយេរូឆាលឹម គៃមាផាតទោយ្សតានៃ† ២៥:២០៖ ប៝នយេរូឆាលឹម ជេងនតុកគែសទូមល៝ម់ញីសឞ្រាសជានឞ្រាសមាកោរាញឞ្រាស នតុកអាអេងមោអោសគែស។ នទ្រីទឹងតាប៝នអីនៃគែសកោរាញផូងអីឆ្រាអែល អ៝ក់ នទ្រែលមាគែសអ៝ក់ឞូនុយ្សអីឞ្លាវគឹតមឹនតានាវវៃផូងអីឆ្រាអែល ។។ 21 យើនមាពាង់អុចហាវនាវអ្យាត៝ត់មាកោរាញកាដាច់ផាតទោយ្ស នទ្រីទឹងគ៝ប់ដាៈឞូក្រុងពាង់តាត្រោមនទ្រូងជឹត ក៝ប់ត៝ត់នារគ៝ប់ញជុនពាង់អ៝ន់មាកោរាញកាដាច់”។* ២៥:២១៖ ការ ២៥:១១-១២ 22 កាដាច់អាគ្រឹពា លាសមាផេសតុស ៖ “គ៝ប់អុចអ្យាត់នាវឞូនុយ្សនៃងើយដ៝ង់”។ ផេសតុស អើស៖ “នារអោយតៃកាដាច់តាង់នាវពាង់ងើយ”។
ពោល គុឞើសនាប់មាត់កាដាច់អាគ្រឹពា
23 ត៝ត់នារអោយតៃរី កាដាច់អាគ្រឹពា នទ្រែលមាបេរេនីស ហាន់តានតុកជ្រោរាបុនក្វ៝ង់រឺមខឺមងាន់។ តានៃគែសផូងកោរាញតាហែនក្វ៝ង់ នទ្រែលមាផូងកោរាញតាប៝ននៃហាន់នទ្រែលពាង់។ ជេសរីផេសតុស ដាៈឞូលែវពោល ហាន់តារី។ 24 ផេសតុស លាស៖ “គ៝ប់ទាន់ងក៝ចអ៝ន់មាកាដាច់ នទ្រែលមាទឹងលែៈឞូនុយ្សអីវាច់គុនទ្រែលគ៝ប់តាអ្យា ឞូនុយ្សអ្យាទឹងលែៈផូងអីឆ្រាអែល តាប៝នយេរូឆាលឹម នទ្រែលមាតាប៝នអ្យា ខាន់ពាង់ហាន់នតោនពាង់តាគ៝ប់ នអ៝ប់មានតែរដាៈងខឹតលើយពាង់។ 25 ល៝ង់គ៝ប់អ្យាមោអោសឆៃគែសនាវតីសតាពាង់ត៝ត់មាខឹតឆាក់ យើនមាឆាក់ពាង់នើមអុចទាន់នាវអ្យាហាវត៝ត់តាកោរាញកាដាច់ឞ៝ន់តាប៝នរោម ។ នទ្រីទឹងគ៝ប់មឹនញជុនពាង់អ៝ន់ហាន់ម៝ប់កោរាញកាដាច់តារី។* ២៥:២៥៖ ការ ២១:៣៦; ២៦:៣១ 26 គ៝ប់អេហ៝ៈអោសគែសនាវនហេលនានេៈមាញចីសនាវពាង់មាអ៝ន់កោរាញកាដាច់អីនៃគឹត កើតនទ្រីទឹងគ៝ប់ដាៈឞូក្វាល់ពាង់ហាន់ម៝ប់ខាន់អៃមៃតាអ្យា យើនមានាវខ្លៃអីហោនើសជេងអុចម៝ប់មាកាដាច់នើមអ្យា។ លាសលោចជេសអោបពាង់ រីមើគ៝ប់គែសនាវអាបាៈមាឞ្លាវញចីសតាឆ៝ម់បុត។ 27 យ៝រលាសតឹងមានាវមឹនគ៝ប់ លាសញជុនឞូនុយ្សទោយ្ស អ៝ន់គែសញចីសងក៝ចនហេលនានេៈនាវនតោនតាឆ៝ម់បុតរីដ៝ង់”។
*25:2 ២៥:២-៣៖ ការ ២៣:១២-១៥
*25:8 ២៥:៨៖ ការ ២៤:១០-២១
*25:9 ២៥:៩៖ ការ ២៤:២៧
*25:11 ២៥:១១-១២៖ ការ ២៥:២៥; ២៦:៣១-៣២
*25:13 ២៥:១៣៖ កាដាច់អាគ្រឹពា អ្យាអីក៝នកាដាច់ហេរោត-អាគ្រឹពា អីគែសងក៝ចតា ការ ១២:១-២៤។
*25:14 ២៥:១៤៖ ការ ២៤:២៧
*25:15 ២៥:១៥៖ ការ ២៥:២
*25:18 ២៥:១៨-២០៖ ការ ១៨:១៤-១៥; ២៣:២៩
†25:20 ២៥:២០៖ ប៝នយេរូឆាលឹម ជេងនតុកគែសទូមល៝ម់ញីសឞ្រាសជានឞ្រាសមាកោរាញឞ្រាស នតុកអាអេងមោអោសគែស។ នទ្រីទឹងតាប៝នអីនៃគែសកោរាញផូងអីឆ្រាអែល អ៝ក់ នទ្រែលមាគែសអ៝ក់ឞូនុយ្សអីឞ្លាវគឹតមឹនតានាវវៃផូងអីឆ្រាអែល ។
*25:21 ២៥:២១៖ ការ ២៥:១១-១២
*25:25 ២៥:២៥៖ ការ ២១:៣៦; ២៦:៣១