នាវកោរាញឞ្រាសងើយនាវតឹមរាង្លាប់មហែ ផីលីប 3

នាវគុងាវតឹមទីដាសនាវកោរាញឞ្រាសអុច

1 អើអ៝សនោតានាវញឆីង គែសទូនាវជឹត អ៝ន់ខាន់អៃមៃរាម់មអាកទោយ៝រមានទើកោរាញយេឆូ លែៈជានមាខាន់អៃមៃ។ គ៝ប់មោទឹលអោសញចីសទូតឹជឹតនាវអីគ៝ប់លែៈញចីសជេសអ៝ន់មាខាន់អៃមៃអាល៝រនើស។ គ៝ប់ញចីសកើតនអាគៃមាអ៝ន់ខាន់អៃមៃញឆីងន៝ប់។* 2 អ៝ន់ខាន់អៃមៃញជ្រាង់មាមពោលឞូនុយ្សអ្យើសអីតឹមឞានមាឆ៝អុចឆាហេក ញជ្រាង់មាមពោលឞូនុយ្សអីនតីងក្លាៈលាស៖ «គែសក៝សនតោមើទឹងកោរាញឞ្រាសរាក្លាយ្ស»។* 3 យើនមាឞ៝ន់ជេងឞូនុយ្សអីកោរាញឞ្រាសរ៝មងាន់ ជេងតឹមឞានមាឞូនុយ្សអីក៝សនតោងាន់ ឞ៝លលាសមោអោសគែសក៝សនតោតារាង្លៃឆាក់។ ឞ៝ន់ជេងឞូនុយ្សកោរាញឞ្រាសរ៝ម យ៝រលាសឞ៝ន់យើកមឞាសកោរាញឞ្រាសនអ៝ប់មាឞ្រាសហ្វេងអ្វែសគុតាឞ៝ន់។ ឞ៝ន់ញឆីងមាឞ្រាសក្រីសយេឆូ គៃមារាក្លាយ្ស ឞ៝ន់មោអោសញឆីងមានទើជានតារាង្លៃឆាក់ជានតឹងនាវវៃគៃមារាក្លាយ្ស។*

4 លាសជាននទើតឹងរាង្លៃឆាក់តឹងនាវវៃជេងគែសនាវខ្លៃ គ៝ប់គែសនទើអ៝ក់មាញឆីង។ លាសគែសទូហ្វេឞូនុយ្សទើយនហីអេងឆាក់យ៝រមានទើអីនៃ គ៝ប់ទើយរាលាវមាពាង់ងាន់រ៝៖* 5 យ៝រលាសឞូក៝សនតោគ៝ប់ជេសគ៝ប់ទែសលែៈគែសផាមនារ គ៝ប់ផូងអីឆ្រាអែល ទែសតារាន៝យមពោលបែនយាមឹន *។ គ៝ប់នអ៝ប់មាមេៈឞឹគ៝ប់ហោមងើយនាវងើយហេឞ្រើ ដ៝ង់។ លាសគឹតមាមពែសមានាវវៃផូងអីឆ្រាអែល គ៝ប់ជេងផូងផារីឆី អីឞូលឺហោងាន់ញអោតនាវវៃផូងអីឆ្រាអែល ។ 6 លាសងើយមានាវគើយ្សមានាវវៃផូងអីឆ្រាអែល គ៝ប់គើយ្សហោងាន់នហ៝មាត៝ត់ជានជេរជ៝ត់អ៝ន់មាផូងញឆីងមាឞ្រាសក្រីស ជឹត†។ លាសងើយមានាវឆ៝ង់យ៝រមាជានតឹងនាវវៃផូងអីឆ្រាអែល គ៝ប់មោអោសគែសនាវមានទុយ្ស។* 7 អាល៝រនើសគ៝ប់កើបទឹងលែៈនទើអីនៃគែសនាវខ្លៃងាន់ យើនមាអាបៃអ្យាគ៝ប់ខាតងាន់ទឹងលែៈនទើអីគ៝ប់លែៈជាននៃនើស យ៝រមាអាបៃអ្យាគ៝ប់ញឆីងមាឞ្រាសក្រីស ។* 8 រាលាវឞើសនៃជឹតគ៝ប់កើបទឹងលែៈនទើមោអោសហោមគែសនាវខ្លៃ យ៝រមាគឹតនាល់ឞ្រាសក្រីសយេឆូ អីកោរាញគ៝ប់គែសនាវខ្លៃទុតហោរាលាវឞូ។ យ៝រមាពាង់គ៝ប់មអារ់ទឹងលែៈនទើ គ៝ប់កើបទឹងលែៈនទើអីនៃតឹមឞានមានទ៝ក់ទើម គៃមាគ៝ប់គុនទ្រែលឞ្រាសក្រីស ‌ 9 គៃមាជេងប៝នលានពាង់នើម។ កោរាញឞ្រាសកើបគ៝ប់លែៈឆ៝ង់យ៝រមាគ៝ប់ញឆីងមាឞ្រាសក្រីស មោទីអោសយ៝រមានទើគ៝ប់នើមជានតឹងនាវវៃផូងអីឆ្រាអែល ។ នាវកោរាញឞ្រាសកើបឞ៝ន់ឆ៝ង់តាៈឞើសពាង់នើមអ៝ន់យ៝រមានាវឞ៝ន់ញឆីង។* 10 គ៝ប់អុចងាន់គឹតនាល់ឞ្រាសក្រីស គ៝ប់អុចគឹតឆៃនាវទើយអីអ៝ន់ពាង់ទ៝ក់រេសតៃនើស គ៝ប់អុចគុនទ្រែលពាង់តានាវជេរជ៝ត់ត៝ត់មាខឹតឆាក់តឹមឞានមាពាង់ដ៝ង់។* 11 គ៝ប់អុចងាន់ជានកើតនៃ គៃមាជេសគ៝ប់ខឹតគ៝ប់ទ៝ក់រេសដ៝ង់តានារកោរាញឞ្រាសអ៝ន់ទឹងលែៈឞូនុយ្សអីញឆីងមាឞ្រាសក្រីស ទ៝ក់រេសតៃ។

