Luk
Dowan Weng Olo Luke Dolanebuotabe.
Tekein kemin wengobe.
Yesuse atdimo kaanea imin hananea ulanea abilim uneta omito Luke dowan weng olo dolanebiobe. Luke sino dokta bineta omito e dokta okoko deiboneta Fole okoko daaha binebiobe. E Yudababe. E weng olo Glik ten imi dolabenebiobe. Glik teni fumbianiba Kukub molot wafunino klayamobo gabib kesoa e Yesuse kukubo nabinebuo weng sango dolaibua weng olo wateniba Yesuse bain kukub molot wafunin nakabo geine geneta dolanebiobe. E nibo alebenea baanea Yesuse nakaia unanga nibo dohalinin nakabo gena bianea eka Yesuse okok dlasanin nakai okoko nabinibbuo weng sango buk mako temo dola nanebiobe.
1:1-4 Mikiktem wengobe.
1:5–2:52 Yone aa fuayemin naka esa eka Yesus esa i ten binibbuo weng sangobe.
3:1-20 Yon aa fuayemin nakae okoko weng sangobe.
3:21–4:13 Yone Yesuse aaye fuelabanebuo weng sang osa eka Gululame Yesuse dabamatemseo weng sang osa otabe.
4:14–9:50 Yesuse Galili betano nakaia unangai daaye binebuo weng sangobe.
9:51–19:27 Yesuse Galili betan ye danea monea Yelusalem bib onseo weng sangobe.
19:28–21:38 Yesuse atdimo dabasa ananomabib amo meb tebua e Yelusalem bib ye bianea okok kebinebuo weng sangobe.
22:1–24:53 Yesuse kaanebuo weng osa eka e imin hananebuo weng osa otabe.
1
1-4 Ae komok Tiofilas kobo ne weng sango dola omfubkenang genitabe. Inamin namin kukubo Sume klanea ni aleyebea nakai mikiktemo kukub olo tloa watemibi weng sang olo nisa alebeiba naka homoni bain weng olo dolabib otane nele weng olo kla kibiania wentebi kesoa inamin namino mikiktemo tam tlobu osa eka omito tam tlobu osa eka mubiango tam tlobu osa o weng sango ne alukum dola omfubkenang genitabe. Niminbabe, kobo tekein keneba weng olo bainobo genebta kla tekein kenale!
Gode baanea Lisabeto Yone dofanamabobo gesebe.
5 Sino Yudai komoke niniino Helote dabalim olo bie dimo Gode amo kimanin nakae niniino Sekalaiae bianea e sino Gode amo kimanin nakae Abaisae molofeitobe. E alelo niniino Lisabet otabe. Osa Gode amo kimanin nakae Elone molofeitobe. 6 I kamo Gode kin dimo kukub ayamo wafu bianiba Sume hekmel weng osa kla wafuna bianiba i kukub misiamo mo namin blim bianiba 7 Lisabeto fioum kesoa i kamo memei blim binabibbua am olo dimo imake hangkalebmin anabea eka alelo konokmon anaib biotabe. 8-9 Gode amo kimanin nakai kukubo inaminobe. I okoko alango wayen tlaniba am mak bomanoa Sekalaiae meletani Gode am sumo kimanin okoko klaniba Sekalaiae dofaib kesoa e tanea Gode am sumo tem tam unanea Gode heitdabanamabeo wel aaye tang ayamo bafunang genea unea 10 Yuda nakaia unangai homoni bib tam bianiba Gode nganhabiba Sekalaia ele Gode am sumo tem tamo wel aaye tang ayame bafunabea 11 Sume abisake tenea wel aaye bafunamin biino kweital sin da ye mabia 12 Sekalaiae atemnea e smiko deiba unoa tosiansea 13 abisake Sekalaiae baabanea Kobo mo tosianemebe! Kobo Gode nganhabebo e keb wengo wente kesoa keb alelo Lisabeto amun sanamabobo, sinanomo o miine dofanomo e niniino Yon ge nganabaine! 14 Ib kamwalo e dofanimibo seinhabiba naka mak unang mak isa seinhamomabiobe. 15 Niminbabe, e biemo amun temo biameo Gode Hobe bekeba bia eka dofanomo osa amitie bekeba bia eka waen aay esa aay afeto sbal osa e mo dowonamabebabo, e Gode kin dimo naka ayamobe. 16 Eka e Gode wengo Islel nakaia unangai omkayebea nakaia unangai homoni e wengo wenteniba bobol temo deskinaniba i Sume Gode omalomabiobe. 17 Makob sinanggwano Gode weng omkeimalin nakae Ilaiyae nanebio inanea Yon esa inanamabebo, Gode Hobe bekeba biamabe kesoa e titilo sumobe. Eka e sin tenea Sume deibo kebanea e weng ayamo omkaye bianea aleyebea nakaia unangai wenteniba i memei tena awa gembibo deiboniba i memei gobeniba eka naka misiam unang misiam isa i bobol temo deskinaniba Gode omaliba Yone nakaia unanga eli klaubenea ayam aniba Sume tlamabeo waisanomabiobo gesea 18 Sekalaiae abisake baabanea Ne hangkalebmin aia eka ne alelo konokmon ananobbio kesoa ne fatnanita keb wengo bainobo gebkenamabine? gesea 19 abisake Sekalaiae baabanea Ne Gebliel netabo, ne God esu ye blia e nemanea tenia kebsu ele tlania dowan weng ayamo baabkei otane 20 kobo ne wengo mo bainobo geim blim kesoa kobo kobom anebbua sinanoa ne wengo yamo balinomo dim ota kobo wengo imin baanamabeobo ge baabanabea 21 eka Yuda nakaia unangai bib tam blibi Sekalaiae waisa bianiba fumbianiba Nimin kebianeta Gode am tamo bieta afok smiko homono blimanamabone? ge fumbiba 22 e tam tle otane kobom ane kesoa e wengo mo baabeim blimobe. I atemniba funaniba Sekalaiae dam deib watemebo gabiba e kweilon ota kinea alebene otane e wengo mo baaim blimobe. 23 E okoko blimanoa e monea ele bibam bianea e alelo omebbia amunsanoa 24 am tam bua alimo asuke asuke make nao blimanoa baanoa 25 Ne sino fioum blia nakaia unangai natemniba fumbianiba O misiamobo ge fumbiba ne aal genam binabi otane mema olo Sume emaye kukub ayamo omnea amunsania aal genalino blimutnenobo gesobe.
