នាវកោរាញឞ្រាសងើយនាវតឹមរាង្លាប់មហែ កោរាញអ៝សម៝ន 22

1 “ហើយផូងអ៝សនោកោញវា នទ្រែលមាមពោលឞូរាញ គ៝ប់ទាន់ព្លើងអើសមាខាន់អៃមៃ ទាន់ខាន់អៃមៃអ្យាត់នាវគ៝ប់ងើយអ្យាប៝ត់!” 2 ទោលខាន់ពាង់តាង់ពោល ងើយមានាវងើយហេឞ្រើ កើតនៃ ឞូលើមាអ្យាត់ឆាក់រាក់ក្លាក់ងាន់ ជេសរីពាង់លាសមាខាន់ពាង់៖ 3 “គ៝ប់ជេងផូងអីឆ្រាអែល ទែសតាប៝នតាឆើស ឞ្រីកីលីកៀ ។ យើនមាគ៝ប់គុរេសតាប៝នអ្យានតើមឞើសជេៈងាន់ នហ៝មាលាប់នតីតឹងនាវវៃផូងអូចែឞ៝ន់កាល់អែនើសលែៈទុតនាវដ៝ង់។ គ៝ប់នតីតាៈឞើសនើមនតីកាមាលៀល អីឞូលឺហោងាន់។ គ៝ប់នអើរតឹងកោរាញឞ្រាសកើតខាន់អៃមៃនារអ្យានៃដ៝ង់។** 4 អាល៝រនើសគ៝ប់លែៈជានជេរមាឞូនុយ្សអីញឆីងមាកោរាញយេឆូ *ត៝ត់មាងខឹតឞូ។ គ៝ប់ញុបក៝ត់ឞូក្រុងតាត្រោមនទ្រូង នអ៝ប់មាឞូអូរឞូក្លោ។ 5 កោរាញជានឞ្រាសទុតក្វ៝ង់ នទ្រែលមាផូងកោរាញជានការផូងអីឆ្រាអែល លែៈគឹតជេសគ៝ប់ងើយទីងាន់មានទើអីនៃ។ ខាន់ពាង់អ៝ន់ឆ៝ម់បុតមាគ៝ប់ ញជ្វាល់អ៝ន់មាផូងអ៝សនោផូងអីឆ្រាអែល អីគុតាប៝នដាមាស អ៝ន់គ៝ប់គែសនាវទើយគៃមាញុបក៝ត់ផូងអីញឆីងមាកោរាញយេឆូ លែវតេៈទោយ្សខាន់ពាង់តាប៝នយេរូឆាលឹម អ្យា ជេសរីគ៝ប់ហាន់តាប៝ននៃ”។