នាវនតឹតមាតឹមរាល៝ងញច្វាត់

12 គ៝ប់មោហ៝ៈឆ៝ៈទើន មោហ៝ៈជានជេសទឹងលែៈនាវអីនៃ។ គ៝ប់មោហ៝ៈជេងទូហ្វេឞូនុយ្សលែៈតឹមទីមាទឹងលែៈនាវអុចឞ្រាសក្រីសយេឆូ ។ យើនមាគ៝ប់អុចងាន់ជេងទូហ្វេឞូនុយ្សកើតនៃ យ៝រលាសឞ្រាសក្រីសយេឆូ រាក្លាយ្សគ៝ប់គៃមាជេងទូហ្វេឞូនុយ្សកើតនៃ។* 13 អើអ៝សនោតានាវញឆីង គ៝ប់មោហ៝ៈជេងទូហ្វេឞូនុយ្សកើតនៃ យើនមាគ៝ប់អុចជេងឞូនុយ្សកើតនៃ។ នទ្រីទឹងគ៝ប់មអារ់លើយមោហោមកើបខ្លៃមានទើអីអើមឞើសកើយនើស ជេសរីគ៝ប់ញឆ្រោយ្សជានការគៃមាឆ៝ៈទើននទើអីហោមជឹតនាប់តៃ។ 14 គ៝ប់ញឆ្រោយ្សជានការតឹមឞានមាឞូនុយ្សតឹមរាល៝ងញច្វាត់ញឆ្រោយ្សញច្វាត់ត៝ត់តានតុកលោចញច្វាត់ គៃមាឆ៝ៈទើននាវងខោមនទើកោរាញឞ្រាសអុចអ៝ន់មាគ៝ប់។ ពាង់ក្វាល់ឞ៝ន់គៃមាឞ៝ន់ឆ៝ៈទើននាវអីនៃតាកាលើត្រោក តាៈឞើសនទើឞ្រាសក្រីស លែៈជេសជាន។ 15 លាសនទ្រីទឹងលែៈឞ៝ន់អីលែៈគឹតមឹនជ្រូតានាវញឆីងមាឞ្រាសក្រីសយេឆូ អ៝ន់គែសនាវមឹនកើតនាវគ៝ប់ញចីសនៃ។ លាសខាន់អៃមៃគែសនាវមឹនអេងឞើសគ៝ប់តាព្លាង់ទូនតីលនាវ កោរាញឞ្រាសមរាញហើអ៝ន់ខាន់អៃមៃគឹតវ៝ត់មានទើអីនៃរ៝។ 16 អ្យាត់មាឞ៝ន់ហោមគុងាវតឹមទីមានទើកោរាញឞ្រាសលែៈញហើអ៝ន់ឞ៝ន់គឹតវ៝ត់ហ៝ៈ ឞ៝លលាសគែសនាវមឹនអេងកាដោយ។

