1 Mee mɨguꞌuktøjktɨ, kidi nugo xmɨbøjktɨ ja ja̱a̱ꞌy pøn wa̱ndɨp jøts ku ja tnɨga̱jpxɨdɨ ja Dios yꞌøgyajpxy ja yꞌøyꞌayuujk, ejxtɨ yikxon pønɨ janchpɨ tyɨɨbyɨ døꞌøn ja kya̱jpxtɨp, pø may adøtstɨpxɨ ja ja̱a̱ꞌy ya̱ na̱xwiiñ pøn wɨnda̱a̱yꞌa̱jttɨp. 2 Yɨdeꞌents meets ja xnɨja̱wɨdɨt: jaꞌ ɨdøꞌøn ja wyɨnatyɨ pøn tjanchja̱ꞌwɨdɨp jøts ku Jesucristo ya̱ yꞌatsna̱nkyꞌejxøø tyimyja̱a̱ꞌyɨn, jaꞌats ɨdøꞌøn ja Dios Teety møøt yꞌity. 3 Pønts jadeꞌen tkamɨbøjkp ja Jesús, jaꞌats ɨdøꞌøn ja Dios Teety kamøøtꞌejtɨyɨp; ja kaꞌøwyɨnma̱a̱ꞌñ ja neꞌegɨ yiktumpy midi tkamɨnamya̱a̱jyɨp ja Cristo. Tøxɨ xnɨmadowdɨ jøts ku ja myeꞌent ja kaꞌødyumbɨ øy juunɨ; tøts ɨdøꞌøn ja yjanchmiñ, pø jaanɨxɨ ja wyɨnma̱a̱ꞌñ ja ya̱ na̱xwiiñ.

4 Uꞌnktɨ una̱ꞌjktɨ, Dios mee mjaꞌa̱jttɨp, tøxɨ xmɨmajada̱ꞌa̱ktɨ pøn mwɨnda̱a̱yꞌa̱twa̱jnɨdɨp; pø tyimyøkxɨ jaꞌ pøn mee mmøøtꞌejtyɨyɨp jøts nɨkaꞌap ja jadeꞌen myøkɨ ja kaꞌødyumbɨ yjaꞌ. 5 Jaꞌ ja nugo tyunkꞌa̱jttɨp ja kaꞌødyunk ja kaꞌøwyɨnma̱a̱ꞌñ paty ja tum jap ttukꞌɨxpøktɨ ja ja̱a̱ꞌy jøts ja jadeꞌen yikmøja̱wɨdɨt. 6 Diosts adøm xjaꞌa̱jtɨndɨp jøts ja xmɨbɨjkyɨndɨ pøn jaty ja Dios møøtꞌejtɨdɨp. Jaꞌats xkamɨbøjkɨndɨp pøn kamøøtꞌejtɨdɨp ja Dios; jadeꞌenꞌampyts nnɨja̱ꞌwaꞌan pøn tpadundɨp ja yꞌøybɨ ja tyɨɨbyɨ jøts pøn tpadundɨp ja ta̱a̱yꞌa̱jtɨn.

7 Mee mɨguꞌuktɨ, xpa̱a̱tꞌa̱jtɨndɨp ejtp nɨxem nɨya̱m nnachojkandɨt, jabɨ Dios wyɨngujkpxɨ chøøñ ja øchojkɨn. Pøn ja myɨguꞌuk ttsojkp, pøn ja myɨguꞌuk tpaꞌayoop, jaꞌats ɨdøꞌøn ja Dios tjanchja̱ꞌwɨp jøts ja jadeꞌen yꞌuꞌnkꞌatyɨyɨ. 8 Pøn tkatsojkp tkabaꞌayoop ja myɨguꞌuk, jaꞌats tkidyimyjanchja̱ꞌwɨp ja Dios, kumɨ ejtp ja Dios ttsøky ja ja̱a̱ꞌy, ejtp ja tpaꞌayøy. 9 Jøts adøm ja ojts xanɨꞌejxaꞌandɨ sa̱ ja xjanchøjkyɨndɨ xpaꞌayøꞌøyɨndɨ ku ja tyuꞌumptspɨ Uꞌnk ja ojts xanɨguejxyɨndɨ, jøts ja øchɨna̱a̱ꞌyɨn xmøꞌøyɨndɨ yꞌooꞌkɨngøjxp. 10 Yɨdeꞌenꞌampy ɨdøꞌøn ja Dios chojkɨn ja pyaꞌayoꞌowɨn yꞌejxɨ tyɨyɨ: pø nɨgɨdi adømxɨ ja tø ndsøjkyɨndɨ nbaꞌayøꞌøyɨndɨ jawyeen, pø jaꞌaxɨ adøm køꞌøm tø xtyimchøjkyɨndɨ jøts ja yꞌUꞌnk ja xanɨguejxyɨndɨ jøts ja xkuꞌayoꞌowandɨt ja nbøky.

