នាវកោរាញឞ្រាសងើយនាវតឹមរាង្លាប់មហែ រោម 6

នាវតីសមោហោមអោសគែសនាវទើយជឹត

1 លាសនទ្រីមើមឞ៝ន់លាស? ឞ៝ន់ហោមអុចជានតីសតៃ គៃមានាវអ្វែសកោរាញឞ្រាសលើហោអ៝ក់ឞើស?* 2 មោទីអោស! ឞ៝ន់តឹមឞានមាលែៈខឹតមពែសមានាវតីស លាសនទ្រីមើមទឹងឞ៝ន់ហោមទើយគុរេសជានតីសជឹត?* 3 អើមខាន់អៃមៃមោគឹតបាស? ទឹងលែៈឞ៝ន់អីលែៈគែសជេសទើននាវបាប់តែមយុកមាទាក លែៈគុតឹមរាង្លាប់នទ្រែលឞ្រាសក្រីសយេឆូ ។ នាវឞ៝ន់ទើននាវបាប់តែមអីនៃ ជេងតឹមឞានមាឞ៝ន់ខឹតនទ្រែលពាង់ដ៝ង់។* 4 តានាវបាប់តែមយុកមាទាកអីនៃឞ៝ន់តឹមឞានមាខឹតនអ៝ប់មាត៝ប់នទ្រែលពាង់ គៃមាឞ៝ន់គុតានាវរេសមហែកើតឞ្រាសក្រីស ដ៝ង់។ ជេសរីអាបៃអ្យាឞ៝ន់ទើយគុរេសតានាវរេសមហែតឹមឞានមាឞ្រាសក្រីស អីកោរាញឞ្រាសឞឹលែៈអ៝ន់ទ៝ក់រេសតៃមានាវទើយនាវច្រេកលើបពាង់នើម។*

5 លាសឞ៝ន់លែៈគុនទ្រែលឞ្រាសក្រីស តានាវខឹតពាង់កើតនៃ ឞ៝ន់មរាទ៝ក់រេសតៃកើតពាង់លែៈទ៝ក់រេសដ៝ង់។ 6 ឞ៝ន់លែៈគឹតជេស នូយ្សនហ៝ម់អើមឞ៝ន់អីអុចជានតីសនឹង តឹមឞានមាលែៈងខឹតជេសតាឆីតឹមរាកាង់នទ្រែលឞ្រាសក្រីស គៃមានាវតីសមោហោមគែសនាវទើយតានាវរេសឞ៝ន់។ ជេសរីឞ៝ន់លើយហោមអោសជានទឹកមានាវតីសជឹត។* 7 នតឹតលាសឞូម៝សអីលែៈខឹត លែៈក្លាយ្សជេសឞើសនាវទើយនាវតីសដ៝ង់ មោហោមឞ្លាវជានតីសតានែសនតូ។ 8 លាសឞ៝ន់លែៈខឹតជេសនទ្រែលឞ្រាសក្រីស ឞ៝ន់លែៈគឹត ឞ៝ន់តៃទ៝ក់រេសនទ្រែលពាង់ដ៝ង់។* 9 ឞ៝ន់លែៈគឹតជេសនាវអីនៃ យ៝រលាសឞ្រាសក្រីស លែៈទ៝ក់រេសជេសឞើសផូងខឹត ពាង់មោហោមអោសឞ្លាវខឹតតៃ នាវខឹតមោហោមអោសគែសនាវទើយតាពាង់តៃ។* 10 នាវពាង់ខឹតអីនៃ ពាង់ខឹតទូតឹទើមមោហោមអោសខឹតតៃ គៃមាងគ្រ៝សលើយនាវតីស។ អាបៃអ្យាពាង់រេស ជេងរេសអ៝ន់មាកោរាញឞ្រាសនើម។* 11 លាសនទ្រីអ៝ន់ខាន់អៃមៃតឹមឞានកើតនៃដ៝ង់ អ៝ន់កើបខាន់អៃមៃនើមតឹមឞានមាលែៈខឹតជេសមពែសមានាវតីសលើយហោមអោសជានតីស ជេសរីអ៝ន់រេសមាកោរាញឞ្រាសនើម យ៝រលាសខាន់អៃមៃលែៈគុនទ្រែលឞ្រាសក្រីសយេឆូ ។*

