1 Neṉ redxejga bidojp xhidalro bejṉ, luxh xheti xhigauureni. Dxejc gurejdx Jesús rexpejṉpacni ni rinajlni, räjpni lojreni:

2 ―Rulazlazä rebejṉre, sa'csi ṉaj rajc choṉ dxej tre'reni loä, luxh xhet yu'di gauureni. 3 Niluxh palga guxhaḻäreni rolijzreni, xliajzreni, sidxajgreni lo nejz; sa'csi yu' renani zijtru siäädreni.

4 Dxejcru räjp rexpejṉpacni lojni:

―¿Caro chaca'nu yätxtiil te cha xque' rebejṉre ree, cadro rut rbäjzdi?

5 Sas gunabdiidx Jesús lojreni:

―¿Bal yätxtiil rajptu?

Dxejcru räjpreni:

―Gajdztisni.

6 Gunibee Jesús gurej rebeṉxhidaalga loj yuj. Sas cua'ni guigajdx yätxtiilga, badeedni xquixhtios lo Dios, guḻa'ni reyätxtiilga. Dxejc badeednini loj rexpejṉpacni te guteedrenini loj rebeṉxhidaal. Bateedtireni yätxtiilga lo rebeṉxhidaalga. 7 Rajpzareni gaii bälbäz, dxejcti badedsac Jesús xquixhtios lo Dios, gunibeeni bateedzareni rebälbäzre loj rebeṉxhidaalga. 8 Dxejc gudajwreni, gudxaj xque'reni. Dxejc batojp rexpejṉpac Jesús gajdz dxijm̲ reyätxtiil näj rebäjl dxuc ni bia'n. 9 Niluxh renani gudajwga najcreni si'cti tajp mil bejṉ. Dxejcti basadiidxnireni. 10 Biunägajc Jesús rexpejṉpacni neṉ canuu, biäädreni nez Dalmanuta.

11 Biääd refarisee, renani najc rebeṉguidoo loj guedx Israel, guslojreni cayeinäjreni Jesús. Canabreni gunni te senro nani Diostis ni yu' guibaa sajc gun. Cagula'tzsireni, don xhi gunni. 12 Dxejcti bazaa lajz Jesús neṉ lastooni, räjpni:

―¿Xhicuent rlajz rebejṉ ni nabajṉ ṉaj fii gac resenro xten Dios? Rniliä́pac lojtu, di rebejṉ ni nabajṉ ṉaj fii nicla tej sen xhaguibaali.

13 Dxejcti basa'nnireni ro'c, biusacni neṉ canuu, sä'tini stelaad nisga.

14 Biaḻlajzreni nica'reni yätxtiil, luxh xhetliidi sanädireni. Tejtis yätxtiil nuureni neṉ canuu. 15 Cagulijdx Jesús rexpejṉpacni, räjpni lojreni:

―Coḻsusiṉ, coḻnati levaduur xten refarisee, coḻnatiza levaduur xten Herodes. (Nalajznu, xtiidxreni najc si'c levaduur.)

16 Dxejcti cayeinäj sa'reni diidx xcuent nani gunii Jesús lojreni, dxejc räjpreni:

―Sa'csi dinu jia'p yätxtiil, ni'c rniini scree.

17 Che gucbee Jesús xhini'c caniireni, räjpni:

―¿Xhicuent rniitu: “Sa'csi dinu jia'p yätxtiil”? ¿La gajdtu fii, la gajdtu gacbee? ¿La laḻtis nacnajd lastootu? 18 ¿La yu' balojtu, luxh ditu fii? ¿La sojb diajgtu luxh di diajgtu jiejn? ¿La dilajztu guizaj? 19 Che guḻa'a guigaii yätxtiil te gudajw gaii mil niguii, ¿bal dxijm̲ yätxtil biujy batojptu?

Sas räjpreni lojni:

―Tzubitio'pni.

20 ―Che guḻa'a guigajdz yätxtiil te gudajw tajp mil bejṉ, ¿bal dxijm̲ yätxtil biujy batojptu?

Sas räjpreni:

―Gajdzni.

