1 Chúkula Jesús íkäi nokta noksuka, Galiléa buiärapo yeu sika, Judea buiärau bíchaa siika, Jordán bathue huáytana. 2 Juebenara gente áa sáu sájjak. Huämïri jume kökoreme tütek.

3 Huanärim áu yájjak, jume pariserom, ä jioptua báreka, ínel jíaka:

—¿Jachu yoremta béchïbo türi jäni ä jubi ä jímmaanakëhui, kía jita béchïbo junne?

4 Áapo am yómmiaka ínel jiaahua:

—¿Jachem kaa ä nok‑la, juka jïojteta? Bueïtuk júnakoy ániata naateyo, “outa entok jámutta yáuhuak”. 5 Entok két ínel jiaahua: “Íäri béchïbo jü yoreme ä áchayhua entok ä áyehua tösika, ä jubibeu rúkteka áamak jíapsinake. Huanärim ínëli huépülak náu takahuanake.” 6 Júnëlim béja katim náapat guooyi, ál‑lam náu huépülak takaanake. Juka Diosta náu rúktiakähui éntok, jü yoreme kaibu am näikimtenake.

7 Inëlim áu jiaahua:

—¿Jatchiaka júntuk Moisés ä jímmaaka divorcio jiösiata ä mák nésahuek?

8 Áapo ínel ámeu jiaahua:

—Enchim námakak jiápsekä béchïbo jü Moisés junëli ä yáatebok, jume enchim jáamuchim enchim guötianake bétana. Të tua kësampo naateka kaa junëli huéiyey. 9 Ínapone ínel enchimmeu jiaahua, jábe ä jubi täbui yoremtamak áhuä náyotek ára ä jímma. Kaa ä junëlituko, ä jubi jiösia divorciota ä mákaka täbuik jubekätek, adulterio kúlpata jípureka tatahua; entok jábe juka jímmata jubekame két jíba júkäi kúlpata huériunake.

10 Huanäi ä discíipulom ínel áu jiaahua:

—Ä ínëlitunakey, kaa áma huétche, jü emo jubiahuame.

11 Huanäi Áapo ínel ámeu jiaahua:

—Katim sïmetaka áma yuuma, ä mabet béchïbo, ál‑la huame Diosta bétana jüneehuamta mabetame. 12 Bueïtuk huate yoremem jauhuey júne kaa jujube; bempo júnel yeu tómtila. Huate entok tua káponim, yoremem ínel am yáalä béchïbo; huate entok bempo ínel emo yáala, kaitat obisi éaka, juka Diosta tékil joo béchïbo. Juka íkäi mabetakame áma áu yumäu jüneriaka ä yáanake; jíba türi éläposu jauhuey júne kaa jubnake.

13 Huanäi ili usim áu tóijhuak, áme béppa mámteka Diostau am buanianakë béchïbo; të jume discíipulom kutti ámet nónokak, Jesústa kaa múksi bít ïaaka. 14 Të Jesús ínel ámeu jiaahua:

—Akem am tójja Jume ili usim éläposum ínou kannake. Katem júkäi am úuhua, bueïtuk Diosta téhuekapo réy nésauta, bempom ä áttiak.

15 Huanäi áme béppa mámteka yeu siika, jum ä aneïpo.

16 Huanäi senu áu yepsaka ínel áu jiaahua:

—Türi Maestro, ¿jita tühuatasune yáanake jäni, juka yü jíapsihuamta jípu béchïbo?

17 Áapo ínel áu jiaahua:

—¿Jatchiake nee türï tíiya? Kaabe éntok türi, Dios jíbba. Të empo jíapsita ayukäu kibak bárëtek, Diosta nésahuim, Akë am ëeria.

18 Júnel áu jiaahua:

—¿Jíta nésaurim?

Huanäi Jesús ínel áu jiaahua:

—Katë yore súuhua. Jubekë kaa täbuimak jiápsa. Katë ékbua. Katë kía jábetat nooka. 19 Juka em átchay entok em áiye, Akë am yöre; éntoke juka emo bénasi yoremta emo bénasë ä ériaka ä bínnake.

20 Jü jübua yötume ínel áu jiaahua:

—Íkäi sïmetane ëeriala ín usitukäpo naateka. ¿Jita éntok júchi ínou bëye?

21 Jesús ínel áu jiaahua:

—Empo tua lútula jíapsi bárëteko, sikë juka sïmeta em jípurëu nénkaka, poloobem ä miika. Huanäre äbo sika ino sáu huéiye. Inëlë sïmeta joaka, áman téhuekapo ä jípunake, juka juebenak béj‑remta.

22 Íkäi jíkkajaka jü jübua yötume, kaa al‑leaka siika; bueïtuk yún jita jipurey, rikotukay.

23 Huanäi Jesús ínel ámeu jiaahua, ä discíipulommehui:

—Tuane lútüriapo ínel enchimmeu jiaahua, tepa obiachi jü riko jum téhuekapo réy nésahueu kibak béchïbo. 24 Júchine ínel enchimmeu jiaunake, chë júne kaa obiachi jü kameyo jiikia pusimpo áman ä huéenakë béchïbo, juka rikota téhuekapo Diosta réytaka nésahueu huéenake béppa.

25 Jume discíipulom íkäi jíkkajaka, tepam guómtilataka taahuak, ínel jíakari:

—¿Jábesu éntok béja ára jínëutaka tahuanake jäni?

26 Huanäi ám bíchaka Jesús ínel ámeu jiaahua:

—Jume yoremem béchïbo ïri tepa obiachi; të Diosta béchïbo kaita obiachisi maachi.

27 Huanäi jü Peero ä yómmiaka, ínel áu jiaahua:

—Señor ítapo ëni, sïmeta itom jípurëu tóij‑la; huanäite emo sáu kaate. ¿Jítasute, én, jípunake?

28 Huanäi Jesús ínel ámeu jiaahua:

—Tua lútüriapone ínel enchimmeu jiaahua, júnakoy béja sïmeta bemelasi tahuako, ínapo Diosta Üusi tua réytaka bankot yejteko jum sïmek béppa ujyorikuu, eme ino sáu rejtilame, ámanïrem két jume dooce rey bankommet jotenake. Jume Israelta dooce tribum béchïbem jueezimtunake. 29 Jábe junne juka ä jóuhua, ö áamak huéeri, ö ä áchayhua, ö ä áyehua, ö ä jubiahua, ö ä usihua entok buíata, ín téhuam béchïbo ä tójakame, cientota béekisi áa béppa ä mabetnake, Diosta bétana, éntok két juka yü jíapsihuamta. 30 Të juebénaka bát kateme chúkulam kannake; jume chúkula kateme éntok bát kannake.