12 លាសនទ្រីខាន់អៃមៃលើយហោមអោសជានតឹងទូនតីលនទើអ្យើសនទើតីសជឹត លើយហោមអោសជានតឹងនាវកើញអ្យើសតាឆាក់ជាន់អីហោមឞ្លាវខឹត។ 13 លើយហោមអោសអ៝ន់ទូនតីលនទើតាឆាក់ជាន់ខាន់អៃមៃជាននទើអ្យើសនទើតីស យើនមាជាវខាន់អៃមៃនើមមាកោរាញឞ្រាស យ៝រលាសឞើសនតើមនើសខាន់អៃមៃតឹមឞានមាលែៈខឹត យើនមាអាបៃអ្យាខាន់អៃមៃលែៈគែសនាវរេសមហែ នទ្រីទឹង ទ៝ង់ទឹងលែៈឆាក់ជាន់ខាន់អៃមៃ គៃមាជាននទើឆ៝ង់នទើអ្វែសអ៝ន់មាកោរាញឞ្រាសទោ។* 14 ខាន់អៃមៃមោហោមអោសខាច់ជានតឹងនូយ្សនហ៝ម់អុចជានតីស ខាន់អៃមៃលែៈគែសនាវទើយមានាវអីនៃ យ៝រលាសខាន់អៃមៃមោហោមគុតាន៝ម់នាវវៃមោឆេ លែៈគុជេសតាន៝ម់នាវអ្វែសកោរាញឞ្រាស។*

នាវដាៈឆើមកើលជានការមាកោរាញឞ្រាស

15 លាសនទ្រីមើមឞ៝ន់លាស? លាសឞ៝ន់លែៈគុជេសតាន៝ម់នាវអ្វែសកោរាញឞ្រាស មោហោមអោសគុតាន៝ម់នាវវៃមោឆេ លាសនទ្រីទីដ៝ង់ឞ៝ន់ហោមជានតីសលាសមោ? មោទីអោស!* 16 ខាន់អៃមៃលែៈគឹតជេស ម៝សនទើអីខាន់អៃមៃអុចកើយ្សគៃមាជានតឹង ខាន់អៃមៃជេងតឹមឞានមាទឹកមានទើអីនៃ។ លាសខាន់អៃមៃជេងទឹកមានាវតីស នាវតីសលែវខាន់អៃមៃត៝ត់មានាវខឹត។ លាសខាន់អៃមៃកើយ្សអ្យាត់នាវកោរាញឞ្រាស នាវអីនៃលែវខាន់អៃមៃត៝ត់មាកោរាញឞ្រាសកើបខាន់អៃមៃឆ៝ង់។* 17 ឞើសនតើមនើសខាន់អៃមៃជេងទឹកមានាវតីស យើនមាលាសអ្វែសមាកោរាញឞ្រាស អាបៃអ្យាខាន់អៃមៃលែៈអ្យាត់មាលែៈឞើសនូយ្សនហ៝ម់ងាន់នាវឞូលែៈនតុមនតីខាន់អៃមៃ។* 18 កោរាញឞ្រាសលែៈរាក្លាយ្សជេសខាន់អៃមៃឞើសនាវតីស ជេសរីខាន់អៃមៃលែៈជេងទឹកមានាវគុងាវឆ៝ង់។*