11 Mɨguꞌuktøjktɨ, pønɨ tødam ja Dios xtsøjkyɨndɨ, ti kuts adøm nganachøjkyɨndɨ nayɨdeꞌen ja xem ja ya̱m. 12 Pøn ja Dios tø tꞌukꞌixy, nɨpøn ja tkaꞌixy; pønɨ nachojkaꞌandɨpts nabyaꞌayoꞌowaꞌandɨpts nɨxem nɨya̱m jadeꞌen ja xmøøtꞌijtyɨndɨ jøts ja jadeꞌen nja̱a̱ktyimchojkɨnt. 13 Nnɨja̱ꞌwɨndɨp ku ja Dios møøt nꞌijtyɨndɨ jøts xnamyøøtꞌejtɨndɨp ja nayɨdeꞌen, jaꞌagøjxp ku ja tø xuktatøjkaꞌandɨ ja yꞌEspíritu Santo. 14 Tø øøts nꞌixy, tø øøts nnɨja̱wɨ wempꞌa̱m, paty øø nwa̱ꞌa̱ñ jøts ku ja Dios Teety tø tjanchkexy ja yꞌUꞌnk yiknɨtsokpɨ ya̱ na̱xwiiñ. 15 Pønts tjanchja̱ꞌwɨp jøts wya̱ꞌa̱ñ ku ja Jesús Dios Uꞌngɨ, jaꞌats ja Dios tmøøtꞌejtp jøts nayɨ møøtꞌejtɨp ja nayɨdeꞌen.

16 Jadeꞌenꞌampy adøm ja tø nnɨja̱ꞌwaꞌandɨ jøts ku xjanchøjkyɨndɨ xpaꞌayøꞌøyɨndɨ ja Dios. Pø jaꞌaxɨ ejtp tsojkp, pø jaꞌaxɨ ejtp paꞌayoop; pønts ja tsojkɨn yikwɨngaxɨꞌkpy, jaꞌ ja Dios møøtꞌejtɨp. 17 Ku jadeꞌen nbaduꞌunɨnt, jadeꞌen ja nyikmøjta̱a̱jkɨnt ja øwyɨnma̱a̱ꞌñ, jøts ja jadeꞌen ngawɨngudsøꞌjkant ku ja myeꞌent tɨɨdyumbɨ; jaꞌagøjxp ku ja nayɨdeꞌen xukwɨnma̱a̱ꞌyɨmp ja tsojkɨn ja paꞌayoꞌowɨn sa̱m ja xtsøjkyɨndɨ sa̱m ja xpaꞌayøꞌøyɨndɨ. 18 Nɨwɨneꞌenɨn ja Dios chojkɨn ja Dios pyaꞌayoꞌowɨn xkayiktsøꞌjkandɨt. Yja̱a̱ktyimyiktɨgøøgyijxpy ja tsøꞌøgɨ ja neꞌegɨ, jøts pø yikuꞌayoꞌowɨpxɨ ja tsøꞌøgɨ ku pøn chøꞌøgɨ, jaꞌats ɨdøꞌøn tkayikmøjtøjkɨpnɨm ja Dios chojkɨn ja Dios pyaꞌayoꞌowɨn.

19 Jaꞌagøjxp adøm ja Dios ndsøjkyɨndɨ kumɨ jawyeen ja jadeꞌen tø xtsøjkyɨndɨ. 20 Pøn nugo wa̱mp: “Ndsøjkpy øts ja Dios”, jøts nɨ kaꞌanɨmdɨmts ja myɨguꞌuk ja twa̱ꞌa̱ñ ttsøky, jaꞌats ɨdøꞌøn ta̱a̱yɨp. Sudsoꞌampyts ja Dios tja̱a̱ktyimchokt, pø kaꞌaxɨ ja kyaxɨꞌɨky, ti jaꞌ net ja yja̱a̱ktsokp pø ja myɨguꞌukxɨ ja kyatsøjkpy pøn yjaꞌijxpy wiiñꞌa̱jy. 21 Jøts ja Dios yɨdeꞌen xmøꞌøyɨndɨ ja yꞌanaꞌamɨn: pønɨ pøn ja Dios ttsojkp, nayɨdeꞌen ja myɨguꞌuk ja twa̱ꞌa̱nt ttsokt.