2
Mayyi Yesu
(Mata 1.18-25)
1 La zamana uwatà Awgustus, məŋ sufəl aŋa azla Rom agòɗ kà: ‘Say tatugw dza la makoray gulo gesina’, agòɗ. 2 Uwaga kà matugw dza matera, uwana apakà vok la zamana aŋa Kwiriniyus gumna aŋa kutso Səriya. 3 Azladza gesina tadàh kà matsetser atà, kəla uwabeyuwi adà à gudəŋ aŋha.
4 Yusufu babay atsìzlla ala la Nazaret la kutso Galili, kà maday à kutso Yahudiya, à huɗ gudəŋ uwana à abà, Betelehem tagòɗal, à slaka uwana tayyà sufəl David à abà. Kà uwana masla kà mayyi à tsəh ala aŋa David. 5 Tahàd kà matsetser sləm aŋatà, la mawɗa aŋha, Mariyama, uwana akùd kaslà masewk à ahəŋ. 6 Kiya uwaga, mok uwana tabəzay, kaslà masewk à ahəŋ aŋha adaslay. 7 Ŋgaha ayyà bəzi zilga, malkwoy aŋha, afafàɗal lukut à adi, ŋgaha ahənàŋ à daŋor à abà, kà uwana slaka la ahəŋ kà aŋatà la gày məlok dza la aku aw.
Malika apəhla vok à azlaməna manəŋla azlatatak
8 La gudəŋ uwatà, azlaməna manəŋla azlatatak la ahəŋ uwana tahanay la fəta kà manəŋla azlatatak aŋatà. 9 Malika aŋa Sufəl Zəzagəla apə̀hatàla vok, ŋgaha mazləɓay aŋa Sufəl Zəzagəla awùɗla slaka aŋatà. Guba akə̀s atà gesina aŋatà. 10 Ama malika agòɗ à atà: “Guba akəs akul aw, kà uwana gəsà à akul à waŋ kà gay matsiɗayga, uwana adàrab azlatsəhay gesina. 11 La huɗ aŋa vəɗ uwanay la abà, la huɗ gudəŋ aŋa David la abà kà, tayyà à akul masla maɓəl akul: Masla Kristu, Sufəl. 12 Aganay tatak uwana adàpəhakulla: Kadànəŋaw bəzi vərna mafafàɗal lukut à adi gà, mahənəŋ à ahəŋ gà la daŋor la abà.”
13 Katskats, maham à ahəŋ malika la zagəla tahamà gay à vok la malika uwatà, taslə̀kàw Zəzagəla tagòɗ:
14 “Mazləɓay aga la Zəzagəla uwana la zagəla,
Lapiya aga la gudəŋ la vok la slaka azladza uwana Zəzagəla awoya atà, ŋgaha azlauwana tawoya masla babay!”
Azlaməna manəŋla azlatatak tahàd à gudəŋ Betelehem
15 Mok uwana azlamalika tasàk atà à ahəŋ, tawùl aŋatà à zagəla kà, azlaməna manəŋla azlatatak tagòɗ à vok kà atà à atà: “Məhàd tsəràh à Betelehem zlà, delga kà mənəŋ tatak uwana apakà vok, mədànəŋ Sufəl Zəzagəla apə̀hanula zlà”, tagòɗ. 16 Ŋgaha atà tamərà vok kà maday, taɓə̀z à Mariyama à vok atà la Yusufu, ŋgaha la bəzi vərna, uwana mahənəŋ à ahəŋ gà la daŋor la abà. 17 Mok uwana tanəŋə̀ŋ, tatùgw gay uwana tanəŋàŋ, la uwana tatsənà la slaka aŋa malika lakəl aŋa bəzi. 18 Azladza uwana tatsə̀ɓ sləm à azlaməna manəŋla azlatatak uwaga kà, ləv avàl atà à gay gesina, kà uwana tatsənà uwaga. 19 Ama Mariyama kà, aɓə̀k uwaga gesina à gəl aŋha à afik, adzùgw uwaga la lela. 20 La lig la ahəŋ, azlaməna manəŋla azlatatak takə̀s tetəvi kà mawul aŋatà la mazləɓ Zəzagəla. Tazləɓà masla kà azlatatak uwana tatsənàŋ, la uwana tanəŋàŋ, kà uwana uwaga gesina kà, apakà vok bokuba uwana malika apə̀h à atà.
