KHOKHUEN CABU
A Pabae Nah
(The Second Book of the Chronicles)
II Khokhuen Cabu Kawng
Khokhuen Cabu a pacuek neh a pabae he lamhma ah pakhat lam ni a om. Adam lamkah a tong tih 538 b.c. Babylon vangsawn lamkah a mael uh hil kah Pathen pilnam kah khokhuen cil a rhui te a thuep.He cabu loh olpuei la a thui tah, a tue he lang tih thovael mai cakhaw Pathen tah a pilnam taengah uepom la om. Uepom hlang Pathen loh a bom te diklai rammawtnah (politic) kawng lakah a tueng sak. A thuem la Pathen bawknah neh Pathen taengah pilnamloh ol a kam te a tip la a thui. He cabu aka taelkung long he boe aka koek tlangpuei ram lakah Boeipa taengah uepom la aka om tuithim (Judah) kawng he a paelki. Jerusalem kah Bawkim aka sa Solomon kawng he a tip la a thui. 586 b.c vaengah Babylon caem loh a muk uh tih sal la a khuennah kawng khaw a tueng sak. Cabu a bawtnah ah Persia Cyrus loh Judah hlang amah ram la a mael saknah kawng khaw a thui.
Sawt Yoeinah
Solomon Bawkim a sak 1.1—9.31
Manghai rhoek paekboenah 10.1—28.27
Manghai a bawtnah 29.1—36.23
1
Solomon Loh Cueihnah A Bih
1 David capa Solomon loh a ram ah thaa a huel vaengah anih te a Pathen BOEIPA loh a so la a pantai sak hang. 2 Te vaengah Solomon loh Israel boeih te khaw, thawngkhat neh yakhat mangpa rhoek te khaw, laitloek rhoek te khaw, Israel pum kah khoboei neh a napa boeilu boeih rhoek te khaw a voek. 3 Te phoeiah Solomon neh a taengkah hlangping boeih te Gibeon kah hmuensang la cet uh. Teah te khosoek ah BOEIPA kah sal Moses loh a saii Pathen kah tingtunnah dap khaw om. 4 2Sa 6.1-17; 1Kh 13.5-14; 15.25—16.1David loh Pathen thingkawng te Kiriathjearim loh amah te ham a saelh hmuen la a khuen. Te ham te David loh Jerusalem ah dap a tuk pah. 5 Sng 38.1-7Tedae Hur koca Uri capa Bezalel kah a saii rhohum hmueihtuk te tah BOEIPA kah dungtlungim hmai ah a khueh tih te te Solomon neh hlangping loh a dawt. 6 Te phoeiah Solomon te tingtunnah dap ah BOEIPA mikhmuh kah rhohum hmueihtuk taengla pahoi cet tih a soah hmueihhlutnah thawngkhat a nawn. 7 Tekah khoyin ah tah Pathen te Solomon taengah phoe tih anih te, “Mebang khaw bih lamtah nang te kam pae eh,” a ti nah.
8 Te dongah Solomon loh Pathen taengah, “Namah loh a pa David taengah sitlohnah muep na tueng dongah kai he anih yueng la nan manghai sak. 9 Sue 13.16; 28.14BOEIPA Pathen aw, na ol he a pa David taengah cak saeh. Namah loh kai he diklai laipi, pilnam miping soah nan manghai sak coeng. 10 Kai he cueihnah neh cangnah m'pae mai laeh lamtah pilnam mikhmuh ah he ka kun ka ael, ka vuenva pawn eh. Na pilnam he yet he u long nim lai a tloek ve?” a ti.
11 Te dongah Pathen loh Solomon te, “He he na thinko ah om pai tih khuehtawn koeva neh thangpomnah nan bih moenih, na lunguet kah hinglu neh khohnin a puh khaw nan bih moenih. Namah ham te cueihnah neh cangnah nan bih. Te nen te a soah nang kan manghai sak thil ka pilnam te laitloek pah. 12 Cueihnah neh cangnah te nang taengah kam paek. Te phoeiah khuehtawn neh koeva neh thangpomnah khaw nang taengah kam paek ni. Te bang te nang hmai kah manghai rhoek taengah khaw om pawt tih nang hnukah khaw te bang te om mahpawh,” a ti nah.
13 Te phoeiah Solomon tah Gibeon kah hmuensang lamkah tingtunnah dap hmai lamloh Jerusalem la cet tih Israel te a manghai thil.
Solomon kah Leng Neh Marhang
14 1Mg 4.26Te phoeiah Solomon loh leng neh marhang caem te a coi tih a taengah leng thawngkhat ya li neh marhang caem thawng hlai nit a om pah. Te te leng khopuei khui neh Jerusalem kah manghai taengah a khoem. 15 Manghai loh cak neh sui te Jerusalem ah lungto bangla a kuk tih lamphai te kolrhawk ah aka ding thaihae bangla a hawn. 16 Olr 17.16Solomon kah marhang rhoek te Egypt lamkah neh Kue lamloh a thawt pah. Kue lamkah te manghai kah thenpom a phu la a loh uh. 17 A khuen uh vaengah khaw Egypt lamkah te leng pakhat ah tangka ya rhuk neh marhang pumat te ya sawmnga neh a khuen uh. Te tlam ni Khitti manghai boeih neh Aram manghai rhoek taengah khaw amamih kut neh a khuen uh.