7
ឞ្រាសយេឆូ ជានឞាសជីអ៝ន់មាទឹកកោរាញតាហែនរោម
(មថ ៨:៥-១៣)
1 ជេសឞ្រាសយេឆូ ងើយនាវអីនៃអ៝ន់មាផូងប៝នលាន ជេសរីពាង់ហាន់លាប់តាប៝នកាពើនិម ឞ្រីកាលីលេ នទ្រែលមាមពោលអ៝សម៝នពាង់។ 2 តាប៝ននៃគែសទូហ្វេឞូនុយ្សជីហោងាន់ឞើយមាខឹត ឞូនុយ្សអីនៃជេងទឹកទូហ្វេកោរាញតាហែន* ៧:២៖ កោរាញតាហែនអីអ្យាពាង់គែសក៝នតាហែន ១០០ នុយ្ស។ រោម កោរាញរ៝ង់ងាន់មាពាង់។ 3 ត៝ត់កោរាញតាហែនអីនៃតាង់លឺឞូងក៝ចឞ្រាសយេឆូ ជេសរីពាង់ដាៈមពោលកោរាញអីឆ្រាអែល អាបាៈហាន់ជាៈឞ្រាសយេឆូ គៃមាហាន់ជានឞាសទឹកអីនៃ។ 4 ជេសរីមពោលកោរាញអីនៃហាន់ម៝ប់ឞ្រាសយេឆូ ត៝ត់តាឞ្រាសយេឆូ រីខាន់ពាង់ឞ៝ញពាង់ហាន់នទ្រែលខាន់ពាង់៖ “អើយកោរាញមៃយោៈមាកោរាញតាហែនរោម អីនៃទីមេៈ 5 យ៝រលាសពាង់រ៝ង់មាប៝នលានឞ៝ន់ ជេសរីពាង់ឆើមអ៝ន់ព្រាក់មាជានទូមល៝ម់ញីសរាបុនជឹតអ៝ន់ឞ៝ន់”។
6 ជេសរីឞ្រាសយេឆូ ហាន់នទ្រែលមពោលកោរាញអីនៃ។ ត៝ត់ឞើយត្រុយ្សអាជៃរី កោរាញតាហែនអីនៃដាៈមឹតជាង់ពាង់ហាន់ច្វាៈមឞើសឞ្រាសយេឆូ អាត្រ៝ងរី៖ “អើកោរាញ! មោខាច់អោសជាៈលែវមៃលាប់តាជៃគ៝ប់ យ៝រលាសគ៝ប់មោទីផូងអីឆ្រាអែល នទ្រីទឹងមោលាង់ទីលាសគ៝ប់ជាៈមៃលាប់តាជៃគ៝ប់។* ៧:៦៖ មក ១:៧; ១កោ ១៥:៩ 7 នទ្រីទឹងគ៝ប់នើមមោឞាញ់ហាន់ម៝ប់មៃដ៝ង់។ ទាន់មៃលាសទូត៝ងឞើសនៃ ទឹកគ៝ប់ឞាសជីរ៝។ 8 គ៝ប់គុតាន៝ម់ឞូ យើនលាសគែសក៝នតាហែនអ៝ក់គុតាន៝ម់គ៝ប់ដ៝ង់។ លាសគ៝ប់ដាៈទូហ្វេហាន់ ពាង់ហាន់រ៝ លាសដាៈឞូនុយ្សអាអេងវាច់ ពាង់វាច់រ៝។ លាសគ៝ប់ដាៈទឹកគ៝ប់ជានទូនតីលនទើ ពាង់ជានរ៝។ លាសនទ្រី គ៝ប់គឹតលាសមៃងើយគែសនាវទើយកើតនៃដ៝ង់”។
