1 Bdze dze dze ne rdziiladz zho lo dziin, güey Marí Magdal, Salomé, ni Marí xniaa Jacob güeysi zho grë nceit nex ne tsietëëb zho lad xcuerp Jesús. 2 Laa zeeṉe biini liu, dze ne rzobni zhmal, silgaw loxaque ziaadlan ngbidza laa gza wnaa co briee laa zho zie ro baaṉ Jesús.

3 Nëz no zho, rnabdiidzlsa zho dieṉ zha gdioob quie nroob ne nioog ro baa, cho siguieḻ coba. 4 Ni zeeṉe bdziṉ zho, goṉ zho laa quie co bdiooble.

5 Laa zho bzëëb leṉ baa, zeeṉe goṉ zho nëz derech laa tib mgui nguieg zob ga, nacw me tib lar nool, dib nquitsbiese rna lar co. Bdzieb zho goṉ zho me; 6 dzigo rëbchaa me lo zho:

―Gdziebde to. ¿Jesús lëë, meṉ Nazaret ne pquiaa zho lo cruz, meṉ co ziaadguib to? Guieṉdle me nu, ¡laa me brieebanle! Goḻwi gaṉle nu nac zaatne pxob zho me. 7 Goḻtsie, goḻguiab lo Pedr ni lo grëraa xpëëdscuel me tsie zho Galilé, ga tsiedzieel zho me zigne rëble me lo zho glo.

8 Rias gza wnaa co laa zho briee ga, masaque rzhidz zho rdzieb zho. Lo dzeb co ni par gnee zho gacd.

9 [Dze ne rzobni zhmal ga, sil co brieeban Jesús, ni Marí Magdal nac zha ne glopaa goṉ me; lëë Marí co ga beeṉguiac me zeeṉe beṉcxooṉ me gadz meṉdox ne nosacsi Marí. 10 Dzigo güey Marí güeynie Marí diidz lo grë zha ne bzënie me ga. Lëëtaaque laa zho ndxie mban rac zho, roon zho no zho xquieḻnë me. 11 Niicle bin zho rëb Marí laa me brieebanle, goṉlo Marí me; per bliladzd zhow.

12 Bded ga, brieequia me lo schop xpëëdscuel me lëëtaque no zho nëz zie zho dan. 13 Dzigo güey zho güeynie zho diidz lo grëraa zha ne nacgza zho; per niicle xtiidz grop zha co bliladzd zho.

14 Laa stibtaa vuelt, lëëtaque ndziib zho lo mezh no zho wagw gza tsiiptib zho, tibaque zeeṉe laa me brieequia; dzigo goctox me lo zho sac goṉ me ib bliladzd zho xtiidz me; ni goṉ me scataa nad zdoo zho, sac niicle güey zha ne goṉ me güeynie zho diidz ne nli brieeban me, ni bliladzd zhow. 15 Ni rëb me lo zho:

―Goḻtsie dipse lo guidzliu, goḻtsieseed miech Xtiidz Ndzon Dios. 16 Grëse zha ne dib zdoo gliladza ni chobnis zho, scaania Dios zho; saṉgue zha ne gliladzda, laa zho bnitlole ga. 17-18 Grë zha ne sca dib zdoo gliladz naa: znee zho stib diidz ne rneed zho. Niicle xeṉ zho grë meeḻ ntseeb, concuaangaa miech zho, ib peet gacd zho. Ni zeeṉe cxobnia zho guic grë meṉ rzacnë, zuṉguiac zho zho; grë meṉdox ne noguitnie miech, zeeṉe gzeet zho lë naa zuṉcxooṉ zho ma.

19 Blozhse sca bnee me lo zho, laa me zey gbaa bzob me cue Dios nëz derech.

20 Dzigo grëse xpëëdscuel me laa zho briee, brieets bliaaḻ zho zieseed zho miech Xtiidz Dios. Ni me nac meṉ ne noyacnieṉ zho ruṉ zho grë milagr nroob, zeeṉa glu ne nli Xtiidz me nac miṉe noseed zho miech.]