17 អើអ៝សនោ អ៝ន់ទឹងលែៈខាន់អៃមៃជានតឹងនាវគុងាវគ៝ប់។ ជេសរីអ្វាញ់ឞូនុយ្សអីជានតឹងនាវអ្វែសគ៝ប់អីខាន់អៃមៃលែៈឆៃជេសតាគ៝ប់។* 18 គ៝ប់លែៈវៃមឞើសងក៝ចអ៝ន់មាខាន់អៃមៃបាបើងាន់ ជេសរីអាបៃអ្យាគ៝ប់មឞើសងក៝ចតៃអ៝ន់មាខាន់អៃមៃនអ៝ប់មាទាកមាត់៖ គែសអ៝ក់ឞូនុយ្សងើយមាមឞូងទើមខាន់ពាង់ញឆីងមាឞ្រាសក្រីស យើនមានាវគុរេសខាន់ពាង់ជេងតឹមឞានមាផូងរាលាង់ដាសនាវនតីឞ្រាសក្រីស នើមអីខឹតតាឆីតឹមរាកាង់នើសច្រាវ។* 19 ត៝ត់នារងគ្លែៈទុតតៃទឹងលែៈខាន់ពាង់អីនៃខឹតរ៝សហេង ខាន់ពាង់គឹតមានទើអីឆាក់ជាន់ខាន់ពាង់អុចទើម តឹមឞានមាយើកមឞាសមាឆាក់ខាន់ពាង់នើម ខាន់ពាង់ឆ៝ៈនទើអីដីតព្រេងមានហីអេងឆាក់ ជេសរីខាន់ពាង់ពើសមារាវៃមានទើតានែសនតូអ្យាទើម។* 20 ល៝ង់ទឹងលែៈឞ៝ន់ នតុកប៝នឞ៝ន់នើមងាន់ជេងនតុកប៝នអ្វែសតាកាលើរី ជេសរីឞ៝ន់ហោមគុក៝ប់អុចហោងាន់កោរាញយេឆូក្រីស អីនើមរាក្លាយ្សឞ៝ន់គើញជុរតាៈឞើសតាកាលើរីតៃ។* 21 ពាង់មរារាគ៝ល់លើយឆាក់ជាន់ឞ៝ន់អីឞ្លាវជីឞ្លាវខឹត អ៝ន់ជេងតឹមឞានមាឆាក់ជាន់ទុតអ្វែសពាង់នើមអីគែសនាវច្រេកលើប។ ពាង់ជាននទើអីនៃតាៈឞើសនាវទើយពាង់នើម នាវទើយអីនៃអ៝ន់ពាង់ជេងកោរាញទឹងលែៈនទើដ៝ង់។*

*3:1 ៣:១៖ ផល ២:១៨; ៤:៤

*3:2 ៣:២៖ កាល ៥:១២

*3:3 ៣:៣៖ រម ៣:២៨-២៩; កាល ៥:៦

*3:4 ៣:៤-៥៖ នង ១២:៣; ការ ២២:៣; ២៣:៦; រម ១១:១

*3:5 ៣:៥៖ មពោលបែនយាមឹន ជេងទូមពោលតា ១២ មពោលផូងអីឆ្រាអែល ដ៝ង់។

†3:6 ៣:៦៖ ផូងអីឆ្រាអែល អីមោញឆីងមាឞ្រាសក្រីស កើបនាវនតីមាឞ្រាសក្រីស ជេងនាវនតីងក្លាៈ ជេងនាវតឹមរាទ៝ង់មាកោរាញឞ្រាស។ កើតនទ្រីឞូនុយ្សអីគើយ្សងាន់មានាវវៃផូងអីឆ្រាអែល នអ៝ប់មាមោញឆីងមាឞ្រាសយេឆូ អីនៃ ខាន់ពាង់មឹនលាសខាន់ពាង់ជានតឹងនាវកោរាញឞ្រាសអុច ជានតឹងឆ៝ម់បុតនាវវៃរាខិច ១៣:១-៥‌ លាសជានជេរជ៝ត់ឞូនុយ្សអីញឆីងមាឞ្រាសក្រីស ។

*3:6 ៣:៦៖ ការ ៨:៣; កាល ១:១៤

*3:7 ៣:៧-៨៖ មថ ១៦:២៥-២៦

*3:9 ៣:៩៖ រម ៩:៣២; ១០:៣-៤; កាល ២:១៦; អេផ ២:៨-៩

*3:10 ៣:១០-១១៖ រម ៨:១៧; ២កោ ៤:១០-១១

*3:12 ៣:១២-១៤៖ ១កោ ៩:២៤-២៧; ១តម ៦:១២

*3:17 ៣:១៧៖ ១កោ ១១:១

*3:18 ៣:១៨៖ អេផ ៥:៦-៧

*3:19 ៣:១៩៖ រម ១៦:១៨

*3:20 ៣:២០៖ យហ ១៤:២-៣; អេផ ២:១៩; កោល ៣:២; ហេឞ ១២:២២-២៣; តត ២:១៣

*3:21 ៣:២១៖ ១កោ ១៥:៥១-៥៣