1 Ra Jesu bi xipa ꞌnara ꞌbede yá nxadi gue mahyoni da ꞌyapabi Ajua̱ nza̱ntho nsinque da zabi. 2 Ne bi ꞌñembi:

―Mi ꞌbʉi ꞌnara nzaya ja ꞌnara hnini, himi tsu Ajua̱ ne ni ꞌnara ja̱ꞌi himi tsu. 3 Ne de núꞌa̱ ra hniniꞌa̱ mi ꞌbʉi ꞌnara viuda nehe, nza̱ntho mi pa da cꞌa̱ꞌtsa núꞌa̱ ra nzaya pa da ña̱ni de rá ncontraꞌa̱. 4 Pe bi thogui ndunthi ya pa nura nzaya himbi umba ra mfatsꞌi núꞌa̱ ra viuda. Pe ꞌmɛfa bi ꞌño rá mfenisɛ núꞌa̱ ra nzaya ne bi ꞌñena: “Masque nugui hindí tsu Ajua̱, nixi ꞌnara ja̱ꞌi hindí tsu, 5 pe hingo rá ngueꞌa̱ ma ga øta núꞌa̱ xica ra viuda, pa hingue xi stí tsøtcatho ma mʉi.”

6 Ra zi Hmu Jesu bi ꞌñena:

―Guehna bi ma̱nga núꞌa̱ ra tsꞌo nzaya. 7 Xihma̱ Ajua̱, ¿ha gue hinda ña̱ni núꞌʉ toꞌo xa huahni, núꞌʉ apabiꞌa̱ ma pa ra xuui? ¿Ha gue hinda matsꞌi ꞌbesthoꞌʉ? 8 Dí xiꞌahʉ gue ha̱, ꞌbestho da matsꞌi. Xi sta yopa mengui Núꞌa̱ Toꞌo e bi Nja̱ꞌi, ¿ha gue da zʉdi ndunthi toꞌo di camfri ꞌbʉ? Ya hina.

9 Ra Jesu bi ma̱nga maꞌna ra ꞌbede pa núꞌʉ toꞌo ri ꞌñetsꞌi gue ya hoja̱ꞌi ne xi ya denate, ne bi ꞌñena:

10 ―Yoho ya ꞌñøhø bi ma ja ra nija̱ pa da ꞌyapabi Ajua̱, ꞌna mrá fariseo, ha nu maꞌna mrá ꞌña̱tsa ngʉxboja̱. 11 Ha nura fariseo bi ꞌyapabi Ajua̱ má ꞌbai ne mi ena njaua: “Dí jama̱di ma Zidadaꞌi, ngueꞌa̱ nugui hindí nja ngu ya ꞌyøtꞌatsꞌoqui, ya be, ya tsꞌoꞌmʉi ne ya zinga medintha̱ti, nixi dí nja ngu nuni ra ꞌña̱tsa ngʉxboja̱ ꞌbahni. 12 Nugui dí ayuna yoꞌqui ra semana, ne nza̱ntho dí ꞌraꞌa ꞌrɛtꞌa centavo cada ra bɛxo núꞌa̱ dí ta̱ha̱,” njabʉ bi ꞌñena. 13 Pe núꞌa̱ ra ꞌña̱tsa ngʉxboja̱ bi gohi tsꞌʉ zi yabʉ de ra fariseo, ne nixi bi ne bi gʉxa yá da pa mahetsꞌi ngueꞌa̱ mi pa̱di gue xi mrá ndutsꞌoqui, pe xi mi apabi Ajua̱ con gatho rá mʉi ne mi ena: “¡Ma Zidadaꞌi, dá nja ri nthecate de guequi, ngueꞌa̱ xi majua̱ni nugui ꞌnadrá da̱nga ꞌyøtꞌatsꞌoqui!”

