នាវកោរាញឞ្រាសងើយនាវតឹមរាង្លាប់មហែ តីតុស 3

នាវរេសជេងផូងញឆីង

1 ងកាសដ៝ង់ផូងញឆីងអ៝ន់យើកមាកោរាញម៝ត់អ្វាញ់ឞ្រីទាក នទ្រែលមាផូងអីគែសនាវទើយ។ អ៝ន់ខាន់ពាង់អ្យាត់ ជេសរីនទ្រាប់នឹងមាជាននទើអ្វែសអាប់នតីល។* 2 ងកាសខាន់ពាង់ដ៝ង់ លើយអោសអ៝ន់ខាន់ពាង់ងើយនាវអ្យើសឞូមាឞូនុយ្សអេង អ៝ន់ខាន់ពាង់ទែរឞើសនាវតឹមល៝ក់តឹមជាញមាឞូ អ៝ន់ខាន់ពាង់គែសនូយ្សនហ៝ម់មលែស នហ៝មាយើកមាទឹងលែៈឞូនុយ្ស។* 3 ឞើសនតើមនើសផូងឞ៝ន់ឞូនុយ្សរាលូកម៝ល់ ឞូនុយ្សទាង់ឞោក ឞូនុយ្សអីអ្យាត់នាវឞូមរោស ឞូនុយ្សបឹបើច ឞូនុយ្សទឹកមានទើកើញ រ៝ង់មារាង្លៃឆាក់អុចអាប់នតីល គែសនូយ្សនហ៝ម់ជាញ គែសនូយ្សនហ៝ម់មោនាច នអ៝ប់មាតឹមឞ្យាញ់នទ្រាង់នើម។* 4 យើនមាត៝ត់កោរាញឞ្រាសអីនើមរាក្លាយ្សផូងឞ៝ន់ញហើនាវអ្វែសនាវរ៝ង់ពាង់នើមអ៝ន់មាឞូនុយ្ស‌* 5 ពាង់រាក្លាយ្សផូងឞ៝ន់។ មោទីអោសពាង់រាក្លាយ្សយ៝រមាឞ៝ន់លែៈជានឆ៝ង់ ពាង់គែសនាវយោៈនអាចទើម ទឹងពាង់រាក្លាយ្សឞ៝ន់អ្យា។ នអ៝ប់មាពាង់អ៝ន់ឞ្រាសហ្វេងអ្វែសអីក្ល៝សអ្វែសគុតាឆាក់ឞ៝ន់ ជេសរីនាវទើយឞ្រាសហ្វេងអ្វែសជាននូយ្សនហ៝ម់ឞ៝ន់អ៝ន់មហែតឹមឞានមាទែសទូតឹជឹត ពាង់តឹមឞានមារាវផូងឞ៝ន់អ៝ន់ក្ល៝ស។ កើតនទ្រីពាង់រាក្លាយ្សផូងឞ៝ន់។ 6 ពាង់អ៝ន់ឞ្រាសហ្វេងអ្វែសជាននទើខ្លៃអ៝ក់ងាន់តាផូងឞ៝ន់ យ៝រមានទើឞ្រាសយេឆូក្រីស អីនើមរាក្លាយ្សផូងឞ៝ន់លែៈជាននើស។ 7 យ៝រមានាវអ្វែសពាង់នើម កោរាញឞ្រាសកើបផូងឞ៝ន់ជេងឞូនុយ្សឆ៝ង់ ជេសរីអ៝ន់ផូងឞ៝ន់គែសនាវរានើមន៝ប់ឆ៝ៈទើននាវរេសនហ៝រ៝តាជឹតនាប់តៃ*។* 8 នាវអីនៃជេងងាន់។

