នាវកោរាញឞ្រាសងើយនាវតឹមរាង្លាប់មហែ យោហាន 20

ឞ្រាសយេឆូ ទ៝ក់រេស

(មថ ២៨:១-៨; មក ១៦:១-៨; លក ២៤:១-១២)

1 អើមអោយនារត៝ល់ង្វាយពើសនៃ*ឞ្រីហោមង៝ មារី តាៈឞើសប៝នមាដាលា ហាន់អាមោច។ ត៝ត់តានៃពាង់ឆៃលុឞូរាទ៝ល់នតូមោចលែៈរាលាៈលើយ។ 2 ជេសរីពាង់ព្លឹញច្វាត់មឞើសមាឆីមោន អីឞូក្វាល់ពេត្រោស ដ៝ង់ នទ្រែលមាទូហ្វេអ៝សម៝នអេងអីឞ្រាសយេឆូ ទែរ៝ង់នៃនើស មារី លាស៖ “ឆាក់កោរាញឞ៝ន់លែៈឞូឆ៝ៈ មោហោមឆៃអោស ហេនមោគឹតអោសអាសនតុកអ៝ន់ឞ្រែ!”* 3 ជេសរីពេត្រោស នទ្រែលមាទូហ្វេអ៝សម៝នអេងនៃ ហាន់អាមោច។ 4 ឞារហៃខាន់ពាង់នៃហាន់ញច្វាត់នទ្រែល យើនមាទូហ្វេអ៝សម៝នអេងនៃញច្វាត់ត៝ត់ល៝រតាមោច។ 5 ពាង់កុញអ្វាញ់ឆៃទើមឞ៝កងលាងឞូពូតឞ្រាសយេឆូ យើនមាពាង់អេហ៝ៈអោសលាប់តាត្រោមមោច។ 6 ឆីមោន អីឞូក្វាល់ពេត្រោស ដ៝ង់ហាន់ត៝ត់ឞើសកើយ ពាង់លាប់តាត្រោមមោចឆៃឞ៝កងលាងឞូពូតឞ្រាសយេឆូ តានៃដ៝ង់។ 7 ជេសរីឞ៝កឞូងកុមឞោកឞ្រាសយេឆូ នៃ មោគែសអោសអ៝ន់នទ្រែលឞ៝កពូតឆាក់ពាង់ លែៈឞូក្លោនអ៝ន់អេង។ 8 ជេសរីអ៝សម៝នអីត៝ត់ល៝រតាមោចនៃ ពាង់លាប់ដ៝ង់ ពាង់ឆៃ ជេសរីពាង់អ្យាត់លាសឞ្រាសយេឆូ លែៈទ៝ក់រេសងាន់។ 9 នោកនៃឞារហៃខាន់ពាង់អីនៃអេវ៝ត់អោសនាវកោរាញឞ្រាសងើយញចីសលាស អ្យាត់មាឞ្រាសយេឆូ ទ៝ក់រេសជេសពាង់ខឹត។* 10 ជេសរីខាន់ពាង់ព្លឹឆឹតតាជៃខាន់ពាង់គុនើស។

មារី តាៈឞើសប៝នមាដាលា ឆៃឞ្រាសយេឆូ

(មថ ២៨:៩-១០; មក ១៦:៩-១១)