6 “ទោលគ៝ប់ហាន់រ៝ៈត្រ៝ងឞើយត៝ត់តាប៝នដាមាស នៃ ក្លាប់លាសនារងក្លាងឞោក ទោមាគែសអាងតាៈឞើសកាលើត្រោកតីច្រាតអាងជុមគ៝ប់ងាន់។ 7 គ៝ប់នហ៝មាចោតអានែសឆូ ជេសរីតាង់នតែសងើយតាៈឞើសកាលើត្រោកតីលាសមាគ៝ប់៖ «ហើយឆោល ! ហើយឆោល ! ម៝សនាវមៃជានជេរមាគ៝ប់មេស?» 8 គ៝ប់អោបពាង់ឞើសអ្យា៖ «ហើយកោរាញ ឞូម៝សមៃរី?» ពាង់អើសតៃឞើសតី៖ «គ៝ប់អ្យាយេឆូ តាៈឞើសប៝ននាឆារែត អីមៃជានជេរនៃនើសហែស»។ 9 លែៈផូងអីឞ្រោៈនទ្រែលគ៝ប់ ខាន់ពាង់ឆៃទាទេនទើអាងនៃ តីសមាមោអោសតាង់ងើយ។ 10 គ៝ប់អោបតៃពាង់៖ «លាសនទ្រីមើមគ៝ប់ជាន កោរាញមេស?» ពាង់អើសឞើសតី៖ «មៃទ៝ក់ហ៝ម់ ហាន់តាប៝នដាមាស តាប៝ននៃគែសឞូមរាមឞើសលែៈនទើកោរាញឞ្រាសទែដាៈមាមៃជាន»។ 11 ជេសរីគែសឞូអីហាន់នទ្រែលគ៝ប់នៃនើស ខាន់ពាង់ឆើមតេកតីគ៝ប់លែវលាប់តាប៝នដាមាស យ៝រលាសមាត់គ៝ប់អ្វាញ់មោហោមអោសឆៃ យ៝រមានាវច្រាតអាងអីនៃនើស។ 12 តាប៝ននៃគែសទូហ្វេឞូនុយ្សរាញាអានានេស ពាង់ជេងឞូនុយ្សអ្យាត់នាវកោរាញឞ្រាសតឹមទីដាសនាវវៃឞ៝ន់ លែៈផូងអីឆ្រាអែល តាប៝ននៃរានេពាង់ទាទេ។ 13 ពាង់ឞ្រោៈទាច់តាគ៝ប់រី ជេសរីលាសមាគ៝ប់៖ «ហើយនោ អ៝ន់មាត់មៃឆៃអាងហ៝ម់»។ ទូនហ៝ម់តានៃមាត់គ៝ប់ឆៃអាងរ៝ គ៝ប់អ្វាញ់ឆៃពាង់។ 14 ជេសរីពាង់លាសមាគ៝ប់៖ «កោរាញឞ្រាសអីផូងអូចែឞ៝ន់យើកមឞាសលែៈកើយ្សជេសមៃ គៃមាអ៝ន់មៃគឹតនាល់នាវពាង់អុច អ៝ន់មៃគឹតនាល់ឞ្រាសក្រីស អីនើមទុតឆ៝ង់ នទ្រែលមាអ៝ន់មៃគឹតតាង់នាវពាង់នើមងើយ‌ 15 យ៝រលាសកោរាញឞ្រាសអុចអ៝ន់មៃមឞើសងក៝ចមាទឹងលែៈឞូនុយ្សលាមនែសនតូលែៈនាវខ្លៃអីមៃលែៈឆៃលែៈតាង់។ 16 អាបៃអ្យាម៝សហោមក៝ប់ជឹត ខ៝ន់មៃទ៝ក់ហ៝ម់ទើននាវបាប់តែមយុកមាទាក មឞើសឆើមទាន់កោរាញឞ្រាសរាវក្ល៝សនាវតីសមៃ»”។

17 “ត៝ត់គ៝ប់ព្លឹឆឹតតាប៝នយេរូឆាលឹម ទោលគ៝ប់គុមឞើសឆើមតាជ៝ង់គូងញីសជានឞ្រាស គ៝ប់គែសនាវតឹមឆៃ។ 18 គ៝ប់ឆៃកោរាញយេឆូ លាសមាគ៝ប់៖ «មៃទ៝ក់ហ៝ម់ហាន់អ៝ន់គើញឞើសនតុកអ្យា យ៝រលាសឞូនុយ្សតាប៝នអ្យាឞូមោអោសអ្យាត់នាវមៃមឞើសងក៝ចនាវគ៝ប់»។ 19 ជេសរីគ៝ប់មឞើសមាពាង់៖ «ហើយកោរាញ ឞូនុយ្សតាប៝នអ្យាលែៈឞូគឹតជេសគ៝ប់ហាន់រ៝ៈញីសរាបុនទឹងលែៈ ញុបទឹងលែៈឞូនុយ្សអីញឆីងមាមៃ រាពាត់មឞាងខាន់ពាង់ តេៈខាន់ពាង់តាត្រោមនទ្រូង។ 20 ខាន់ពាង់គឹតដ៝ង់ទោលឞូងខឹតឆាតេផាន នៃនើស ជេងនើមមឞើសងក៝ចនាវខ្លៃមៃ គ៝ប់គុនទ្រែលតានៃ នទ្រែលមាលែៈតឹមទីនាវមាផូងនៃដ៝ង់ គ៝ប់ដ៝ង់គុញជ្រាង់ឞ៝កអាវក្វ៝ង់អីមពោលងខឹតពាង់ទ្រ៝សនៃនើស»។* 21 ជេសរីពាង់លាសមាគ៝ប់ជឹត៖ «មោអោស មៃទ៝ក់ហាន់ហ៝ម់ គ៝ប់អ៝ន់មៃហាន់តានតុកងាយ តាផូងអីមោទីផូងអីឆ្រាអែល »”។*

