Ɗerewel nakə tə watsatay naha a
Hebrœ hay
aye
Məfələkwe
Ɗerewel nakə tə watsatay naha a Hebrœ hay aye na, məzele i ndo məwetse andaya faya bay. A tsikatay me a way hay na, kə ɗa ha bay. Ndo məwetse eye na, ndo Gərek, a sər Dzam Guram eye lele. A watsatay naha na, a Yahuda neheye tə dzala ha ka Yesu aye. Nəteye ta ge bəle məpe mədzal gər ka Yesu, a gatay tsəɓtsəɓ sa bay. Siye hay a satay məgəre ha məpe mədzal gər. Hərwi niye, ndo məwetse ɗerewel nakay a say masəkahatay ha matətike nakə tə huta ada məvəlatay gədaŋ.
Tə Kəriste nakə Mbəlom a sləraw aye, ndo hay ta dzapa ta Mbəlom (1.1–2.18).
Ndo hay ta sliye faya mahəndzəɗe ka Mbəlom hərwi ŋgwalak nakə Kəriste a ge aye (3.1–5.10).
Ndo məwetse ɗerewel nakay kə ɗa ha haladzay ma kəkay nakə Yesu neŋgeye bagwar i ndo məvəlay wu a Mbəlom i ndo məpe mədzal gər hay ka tor eye andza Melkisedek.
Məpe mədzal gər i bəba təte hay mavəla eye hərwi məɗe ha a ndo məpe mədzal gər hay nakay na, ma vəlateye gədaŋ ka mətese abəra mə ɗəretsətseh hay ada tə masəpete neheye anəke aye (11–12.13). Ma dazlay ka 12.14, mandəve i ɗerewel nakay faya ma ɗiye ha kəkay nakə ndo məpe mədzal gər hay ta sliye faya məndze ta Mbəlom aye, ta ndo siye, ada məge məhay gər i ndo neheye deɗek aye.
1
Mbəlom a tsikatay me a ndo hay tə bəɗiɗay i Wawa ŋgay
1 Ahəl niye na, Mbəlom kə tsikatay me a bəba təte kway hay madzəga haladzay ada ta tsəveɗ mekeleŋ eye wal wal haladzay tə bazlam i ndo məɗe ha bazlam ŋgay hay. 2 Mbəlom a tsikawa andza niye hus a həlay kway nakay maduk i duk eye. Anəke a tsik bazlam ŋgay ɗuh na, ta bəɗiɗay i Wawa ŋgay. Mbəlom a ge məndzibəra ahəl niye tə həlay i Wawa ŋgay, a zla neŋgeye hərwi ada mâ ləva wu hay tebiye. 3 Ta ŋgateye a məzlaɓ i Mbəlom na, mə neŋgeye. Neŋgeye a ndzəkit bo Bəba Mbəlom. Wu hay tebiye andaya hərwi ŋgay. Kə ta tsəveɗ nakə Mbəlom ma bariye mezeleme abəra ka ndo hay aye hərwi ada tâ huta tsəveɗ matəre tsəɗaŋŋa. Ma dəba eye na, a tsal a mbəlom, a ye naha a ndza tə həlay i mənday i Mbəlom neŋgeye nakə a ləva wu hay tebiye aye hərwi ada tâ ləva tə neŋgeye.
4 Andza nakay, Mbəlom a ɗa ha Wawa ŋgay na, bagwar eye, a ze gawla i Mbəlom hay, andza nakə məzele niye Mbəlom a vəlay a ze i gawla i Mbəlom hay aye. 5 Mbəlom kə tsikay ɗaɗa a gawla ŋgay nəte:
«Nəkar wawa ga.
Bəgom neŋ na təra Bəba yak.»
Kə tsik ka gawla ŋgay nəte:
«Neŋ na təriye bəba ŋgay,
neŋgeye ma təriye wawa ga* 2 Samuyel 7.14.» bay.
6 Ane tuk na, ahəl nakə Mbəlom faya ma sləraweye Wawa ŋgay felik eye ka məndzibəra na, a gwaɗ:
«Gawla i Mbəlom hay tebiye tâ ɗəslay ha gər.»
7 Ka gər i gawla i Mbəlom hay na, Ɗerewel i Mbəlom a gwaɗ:
«Nəteye na, ndo i maslaŋ ŋgay hay.
A təra tay ha andza mətasl, nəteye andza ɗərneh i ako.»
8 Ane tuk na, ka gər i Wawa i Mbəlom na, mawatsa eye mə Ɗerewel i Mbəlom a gwaɗ:
«Nəkar na, Mbəlom, ka ləviye bəy yak ka tor eye.
Ka ləviye ndo yak hay ta ŋgwalak.
9 Wu nakə ŋgwalak eye na, ka wuɗa.
Wu nakə ŋgwalak eye bay aye na, a yaka a gər bay tebiye.
Hərwi niye Mbəlom, Bəba yak Mbəlom, kə zla kar
ada kə pa kar bagwar eye ka ze ndo neheye nəkurom ka bo dziye aye
ada kə vəlakway məŋgwese.»
10 Ɗerewel i Mbəlom a gwaɗ sa:
«Bəy Maduweŋ, ka madazlay i wu tebiye maa ge məndzibəra na, nəkar.
Nəkar tə həlay yak eye ka ge magərmbəlom.
11 Wu neheye tebiye ka ge aye ta dziye.
Ane tuk na, nəkar na, ka ndziye ka tor eye.
Wu neheye tebiye ta giye guram andza petekeɗ.
12 Ka paɗiye tay ha andza ta paɗiye petekeɗ guram eye.
Nəteye ta mbəɗiye andza petekeɗ a mbəɗa,
ane tuk na, nəkar na, ka mbəɗiye bay,
sifa yak ma ndəviye ɗaɗa bay.† Dəmes hay 102.26-28.»
13 Ɗaɗa Mbəlom kə tsikay a gawla ŋgay:
«Dara, ndza tə həlay i mənday ga,
hus a pat nakə neŋ, na piye tay ha ndo məne ɗəre yak hay a huɗ i sik yak aye‡ Dəmes hay 110.1.» na,
kə tsikay nəte bay.
14 Gawla i Mbəlom hay nəteye na, way hay? Nəteye məsəfəre neheye faya ta geye məsler a Mbəlom aye, ma sləriye tay ha məmatay bo a ndo neheye faya ma təmiye tay ha aye.