Mapəhla Yesu ala la məŋ gày Zəzagəla la aku
21 Mok uwana kasukwa tekula adadà à lig kà, mahənay adaslay kà makədəv Yesu à uda, tavàl sləm Yesu, sləm uwana malika apəhla ala à mok uwana iyà aŋha alə̀g mazəɓ à huɗ dadàŋ.✡ 2.21 3Musa 12.3
22 Ŋgaha bokuba uwana gay aŋa maɗàh mavəlàh adadəv à gay kà, bokuba uwana mapəhay aŋa Musa agoɗ, tadàla Yesu à Urusalima kà mapəhla masla ala la huma aŋa Sufəl Zəzagəla, 23 bokuba uwana tatsetsèr à mapəhay aŋa Sufəl à abà:
ˈKəla malkwoy zilga kà, uwaga tatak matsufay gà aŋa Sufəl Zəzagəla la fəta la awtày tsikasla.ˈ
24 Takaɗàh azlatatak uwana kaɗàw, wakità mapəhay agòɗ:
ˈAzlahabakoku fəta səla baŋaw azlazlabara habakoku mtəga səla.ˈ✡ 2.24 2Musa 13.2,12; 3Musa 12.6-8
Mahabay aŋa Səmeyyon
25 Dza anik la ahəŋ la Urusalima uwana sləm aŋha Səmeyyon. Zil uwatà kà dza dziriga, akə̀s gay aŋa Zəzagəla, ŋgaha akudà dza uwana naka atsa à waŋ, kà maɓəl azladza Isərayel. Masla kà agà la Masasəɗok Zəzagəla. 26 Ŋgaha Masasəɗok Zəzagəla apə̀hla à vok à abà kà, adàmətsay dadàŋ aw, say baŋa adànəŋ huɗ adi aŋa Kristu, uwana Sufəl Zəzagəla adàsləl à ahəŋ dadàŋ. 27 Masasəɗok Zəzagəla adàla masla à məŋ gày Zəzagəla à agu, la mok uwana azlababa tasə̀lla Yesu à waŋ, kà maɗahallaŋ bokuba uwana: ‘Ɗahàwwàŋ’, wakità seriya agòɗ. 28 Səmeyyon azə̀ɓ bəzi à ahàl, ŋgaha ‘Kikay’, agòɗ à Zəzagəla la magoɗay:
29 “Sufəl, lagonay kà mapəh à ahəŋ aŋak kà adagəɗ à afik,
Sàk à mayà aŋak aməts aŋha la lapiya adagay zlà,
30 Kà uwana lagwa kà, gədanəŋ maɓəlay aŋak la yewdi gulo,
31 Uwana kaɗahàŋ à ahəŋ kà aŋa tsəhay gesina.
32 Uwaga la uwana uɗaka uwana adapəhla ka ala la huma azladza gudəŋ à vok gesina,
Uwaga la uwana adavà mazləɓay à tsəhay aŋak Isərayel.”✡ 2.32 Yesayya 42.6; 49.6; 52.10
Mapəh à ahəŋ aŋa Səmeyyon
33 Baba la iyà aŋha atà səla nna ləv avàl atà à gay kà gay uwana Səmeyyon apə̀h lakəl aŋha. 34 Səmeyyon apìs à atà gay à vok, ŋgaha agòɗ à Mariyama iyà aŋa Yesu: “Zəzagəla akə̀sànì bəzi uwanay kà, kà matsalla matekwiɗ, ŋgaha kà aŋa matsizlla azladza aŋuvaw ala la tataka azla Isərayel la abà. Adagay tatak manəŋal adi aŋa Zəzagəla, uwana azladza tadàkweska. 35 Ŋgaha adàpəhla madzugway aŋa azladza gesina ala la uɗaka la abà la dazuwaya, ŋgaha kak babay kà, katsakar adàzləl madzugway aŋak ala kà madzugway aŋa tsəh ləv aŋak mas à uda la dazuwaya.”
