HABAKKUK
(The Book of Habakkuk)
Habakkuk Cabu Kawng
Tonghma Habakkuk he ram a hinghong (chaos) tue vaengah kho a sak. Ram tlung Assyria neh Babylon kah tanah laklo kah Judah tah halangnah neh huencannah khaw muep yet. Tiktamnah mueh kawng dongah Job bangla Habakkuk loh Pathen te phaeng a tueng sak. Judah ah halangnah a om pawt hamla Boeipa taengah a bih. Judah dantat hamla Pathen loh Babylon a tueih pah. Habakkuk tah let coeng Babylon hlangtholh loh me tlamlae a a then aih a ti. Babylon kah a thae te Pathen loh a ueh tloel coeng dongah dan a tat. Pathen kongaih a vai pawt dongah Judah te ana mawn laeh saeh a ti. Pathen loh pilnam a khang vetih thaomnah a paek pawn ni.
Sawt Yoeinah
I. Tonghma kah kohuetnah rhaepnit 1.1—2.20
A. Kohuetnah a pacuek 1.1-11
1. Israel kah tholhnah 1.2-4
2. Pathen kah hlatnah 1.5-11
B. Kohuetnah a pabae 1.12—2.20
1. Khalden kah a muennah 1.12—2.1
2. Israel kah daemnah 2.2-20
II. Tonghma kah thangthuinah 3.1-19
A. Ming tanglue 3.1
B. Bihhoenah 3.2
C. Pathen phoenah 3.3-15
D. Tangnah aka cak 3.16-19
1
1 He olrhuh he tonghma Habakkuk loh a dang.
Habakkuk Thangthuinah Cuek
2 BOEIPA aw me hil nim bomnah kam bih lahve?
Na hnatun pawt dongah kuthlahnah te
namah taengla ka pang dae nan khang pawh.
3 Balae tih kai he boethae he
nan hmuh sak tih ka hmai ah thakthaenah,
rhoelrhanah neh kuthlahnah he nan paelki sak.
Te dongah tuituknah om tih
olpungkacan khaw puek coeng.
4 Te dongah olkhueng he dap tih
tiktamnah he a yoeyah la cet pawh.
Halang loh a dueng te a dum dongah
laitloeknah he a haeh la cet.
BOEIPA Kah Hlatnah Pakhat
5 Clt 13.41Namtom rhoek te hmu lamtah paelki laeh.
Ngaihmang sak laeh, ngaihmang sak laeh.
Namah tue kah aka thoeng khoboe he
a daek vaengah na tangnah uh mahpawh.
6 2Mg 24.2Namtom ah aka khahing
Khalden te ka thoh ngawn coeng ne.
Te dongah amah kah pawt khaw
dungtlungim pang ham tah
khohmuen hoengpoeknah ah cet paitok lah ko.
7 Anih tah a rhimom tih a rhih khaw om.
Amah lamloh a laitloeknah neh
a boeimangnah khaw a khuen.
8 A marhang te kaihlaeng lakah loe tih
hlaemhmah uithang lakah a lai haat.
A marhang caem rhoek a pet uh vaengah
a marhang caem loh a hla lamkah khaw
a pha uh tih caak hamla
aka paco atha bangla ding uh.
9 Kuthlahnah ham a pum la
lambong neh cet uh.
A maelhmai te khothoeng la
a khueh uh tih laivin bangla tamna a kuk uh.
10 Anih loh manghai rhoek te a soehsal tih
boeica rhoek khaw anih taengah nueihbu la poeh.
Anih tah hmuencak takuem ah
a luem dongah laipi a hmoek tih hmuencak te a loh.
11 Mueihla loh a hil tih a pah vaengah
amah thadueng te a pathen la
aka ngai te tah boe coeng.
Habakkuk kah Thangthuinah Pabae
12 Ka Pathen BOEIPA,
ka hlangcim namah he hlamat lamkah moenih a?
BOEIPA te ka duek sak uh thai mahpawh.
Laitloeknah ham amah na khueh tih
aka toel ham khaw amah te lungpang la na khueng.
13 Mik he cil lamloh boethae te a hmuh tih
na noeng mueh thakthaenah te a paelki.
Balae tih hnukpoh rhoek te na paelki,
halang loh amah lakah
aka dueng a dolh vaengah na ngam?
14 Te dongah hlang he
tuitunli kah nga bangla na saii tih
rhulcai bangla anih soah aka taem khaw tal.
15 A pum la vaih neh a doek tih a soh neh a hoi,
a lawk neh a kol.
Te dongah a kohoe tih omngaih van.
16 Te dongah a soh taengah te a nawn tih
a lawk taengah te a phum.
Te long te a khoyo a ul pah tih
a buh a tham a kom pah.
17 He dongah nim a lawk te a soh a duen vetih
sainoek bangla namtom ngawn ham te
lungma a ti pawt eh?