Gode baanea Maliao Yesuse dofanamabobo ge baasebe.
26 Lisabeto amunsabua alimo 6 blimanota Gode abisake niniino Gebliele dabanea monea Galili betano bib gwabo niniino Nasalet bib ye onsebe. 27 Unang souo niniino Maliao Nasalet bib ye bianoa o imake Yosebe dobone ge baabueib otane i kamo makobo mo haanim blim blibtabe. Yosebe Yudai komok sume Debite molofeitobe. 28 Abisake tenea osu ye tlanea baabonea Ayam biebo? Sume gobke bianea kamakanea bekebkenebo obo seinale gesea 29 Maliao e wengo wentenoa bobol hekhek fumbianoa E weng olo mitmakamo fatnamine? ge funsoa 30 abisake imin baabonea Maliao obo mo tosianemebe! Gode katemnea seinkemebo, 31 obo amunsaneba mene dofanemebe e niniino Yesus ge nganabanale! 32 E damanemeo niniin sum anamabebe. Sume ne miinobo ge ohamabebe. Eka e makob e fanine Debite Yudai komoke ulab kesoa Gode Yesuse dofakanea e nakaia unangai kimanamabebe. 33 Eka e amitie Yekobe molobseli komok anamabebo, e nakaia unangai kimanino mo blimanomobabo ge baabosea 34 Maliao abisake baabanoa Ne imake mo dibim blim bli olole fatnanita ne amunsa namabine? ge baabasoa 35 abisake baabonea Gode Hob eta daabkeneta bekebkenebo, Sume titilo gekemano kesoa ob miine dofanemebe nakaia unangai oha bianiba E Gode miin kiningobo ge ohamomabiobe. 36 Eka ne weng mako baabkenamabio Ob baabo Lisabeto sino nakaia unangai owe bianiba o fioumobo, memei mo dlanamabobabo ge owe binabibo o konokanobuo otane o amunsa buo alimo 6 blimanobe. 37 Gode titilo sbal kesoa inamin namin okoko sino klam tlebuo mema olosa klabianea olosa inanamabebo gesea 38 Maliao abisake baabanoa Ne Gode okok unangobo, kobo weng olo baatnenebo Gode emaye inatneneko gesoa abisake deibo onsebe.
Maliao monoa Lisabeto am onsobe.
39 Maliao bianoa mitdanoa monoa beil bibo bib sumo Yuda betan ye unanoa 40 tamnoa Sekalaiae am tam unanoa Lisabeto baabonoa Ayam biebo? gesoa 41 Lisabeto wentenabua mene amun tem wat doungowasea eka Gode Hobe Lisabeto bekebo bia 42 Lisabeto Maliao weng sum baabonoa Obo Gode daabkene kesoa obo seinamabeobe. Unang maki seinino ob seinino gaisenoa ob mene dofanemebe Gode daabanea seinamabebe. 43 Obo ne Sume dofanamabeb otane teneba niniin blim unang ne am ele tlebobo, 44 ne ob wengo wentena bia ne mene amun tem wat seimbianea doungowanebe. 45 Obo Gode wengo wenteneba e wengo bainobo geneb kesoa Gode daabkenea seinamabeobo ge baabosobe.
Maliao Gode niniino dobtouleb bisobe.
