1 Vərdi anik, Yesu ahàd à mtəga aŋa tekula aŋa məŋga aŋa azla Farisəya la vuɗ maduw ləv, kà mazuw tatak may. Azladza uwana la abatà, tanərə̀z Yesu lela. 2 Dza anik la ahəŋ uwana makəsl vəɗah gà la abatà la huma aŋha. 3 Yesu apə̀h gay à azlaməŋga aŋa azlaməna mapəhla mapəhay ala la azla Farisəya: “Wakità mapəhay gami ma avà tetəvi kà mawur dza ala la vuɗ maduw ləv takay?” 4 Ama asà à atà mawulla gay à uda aw. Kiya uwaga aɓə̀k ahàl à masla ɗuvats à gəl, awuràŋ ala, ŋgaha asàk à dza uwatà, adà aŋha. 5 Yesu agòɗ à atà: “Uwa à uwana bəzi aŋha àŋkaw kokur aŋha atəɗ à suwa à abà ma la vuɗ maduw ləv kà, azəɓ à uda aw uwi?” 6 Dza la ahəŋ aslàla vok kà mawulla gay à uda lakəl aŋa uwaga aw.

7 Iyay, la abatà Yesu anərə̀z maya­hani slaka aŋa azladza uwana tazàlàh atà à maham gay à vok à abà. Tayahay kà azla­slaka delga. Kiya uwaga apə̀h à atà gay uwaga: 8 “Baŋa dza azàla ka à madəvaday mazəɓ mis à abà kà, kayàh slaka madza madzay delga gà dadàŋ aw. Zlahaw dza anik la ahəŋ, à uwana tazàlal à madəvaday uwaga à abà, aɗuwa ka bay ma? 9 Ŋgaha kà pəra masla mazallàh akul atsa à waŋ, agoɗ à ka: ‘Kona, sàkla slaka uwaga à dza uwanay.’ La abatà kà, kak kà magol ziruwi adahama ka à gəl kà matsizlla ala la huma, kà mad à lig. 10 Ama baŋa tazàla ka kiya uwaga kà: Hàd, kadza aŋak à madzay la lig. Kà uwana la mok uwana masla mazallàh akul adàda à awtày kà, adàgoɗ à ka: ‘Slawda, kak kà, zà vok à huma à gay la abanay’, la abatà kà, kà aŋak kà adàgay dzəɓa aŋha səla aw la huma azladza uwaga gesina, kà kak aŋa mad à huma à gay.✡ 14.10 Haŋkəli 25.6-7 11 Kà uwana kəla uwa­be­yuwi uwana azigən gəl aŋha kà, tadà­wulla ala à lig. Ŋgaha dza uwana awulla gəl à vəɗah kà, tadàdalla à huma.”

12 Kiya uwaga Yesu agòɗ à dza uwana, azàlàh babay: “Iyay zlà, baŋa kavà tatak may, baŋaw kata kaf à uda kà, kazàllàh azla­slawda aŋak la azla­deda aŋak, baŋaw la azla­yaga aŋak, la azlaməna magay aŋak, uwana azla­ga­le­piga pəra aw. Way kà atà babay kà tadà­zalla ka vərdi anik, kà mazuw tatak, kà uwana baŋa tazàla ka kà bokuba tapə̀lla ka uwana à abà tazùw la mtəga anak suwaŋ. 13 Ama baŋa kat kaf à uda kà, zàlàh kà azlaməna kuɗa, azla­ma­godu, azla­deri ŋgaha la azla­gu­ləf pəra. 14 Kità kà, kadàgay la marabay, kà uwana atà kà taslala vok aŋa mapəlla ka à abà aw. Uwaga kà Zəzagəla la uwana adàpəlla ka à abà la mavakay uwana adà­wulla azladza dziriga à uda la mamətsay.”‘

