នាវកោរាញឞ្រាសងើយនាវតឹមរាង្លាប់មហែ ១ តីមោថេ 6

1 ឞូម៝សអីជានទឹកឞូ អ៝ន់ពាង់កើបកោរាញពាង់នើមអីនៃជេងឞូនុយ្សអីពាង់យើកងាន់ គៃមាលើយអោសអ៝ន់ឞូងើយអ្យើសមារាញាឆាក់កោរាញឞ្រាស នទ្រែលមានាវឞ៝ន់នតុមនតី។* 2 លាសទូហ្វេកោរាញទឹកឞូជេងឞូនុយ្សញឆីង អីទឹកនៃលើយអោសមឹនអីកោរាញលែៈញឆីងជេស ជេសរីមោខាច់អោសយើកមាពាង់។ លើហោជានការមាពាង់ជឹត ជានការអ្វែស យ៝រមាពាង់ជេងអ៝សនោកោរាញឞ្រាសរ៝ង់។

នាវនតុមនតីងក្លាៈ នទ្រែលមានាវកើញទ្រាប់នទើតានែសនតូអ្យា

ជេសរីនតុមនតីនាវអ្យាអ៝ន់ឞូអ្យាត់ដ៝ង់។ 3 លាសឞូនុយ្សនតុមនតីនាវអាអេង មោតឹមទីមានាវងាន់ឞ្រាសយេឆូក្រីស អីកោរាញឞ៝ន់ លាសពាង់នតុមនតីនទើអីមោតឹមទីមានាវកោរាញឞ្រាសអុចមានាវរេសឞ៝ន់‌* 4 ពាង់អីនៃគែសនូយ្សនហ៝ម់ហឺនទើម ទូនតីលនាវមោគឹតអោស។ នូយ្សនហ៝ម់ពាង់អ្យើស អុចតឹមអោបរាខេលនាវមោខ្លៃ នទ្រែលមាតឹមរាលាច់មានាវងើយ។ តាៈឞើសនាវអីនៃជានអ៝ន់នាវតឹមមោនាច នាវតឹមងខាសផូង នាវងើយញចើត នាវនតោនឞូអាអេងជានអ្យើស‌ 5 នាវតឹមរាលាច់នឹង។ ឞូនុយ្សកើតនអាមោហោមអោសគឹតតីសគឹតទី មោហោមអោសគែសនាវងាន់។ ខាន់ពាង់នអោនលាសនាវអុចអ្យាត់មាកោរាញឞ្រាស ជេងត្រ៝ងមាជ៝យទ្រាប់នទើ។ 6 យើនមាគែសនាវខ្លៃហោងាន់លាសឞូនុយ្សអុចអ្យាត់មាកោរាញឞ្រាស លែៈឆ៝ប់ត៝ង់ជេសមាទ្រាប់នទើពាង់នើមលែៈគែសដ៝ង់‌* 7 យ៝រលាសទឹងលែៈឞ៝ន់មោគែសអោសញអោតនទើទូនតីលហាន់តានែសនតូអ្យានោកទែសឞើសនទុលមែ ជេសរីមោដ៝ង់ឞ៝ន់ទើយឆ៝ៈឞើសនែសនតូអ្យា។ 8 លាសនទ្រីលាសឞ៝ន់គែសនទើឆោងឆា គែសឞ៝កងគូតអាវញឆ៝ស អ៝ន់ឞ៝ន់លែៈឆ៝ប់ត៝ង់ជេស។ 9 ល៝ង់ឞូនុយ្សអីកើញគែសកើញនទ្រ៝ង់ ខាន់ពាង់តុបតានាវនទើម គែសទាក់យ៝រលាសនាវនអើរអេងៗ។ នាវនអើរអាបាៈនៃអីមោគែសនាវខ្លៃទើម អាបាៈអេងជឹតជានអ្យើសមាពាង់នើម នាវអីនៃងក្រ៝ម់លើយឞូនុយ្សអ៝ន់រ៝សហេង។* 10 តើមឆីគែសយ៝រមាអីរែសពាង់ កើតនទ្រីដ៝ង់អ៝ក់នតីលនាវអ្យើសគែសយ៝រមានាវរ៝ង់អីរមាព្រាក់។ ឞូនុយ្សអាបាៈយ៝រមាលែៈរ៝ង់មាព្រាក់ហោអីរ នហ៝មាជេងហ្យើតបាសងាយឞើសនាវញឆីងមាឞ្រាសក្រីស ជេសរីលើសអេងឆាក់ពាង់នើមគែសនាវជេរជ៝ត់ហោងាន់។