11 យើនមាមារី ហោមគុញុមឞើសទីសនតូមោច ពាង់ហោមញុមកុញអ្វាញ់ជឹតត្រោមនតូឆូ‌ 12 ឆៃតោងពារ់ឞារហៃញឆ៝សឞ៝កអាវងលាង គុរើបគើបតាព្លាង់នតុកឞូញជ៝រឞ្រាសយេឆូ នើស ទូហ្វេឞើសឞោក ទូហ្វេឞើសជ៝ង់។ 13 តោងពារ់អីនៃអោបពាង់៖ “អើយោស! ម៝សលើសញុមអៃនៃ?” ពាង់អើស៖ “យ៝រលាសឆាក់កោរាញគ៝ប់លែៈឞូឆ៝ៈ គ៝ប់មោគឹតអោសអាសនតុកអ៝ន់ឞ្រែ”។ 14 ជេសពាង់ងើយកើតនៃ ពាង់ងគឹលជឹតកើយឆៃឞ្រាសយេឆូ ទ៝ក់តានៃ យើនមាពាង់មោអោសគឹតនាល់លាសឞ្រាសយេឆូ ។* 15 ឞ្រាសយេឆូ អោបពាង់៖ “អើយោស ម៝សលើសញុមអៃនៃ? ឞូម៝សជ៝យអៃនៃ?” មារី នអោនលាសឞូនុយ្សម៝ត់មីរ ជេសរីពាង់អោប៖ “អើនោ លាសលែៈមៃឆ៝ៈឆាក់ឞូនុយ្សតាអ្យា ទាន់មៃមឞើសមាគ៝ប់ អាសនតុកមៃអ៝ន់ គ៝ប់ឞែមាហាន់ឆ៝ៈ”។ 16 ឞ្រាសយេឆូ លាសមាពាង់៖ “មារី !” មារី ងគឹលជឹតឞ្រាសយេឆូ ជេសរីងើយមាពាង់មានាវងើយហេឞ្រើ ៖ “រាបូនី!” គែសនាវខ្លៃលាស៖ «នើមនតី!» 17 ឞ្រាសយេឆូ លាសមាពាង់៖ “លើយក្វាន់ក៝ន់គ៝ប់ យ៝រលាសគ៝ប់អេហ៝ៈអោសឆឹតអាឞឹគ៝ប់។ ទាន់អៃហាន់មឞើសងក៝ចមាផូងអ៝សនោគ៝ប់៖ «គ៝ប់ឆឹតអាឞឹគ៝ប់ ជេងឞឹខាន់មៃដ៝ង់ គ៝ប់ឆឹតអាពាង់អីកោរាញឞ្រាស ជេងឞ្រាសអីខាន់មៃយើកមឞាសដ៝ង់»”។* 18 ជេសរីមារី តាៈឞើសប៝នមាដាលា ហាន់ ពាង់មឞើសងក៝ចមាមពោលអ៝សម៝ន៖ “គ៝ប់លែៈឆៃកោរាញឞ៝ន់” នទ្រែលមាមឞើសងក៝ចមាខាន់ពាង់នាវឞ្រាសយេឆូ ដាៈពាង់នតើយ្សនៃ។

ឞ្រាសយេឆូ ញហើឆាក់អ៝ន់មាមពោលអ៝សម៝នពាង់ឆៃ

(មថ ២៨:១៦-២០; មក ១៦:១៤-១៨; លក ២៤:៣៦-៤៩)

19 តានារត៝ល់ង្វាយពើសអីនៃដ៝ង់ នារលែៈញ៝ប់ មពោលអ៝សម៝នគុរាបុនតាត្រោមជៃ ខាន់ពាង់នតឹលមពោងទុតន៝ប់ យ៝រលាសក្លាចមពោលកោរាញផូងអីឆ្រាអែល ។ ជេសរីទោមាឞ្រាសយេឆូ ហាន់ទ៝ក់តាងក្លាងងគូលខាន់ពាង់នៃ លាសមាខាន់ពាង់៖ “អ៝ន់នាវដាប់មពាន់មាខាន់មៃ!”** 20 ជេសឞ្រាសយេឆូ លាសកើតនៃ ពាង់ញហើដ៝ង់តីពាង់នើម នទ្រែលមាពុងទាកពាង់អ៝ន់មាមពោលអ៝សម៝នឆៃ។ មពោលអ៝សម៝នឆៃកោរាញយេឆូ ខាន់ពាង់រាម់រាហើនហោងាន់។ 21 ឞ្រាសយេឆូ លាសតៃមាខាន់ពាង់៖ “អ៝ន់នាវដាប់មពាន់មាខាន់មៃ! គ៝ប់ដាៈខាន់មៃហាន់តានតុកអេងៗ កើតមាឞឹលែៈដាៈគ៝ប់ហាន់អ្យាដ៝ង់”។* 22 ជេសពាង់ងើយកើតនៃ ពាង់ខោមជឹតខាន់ពាង់ នហ៝មាលាស៖ “ឆ៝ៈហ៝ម់ឞ្រាសហ្វេងអ្វែសអីក្ល៝សអ្វែស!* 23 លាសខាន់មៃយោៈមាឞូមោហោមកើបនាវតីសខាន់ពាង់ កោរាញឞ្រាសយោៈមាខាន់ពាង់ដ៝ង់។ យើនមាលាសខាន់មៃមោយោៈហោមកើបនាវតីសឞូ នាវតីសខាន់ពាង់ហោមអែកើតអើម”។*