15 Mok uwana tatsə̀n gay uwaga kà, tekula la tataka aŋa azladza uwana la tatak may la adi, agòɗ à Yesu: “Tsa kətà kà, marabay agay la dza uwana adàzuw tatak may aŋha la makoray aŋa Zəzagəla!” 16 Yesu agòɗ à atà: “Dza anik la ahəŋ, atà magol kaf à uda, ŋgaha azàlàh azladza aŋuvaw. 17 La mok uwana tatak adahənay kà, aslə̀l magamza aŋha kà mazalàh azladza uwana tapàh à atà: ‘Sàw à waŋ, sàw à waŋ adagay, kà uwana tatak may kà adahənay!’ 18 Ama gesina aŋatà tadzəkà manav kamkam la tekula tekula. Matera agòɗ à magamza: ‘Gi, gəsùkw guf kà, asa à gi, gəday kà manəŋəŋ, kamkam bàsgəŋ.’ 19 Kiya uwaga masəla agòɗal aya: ‘Gəsùkw sla səɗuk zlo, gəday gədàgurla atà sləray, kamkam bàsgəŋ.’ 20 Ŋgaha anik agòɗal aya suwaŋ: ‘Gi kà, gədazəɓ mis kà bà lagwa lagwa, kà uwaga à uwana gəslala vok aŋa manəf ka aw pəra.’ 21 Kiya uwaga magamza awùl à slaka məŋga aŋha, apə̀hal uwana tapàhal gesina. La abatà kà, zil gày apàk ləv, la magoɗay à magamza aŋha: ‘Hàd, katskats à azla­va­da­vaday à afik, la azlagay barama à ama la huɗ gudəŋ la abà, ŋgaha hàd kasəlla azlaməna kuɗa à waŋ, la azla­ma­godu, la azla­gu­ləf ŋgaha la azla­deri gesina!’ 22 Zwek la huma, uwana uwaga adaɗaha vok kà, magamza asà à waŋ agòɗ à məŋga aŋha: ‘Məŋga, uwana kapə̀h kà, aɗahà vok, ama slaka atamà à ahəŋ bà gotənaŋ aya.’ 23 Kiya uwaga məŋga agòɗ à magamza aŋha: ‘Lagwa kà, dàh à azlabəza mazləramàh tetəvi à ama, la azlalig zlagam, fàh à atà gasa à gəl, kà masəlla atà à waŋ kà aŋa mahənla aŋa gày gulo! 24 Ndzer, gəpəh à akul la dziriga kà, azla­uwana gəzàlàh atà takwèsàh kà, tetuwa tadàtap tatak may gulo tetuwa aw.’ ”

25 Maham à ahəŋ dza aŋuvaw tanəfà Yesu la tsəh. Yesu agòla vok, ŋgaha agòɗ à atà: 26 “Baŋa dza asal, manəf gi kà, say apəsew baba aŋha, la iyà aŋha, la mis aŋha, la azlabəza aŋha, la azla­deda aŋha ŋgaha amiyaka gəl aŋha dadàŋ. Tsa baŋa kiya uwaga aw kà, aslala vok aŋa magay masla matapla la slaka gulo aw. 27 Kəla dza uwana akəs mamətsay aŋha, ŋgaha anəf gi aw kà, aslala vok aŋa magay masla matapla la slaka gulo aw. 28 Baŋa dza asal maŋal magol gày kà, say adza madzay dadàŋ, atugw tatak uwana adàziŋ ala gesina dadàŋ. Baŋa sili aslay kà mahənlaŋ ala, la uwana adzəka sləray. 29 Awkà baŋa adzəka maf godega à gày à ahəŋ pəra, uwala à adà­hənəŋ ala aw kà, kəla dza uwana adànəŋ gày uwana ahənla aw kà, tadàdzəka makəɗaslal. 30 Tadà­goɗay: ‘Nə̀ŋàw tsi, kona uwanay tsi: Adzəkà maŋal magol gày, uwala aslala vok aŋa mahənəŋ ala aw tsi!’ 31 Kiya uwaga babay la sufəl uwana asal map guvəl la sufəl anik kà, say adza madzay dadàŋ, kà manərəzay à baŋa dza dəbow kulo aslala vok aŋa map guvəl la dza dəbow dzik səla. 32 Baŋa aslay aw kà, tsa sufəl anik uwanay aləg kərkər dadàŋ kà, say asləl gay kà manav masəl vok atà səla.” 33 Yesu agòɗ kiya uwaga babay zlà: “Baŋa dza apəsew tatak aŋha gesina aw kà, aslala vok aŋa magay masla matapla la slaka gulo aw!”

34 “La haɗay gà kà, slugul kà tatak delga. Ama baŋa azlaɗay aya aw ma, kakay dza azlaɗəŋ ma? 35 Uwaga akəsa vok baməraka aŋa kutso aw, ŋgaha bay apàk arəguwa babay aw. Uwaga kà say maftukw ala pəra. Dza uwana sləm lakəl kà atsəɓal sləm lela zlà!”