9 ត៝ត់ឞ្រាសយេឆូ តាង់នាវកោរាញតាហែនអីនៃ តានូយ្សនហ៝ម់ពាង់នទ្រ៝ត់ញហីសងាន់។ ជេសរីពាង់រាលែជឹតឞូនុយ្សអីឞ្រោៈនទ្រែលពាង់ ងក្រែមាលាស៖ “គ៝ប់មឞើសមាខាន់អៃមៃ ឞ៝លលាសតាផូងអីឆ្រាអែល អីកើបអេងឆាក់ខាន់ពាង់នើមលាសលែៈគឹតនាល់កោរាញឞ្រាស អេហ៝ៈគែសនាវញឆីងកើតពាង់អីនៃដ៝ង់”។ 10 ជេសរីមឹតជាង់អីកោរាញតាហែនដាៈហាន់នៃនើស ខាន់ពាង់ព្លឹឆឹតជឹតកើយ ត៝ត់អាជៃឆៃទឹកពាង់អីនៃលែៈឞាសជី។
ឞ្រាសយេឆូ ជានទ៝ក់រេសទូហ្វេក៝នឞូក្លោ
11 ជេសរីឞ្រាសយេឆូ ហាន់ជឹតតាទូប៝ន រាញាប៝នអីនៃនាអីន ។ គែសអ៝ក់ឞូនុយ្សហាន់នទ្រែលពាង់ មពោលអ៝សម៝នពាង់នើម នទ្រែលមាឞូនុយ្សអាបាៈអេងអ៝ក់ដ៝ង់។ 12 នោកខាន់ពាង់ឞើយមាត៝ត់តាមែងមពោងមពេរប៝នអីនៃ ឆៃគែសឞូនុយ្សឞ្រោៈនហ៝ចត៝ប់ខឹត។ ឞូនុយ្សអីខឹតនៃក៝នឞូក្លោ ទើនគែសទូហ្វេក៝នឞូក្លោអីនៃទើម អីមេៈរីនទ្រោខឹតឆាយជឹត។ ជេសរីគែសអ៝ក់ឞូនុយ្សតាប៝នអីនៃឞ្រោៈនទ្រែលពាង់។ 13 ត៝ត់ឞ្រាសយេឆូ ឆៃឞូអូរនទ្រោខឹតឆាយអីនៃ ពាង់យោៈនអាចហោងាន់។ ឞ្រាសយេឆូ លាសមាពាង់៖ “លើយហោមញុម”។ 14 ជេសរីឞ្រាសយេឆូ ហាន់ទាច់ពាស† ៧:១៤៖ តឹងមានាវវៃផូងអីឆ្រាអែល ឞូមោអុចអោសពាសឞូនុយ្សខឹត យ៝រលាសមោក្ល៝សតឹងនាវវៃខាន់ពាង់។តាម៝ង់រានូងនៃ មពោលអីតូងរីញឆ្រុងដ៝ង់ ពាង់លាសមាឞូនុយ្សអីខឹតនៃ៖ “ហើយអ៝ស គ៝ប់មឞើសមាមៃទ៝ក់ហ៝ម់!”
15 ជេសរីឞូនុយ្សខឹតអីនៃទ៝ក់ដើបគុតារីរ៝ ឞ្លាវមឞើសងើយប្ហ៝ៈ។ ជេសរីឞ្រាសយេឆូ ញជុនឞូក្លោនទាម់អីនៃអាមេៈពាង់នើម។* ៧:១៥៖ ១កក ១៧:២២-២៣; ២កក ៤:៣៦ 16 លែៈឞូនុយ្សអីគុតានៃក្លាចទាទេងាន់ ខាន់ពាង់រានេមាកោរាញឞ្រាស៖ “លែៈគែសឞូនុយ្សនតើយ្សនាវងើយកោរាញឞ្រាសទុតក្វ៝ង់លែៈវាច់គុនទ្រែលឞ៝ន់ ពាង់វាច់តឹមឞានមាកោរាញឞ្រាសវាច់កើលផូងប៝នលានពាង់នើម”។* ៧:១៦៖ លក ១:៦៨-៦៩ 17 ខាន់ពាង់មឞើសងក៝ចឞ្រាសយេឆូ នៃលាមឞ្រីយូដា នទ្រែលមាលាមឞ្រីច្យៅមែងដ៝ង់។