14 Hangue bi ꞌñenga ra Jesu:

―Dí xiꞌahʉ gue núꞌa̱ ra ꞌña̱tsa ngʉxboja̱ bi zʉdi ra pumbate de yá tsꞌoqui, ne bi menga ja rá ngu ya hinte má tsꞌoqui mi tu. Pe nura fariseo himbi zʉdi ra pumbate de yá tsꞌoqui. Ngueꞌa̱ nuꞌa̱ tóꞌo ri ꞌñexasɛ, núꞌá̱ go gueꞌa̱ ma da ꞌbɛ rá tsa. Ha nuꞌa̱ tóꞌo hini ꞌñexasɛ, núꞌá̱ ꞌmɛfa ma da tꞌeꞌtsua rá nsu.

15 Bá tsꞌimpabi ya zi ba̱tsi ra Jesu pa da hñuxa yá ꞌyɛ ne da ja̱pabiꞌʉ. Pe nu mi hyanda njabʉ yá nxadi bi zʉi núꞌʉ toꞌo mri zi yá ba̱tsi. 16 Ha nura Jesu bi ꞌñembabiꞌʉ:

―Hophʉ ya ba̱tsi da e da zʉcagui, oguí ha̱cuahʉ, ngueꞌa̱ nuꞌʉ tóꞌo da ꞌmʉi ja rá hmanda Ajua̱, mahyoni da nja ngu nuya ya zi ba̱tsi. 17 Nehe dí xiꞌahʉ gue nuꞌa̱ tóꞌo hinda nja ngu ꞌnara zi ba̱tsi pa da ꞌmʉi ja rá hmanda Ajua̱, hinda za da yʉtꞌa ja rá hmanda Ajua̱.

18 Ne de gueꞌa̱ ꞌnara nda̱ de ja ra nija̱ bi ꞌyambabi ra Jesu ne bi ꞌñembi:

―Nuꞌi Xahnate, ꞌnagrá hoja̱ꞌi, ¿te da za ga øtꞌe pa ga tsʉdi ra te pa nza̱ntho?

19 Ha nura Jesu bi ꞌñembabi:

―¿Hanja guí engagui gue drá hoja̱ꞌi? Joꞌo maꞌna ra hoja̱ꞌi, hønsɛ Ajua̱. 20 Nuꞌi guí pa̱di xá hño ya hmanda de ra ley habʉ ena: “Oxqui ntsinga medintha̱ti, oxqui nhyote, oxcrí mpe, ne oxqui jʉꞌtsua ya ncꞌuamba ri miquꞌeiui, ne umba ra tꞌequꞌei ri dada ne ri na̱na̱ ne suꞌʉ.”

21 Ha núꞌa̱ ra ꞌñøhø bi ꞌñena:

―Gatho núyá stá øtꞌe desde ndí ba̱tsi.

22 Ha nu mi ꞌyøde ra Jesu njabʉ, bi ꞌñembabi:

―Ri ꞌbɛdi gui ꞌyøtꞌa maꞌna. Rí ma gui pa gatho núꞌa̱ guí pɛꞌtsi, ne gui hecuabi ya hyoya. Njabʉ ha̱, ma grí tsʉdi ya hño de mahetsꞌi. Ne bá ehe gui tɛngagui.

23 Pe nu mi ꞌyøde njabʉ núꞌa̱ ra nda̱ xi bi du rá mʉi ngueꞌa̱ xi mrá da̱nga rico. 24 Nu mi hyanda ra Jesu gue xi bi du rá mʉi, bi ꞌñena:

―¡Xi xá hñei da yʉtꞌa ꞌnara rico ja rá hmanda Ajua̱! 25 Maꞌna hingui hei da thogui ꞌnara da̱nga mboꞌni ngu ra cameyo ja rá gu ꞌnara ꞌyofri que ꞌnara rico da yʉtꞌa ja rá hmanda Ajua̱.

26 Ha núꞌʉ toꞌo bi ꞌyøde nu mi ma̱nga njabʉ, bi ꞌñena:

―Nuꞌbʉ njabʉ, ¿toꞌoꞌa̱ da za da mpøhø?

27 Nura Jesu bi ꞌñembabi:

―Nuꞌa̱ jʉmpabi xá hñei ya ja̱ꞌi, pa Ajua̱ otho ꞌnara tꞌøtꞌe strá hñei.