22 ផូងប៝នលានគុអ្យាត់នាវពាង់ងើយត៝ត់តាង់ពាង់ងើយអីនៃ ជេសរីឞូនតែរទ្រើវលាស៖ “ងខឹតលើយពាង់ ម៝សជានរ៝ងឞូនុយ្សអីនៃ!”* 23 លែៈផូងប៝នលាននៃនតែរទុតហោ ទ្រ៝សមអារ់ឞ៝កអាវខាន់ពាង់នើម នអ៝ប់មាក្វាកនែសឆូយជឹតលើជឹត យ៝រមាខាន់ពាង់ជីនូយ្សទុតហោងាន់។ 24 យ៝រមាឆៃកើតនៃ កោរាញតាហែនក្វ៝ង់ទែដាៈឞូលែវពោល លាប់តាពោយ្សរី ជេសរីដាៈឞូរាពាត់ពាង់មារាឆែ នទ្រែលមាអោបជែកអុចគឹតម៝សនាវទឹងឞូជីនូយ្សនតែរកើតនអៃ។ 25 ជេសឞូក៝ត់ពាង់គៃមារាពាត់ ពាង់ងើយដាសកោរាញតាហែនអីគុទាច់មាពាង់នៃ៖ “ទីដ៝ង់មៃរាពាត់ទូហ្វេផូងរោម លាសអេហ៝ៈផាតទោយ្ស?”* 26 ត៝ត់មាតាង់នាវពាង់លាសកើតនៃ កោរាញតាហែនអីនៃហាន់មឞើសមាកោរាញតាហែនក្វ៝ង់រី៖ “ម៝សជានមរែកើតនអៃ? ឞូនុយ្សអីនៃជេងផូងរោម យា”។ 27 កោរាញតាហែនក្វ៝ង់នៃហាន់អោបពោល លាសមាពាង់៖ “ល៝ង់មៃមឞើសមាគ៝ប់ ងាន់លាសមៃនើសផូងរោម ?” ពោល អើស៖ “អើ ងាន់ដ៝ង់”។ 28 កោរាញតាហែនក្វ៝ង់លាសតៃមាពាង់៖ “គ៝ប់អ៝ន់ព្រាក់ទុតអ៝ក់ ទឹងជេងផូងរោម ”។ ពោល ទែអើសមាពាង់៖ “គ៝ប់ជេងផូងរោម នតើមឞើសនទុលមែងាន់”។ 29 លែៈផូងអីគៃមាអោបពាង់នៃទូងាយឞើសពាង់រ៝។ ល៝ង់កោរាញតាហែនក្វ៝ង់នៃក្លាច ត៝ត់មាពាង់គឹតឞូនុយ្សអីពាង់ដាៈឞូក៝ត់នៃជេងផូងរោម ។

30 ត៝ត់អោយតៃរី កោរាញតាហែនក្វ៝ង់នៃដាៈឞូទ្រ៝សរាឆែរាវាក់ពោល ជេសរីពាង់ដាៈមពោលកោរាញជានឞ្រាស នទ្រែលមាមពោលកោរាញជានការផូងឞ្រីយូដា ទឹងលែៈ រាគូមតានតុកខាន់ពាង់ ជេសរីពាង់លែវពោល ហាន់តាឞើសនាប់ខាន់ពាង់នៃ យ៝រលាសពាង់អុចគឹត ម៝សនាវទឹងផូងឞ្រីយូដា នតោនពោល នៃ។