អ៝សម៝នយោហាន-បាប់តែម ហាន់ម៝ប់ឞ្រាសយេឆូ
(មថ ១១:២-១៩)
18 មពោលអ៝សម៝នយោហាន-បាប់តែម ឆៃទឹងលែៈនៃ ជេសរីហាន់មឞើសទឹងលែៈនាវអីនៃអ៝ន់យោហាន-បាប់តែម គឹត។ 19 ជេសរីយោហាន-បាប់តែម ដាៈឞារហៃមពោលអ៝សម៝នពាង់ហាន់ម៝ប់ឞ្រាសយេឆូ អោបពាង់កើតនអា៖ “នោកកាល់អែនើសកោរាញឞ្រាសលែៈត៝នមាឞូនុយ្សនតើយ្សនាវងើយកោរាញឞ្រាសលាស គែសឞ្រាសក្រីស អីនើមរាក្លាយ្សលែៈកោរាញឞ្រាសទែកើយ្សជុរវាច់តាៈឞើសកាលើត្រោកនតុកកោរាញឞ្រាសនើម។ មៃអ្យាឞ្រាសក្រីស អីនៃឞើស មោលាសអ៝ន់ហេនហោមក៝ប់ទូហ្វេអេងជឹត?”* ៧:១៩៖ លក ៣:១៦ 20 ជេសរីឞារហៃខាន់ពាង់អីនៃហាន់ត៝ត់តាឞ្រាសយេឆូ អោបពាង់៖ “ហើយកោរាញ ហេនអ្យាយោហាន-បាប់តែម ដាៈហាន់អោបមៃ គឹតមៃអ្យាងាន់ឞ្រាសក្រីស អីកោរាញឞ្រាសលែៈត៝នជុរវាច់ មោលាសអ៝ន់ហេនហោមក៝ប់ទូហ្វេអេងជឹត?” 21 នោកនៃអ៝ក់ឞូនុយ្សឞ្រាសយេឆូ លែៈជានអ៝ន់ឞាសជី ឞូនុយ្សគែសនាវជីអេងៗ ឞូនុយ្សឞ្រាសអ្យើសលើស ជេសរីអ៝ក់ឞូនុយ្សចែសមាត់ពាង់ជានអ៝ន់ឆៃអាងដ៝ង់។ 22 ឞ្រាសយេឆូ លាសមាមពោលអ៝សម៝នយោហាន-បាប់តែម អីនៃ៖ “ខាន់មៃមឞើសងក៝ចមាពាង់រី ទឹងលែៈនទើខាន់មៃលែៈតាង់ លែៈឆៃគ៝ប់ជាន។ ឞូនុយ្សចែសមាត់អ្វាញ់ឆៃ ឞូនុយ្សតឹកតោរអ្យាត់តាង់ ឞូនុយ្សក្វែតរាវែនឞ្លាវឞ្រោៈ ឞូនុយ្សផុងឆាឞាសក្ល៝ស ឞូនុយ្សខឹតទ៝ក់រេស ជេសរីឞូនុយ្សអ៝អាចតាង់នាវមហែមហានអ្វែស។* ៧:២២៖ អេឆា ២៩:១៨-១៩ 23 អ្វែសមអាកងាន់មាឞូនុយ្សមោមអារ់នាវពាង់ញឆីងមាគ៝ប់ យ៝រមានទើគ៝ប់ជានតីសដាសនាវមឹនពាង់អុច!”