19 គ៝ប់ងើយមានាវជានទឹកឞូ យ៝រលាសខាន់អៃមៃនើសហោមជេងឞូនុយ្សមោលាង់ជានតឹងនាវកោរាញឞ្រាសអុច។ ឞើសនតើមនើសខាន់អៃមៃជាវឆាក់ជាន់ខាន់អៃមៃនើមអ៝ន់ជានទឹកមានាវអ្យើស នទ្រែលមានាវតឹមរាទ៝ង់មាកោរាញឞ្រាសលើមាហោ។ អាបៃអ្យាអ៝ន់ខាន់អៃមៃជាវហ៝ម់ឆាក់ជាន់ខាន់អៃមៃនើមអ៝ន់ជានទឹកមានាវឆ៝ង់ គៃមាខាន់អៃមៃជេងក្ល៝សអ្វែស។ 20 នោកខាន់អៃមៃហោមជានទឹកមានាវតីសនើស ខាន់អៃមៃមោអោសជានតឹងនាវកោរាញឞ្រាសអុច។ 21 លាសនទ្រីនាវអីខាន់អៃមៃជានតីសអីនៃនើស ម៝សនទើគែសនាវខ្លៃមាខាន់អៃមៃអាបៃអ្យា? អាបៃអ្យាខាន់អៃមៃគែសនាវដីតទើមមានាវជានអីនៃ។ នាវអីនៃលែវខាន់អៃមៃត៝ត់តានាវខឹតគុតានទ្រូងអុញនហ៝រ៝តានារជឹតនាប់តៃ! 22 យើនមាអាបៃអ្យាខាន់អៃមៃមោហោមអោសគុតាន៝ម់នាវទើយនាវតីស ខាន់អៃមៃលែៈជេងទឹក*មាកោរាញឞ្រាស។ នាវខ្លៃអីលែៈជេងទឹកមាកោរាញឞ្រាស ខាន់អៃមៃជេងប៝នលានកោរាញឞ្រាសជេងក្ល៝សអ្វែស នាវអីនៃលែវត៝ត់តានាវរេសនហ៝រ៝។ 23 នាវជានតីសលែវត៝ត់តានាវខឹតគុតានទ្រូងអុញនហ៝រ៝។ ល៝ង់នទើកោរាញឞ្រាសអ៝ន់ទើមទាមមាឞ៝ន់ជេងនាវរេសនហ៝រ៝ តាៈឞើសនទើឞ្រាសក្រីសយេឆូ អីកោរាញឞ៝ន់លែៈជាននើស។*

*6:1 ៦:១៖ រម ៥:២០

*6:2 ៦:២៖ កោល ៣:៣

*6:3 ៦:៣៖ ២កោ ៥:១៤; កាល ២:១៩

*6:4 ៦:៤៖ រម ១:៣-៤; កោល ២:១២

*6:6 ៦:៦៖ កាល ៥:២៤

*6:8 ៦:៨៖ កាល ២:២០; ២តម ២:១១

*6:9 ៦:៩៖ ២តម ១:១០; ១តេ ៤:១៤

*6:10 ៦:១០៖ រម ៨:១-៣; ហេឞ ១០:១៤; ១ពេ ៣:១៨; ២កោ ៥:១៨-២១

*6:11 ៦:១១៖ កាល ២:១៩-២០

*6:13 ៦:១៣៖ រម ១២:១; ១ពេ ២:២៤

*6:14 ៦:១៤៖ រម ៥:២១; ៧:១-៦; កាល ៥:១៨; ១យហ ៣:៦

*6:15 ៦:១៥៖ រម ៦:១

*6:16 ៦:១៦៖ រម ៥:២១; មថ ៦:២៤

*6:17 ៦:១៧៖ រម ៨:៧-៩; ២កោ ៥:២១

*6:18 ៦:១៨៖ យហ ៨:៣២; ១ពេ ២:១៦

*6:22 ៦:២២៖ «ទឹក» មោលាស «ឞូនុយ្សឆើមកើលជានការមាកោរាញឞ្រាស»។

*6:23 ៦:២៣៖ រម ៥:២១; ១យហ ៥:១១-១២; នន ២:១៧; ៣:១៩