8
1-2 ឆោល តឹមទីទូនតោរនាវអុចងខឹតឆាតេផាន ដ៝ង់។ គែសផូងអាបាៈអីអ្យាត់នាវកោរាញឞ្រាស លែវត៝ប់ឆាតេផាន នៃ ញុមវើលមាពាង់ទុតហោ។
ឆោល ជានជេរមាផូងញឆីងមាឞ្រាសយេឆូ
តានារនៃឞូនតើមជានជេរទុតហោមាផូងញឆីងមាឞ្រាសយេឆូ តាប៝នយេរូឆាលឹម ។ នទ្រីទឹងខាន់ពាង់ញច្វាត់ទូញហីងញហាងលាមឞ្រីយូដា នទ្រែលមាឞ្រីឆាមារី ទើនហោមអែមពោលកោរាញអ៝សម៝នទើម។* ៨:១៖ ការ ៧:៥៨; ១១:១៩; មថ ១០:២៣ 3 ល៝ង់ឆោល រីអុចងគ្រ៝សលើយផូងញឆីងមាឞ្រាសយេឆូ ពាង់លាប់អាប់ញីសរោងមពោងជៃឞូ ញុបតេកឞូតេៈនទ្រូង ឞូអូរមោលាសឞូក្លោ ញុបទឹងលែៈរ៝។* ៨:៣៖ ការ ៩:១-២, ១៣-១៤, ២១, ២៦; ២២:៤-៥; ២៦:៩-១១; ១កោ ១៥:៩; កាល ១:១៣-១៤; ផល ៣:៦
ផីលីប មឞើសងក៝ចនាវមហែមហានអ្វែសតាឞ្រីឆាមារី
4 លែៈមពោលអីញច្វាត់ញហីងញហាងរីនើស ខាន់ពាង់ហាន់អាប់នតុក នទ្រែលមាមឞើសងក៝ចនាវមហែមហានអ្វែសឞ្រាសយេឆូ ។* ៨:៤៖ ការ ១១:១៩ 5 ផីលីប អីឞូលែៈកើយ្សនទ្រែលឆាតេផាន នើស ពាង់ហាន់តាទូប៝នតាឞ្រីឆាមារី ។ តាប៝ននៃពាង់មឞើសងក៝ចនាវឞ្រាសយេឆូ ជេងឞ្រាសក្រីស អីនើមរាក្លាយ្សកោរាញឞ្រាសទែញជ្វាល់។* ៨:៥៖ ការ ៦:៥ 6 លែៈផូងប៝នលានតានៃនអើរអុចអ្យាត់ងាន់នាវផីលីប ងើយ យ៝រលាសលែៈនាវខាន់ពាង់តាង់ខាន់ពាង់ឆៃផីលីប ជាននាវខ្លៃនើសលែៈនាវងាន់។ 7 គែសអ៝ក់ឞូនុយ្សគែសឞ្រាសអ្យើសលាប់ ខាន់ពាង់នតែរទុតទាង់ងាន់ នហ៝មាឞ្រាសអ្យើសទូលោសឞើសខាន់ពាង់អីនៃ។ គែសឞូនុយ្សក្វែតរាវែន នទ្រែលមាឞូនុយ្សខឹតជ៝ង់ខឹតតីអ៝ក់ដ៝ង់ឞាស។* ៨:៧៖ លក ៩:១-២ 8 យ៝ររីឞូនុយ្សតាប៝ននៃគែសនាវរាម់មអាកហោងាន់។
9 តាប៝ននៃ គែសដ៝ង់ទូហ្វេឞូនុយ្សរាញាពាង់ឆីមោន ពាង់គុតានៃលែៈជ៝ៈនាម់ជេស។ ពាង់ជេងឞូនុយ្សម៝ត់នអាងជាននទើមានាវទើយឞ្រាសអ្យើស ពាង់ងក៝ចអេងឆាក់ពាង់នើមជេងឞូនុយ្សខ្លៃ។ ទឹងលែៈផូងឆាមារី តាប៝នអីនៃ ខាន់ពាង់នទ្រ៝ត់ញហីសងាន់មានទើពាង់ជាន។ 10 ទឹងលែៈឞូនុយ្ស នតើមឞើសឞូជេៈត៝ត់មាឞូក្វ៝ង់ អ្យាត់ពាង់អ្វែសងាន់ ឞូលាស៖ “ពាង់អ្យារ៝គែសនាវឞ្រាសកោរាញឞ្រាស អីឞូក្វាល់លាស«នាវឞ្រាសក្វ៝ង់ងាន់»”។ 11 ទឹងឞូអ្យាត់មាពាង់កើតនៃ យ៝រលាសលែៈជ៝ៈនាម់ងាន់ឞូនទ្រ៝ត់ហីសរាហ៝ល់មានទើអីពាង់ជាននៃ។ 12 យើនមាទោលផីលីប មឞើសងក៝ចនាវមហែមហានអ្វែសមានាវកោរាញឞ្រាសអុចម៝ត់អ្វាញ់មាឞូនុយ្ស នទ្រែលមាមឞើសងក៝ចឞ្រាសយេឆូក្រីស ឞូតឹងអ្យាត់នាវពាង់ងើយអីនៃរ៝ ជេសរីខាន់ពាង់អ៝ន់ផីលីប ជានបាប់តែមយុកខាន់ពាង់មាទាកនអ៝ប់មាឞូអូរឞូក្លោ។ 13 ល៝ង់អីឆីមោន រីអ្យាត់នាវផីលីប ងើយដ៝ង់ នហ៝មាទើនជានបាប់តែមយុកមាទាករ៝ ជេសរីពាង់គុនទ្រែលផីលីប មរ៝។ នោកនៃពាង់នទ្រ៝ត់ហីសរាហ៝ល់ងាន់ឆៃនាវមឞេន នទ្រែលមានាវខ្លៃអីផីលីប ជាននៃ។
14 មពោលកោរាញអ៝សម៝នហោមគុតាប៝នយេរូឆាលឹម រី។ ត៝ត់ខាន់ពាង់តាង់លឺតាឞ្រីឆាមារី រីគែសឞូនុយ្សឆ៝ៈទើននាវកោរាញឞ្រាស ខាន់ពាង់ដាៈពេត្រោស នទ្រែលមាយោហាន ហាន់តាឞ្រីនៃ។ 15 ត៝ត់តានៃ ឞារហៃកោរាញអ៝សម៝នរីមឞើសឆើមទាន់មាកោរាញឞ្រាស គៃមាកោរាញឞ្រាសអ៝ន់ឞ្រាសហ្វេងអ្វែសអីក្ល៝សអ្វែសជុរគុតាមពោលលែៈញឆីងនៃ 16 យ៝រលាសឞារហៃខាន់ពាង់នៃអេអោសឆៃឞ្រាសហ្វេងអ្វែសជុរគុតាទូហ្វេតាមពោលលែៈញឆីងនៃ។ មានមាគែសជានបាប់តែមយុកមាទាកតារាញាកោរាញយេឆូ ។ 17 នទ្រីទឹងពេត្រោស នទ្រែលមាយោហាន តេៈតីតាខាន់ពាង់ ជេសរីមើកោរាញឞ្រាសអ៝ន់ឞ្រាសហ្វេងអ្វែសអីក្ល៝សអ្វែសគុតាខាន់ពាង់។* ៨:១៧៖ ការ ១៩:៦ 18 ទោលឆីមោន ឆៃកោរាញឞ្រាសអ៝ន់ឞ្រាសហ្វេងអ្វែសគុតាខាន់ពាង់រី យ៝រមាមពោលកោរាញអ៝សម៝នតេៈតីនៃ ពាង់ឆ៝ៈព្រាក់គៃមាអ៝ន់ឞារហៃកោរាញអ៝សម៝ននៃ 19 នហ៝មាលាស៖ “អ៝ន់គ៝ប់បាៈនាវទើយនៃអើ គៃមាឞូម៝សគ៝ប់តេៈតី កោរាញឞ្រាសអ៝ន់ឞ្រាសហ្វេងអ្វែសអីក្ល៝សអ្វែសគុតាពាង់ដ៝ង់”។ 20 ពេត្រោស លាសពាង់៖ “អ៝ន់មៃ នទ្រែលមាព្រាក់មៃហាន់គុតានទ្រូងអុញ យ៝រលាសមៃមឹនព្រាក់ទើយរាវាត់នទើកោរាញឞ្រាសអ៝ន់!