46 Maliao baanoa Ne Sume niniino dobtouleb biania 47 Gode ne hengmino temo blio nemtlanamabe nakae bobolo fumbiania seinbibe. 48-49 Ne niniin blim besa okok unang otane Gode natemnea ne niniino nemtouleb biebe. E titilo sum kesoa e inamin namin kukub olo sum omnebo, nakaia unanga isa i molobseli walo unaib isa baaniba Maliao Gode daabonea seinbinobiobo ge onemomabiobe, Gode niniino kiningobe. 50 Sinanggwano nakaia unangai dabalim olo bianiba Gode niniino dobtouleb binibbio isa eka memalo e niniino dobtouleb blib isa sinanomo waloniba e niniino dobtouleb nomabib isa Gode dohalilanea daaye binabebe. 51 E titilsa kesoa e okoko klabianea nakaia unangai ili untak ngambibi dlanea onon tlaniba esu mebo blimaibbiobo, 52 e komok sumi niniino omabbubenea eka e nakai niniin blimi i niniin ota omfabenebiobe. 53 Eka nakaia unangai inamin namin blimi e inamin namin ayamo doyebiobe. Eka inamin namino homono bibebio naka ile e inamin namin ayamo mo doyim blimobe. E besa dlane unibbiobe. 54-55 Eblaham esa nib faninwal mak isa Gode baabenea Ne amitie ibsa ib molobseli walo unaib isa dohalim biania daaye binabibo genebuo e weng olo funanea Yuda nibo e okok kebob naka unang nibo daabenebo ge baananoa o wengo blimanole 56 Maliao Lisabeto am ye bekebo bua alimo asumatna blimanoa imin monoa olo bib onsobe.
Lisabeto Yone aa fuayemin nakae dofasobe.
57 Lisabeto miine dofanamabo dimo tloa o miine naka ten dofanoa 58 Gode omhalilanea men ele dobwene kesoa o bibam sel isa eka o meletan isa wenteniba isa seimbiba 59 amo 8 blimanoa nakaia unanga eli e aalo watlabanomo geniba teniba e niniino aalebe niniin ota imin Sekalaia ge nganabanom genabib otane 60 e awoko baanoa Yeye. E niniino Yon etabo ge baasoa 61 i baaboniba Ob meletani niniino inamini blimobo geniba 62 i Sekalaiae kobom weng baabaniba Keb miine niniino fatnangge nganabanamabebe? gesiba 63 e kobom weng baabenea Ibo tomo olutneiba dolanano gesea i tomo olubasiba E niniino Yon etabo ge baa dolasea i bobol tem hekhek fumbiba 64 Sekalaiae weng olo dolabe dim ota e wengo hebmamsab webianea baanea Gode niniino dobtouleb nea 65 e bibam seli smiko deibe unoa eka wengo monoa Yudia bib mak bib mako beil bibo onon tlanoa 66 nakaia unangai wenteniba obianiba Naka ten ele sinanomo fatnamin naka namabene? ge funmonsiobe. Niminbabe, Sume emaye daabanetabe.
Sekalaiae wengobe.
67 Gode Hobe naka ten ele aalebe Sekalaiae bekeba bie kesoa e Gode wengo omkeimanea baanea 68 Yuda bib sel nibo nib Sume Gode tenea daabenea nib hengmino walubene kesoa nib dimo enino imino mo tam tlamabobabe. Nibo e niniino dobtouleb nomo! 69 Gode naka sbale dobyebo, e Debite molofeitobo, e nibo hengmino temo biobo dotlanamabebo, 70 sinanggwano Gode e weng omkeimalin nakai weng olo omya dolaibbuo mema olo bain inanobe. 71 Sinanggwano Gode nib faninwali baabenea Ib wasi naka isa eka nakai ibo mo gobe blibba isa ne ibo i kweiban dimo deibenia dleb unamabibo ge baabenebiobe. 72 Sinanggwano e inanea nib faninwali dohalilanea bain wengo baabenea Ne amitie daayemabibo, ne weng olo sino baabeibuo mo dokotnenomobabo ge baabenea 73 Gode bain weng olo nib fanine Eblahame baabanebuo mema olo inanea 74-75 nibo daabenea nibo wasi nakai kweiban dimo dotlane kesoa nibo e okoko okok kemobo mo tosianomobe! Amitie e okoko okok kebianoba Gode kin dimo nibo kukub ayamo moloto olota wafu unomo ge baanea 76 eka Sekalaiae imin baanea
Ne miino, kobo nakaia unangai nganabkeniba God Sume weng omkeimalin nakabo ge nganabkeib kesoa kobo sin moneba Sume deibo kebanabebta e mitdaneta tlamabebo, 77 kobo Gode i hengmino omtlabenea dlamabe weng olo omkayemale! 78 Sume nibo gobenea daabenea makob afoko walabbanoa bomat ge tubunabo inanebe. Gode naka make dofakanea nib hengmino walubene kesoa olo makob nib ayalobe. 79 Nibo sino mililan bio tem tab bianoba kaanom genabob otane memalo e ayale tle kesoa nibo deib ayame alebenea bobol ayam omyenea nibo deib eleta unomabbiobo ge baasebe.
80 Eka naka ten ele damanea e bobol temo kla funanea e ibuantem ye bie bita Isleli atemomabib dimo tlota motemeta nakaia unangai atemsiobe.