24 នទុតខាន់ពាង់ព្លឹឆឹត ឞ្រាសយេឆូ នតើមងើយមាយោហាន-បាប់តែម អ៝ន់មាផូងប៝នលាន៖ “ម៝សឞូនុយ្សអ្វាញ់ខាន់អៃមៃហាន់តាឞ្រីរាទាស? ហាន់អ្វាញ់ឞូនុយ្សអីងើយទាសមាឞូនុយ្សអេងៗអុច តឹមឞានមាជាមពាត់រាងោញទាសឆ្យាលមាខោមឞើស? ពាង់មោទីអោស។ 25 ម៝សឞូនុយ្សខាន់អៃមៃហាន់អ្វាញ់? អ្វាញ់ឞូនុយ្សញឆ៝សឞ៝កអ្វែសអាវអ្វែសឞើស? មោអោស។ ឞូនុយ្សញឆ៝សឞ៝កអ្វែសអាវអ្វែស ឆោងឆាព្យាង់កាសត្រាវកាស មពោលនៃគុនតុកកាដាច់គុ មោអោសគុតាឞ្រីរាទាស។ 26 លាសនទ្រីឞូម៝សឞូនុយ្សខាន់អៃមៃហាន់អ្វាញ់? អ្វាញ់ឞូនុយ្សនតើយ្សនាវងើយកោរាញឞ្រាសឞើស? ទីងាន់។ យើនមាពាង់អីនៃរាលាវមាឞូនុយ្សនតើយ្សនាវងើយកោរាញឞ្រាសជឹត* ៧:២៦៖ លក ១:៧៦ 27 យ៝រលាសតានាវកោរាញឞ្រាសងើយលែៈគែសញចីសលាសមាពាង់៖
«ល៝ង់គ៝ប់ញជ្វាល់ឞូនុយ្សហាន់ល៝រមៃ
គៃមានទ្រាប់នូយ្សនហ៝ម់ឞូនុយ្សតឹមឞានមាក្វាយ្សត្រ៝ងអ៝ន់មាមៃ»† ៧:២៧៖ មាល ៣:១។
យោហាន-បាប់តែម អីនៃអីឞូនុយ្សហាន់ល៝រតានាវអីនៃ។ 28 ខាន់អៃមៃអ្យាត់នាវគ៝ប់ ទឹងលែៈឞូនុយ្សអីទែសតាៈឞើសឞូអូរតានែសនតូអ្យា មោគែសអោសទូហ្វេក្វ៝ង់រាលាវយោហាន-បាប់តែម យើនលាសតាមពោលឞូនុយ្សអីកោរាញឞ្រាសម៝ត់អ្វាញ់ ឞូនុយ្សអីជេៈតាន៝ម់ឞូ ឞូនុយ្សអីនៃជេងក្វ៝ង់រាលាវពាង់ងាន់”។
29 ផូងប៝នលាន នទ្រែលមាឞូនុយ្សឆ៝ៈព្រាក់ប៝នលានគៃមាអ៝ន់កោរាញម៝ត់អ្វាញ់ ជេសខាន់ពាង់អ្យាត់នាវយោហាន-បាប់តែម ជេសរីខាន់ពាង់អ៝ន់ពាង់បាប់តែមខាន់ពាង់យុកមាទាក នទ្រីខាន់ពាង់ញហើខាន់ពាង់គឹតកោរាញឞ្រាសជេងទីងាន់។* ៧:២៩-៣០៖ មថ ២១:៣២ 30 តីសមាផូងផារីឆី នទ្រែលមាផូងនើមនតីនាវវៃផូងអីឆ្រាអែល ខាន់ពាង់មោអោសអ៝ន់ពាង់បាប់តែមយុកខាន់ពាង់មាទាក នទ្រីខាន់ពាង់ទូនលើយលែៈនាវកោរាញឞ្រាសអុចអ៝ន់មាខាន់ពាង់។
31 ជេសរីឞ្រាសយេឆូ លាស៖ “លាសនទ្រីមើមគ៝ប់តឹមរាដឹលមាឞូនុយ្សអាបៃអ្យា? ពាង់មើមជេង? 32 ពាង់ជេងតឹមឞានមាក៝នឆែគុព៝ល់តាជ៝ង់គូងប៝ន‡ ៧:៣២៖ តានាវងើយគ្រែក លាស៖ «នតុកតាច់ទ្រាប់»។ គែសអាបាៈតឹមនតែរនទ្រាង់ពាង់៖