* ៨:២០៖ មថ ១០:៨ 21 មៃមោអោសទើយលាប់នទ្រែលតានាវការអ្យា ទូនតីលមោទើយដ៝ង់ យ៝រលាសនូយ្សនហ៝ម់មៃមោឆ៝ង់អោសតានាប់កោរាញឞ្រាស។ 22 អ៝ន់មៃមអារ់ហ៝ម់នូយ្សនហ៝ម់អ្យើសនៃ ជេសរីមឞើសឆើមទាន់មាកោរាញឞ្រាស។ ងខេបលាសពាង់មាយោៈនអាចមោហោមកើបនាវតីសមៃមឹនកើតនអៃ។ 23 គ៝ប់លែៈឆៃមៃគែសនូយ្សនហ៝ម់តឹមមោនាចហោងាន់ នទ្រែលមាហោមខានជានតីសនឹងមោឞ្លាវឞាសជានអ្យើស តឹមឞានមានាវតីសក៝ត់មៃមារាឆែរាវាក់”។ 24 ឆីមោន អើស៖ “លាសនទ្រីដាៈមៃឆើមទាន់មាកោរាញឞ្រាស គៃមាលើយអ៝ន់គ៝ប់គុតានទ្រូងអុញ នាវអីមៃលាសនៃនើស”។
25 ពេត្រោស នទ្រែលមាយោហាន ខាន់ពាង់មឞើសងក៝ចនាវកោរាញយេឆូ មាឞូ នទ្រែលមាលែៈនទើអីខាន់ពាង់ឆៃខាន់ពាង់តាង់តាពាង់នើស ជេសរីខាន់ពាង់ព្លឹឆឹតតៃតាប៝នយេរូឆាលឹម នហ៝មាមឞើសនាវមហែមហានអ្វែសអ៝ក់ប៝នដ៝ង់រ៝ៈត្រ៝ងឞ្រីឆាមារី នៃ។
ផីលីប មឞើសនាវមហែមហានអ្វែសមាឞូនុយ្សឞ្រីអេតយូពី
26 ជេសរីទូហ្វេតោងពារ់កោរាញឞ្រាសលាសមាផីលីប ៖ “ហើយផីលីប មៃទ៝ក់ហ៝ម់ ហាន់មពែសជឹតទ៝ង់រី ហាន់រ៝ៈត្រ៝ងអីជុរឞើសប៝នយេរូឆាលឹម ហាន់ជឹតប៝នកាឆា តាត្រ៝ងអីឞូមោហោមអោសវៃហាន់”។ 27 ជេសរីផីលីប ទ៝ក់ហាន់រ៝ ត៝ត់អាត្រ៝ងរីម៝ប់មាទូហ្វេមពោលឞ្រីអេតយូពី ឞូនុយ្សឞូចារ។ ពាង់ជេងកោរាញក្វ៝ង់តាឞ្រីអេតយូពី ពាង់ម៝ត់អ្វាញ់លែៈទ្រាប់នទើខ្លៃ លែៈព្រាក់កាដាច់តាឞ្រីអីនៃ។ ឞ្រីអីនៃឞូអូរជានកាដាច់ រាញាកាដាច់អីនៃ«កាន់ដេស »។ កោរាញក្វ៝ង់អីនៃពាង់ហាន់តាប៝នយេរូឆាលឹម រីនើស គៃមាយើកមឞាសមាកោរាញឞ្រាស។ 28 ត៝ត់មាឆឹត ទោលពាង់ញច៝តារាទែសឆែស ពាង់រ៝ៈនតែសនាវកោរាញឞ្រាសងើយតាឆ៝ម់បុតអេឆាយ អីឞូនុយ្សនតើយ្សនាវងើយកោរាញឞ្រាស។ 29 នោកនៃឞ្រាសហ្វេងអ្វែសលាសមាផីលីប ៖ “ហាន់ហ៝ម់ អ៝ន់ទាច់មារាទែសឆែសនៃ”។ 30 ជេសរីផីលីប ញច្វាត់តឹងរាទែសនៃរ៝ ត៝ត់តានៃពាង់តាង់កោរាញអីនៃរ៝ៈឆ៝ម់បុតអេឆាយ អីឞូនុយ្សនតើយ្សនាវងើយកោរាញឞ្រាស ពាង់អោប៖ “ហើយកោរាញ មៃវ៝ត់ដ៝ង់នាវមៃរ៝ៈអីនៃ?” 31 កោរាញអីនៃអើសលាស៖ “មើមឞ្លាវវ៝ត់អេង លាសមោគែសឞូនុយ្សមារាឞ្លាង?” ជេសរីពាង់ជាៈផីលីប ញច៝នទ្រែលកាលើរីគុទាច់ពាង់។ 32 ត្រ៝ងនតុកពាង់អ្វាញ់នៃលាសកើតនអា៖