នាវនតុមនតីងគ្លែៈទុតអ៝ន់មាតីមោថេ

11 យើនមាមៃនៃ មៃជេងនើមជានការមាកោរាញឞ្រាស អ៝ន់មៃទូងាយហ៝ម់ឞើសនាវអីនៃ។ ជេសរីតឹងជ៝យនាវឆ៝ង់ នាវអុចអ្យាត់មាកោរាញឞ្រាស នាវញឆីង នាវរ៝ង់មាឞូ នាវអ៝ត់នូយ្សនឹងតានាវជេរ នទ្រែលមានាវមលែស។* 12 អ៝ន់មៃញឆ្រោយ្សតឹងជ៝យនាវញឆីងមាលែៈនូយ្សនហ៝ម់តឹមឞានមាឞូញឆ្រោយ្សតានាវតឹមលើសគៃមាទើយ គៃមាទើននាវរេសនហ៝រ៝ងាន់។ កោរាញឞ្រាសលែៈក្វាល់ជេសមៃគៃមាឆ៝ៈទើននាវរេសនហ៝រ៝ នទ្រែលមាមៃលែៈមឞើសដ៝ង់នាវមៃញឆីងតាឞើសនាប់ឞូនុយ្សអ៝ក់។* 13 គ៝ប់ទាន់នតិញអ៝ន់មាមៃតានាប់មាត់កោរាញឞ្រាសអីនើមអ៝ន់នាវរេសទឹងលែៈនទើគែសនាវរេស នទ្រែលមាតានាប់មាត់ឞ្រាសក្រីសយេឆូ អីនើមលែៈមឞើសជេសនាវងាន់ឞើសនាប់មាត់ពុនតេស-ពីលាត ៖ 14 អ៝ន់មៃញអោតន៝ប់អ៝ន់ទុតអ្វែសនាវអីកោរាញឞ្រាសលែៈដាៈ មោអោសគែសនាវឞូមានទុយ្ស នហ៝មាត៝ត់ឞ្រាសយេឆូក្រីស អីកោរាញឞ៝ន់នើមវាច់។ 15 ត៝ត់ទីនាររីតៃ កោរាញឞ្រាសមរាញហើពាង់អ៝ន់ឆៃ។ កោរាញឞ្រាសទុតអ្វែស គែសពាង់នើមទើមជេងកោរាញម៝ត់អ្វាញ់ ជេងកាដាច់ក្វ៝ង់រាលាវមាទឹងលែៈកាដាច់ ជេសរីកោរាញក្វ៝ង់រាលាវមាទឹងលែៈកោរាញ។* 16 គែសទូហ្វេពាង់ទើមមោឞ្លាវខឹត ពាង់គុតានតុកអាង។ មោគែសអោសឞូនុយ្សទើយហាន់ទាច់តានាវអាងអីនៃ មោគែសអោសឞូនុយ្សលែៈឆៃពាង់ មោទើយអោសឞូនុយ្សឆៃពាង់ដ៝ង់។ អ៝ន់ទឹងលែៈឞូនុយ្សយើកមាពាង់ អ៝ន់ពាង់គែសនាវទើយមាម៝ត់អ្វាញ់នហ៝រ៝ អើអ៝ន់គែសកើតនៃងាន់រ៝*!*