«ហេនលែៈអោសនហោមគ៝សគ៝រ់ តីសមាខាន់អៃមៃមោព៝ល់រាម់មអាក
ជេសរីហេនលែៈនអ៝រនត៝ង់ទ៝ង់ខឹត តីសមាខាន់អៃមៃមោអុចញុមព៝ល់ដ៝ង់»។
33 លាសនទ្រីយោហាន-បាប់តែម នទ្រែលមាគ៝ប់ជេងតឹមឞានមាផូងក៝នឆែអីនៃ យោហាន-បាប់តែម អ៝ត់ឆោង មោអោសញេតនទ្រាញ់ តីសមាខាន់អៃមៃលាសពាង់ឞូនុយ្សឞ្រាសអ្យើសលាប់”។* ៧:៣៣៖ លក ១:១៥
34 “ល៝ង់គ៝ប់អ្យាអីក៝នឞូនុយ្សតាៈឞើសកោរាញឞ្រាសគែសញេតគែសឆោង មោអ៝ត់ឆោងឆា ខាន់អៃមៃលាសគ៝ប់៖ «ឞូនុយ្សហៃញេតហៃឆោង ជានមឹតជាង់នទ្រែលឞូនុយ្សឆ៝ៈព្រាក់ប៝នលាន ជេសរីគុនទ្រែលឞូនុយ្សតីសអាអេងជឹត»។* ៧:៣៤៖ លក ៥:២៩-៣០ 35 យើនលាសឞូនុយ្សអីតឹងនាវកោរាញឞ្រាស ញហើនាវកោរាញឞ្រាសអីនៃជេងទីអ្វែសងាន់តានាវរេសពាង់”។
ឞ្រាសយេឆូ យោៈមាឞូអូរវាង់តឹរ
36 គែសទូនារគែសទូហ្វេឞូនុយ្សតាផូងផារីឆី រាញាពាង់ឆីមោន ជាៈឞ្រាសយេឆូ ហាន់ឆោងឆាតាជៃពាង់នើម ជេសរីឞ្រាសយេឆូ ហាន់គុឆោងឆានទ្រែលតាជៃពាង់នៃ។ នោកនៃតឹងមានាវវៃផូងនទ្រ៝ង់ខាន់ពាង់ឆោងឆាគុឞិចងកេងជឹតច្យៅ អីជ៝ង់រ៝កជឹតកើយ។* ៧:៣៦៖ លក ១១:៣៧; ១៤:១ 37 តាប៝ននៃដ៝ង់គែសទូហ្វេឞូអូរវាង់តឹរ។ ត៝ត់ពាង់តាង់គែសឞ្រាសយេឆូ គុឆោងឆាតាជៃផារីឆី អីនៃ ពាង់ឆ៝ៈដ៝បជេៈឞូជានមាលុ តាដ៝បរីគែសទាកងីបោកាសខ្លៃដ៝ង់។ 38 ជេសរីពាង់ហាន់តាជៃឆីមោន គុឞើសកើយឞ្រាសយេឆូ រី ពាង់ញុមហ៝រទាកមាត់តាជ៝ង់ឞ្រាសយេឆូ យ៝រមាពាង់រាង៝តមានាវតីសពាង់នើម ជេសរីឆ៝ៈឆ៝ក់ពាង់នើមរីជូតជ៝ង់ឞ្រាសយេឆូ ជេសរីចុមតាជ៝ង់រី ជេសចុមរីពាង់ឆ៝ៈទាកងីបោកាសត៝ៈតាជ៝ង់ឞ្រាសយេឆូ រីជឹត។ 39 ឞូនុយ្សអីតើមជាៈឞ្រាសយេឆូ ឆោងរីនើស ពាង់ឆៃកើតនៃ ជេសរីមឹនអេងតាឆាក់រី៖ “លាសពាង់ជេងឞូនុយ្សនតើយ្សនាវងើយកោរាញឞ្រាសងាន់ ពាង់គឹតរ៝ឞូអូរអីពាសពាង់នៃជេងឞូអូរតីស”។§ ៧:៣៩៖ តឹងនាវវៃផូងអីឆ្រាអែល នាវតីសជានទូហ្វេឞូនុយ្សមោហោមអោសក្ល៝ស លាសទូហ្វេឞូនុយ្សក្ល៝សពាសមាឞូនុយ្សអីមោក្ល៝សពាង់តឺបមោក្ល៝សដ៝ង់ ជេសរីលាសគៃមាក្ល៝សជឹតអ្យាត់មាជាននទើអ៝ក់តឹងនាវវៃអីនៃ។ កើតនទ្រីផូងផារីឆី ទែរងាន់មានទើអីមោក្ល៝ស។* ៧:៣៩៖ យហ ៤:១៧-១៩ 40 ជេសរីឞ្រាសយេឆូ លាសមាឆីមោន ៖ “ហើយនោ គ៝ប់អុចងក៝ចឞ្រីមាមៃ”។ ពាង់អើស៖ “អើមោច្រាវកោរាញ នែសមៃងក៝ចហ៝ម់”។
41 ឞ្រាសយេឆូ លាសទូនាវងើយនតឹត៖ “គែសឞារហៃឞូនុយ្សមាញព្រាក់ឞូ ទូហ្វេមាញ ៥០០ ព្រាក់កាក់* ៧:៤១៖ «៥០០ ព្រាក់កាក់» មោលាស «៥០០ ដេនារី »។ ទូកាក់ដេនារី តឹមឞានមាខ្លៃឞូងខោមជានការទូនារ។ ទូហ្វេមាញ ៥០ ព្រាក់កាក់។ 42 យ៝រមាឞារហៃខាន់ពាង់អីនៃមោគែសព្រាក់ត៝ម់ នទ្រីទឹងឞូនុយ្សអីតើមអ៝ន់មាញព្រាក់នៃមោហោមដាៈត៝ម់។ លាសនទ្រីលែៈឞារហៃអីនៃ ឞូម៝សរ៝ង់ហោរាលាវមាតើមអ៝ន់មាញព្រាក់នៃ?” 43 ពាង់អើស៖ “គ៝ប់គឹតលាសឞូនុយ្សអីមាញអ៝ក់”។ ឞ្រាសយេឆូ លាស៖ “ទីងាន់”។ 44 ជេសរីឞ្រាសយេឆូ អ្វាញ់ជឹតឞូអូរអីនៃ លាសមាឆីមោន ៖ “មៃឆៃឞូអូរអ្យាជានបាស? គ៝ប់លាប់តាជៃមៃ តឹងមានាវវៃឞ៝ន់ទីមាមៃឆ៝ៈទាកគ៝ប់ឞែមារាវជ៝ង់ តីសមាមៃមោអោសឆ៝ៈ ល៝ង់ពាង់ ពាង់ញុមហ៝រទាកមាត់តាជ៝ង់គ៝ប់ឞែៈលែៈផ្យៅ ជេសរីឆ៝ៈឆ៝ក់ពាង់នើមជូតជឹត។* ៧:៤៤៖ នន ១៨:៣-៥ 45 តឹងមានាវវៃឞ៝ន់មៃចុមតាតឹមឞ៝មគ៝ប់ តីសមាមៃមោអោសចុម ល៝ង់ពាង់ ចុមជ៝ង់គ៝ប់មោរាលូ នតើមឞើសគ៝ប់ត្រុយ្សតាអ្យានើសងាន់។ 46 តឹងមានាវវៃឞ៝ន់ទីមាមៃត៝ៈទាកងី† ៧:៤៦៖ ទាកងីអ្យាតឹងមានាវវៃតាឞ្រីអីឆ្រាអែល នោកនៃជេងងី តឹមឞានមាងីមាជានត្រាវ នោកមអាកឞូនុយ្សអីគែសព្រាក់ទ៝ង់ងីបោកាស។តាឞោកគ៝ប់ តីសមាមៃមោអោសត៝ៈ ល៝ង់ពាង់ ត៝ៈទាកងីបោកាសជូតតាជ៝ង់គ៝ប់។ 47 កើតនទ្រីគ៝ប់មឞើសមាមៃ ឞូអូរអ្យាអ៝ក់ងាន់នាវតីសពាង់ គ៝ប់លែៈយោៈនអាចជេសទឹងលែៈនាវតីសពាង់ មោហោមអោសកើបនាវតីសពាង់ នទ្រីទឹងពាង់គែសនាវរ៝ង់ហោងាន់។ តីសមាឞូម៝សអីគែសយោៈនអាចដេៈ នាវរ៝ង់ពាង់គែសដេៈដ៝ង់”។ 48 ជេសរីឞ្រាសយេឆូ លាសជឹតឞូអូររី៖ “នាវតីសអៃលែៈគ៝ប់យោៈជេស គ៝ប់មោហោមអោសកើបនាវតីស”។* ៧:៤៨-៤៩៖ លក ៥:២០-២១ 49 លែៈឞូនុយ្សអីគុនទ្រែលតានៃមឹនអេងតាឆាក់រី៖ “ឞូម៝សពាង់អីនៃហ្យាស ទឹងឞាញ់លាសយោៈនអាចនាវតីសដ៝ង់? គែសកោរាញឞ្រាសទើមទើយយោៈនាវតីស”។ 50 ជេសរីឞ្រាសយេឆូ លាសមាឞូអូរអីនៃ៖ “ហើយអ៝ស យ៝រនាវអៃញឆីងមាគ៝ប់ អៃលែៈក្លាយ្សជេសឞើសនាវកោរាញឞ្រាសតេៈទោយ្ស ឆឹតអ៝ន់អ្វែសលាង់ដាប់មពាន់”។* ៧:៥០៖ មក ៥:៣៤
*7:2 ៧:២៖ កោរាញតាហែនអីអ្យាពាង់គែសក៝នតាហែន ១០០ នុយ្ស។
*7:6 ៧:៦៖ មក ១:៧; ១កោ ១៥:៩
†7:14 ៧:១៤៖ តឹងមានាវវៃផូងអីឆ្រាអែល ឞូមោអុចអោសពាសឞូនុយ្សខឹត យ៝រលាសមោក្ល៝សតឹងនាវវៃខាន់ពាង់។
*7:15 ៧:១៥៖ ១កក ១៧:២២-២៣; ២កក ៤:៣៦
*7:16 ៧:១៦៖ លក ១:៦៨-៦៩
*7:19 ៧:១៩៖ លក ៣:១៦
*7:22 ៧:២២៖ អេឆា ២៩:១៨-១៩
*7:26 ៧:២៦៖ លក ១:៧៦
†7:27 ៧:២៧៖ មាល ៣:១
*7:29 ៧:២៩-៣០៖ មថ ២១:៣២
‡7:32 ៧:៣២៖ តានាវងើយគ្រែក លាស៖ «នតុកតាច់ទ្រាប់»។
*7:33 ៧:៣៣៖ លក ១:១៥
*7:34 ៧:៣៤៖ លក ៥:២៩-៣០
*7:36 ៧:៣៦៖ លក ១១:៣៧; ១៤:១
§7:39 ៧:៣៩៖ តឹងនាវវៃផូងអីឆ្រាអែល នាវតីសជានទូហ្វេឞូនុយ្សមោហោមអោសក្ល៝ស លាសទូហ្វេឞូនុយ្សក្ល៝សពាសមាឞូនុយ្សអីមោក្ល៝សពាង់តឺបមោក្ល៝សដ៝ង់ ជេសរីលាសគៃមាក្ល៝សជឹតអ្យាត់មាជាននទើអ៝ក់តឹងនាវវៃអីនៃ។ កើតនទ្រីផូងផារីឆី ទែរងាន់មានទើអីមោក្ល៝ស។
*7:39 ៧:៣៩៖ យហ ៤:១៧-១៩
*7:41 ៧:៤១៖ «៥០០ ព្រាក់កាក់» មោលាស «៥០០ ដេនារី »។ ទូកាក់ដេនារី តឹមឞានមាខ្លៃឞូងខោមជានការទូនារ។
*7:44 ៧:៤៤៖ នន ១៨:៣-៥
†7:46 ៧:៤៦៖ ទាកងីអ្យាតឹងមានាវវៃតាឞ្រីអីឆ្រាអែល នោកនៃជេងងី តឹមឞានមាងីមាជានត្រាវ នោកមអាកឞូនុយ្សអីគែសព្រាក់ទ៝ង់ងីបោកាស។
*7:48 ៧:៤៨-៤៩៖ លក ៥:២០-២១
*7:50 ៧:៥០៖ មក ៥:៣៤