គ៝ប់អុចមៃនតីនហេលនានេៈងាន់ទឹងលែៈនាវអីនៃ គៃមាឞូម៝សអីលែៈញឆីងមាកោរាញឞ្រាសញឆ្រោយ្សជាននទើអ្វែស។ នាវអីនៃជេងអ្វែស នទ្រែលមាគែសនាវខ្លៃងាន់អ៝ន់មាទឹងលែៈឞូនុយ្ស។ 9 យើនមាទែរហ៝ម់នាវងើយតឹមរាលាច់រាលូកម៝ល់ នាវងក៝ចទែស† នាវតឹមល៝ក់ឞាល់ នាវតឹមរាលាច់មានាវវៃផូងអីឆ្រាអែល យ៝រលាសទឹងលែៈនាវអីនៃមោអោសគែសនាវខ្លៃ ជេងទើមទាមទាទេ។* 10 ឞូនុយ្សអីជាននាវតឹមងខាសមពោល អ៝ន់លាសពាង់ទូតឹមាឞារតឹ ជេសរីលើយហោមម៝ប់ពាង់‌* 11 យ៝រមាលែៈគឹតជេសឞូនុយ្សអីជានកើតនៃលែៈអ្យើសជេស ពាង់ជានតីស នទ្រែលមាតេៈទោយ្សអេងឆាក់ពាង់នើម។

នាវនតិញងគ្លែៈទុត

12 នារជឹតនាប់តៃគ៝ប់អ៝ន់នោអារតេមាស មោលាសនោតីខីកុស ហាន់អាមៃ ត៝ត់ពាង់អាមៃ អ៝ន់មៃញឆ្រោយ្សហាន់គើញអាគ៝ប់តាប៝ននីកោពោលីស រ៝ យ៝រលាសគ៝ប់លែៈអុចគុតានតុកនៃនោកខៃជីកាត់។* 13 ញឆ្រោយ្សកើលនទើអ៝ន់មានោឆេនាស កោរាញនើមនតីនាវវៃ នទ្រែលមានោអាពោលុស គៃមាខាន់ពាង់ហាន់ជឹតនាប់ លើយអោសអ៝ន់ខាន់ពាង់ពាសព៝ត់ទូនតីលនទើ។* 14 អ៝ន់ផូងញឆីងញឆ្រោយ្សជាននទើអ្វែស គៃមាកើលនាវជេរឞូតានទើគុរេសអាប់នារ កើតនទ្រីនាវរេសខាន់ពាង់គែសនាវខ្លៃ។* 15 ទឹងលែៈឞូនុយ្សអីគុនទ្រែលគ៝ប់ ខាន់ពាង់អោបនាវអ្វែសលាង់មៃទាទេ។ ដាៈមៃអោបនាវអ្វែសលាង់ទឹងលែៈឞូនុយ្សអីញឆីងអីរ៝ង់មាហេនយឹ។ ជេសរីអ៝ន់នាវអ្វែសកោរាញឞ្រាសគុនទ្រែលទឹងលែៈខាន់អៃមៃ៕៚

*3:1 ៣:១៖ រម ១៣:១-៧

*3:2 ៣:២៖ ផល ៤:៥; កោល ៤:៦

*3:3 ៣:៣៖ អេផ ២:១-៣

*3:4 ៣:៤-៦៖ រម ៣:២៤; ៩:១៦; អេផ ២:៤-១០; ២តម ១:៩

*3:7 ៣:៧៖ មោលាស «ជេសរីឞ៝ន់មរាឆ៝ៈទើនទឹងលែៈនទើអីពាង់អុចអ៝ន់មាឞ៝ន់ នទ្រែលមានាវរានើមន៝ប់មាឆ៝ៈទើននាវរេសនហ៝រ៝»។

*3:7 ៣:៧៖ តត ២:១៣; រម ៥:៩-១០; ៨:១៤-១៥, ២៤-២៥

†3:9 ៣:៩៖ អាបៃអ្យាឞ៝ន់មោហោមគឹតអោស មើមទឹងពោល ដាៈទែរនាវងក៝ចទែស។ មោអោសគែសនាវអ្យើសតានាវងក៝ចទែស។ ក្លាប់លាសផូងខាន់ពាង់មឹនខ្លៃអីរមានាវងក៝ចទែស។

*3:9 ៣:៩៖ ១តម ១:៤; ២តម ២:១៤

*3:10 ៣:១០-១១៖ មថ ៧:១៥-១៦; រម ១៦:១៧; ១កោ ៥:៩-១១; កោល ២:៨; ២តេ ៣:១៤-១៥; ២យហ ១:១០

*3:12 ៣:១២៖ កោល ៤:៧

*3:13 ៣:១៣៖ ការ ១៨:២៤-២៨

*3:14 ៣:១៤៖ អេផ ២:១០