«ឞូតេកពាង់ តឹមឞានមាឞូតេកឞែឞ្យាប់មាងខឹត ពាង់មោអោសមពាត់រាទ៝ង់។
តឹមឞានមាក៝នឞែឞ្យាប់មល៝មោឞ្លាវញហ្យាង់នោកឞូក៝សរាឆៅ
ពាង់មោអោសនតែសងើយទូត៝ង។
33 ឞូមឺចពាង់បាច់ប៝ច ឞូមោអោសផាតទោយ្សទីមាអោឞាល់។
ពាង់មោអោសគែសយៅមាងក៝ច
យ៝រលាសឞូងខឹតពាង់មោគែសក៝ន នាវរេសពាង់លែៈឞូឆ៝ៈរាហ្វាត់លើយឞើសនែសនតូអ្យា»† ៨:៣៣៖ អេឆា ៥៣:៧-៨។
34 ជេសរីកោរាញនៃអោបផីលីប ៖ “ល៝ង់មៃមឞើសមាគ៝ប់ នាវឞូនុយ្សនតើយ្សនាវងើយកោរាញឞ្រាសលាសកើតនអា ឞូម៝សពាង់អុចលាស? លាសមាឆាក់ពាង់នើម មោលាសអុចលាសមាទូហ្វេឞូនុយ្សអេង?” 35 ផីលីប មឞើសងក៝ចនាវមហែមហានអ្វែសឞ្រាសយេឆូ អ៝ន់ពាង់គឹត នតើមឞើសត្រ៝ងនាវកោរាញឞ្រាសងើយនៃ។* ៨:៣៥៖ លក ២៤:៤៤-៤៦ 36 ឞារហៃខាន់ពាង់អីនៃហោមញច៝នទ្រែលតារាទែសរីទាទេ។ ត៝ត់អានាប់រីឆៃគែសទាក កោរាញនៃលាស៖ “ទាកតាអ្យាគែស ម៝សហោមគែសនាវមាឞ្វៃគ៝ប់ មោអោសអ៝ន់គ៝ប់យុកបាប់តែមមាទាក?” 37 [ផីលីប លាសមាពាង់៖ “លាសមៃញឆីងមាលែៈនូយ្សនហ៝ម់ងាន់ មៃមោច្រាវអោស បាប់តែមទើយ”។ ពាង់អើស៖ “លែៈគ៝ប់ញឆីងកោរាញយេឆូ ពាង់ឞ្រាសក្រីស ពាង់ក៝នកោរាញឞ្រាសងាន់រ៝”។] 38 ពាង់ដាៈឞូញឆ្រុងរាទែសឆែស។ ជេសរីឞារហៃខាន់ពាង់ជុរអាទាកឆូ ផីលីប ជានបាប់តែមយុកពាង់មាទាក។ 39 ទោលខាន់ពាង់ហាវអាកើសអ្យា ឞ្រាសហ្វេងអ្វែសឆ៝ៈផីលីប រ៝សក្ល៝ក់ អ្វាញ់ពាង់មោហោមអោសឆៃ។ ជេសរីកោរាញឞ្រីអេតយូពី អីនៃនតើមហាន់តៃជឹត នូយ្សនហ៝ម់ពាង់រាម់មអាកងាន់ យ៝រមាកោរាញឞ្រាសលែៈរាក្លាយ្សពាង់។ 40 ល៝ង់ផីលីប ឆៃឞ្រាសហ្វេងអ្វែសឆ៝ៈពាង់គុតាប៝នអាឆោត រី។ ជេសឞើសនៃ ពាង់ឞ្រោៈមឞើសងក៝ចនាវមហែមហានអ្វែសរ៝ៈប៝ន នហ៝មាត៝ត់ប៝នឆេឆារា ។