28 Nepʉ nura Pedro bi ꞌñembabi:

―Ma zi Hmuꞌihe, nuje stuá tsoguihe gatho núꞌa̱ ndí pɛꞌtshe pa go stuá tɛnꞌahe.

29 Nepʉ ra Jesu bi ꞌñembabi:

―Majua̱ni dí xiꞌahʉ, nuꞌa̱ tóꞌo da zogui rá ngu, o rá dada, o rá na̱na̱, o yá cu, o rá ꞌbɛhña̱, o yá ba̱tsi po rá ngue ra ma̱ca noya, 30 nuꞌá̱ ma da hña̱ni nuua ja ra ximhai maꞌna ndunthi que núꞌa̱ xa zogui, ne ꞌmɛfa ma da hña̱nga ra te pa nza̱ntho nuni mahetsꞌi.

31 Y nura Jesu bi ꞌueque ꞌnambʉ núꞌʉ ꞌrɛtꞌamayoho yá nxadi, ne bi ꞌñembabi:

―Nubya grá maha pa Jerusale habʉ ma da nja ngu núꞌa̱ xa ꞌyofo yá ꞌmɛhni Ajua̱ de núꞌa̱ ma da thogui Núꞌa̱ Toꞌo bi e bi Nja̱ꞌi. 32 Ma da tꞌɛntꞌua ja yá ꞌyɛ ya ja̱ꞌi núꞌʉ hingyá me Israel, ne nuꞌʉ́ ma da ꞌyøꞌtua ra ntꞌeni, ne ma da ña̱maꞌñʉ de gueꞌa̱, ne ma da zotsꞌi. 33 Nuꞌʉ́ ma da naꞌmbi nepʉ da hyo, pe nurá hñupa ma da yopa nte de ra du maꞌnaꞌqui.

34 Pe nuya nxadi himi tso yá mfeni de núꞌa̱ mi xipabi ra Jesu, nixi himi tsa da ba̱diꞌʉ de núꞌa̱ mi ma̱ñꞌa̱.

35 De ya mi ma da zønga ra Jesu ja ra hnini Jericó, mi huhni ꞌnara goda ja ra ꞌñu, mi pɛti. 36 Ha nu mi ꞌyødeꞌa̱ gue mi pani ndunthi ya ja̱ꞌi, nuꞌá̱ bi ꞌñani te rá ꞌbɛꞌa̱ xqui nja. 37 Nepʉ nuꞌá̱ bi sipabi gue mi pani ra Jesu me Nasare. 38 Nuꞌbʉ́ nuꞌá̱ bi ña̱ ntsꞌɛdi ne bi ꞌñena:

―¡Nuꞌi Jesu, rá Tꞌʉꞌi ra nda̱ Davi, dá nja ri nthecate de guequi!

39 Ha nuya ja̱ꞌi mri ꞌbɛtꞌo mi tsʉi ne mi embi gue da goꞌta rá ne, pe nuꞌá̱ maꞌna mri mafi ntsꞌɛdi ne mi ena:

―¡Rá Tꞌʉꞌi ra Davi, huegagui!

40 Nepʉ ra Jesu bi gohi bi ꞌmai ne bi mɛhni toꞌo bá tsi. Y nu mi zøhø habʉ mi ꞌbaiꞌa̱, bi ꞌyambabi ne bi ꞌñembi:

41 ―¿Te guí ne ga øꞌtꞌaꞌi?

Ha nura goda bi da̱di ne bi ꞌñena:

―Dí ne ga handi, Ndada.

42 Y ra Jesu bi ꞌñembabi:

―¡Nubya ha̱ xa njabʉ ngu núꞌa̱ guí ne! Xcá ña̱ni ngueꞌa̱ xcá camfrigui.

43 ꞌBestho ra oraꞌa̱ ra goda bi za bi hyandi, ne bi dɛna ra Jesu, mi xøcambeni Ajua̱. Y gatho núꞌʉ ya ja̱ꞌi bi hyandi njabʉ, neꞌʉ bi xøcambeni Ajua̱ nehe.