17 ទាន់មៃឞ្វៃហ៝ម់មាផូងនទ្រ៝ង់តានែសនតូអ្យា លើយអ៝ន់ខាន់ពាង់នហីអេងឆាក់ លើយអ៝ន់រានើមមាទ្រាប់នទើអីមោគឹតអោសតានារជឹតនាប់តៃ។ យើនមាអ្យាត់មារានើមមាកោរាញឞ្រាសហ៝ៈ នើមអីអ៝ន់ទឹងលែៈនទើឞ៝ន់ទែមាទ៝ង់អ៝ក់រាមែសងាន់ គៃមាឞ៝ន់រាម់មអាក។* 18 ដាៈខាន់ពាង់ជាននទើអ្វែសកើលឞូអ៝ន់អ៝ក់ លាសជានកើតនអាតឹមឞានមាគែសទ្រាប់នទើងាន់អីអ៝ក់។ ដាៈខាន់ពាង់គែសនូយ្សនហ៝ម់ល៝ង់គៃមាកើលផូងអ៝អាច នទ្រែលមានទ្រាប់ឆាក់មាពាៈនទើអ៝ន់ឞូបាបើ។* 19 ជានកើតនៃមើខាន់ពាង់តឹមឞានមារាបុនទ្រាប់នទើព្រាប់តានតុកកោរាញឞ្រាសតាកាលើត្រោករី រីមើគែសនទើមាញឆីងតានារកោរាញឞ្រាសតេៈទោយ្សមាទឹងលែៈឞូនុយ្សតៃ ជេសរីគែសនាវរេសនហ៝រ៝អីជេងនាវរេសងាន់។

20 អើតីមោថេ ទឹងលែៈនាវកោរាញឞ្រាសលែៈអ៝ន់†ជេសមាមៃ អ៝ន់មៃម៝ត់អ្វែសហ៝ម់។ ជេសរីទែរនាវតឹមងក៝ចមាឞូនទើអីមោគែសនាវខ្លៃ ទែរនាវតឹមរាលាច់តឹមរាទ៝ង់មានាវងើយអីឞូលាសគឹតឞ្លាវ យើនមាគឹតឞ្លាវងក្លាៈច្រាវ‌* 21 យ៝រលាសគែសឞូនុយ្សអាបាៈលែៈញអោតនាវអីនៃ ជេសរីលែៈនត្លើយឞើសនាវញឆីងឞ៝ន់។ ទាន់នាវអ្វែសកោរាញឞ្រាសគុនទ្រែលទឹងលែៈមាខាន់អៃមៃ៕៚

*6:1 ៦:១-២៖ អេផ ៦:៥-៨; កោល ៣:២២-២៥; តត ២:៩-១០; ១ពេ ២:១៨

*6:3 ៦:៣-៥៖ ១តម ១:៥-៧; ២តម ២:២៣; តត ៣:១០-១១; ២ពេ ២:២-៣

*6:6 ៦:៦-៨៖ ១តម ៤:៨; ២កោ ៦:១០; ផល ៤:១១-១៣; ហេឞ ១៣:៥; នហ ៣០:៧-៩

*6:9 ៦:៩-១០៖ មថ ១៣:២២; លក ១២:១៥-២១; អេផ ៥:៥

*6:11 ៦:១១៖ ២តម ២:២២

*6:12 ៦:១២៖ ២តម ៤:៧-៨; ១កោ ៩:២៤-២៧; ផល ៣:១២-១៤

*6:15 ៦:១៥៖ មថ ២៤:៣៦

*6:16 ៦:១៦៖ «អើអ៝ន់គែសកើតនៃងាន់រ៝» មោលាស «អាមែន »។

*6:16 ៦:១៦៖ នង ៣៣:២០-២៣; យហ ១:១៨; ១យហ ១:៥

*6:17 ៦:១៧៖ មថ ៦:១៩-២១; លក ១២:១៥-២១; យាក ១:១០-១១

*6:18 ៦:១៨៖ លក ១៦:៩; អេផ ២:១០

†6:20 ៦:២០៖ គែសអ៝ក់ឞូគឹតគែសនាវខ្លៃលាសអ៝ន់ពាង់ញឆ្រោយ្សជានការនាវនតីឞូ មោលាសនាវមឞើសងក៝ចទី។

*6:20 ៦:២០-២១៖ ១តម ៤:៧; ២តម ២:១៦-១៨, ២៣