21 Dxejc räjpni lojreni:

―¿La gajdtu gacbesa'c xhi benä?

22 Bidzuṉnäj Jesús rexpejṉpacni guedx Betsaida. Dxejc biädnäreni te lotiä'p loj Jesús, gunabreni loj Jesús caanni bejṉga. 23 Dxejc gunaazni ṉaa lotiä'pga, guläänini neṉ guejdx. Che batiobxhejnni neṉ rebalojni, basugajcni ṉaani yejc baloj lotiä'pga, gunabdidxgajc Jesús:

―¿La yu' xhi rhuiilu, ä?

24 Luxh che bahuii bejṉga räjpni:

―Rhuiä sasaj rebejṉ, luxh si'c yajg rhuiä lojreni.

25 Basusac Jesús ṉaani yejc rebaloj bejṉga. Dxejc bejn Jesús bahuii bejṉga. Biajctini, zijtru gujc bahuisa'cni lo guiraa rebejṉ. 26 Dxejcti baxhaḻ Jesúsni rolijzni, räjpni:

―Basquejn, huijga rolijzlu, na'c jiu'lu neṉ guejdx, na'c gäblu xhi gujclu lo rebejṉ ni yu' neṉ guejdx.

27 Birinäj Jesús rexpejṉpacni lo reguejdx ni ria'n nez Cesarea xten Filipo. Laḻni sasajreni lo nejz räjp Jesús loj rexpejṉpacni:

―¿Chuni'c rnii rebejṉ nacä narä?

28 Sas räjpreni lojni:

―Yu'reni rnii najclu Juan ni batiobnis, yu'zareni rnii najclu Elías, yu'zareni rnii najclu te rebejṉ ni gunii xtidx Dios.

29 Dxejc räjpni lojreni:

―¿La'tu a'? ¿Chuni'c rniitu nacä narä?

Dxejc bazejc Pedr diidx, räjpni lojni:

―Luj najclu Crist.

30 Dxejcti räjp Jesús lojreni:

―Rutlojdi gäbtu chu nacä.

31 Dxejcti gusloj Jesús caguluiini rexpejṉpacni, räjpni:

―Narä nacä Xi'n Dios, ni gujc Niguii. Nanabpac tedä trabajwduxh. Sibälaz rebeṉgool ni najc guxhtis neṉ guedx Israel narä, näjza renani rnibee loj rebixhojz, näjza rebejṉ ni ruluii leii: sugu'treni narä, luxh ni riojṉ dxej guibaṉsacä lo rebeṉgut.

32 Guyasi guniini rediidxre. Sas huinä Pedr Jesús telaad, dxejc räjpni loj Jesús:

―Na'c guiniilu si'c.

33 Dxejc batzuré loj Jesús, bahuiini loj rexpejṉpacni. Dxejc gudiḻṉäjni Pedr räjpni:

―Gubicaj loä, Satanás, luj dilu gun xhigab xten Dios, xhigab ni rujn rebejṉtis rujnlu.

34 Dxejc gurejdxni rebeṉxhidaal con reni najc xpejṉpacni, räjpni lojreni:

―Palga yu' chu rlajz gac xpeṉäpac, sucuääz gunni ni rsia' lajzni gunni, sutedni trabajw si'c tej ni caj lo crujz, sujiädnajlni narä. 35 Sa'csi nani rlajz gusḻaa xcäḻnabajṉni, sunijtni xcäḻnabajṉni. Luxh nani runijt xcäḻnabajṉni xcäḻnasa'c narä, xcäḻnasa'c xtidxä, siḻiaapac xcäḻnabajṉni. 36 Xlia' ga'p bejṉ guiraloj lo guedxliujre palga nitni lo Dios par tejpas. 37 Xhet gacdi gudeed bejṉ te guibaṉnäjni Dios. 38 Nani guituinäj narä con rextidxä ṉaj, cheni najc rebejṉ beṉdojḻ, narä, Xi'n Dios nani gujc Niguii, situinää́zani che jiädnää́ reangl xten Dios che jiälää́ lo xcäḻrdimbicha' Xtadä.