8
Jesús násuk huéeka bemela nokta tüteme
1 Én éntok türi jiöbe, jü tua bát huéeme itom náu ettejhuasakäpo, jü sumo sacerdote itom jípurëu, téhuekapo buéresi reytaka jojohuäpo bátatana yejtek. 2 Diosta káripo tékilta johua. Huäri kári tua lútüriapo tabernáculo. Íkäri jü Señor ä tóboktiak, kaa jü yoreme. 3 Bueïtuk sïme sumo sacerdote juka leyta jíä páman áma yéchari, juka Diostau bíchaa näikiata entok jume kaa tü yáarim béchïbo kabaram súahuamta ä yáanakë béchïbo. Íäri béchïbo úttia áapörik két jita huériaka Diostau bíchaa ä kíktenakëhui. 4 Ä ínëlituk ímï buíapo anëtek, katchan júne sacerdotetu éiyey, jume sacerdotem ketune ímï anë béchïbo. Ímëi juka Diostau bíchaa näikiatam jojoa, leyta jíä pámani. 5 Të ímëi ä johua, juka téhuekapo johuamta bénnak. Ïri éntok mamatuahuaka jékkaataka bíttu, juka Moiséjta ä téjhuaahuaka pámani. Tabernáculota ä yáa sáuhuek, ínel áu jíaka: “Tüise át suaka ä bitcha; huanäre ánëli ä yáanake, tua alë bénnak, júya káupo em ä bíttuahuaka bénasi.” 6 Të ëni chë türi tékiata máktaka ä johua, bueïtuk Áapo yoremta entok Diosta násuk huéiyek, juka chë yörisi machik nokta náu tütehuamta yáa báreka. Ïri éntok yáataka óorek, juka chë türik nokhuaka boobít-hua pámani.
7 Të huäri bát huéeme türika yeu sikätek, tua lútüriapo kaibu jariu éehuay, jum guosa huëpo ä yáanähui. 8 Bueïtuk kutti ámeu nonokak, ínel jíaka:
Én éntok béja taahuarim äbo huéiye, jü Señorta jíä bénasi.
Nokakane nokta bemelak náu tütehuamta yéchanake,
Israel entok Judáta gentemmaki.
9 Kaa juka nokta náu tütehuamta bem áchayimmak ín yáakä bénasi,
ál‑la jü júnak taahuarimmet mámpo am buíseka Egipto buiärapo nee yeu am huíkekäpo bénasi,
bueïtuk bempom juka ín noki náu tütehuakapo, ámanim kaa aayuk,
jü Señor ínel jiaahua:
Ínapone bempörim kía tójjak.
10 Huäri béchïbone juka nokta náu tütehuakamta yáanake,
jume Israelta gentemmaki.
Entok két ínel jiaahua jü Señor:
Chúkula huámechï taahuarimmet,
jume ín leyimne bem kóba súahuapo órenake,
entokne bem jíapsimpo am jïojtenake.
Entokne áme béchïbo Diostunake;
bempo éntok ín pueblotunake.
11 Entok kaabe täbuik majtianake,
áamak aani junne, ínel áu jíaka:
Señortë täya.
Bueïtuk sïmetakam nee täyanake,
bempörim násuk jü chë ilitchi éntok jü chë yötau tájti.
12 Jum bem kaa tü yáarimpone am jiokorinake;
entok jume bem kaa tü ayulammehui,
kanne éntok ámeu huáatinake.
13 Bemela noki náu tüterita jiäpo, juka bát huémta öra tía báare. Huanäi ínëli jü örataka tahuame momoye, entok sep jëla kaitatunake.