Mahabay aŋa Hana, masla mapəhal gay ahàl misga
36 Agà la ahəŋ babay masla mapəhal gay ahàl misga uwana sləm aŋha kà Hana, dugu aŋa Fanuyel uwana la tsəhay aŋa Asər. Masla adagay makoz, zil dahalay aŋha uwana ahàd kà, taɗahà mavay məɗəf atà səla, 37 adzà à ahəŋ bokuba mis kuɗa tsəràh à mavay dzik mtəgis gəl aŋha ufaɗ. Masla azàhà vok la gày Zəzagəla la aku aw, la mavakay la mahanay gesina, azlàkàh Zəzagəla, ŋgaha akàs nəlay la madəv kuɗa babay. 38 Asà à waŋ la kaslà uwatà, “Kikay”, agòɗ à Zəzagəla, ŋgaha apə̀h gay aŋa bəzi à azladza gesina uwana atà takudà kà Zəzagəla aŋa maɓəl Urusalima.
Mawul à gudəŋ Nazaret
39 Mok uwana azlababa aŋa Yesu tadàva tatak uwana à gay: ‘Ɗahàwwàŋ’, wakità mapəhay aŋa Sufəl Zəzagəla agòɗ kà, tawùl aŋatà la masla à Galili à gudəŋ Nazaret. 40 Bəzi adà à huma à gay la mazigənay, azàla ndzəɗa à gəl aya, ahə̀nla la matsihila. Ŋgaha vok mahamay aŋa Sufəl Zəzagəla agà lakəl aŋha.
Yesu la məŋ gày Zəzagəla la aku
mavay aŋha kulo gəl aŋha səla
41 Kəla mavay azlababa aŋha tadàhah à Urusalima kà aŋa madəvaday Paska.✡ 2.41 2Musa 12.1-27; 5Musa 16.1-8 42 La mok uwana adaɗah mavay kulo gəl aŋha səla kà, tasə̀l à waŋ la tsəh, kà uwana zagəlà aŋatà. 43 Mok uwana madəvaday adadəv à gay kà, tawùl aŋatà, la kokuɗa masəlay aŋa azlababa, kà Yesu agə̀ɗ à Urusalima. 44 Madzugway aŋatà kà: ‘Yesu kà aga la tataka aŋa azlamanalay aŋha la abà’, tagòɗ, ŋgaha la mok uwana lis tavàk asik à gəl kà, tadzəkà mayahay la tataka aŋa dugum tsiŋ aŋha la abà, ŋgaha la azlamanalay aŋha la abà babay. 45 Ama taɓə̀zal aw, kà uwaga à uwana azlababa aŋha tawùl à Urusalima kà mayahay. 46 La mavakay mamakər taɓə̀zal à gəl la məŋ gày Zəzagəla la aku. Masla adadza madzay la tataka aŋa azlaməna matapla tatak à azladza la abà, atsə̀ɓ à atà sləm, la manavàh atà tatak. 47 Azladza gesina uwana tasə̀ɓal sləm, ləv avàl atà à gay kà haŋkəli aŋha, ŋgaha kà azlamawul à uda aŋha aya. 48 Mok uwana azlababa aŋha tanə̀ŋ kà, takə̀s gəl la ahàl səla, ŋgaha iyà aŋha agòɗal: “Bəzi gulo, kà mana maɗàh à anu a ahəŋ kiya uwanay ma? Nə̀ŋàŋ tsi, anu la baba aŋak kà, mədayàh ka kà məŋga, la iyaw tugwi la adi.” 49 Agòɗ à atà: “Kà mana kayàhàw gi ma? Kasə̀làw kà, azlayla gi, aŋa madz à ahəŋ la gày aŋa baba gulo la aku, kà maɗàh sləray aŋha aw takay?” 50 Ama atà kà tatsənà tatak uwana apə̀h à atà aw. 51 Kiya uwaga Yesu awùl à mtəga atà nna à gudəŋ Nazaret, akə̀s atà gay la ahàl ala. Ama iyà aŋha kà akəsàn lakəl à mad vok aŋa azlatatak gesina uwana apakà vok. 52 Yesu azigə̀n, maslay aŋha adà à huma à gay, masla ahə̀ɗ à Zəzagəla à adi, ŋgaha à azladza gesina à adi babay.