1 La lig aŋa uwaga la ahəŋ, malika tekula la tataka azla­ma­lika məɗəf uwaga la abà, tasà məɗəf la ahàl, asà à waŋ, agòɗ à gi: “Sà à waŋ, gəpəha­kalla kakay à uwana mis masla mazaɓ zilga uwaga adàsa ŋgərpa mi, mis uwaga kà asal magoɗay kà: Huɗ gudəŋ uwana taŋàl à gay mukwà dəŋ. 2 Kiya uwaga azla­su­fəl aŋa gudəŋ à vok taɗa­hàhà mabila la masla, ŋgaha atàpla maɗàh mabila aŋha à azladza la mabiy azladza gudəŋ à vok, ŋgaha tadà à maɗàh uwaga à abà babay.”

3 Kiya uwaga Masasəɗok Zəzagəla asà à gəl gulo, ŋgaha malika uwatà adàla gi à fəta à abà. Mok uwana gi la fəta la abà, gənəŋà mis tekula adadza à tatagà à lig. Tatagà uwatà kà mativga, gəl məɗəf la vok, ŋgaha la dərew kulo lakəl. Vok aŋha kà tsa­tsa­basla matsetser à ahàl sləm matsəkla mago­ɗahay à Zəzagəla à gəl ala à vok. 4 Ama kà aŋa mis uwatà kà, masla atsòkw azla­lukut seda mativga viku­zaga à abà. Masla aɓə̀k tatak ɓə̀ɗà à vok, azlaa­daga la azla­lu­wà­lu­wàga, ŋgaha la azlaakur uwana sləm aŋatà la ahəŋ, tasà luwà­luwà gà la ahàl. Tasà uwatà ada­henla la azla­tatak vaŋvaŋga, bokuba magoɗay kà mabila uwana aɗa­hàhàŋ. 5 La madəgay aŋa mis uwaga kà sləm anik la ahəŋ. Uwaga kà sləm uwana mahaɗ vok à ahəŋ gà. Sləm uwaga tatsetser kà aga: MƏŊ HUƊ GUDƏŊ BABILA, IYÀ AŊA AZLAMƏNA MAZAƁ ZIL, ŊGAHA IYÀ AŊA AZLATATAK VAŊVAŊGA MAWISIGA, VAŊVAŊGA UWANA LA GUDƏŊ LA VOK GESINA. 6 Gənəŋà mis uwatà kà, aŋiz aŋa azlaməna gay Zəzagəla ada­wisla gəl à vok. Kà mana takàɗ atà mi kagoɗaw ay? Kà uwana tazà gay marabəŋ aŋa Yesu.

Uwana gənəŋà uwaga kà, ləv avàl à gi à gay. 7 Malika uwatà agòɗ à gi: “Kà mana ləv avàl à ka gay ma?” Agòɗ à gi: “Tsə̀nàŋ, gəpəha­kala godega aŋa gay mahaɗ vok à ahəŋ gà uwaga, lakəl aŋa mis uwanay kà, ŋgaha lakəl aŋa tatagà uwana mis aga la lig kà, uwaga kà tatagà uwana gəl aŋha məɗəf ŋgaha dərew kulo lakəl kà uwaga. 8 Tatagà uwaga kanəŋàŋ kà, agà la sifa uwarà, ama lagwa kà la sifa aya aw. Zewk kà, adàwula à uda la afək zəŋzəŋga uwatà la abà aya. Baŋa adasa à uda kà, Zəzagəla adàkəɗay tsokw­fasl. La mok uwana Zəzagəla adzəkà maŋal gudəŋ à vok, atsetsèr sləm aŋa azladza uwana tadàɓəza sifa à wakità aŋa sifa à abà, ama azladza anik la ahəŋ kà, sləm aŋatà la wakità aŋa sifa la abà aw. La kaslà uwana tadànəŋ tatagà uwaga kà, ləv adàval atà à gay, kà uwana agà la sifa uwarà. Ama lagwa kà la sifa aya aw, ama zewk kà adàwula à uda.”

9 Kiya uwaga agòɗ à gi aya: “Kà matsən uwaga kà, say azladza tagay azla­ma­tsi­hi­laga, la haŋkəli. Azlagəl məɗəf uwaga kà, apəhla ala kà azla­dadəgwal məɗəf, uwana mis adza à afik. Uwaga apəhla ala kà azla­su­fəl məɗəf babay. 10 Kiya uwaga azla­su­fəl məɗəf: Azla­su­fəl zlo kà makoray aŋatà kà adada à lig tsewwa. Maməkwaga aga la sufəl la afik. Ama maməɗəf kà, kaslà aŋha adasa à waŋ dadàŋ aw. Baŋa kaslà uwaga adàslay kà, adàzuw sufəl kà, kà aŋa kaslà ŋuv pəra. 11 Tatagà uwaga la aslasl gəl aŋha, uwana agà la sifa uwarà, ŋgaha masla la sifa aya aw. Masla tekula la tataka aŋa azla­su­fəl məɗef bay, masla adà­pakay sufəl mamtəgis. Baŋa adà­zla­ŋazlay kà, Zəzagəla adàkəɗay aŋa tetuwa.”

12 “Kà aŋa azla­dərew kulo aŋa tatagà uwaga kà, kanəŋàŋ kà, masla apəhla ala kà lakəl aŋa azla­su­fəl kulo, uwana tadà­zla­ŋalay, ama tazùw sufəl dadàŋ aw. Ama mok uwana tadà­zla­ŋalay kà, tadàɓəza maslay kà aŋa kaslà ŋuv. 13 Azla­su­fəl uwaga gesina tadà­tsən vok gay. Atà tadàvà ndzəɗa la maslay aŋatà kà maɗàh sləray à tatagà uwaga, 14 tadàpa guvəl la magadzaw. Masla kà, aɗuwa atà, kà uwana masla kà Sufəl aŋa azla­su­fəl. Masla la uwana aɗuwa azla­su­fəl gudəŋ à vok gesina, azlaaŋha tanəfay la ləv tekula. Kà uwana masla la uwana atsa­tsà­mànì atà ŋgaha azalà atà kà manəfay, kiya uwaga kà tadàɗuw atà gesina.”

15 Bà gotənaŋ, malika uwaga agòɗ à gi: “Dərəv uwanay kanəŋàŋ, à uwana mis masla mazaɓ zilga uwaga adza à afik kà, apəhla ala kà azladza tsəhay gay gesina, ŋgaha azla­uwana tasà à waŋ la makaɗ gəl à ahəŋ gudəŋ à vok gesina. 16 Azla­dərew kulo uwaga kanəŋà atà, ŋgaha la tatagà uwaga la aslasl gəl aŋha la uwana tadàzin vok à mis masla mazaɓ zilga uwaga ala. Tadàhəl tatak à mis uwaga ala, tadàməl à ahəŋ la godega deyday. Matəm à ahəŋ aŋha kà tadàtəl à gay. 17 Uwaga kà, kà uwana Zəzagəla aguwà la ləv aŋa azla­su­fəl kulo uwaga la tsəh, kà maɗehəŋ uwana asal. Kiya uwaga kà, tatsənà vok gay, kà maɗàh sləray la ndzəɗa aŋatà gesina kà aŋa tatagà uwaga. Tatagà uwaga adà­koray tsəràh à uwana à gay aŋa Zəzagəla adàgəɗ à afik.”

18 “Ŋgaha mis uwana kanəŋàŋ kà uwaga kà məŋ gudəŋ, uwana la maslay lakəl aŋa azla­su­fəl gudəŋ à vok gesina.”