3
1 Coi³ cjoa⁴ nca³ tsi²coi³ coan³-na³jin⁴ qui³cho³ya²-sai³⁴jin⁴, qui³ni²cja³ˀai³tsjen³jin³-jin⁴ nca³ to⁴jin⁴-jin⁴ coi⁴yoi³⁴-jin⁴ ya⁴ Atenas. 2 Qui³cha³ni²⁴-jin⁴ Timoteo, je² ntsˀe³² xi³ si¹xa¹-le⁴ Ni³na¹, xi³ ti¹va³sen¹cao⁴-na³jin⁴ tˀa³tsˀe⁴ je² en¹nta³ tˀa³tsˀe⁴ Cristo, nca³ cˀoa⁴-sˀin² si⁴²nˀion¹-ta³con²no³ cˀoe⁴²ne²-no³ jo³-sˀin² coan⁴cjain¹-no³, 3 jme¹-ni³ nca³ tsi² tsa² ˀya³ xi³ si⁴²cˀa³ntjai²ya³ yao³-le⁴ nca³ fa³ˀa¹ je² cjoa⁴ñˀain³-vi⁴. Je³ˀyao³ nca³ jon² nca³ cˀoa⁴-sˀin² cˀoa⁴cao⁴-na¹. 4 Cˀia⁴ nca³ to⁴jo³ ya⁴ tsa³qui³yo³cao⁴-lai²⁴jin⁴, cˀoa⁴-sˀin² to⁴nqui³-ni³ tsa³cˀin²-lai²⁴jin⁴ nca³ cjoa⁴ñˀain³ chja⁴ˀa², jo³ cji³ma³, ne³ je³ti³ˀyao³. 5 Xi³ coi³ nca³ cˀoa⁴-ti⁴ an³ li²coi³ qui³sco³ya²-sa³nia³ qui³si³ca³sen¹³-nia³ nca³ scoe³-no³, jo³-sˀin² tjio¹ta³con² nca³ ma³cjain¹-no³, tsa² tsi² tsa² ya⁴ chˀao³ ti¹si¹cao⁴-no³ Satanás, tsa² tsi² tsa² to⁴cjoa⁴tjao² qui³ni²xai¹⁴-jin⁴. 6 Cˀia⁴ nca³ je³ji³nčhoa³tˀa³-ni³no³ Timoteo, ja³ˀai³nčhˀoe²-na³jin⁴, cˀoa⁴-sˀin² tsa³cˀe¹-na³jin⁴ na⁴jmi¹ jo³-sˀin² nca³ ma³cjain¹-no³, nca³ ma³tsjoa³chao³, nca³ nta³ fa³jin³-ta³con²na³jin⁴ nca³ntsjai², nca³ me³-no³ nca³ jcha⁴-na³jin⁴, jo³-sˀin² nca³ cˀoa⁴-ti⁴ me³-na³jin⁴ nca³ jcha⁴-lai²⁴jin⁴ nca³ jon². 7 Coi³ cjoa⁴ ntsˀe³², nta³ tsa² cjoa⁴fao¹ cjoa⁴ñˀain³ tjin¹-na³jin⁴, ma³jnco³-ta³coin²⁴jin⁴ xi³ tˀa³tsaon⁴³ nca³ cˀoa⁴-sˀin² to⁴nta³ ma³cjain¹-no³. 8 Ntˀai⁴-vi⁴ntai⁴ ti³yo³choin³⁴-jin⁴, tsa² cˀoa⁴-sˀin² nˀion¹ nta³ ti³yo³cao⁴³ Nai³-na¹. 9 Jme¹ cjoa⁴nta³ xi³ cˀoai⁴-lai⁴jin⁴ Ni³na¹ xi³ tˀa³tsaon⁴³, jo³-sˀin² nca³ ña³qui³ nˀion¹ nta³ tjin¹-na³jin⁴ cjoa⁴tsjoa³ xi³ tˀa³tsaon⁴³ nqui³xcon⁴ Ni³na¹-na¹. 10 Cjai¹nca³ nta³ ti³vˀe²tsˀoai³⁴-jin⁴ ni⁴čhjin³ nca³ ni⁴tjen⁴, jme¹-ni³ nca³ jcha⁴-si¹ni³jin⁴ ncjaon³, jme¹-ni³ nca³ si⁴jnco³-si¹ni³jin⁴ xi³ cha³-sa³le⁴ nca³ ma³cjain¹-no³. 11 To⁴nca³ ti⁴je²-ni³ Ni³na¹ Nˀai³-na¹ cao⁴ Nai³-na¹ Jesucristo ca²ta³si¹ca³sen¹ ya⁴ntia⁴²-na³jin⁴ nca³ coan⁴nquin¹nčhˀoe²-lai²⁴jin⁴ nca³ jon². 12 Ca²ta³si¹ncjin²ya³-no³ Nai³-na¹, cˀoa⁴ nqui²sa⁴-sa³ tse³ ca²ta³ma³tsjoa³chao³ xi²nquio⁴³ cao⁴ cho⁴ta⁴ nca³tsˀi³, jo³-sˀin² nca³ jin⁴-jin⁴ tsjoa³cha³-lai²⁴jin⁴ nca³ jon², 13 jme¹-ni³ nca³ nˀion¹-si¹ni³con³ ni⁴ma⁴-no³, ni⁴jme³-jin² je¹ tjin¹-le⁴ nca³ tsje³ cjoan³ nqui³xcon⁴ Ni³na¹ Nˀai³-na¹, cˀia⁴ nca³ cjoa⁴ˀai¹-nca¹ni³ Nai³-na¹ Jesucristo cao⁴ nca³tsˀi³ cho⁴ta⁴-le⁴.