ឞ្រាសយេឆូ ញហើមាថោមាស

24 នោកឞ្រាសយេឆូ ញហើឆាក់មាមពោលអ៝សម៝ន ថោមាស ឞូក្វាល់ដីដីម ដ៝ង់មោគែសអោសគុតានៃ ពាង់ជេងអ៝សម៝នតាមពោល ១២ នុយ្សកោរាញអ៝សម៝ននៃដ៝ង់។ 25 មពោលអ៝សម៝នអាបាៈមឞើសងក៝ចមាពាង់៖ “ហេនលែៈឆៃកោរាញឞ៝ន់”។ យើនមាថោមាស អើស៖ “លាសគ៝ប់អេហ៝ៈឆៃតេលនតុកឞូព៝ង់ដែកគោលតាតីពាង់ លាសគ៝ប់អេហ៝ៈល៝ក់អោសមាលាវតីតានតុកឞូព៝ង់តីពាង់នៃ នទ្រែលមាលាសគ៝ប់អេហ៝ៈពាសអោសតាតេលនតុកឞូនត៝ប់ពាង់តាពុងទាកពាង់នៃ គ៝ប់មោអ្យាត់អោស”។* 26 ផាមនារឞើសកើយនៃ មពោលអ៝សម៝នគុរាបុនតៃតាត្រោមជៃ នោកនៃគែសថោមាស គុនទ្រែលតានៃដ៝ង់។ ឞ៝លលាសខាន់ពាង់នតឹលមពោងទុតន៝ប់ ឞ្រាសយេឆូ ហោមលាប់ទ៝ក់តាងគូលខាន់ពាង់ លាសមាខាន់ពាង់៖ “អ៝ន់នាវដាប់មពាន់មាខាន់មៃ!” 27 ជេសរីឞ្រាសយេឆូ លាសមាថោមាស ៖ “ល៝ង់មៃអ្វាញ់តីគ៝ប់ ល៝ក់លាវតីមៃនៃតាតីគ៝ប់អ្យាហ៝ម់ ជេសរីពាសតីមៃនៃតាពុងទាកគ៝ប់អ្យាដ៝ង់។ អ្យាត់ហ៝ម់! លើយហោមរាលាច់អោស!”* 28 ថោមាស លាស៖ “អើ មៃកោរាញគ៝ប់ មៃឞ្រាសគ៝ប់ងាន់!” 29 ឞ្រាសយេឆូ លាសមាពាង់៖ “អើថោមាស ! ទឹងមៃញឆីងមាគ៝ប់ យ៝រលាសមៃលែៈឆៃគ៝ប់ យើនមាគែសនាវអ្វែសងាន់មាឞូម៝សញឆីងមោអោសឆៃ”។*

នាវនត្រ៝ង់យោហាន ញចីសតាឆ៝ម់បុតអ្យា

30 ឞ្រាសយេឆូ ជាននាវខ្លៃអ៝ក់ជឹតអ៝ន់មាមពោលអ៝សម៝នពាង់ឆៃ យើនមាមោគែសអោសញចីសតាឆ៝ម់បុតអ្យា។* 31 នទើអីគែសញចីសតាឆ៝ម់បុតអ្យាគៃមាអុចអ៝ន់ខាន់អៃមៃរ៝ៈ នហ៝មាអ្យាត់ឞ្រាសយេឆូ ជេងឞ្រាសក្រីស អីក៝នកោរាញឞ្រាសងាន់ ជេសរីអុចអ៝ន់ខាន់អៃមៃញឆីង គៃមាខាន់អៃមៃគែសនាវរេសនហ៝រ៝យ៝រមាពាង់។*

*20:1 ២០:១៖ នារត៝ល់ង្វាយផូងអីឆ្រាអែល ជេងនារពើសឞ៝ន់អាបៃរី។

*20:2 ២០:២៖ យហ ១៣:២៣

*20:9 ២០:៩៖ យហ ២:២២; លក ២៤:២៥-២៧, ៤៤-៤៦; ១កោ ១៥:៤

*20:14 ២០:១៤៖ យហ ២១:៤; លក ២៤:១៥-១៦

*20:17 ២០:១៧៖ មថ ១២:៥០; ហេឞ ២:១១-១២

*20:19 ២០:១៩-២០៖ យហ ១៦:២២

*20:19 ២០:១៩៖ យហ ៩:២២

*20:21 ២០:២១៖ យហ ១៧:១៨

*20:22 ២០:២២៖ យហ ៧:៣៩; ការ ២:១-៤

*20:23 ២០:២៣៖ មថ ១៨:១៨

*20:25 ២០:២៥៖ យហ ១៩:៣៤

*20:27 ២០:២៧៖ លក ២៤:៣៩

*20:29 ២០:២៩៖ ហេឞ ១១:១

*20:30 ២០:៣០៖ យហ ២១:២៥

*20:31 ២០:៣១៖ យហ ១:៣៤; ៣:១៦