1 Azlaməna gay ləv gulo, aganay wakità masəla uwana gətsetser à akul. La wakità səla uwaga la abà, gətsetsèr à akul kà, gəwulla à akul à tsəh kà azla­tatak uwana kasəlaw adagay kà aŋa mawulla à akul à gəl aŋa azla­tatak uwaga la dziriga. 2 Iyay, asa à gi kà gay uwana azlaməna mapəhàh azlagay uwana Zəzagəla apə̀hatàla mapəh à akul kà avika akul aw, ŋgaha bay, la mapəhay uwana Sufəl Yesu Kristu uwana aɓə̀l anu, apə̀h à azlaməna matapla la slaka aŋha à ahàl, aŋa azlaməna matapla uwana aslə̀l atà à waŋ. 3 Tatak uwana asa à gi aŋa mapəh à akul kaykay kà: La kaslà uwana gudəŋ à vok adàdəv à gay kà, azladza tadà­pəhahla vok ala uwana tadàɗah dèwdèw mawi­siga, uwana asa à atà gesina. Azladza uwaga tadà­kəɗaslah akul. 4 Hahayyà kà, kà mana Yesu Kristu kà atsa à waŋ, bokuba uwana tapəh aw mi, tadà­goɗay? Azla­baba gami madzi­dziga tamàts à gay, azla­tatak uwana la gudəŋ la vok kà bawtawta bokuba uwana Zəzagəla aŋàl pəra. 5 Azladza tadàpəhay kiya uwanay, asa à atà kà matsənəŋ kà dagay uwarà Zəzagəla apə̀h à ahəŋ, ŋgaha kiya uwana aŋàl zagəla ŋgaha kutso. Kutso aguwà à uda kà la iyaw la abà, ŋgaha avaha à atà ala. Zəzagəla aɗahà uwaga gesina la afaɗ gay aŋha.✡ 3.5 1Musa 1.6-9 6 Ama vərdi anik, la tsəhay afaɗ gay aŋa Zəzagəla uwaga, madz à ahəŋ aŋa uwarà kà akalah à ahəŋ, iyaw azà gudəŋ à vok ala gesina.✡ 3.6 1Musa 7.11 7 Zəzagəla agòɗ aya babay kà, zagəla la kutso uwana mənəŋ atà lakana kà, tadza à ahəŋ tsəràh à mavakay uwana akàl adà­paɗah à gay, la mavakay aŋa seriya uwatà aya kà, adàkaɗ azladza uwana takəs gay aŋha aw bay.

8 Azlaməna gay ləv gulo, tatak uwanay gəpəh à akul kà avika akul aw! Kà uwana la huma Zəzagəla kà mavay dəbow kà kalkal la mavakay tekula la yewdi aŋha.✡ 3.8 Mahabay 90.4 9 Azladza aŋuvaw uwana tagoɗay kà: “Zəzagəla kà aduw à tsəh kà kaykay, kà mas à waŋ aŋa maɗàh tatak uwana apə̀h à ahəŋ!”, tagoɗ. Ama kiya uwaga aw. Kà uwana masla kà aba­sa­kullaŋ la makud à akul la abà pəra. Asa à Zəzagəla kà kaɓəzaw tetəvi kà akul aŋa mapəh gay la ləv ala, kà uwana asal kà, dza azila bà tekula aw. Hərəz kà aŋa asal, kà azladza gesina taɓəɗla vok.

10 Tekeɗik baŋa kaslà adàslay kà, Sufəl gami Yesu Kristu adàsa à waŋ, ndzer, ama dza la ahəŋ asəl mavakay uwana adàsa à waŋ aw. Adàsa à waŋ kà bokuba masla à gəl uwana agurùh dza gurùh. La mavakay uwatà, azladza tadà­tsən magol kuda məŋga bərəm, ŋgaha zagəla adàzila tuwiz. Akàl adà­ba­ɓəh tatak uwana à gay, la zagəla la afik gesina. Adàpaka masək à akàl akàl, kutso la tatak uwana la huɗ aŋha gesina adàdəv à gay. 11 Tsa baŋa azla­tatak uwanay gesina adàdəv à gay gesina la kiya uwanay zlà kà, akul kà, dàw à huma à gay la maday delga la abà, dàw bokuba uwana akəs à Zəzagəla à gel la azla­tatak gesina la abà. 12 Fàw madzugway aŋkul kà à mavakay uwana à afik. Zəzagəla adàwulla à waŋ, ŋgaha ɗahàw uwana kaslawwalla vok babay, kà mas à waŋ aŋa mavakay uwaga la katskats. La mavakay uwatà, akàl adà­ba­ɓəh zagəla à gay, la azla­tatak uwana la afik gesina. 13 Ama Zəzagəla apə̀h à anu à ahəŋ kà adàŋal zagəla mawga, ŋgaha la kutso mawga aya. La abatà kà, azla­tatak dziriga la uwana tadàdza à ahəŋ la abà. Uwaga kà tatak uwana məkuday lagwa pəra.✡ 3.13 Yesayya 65.17; 66.22

14 Azlaməna gay ləv gulo, kà uwaga à uwana gəgoɗ à akul bokuba uwana kakudaw mas à waŋ aŋa Sufəl kà, wàɗàw vok à uda kà akul aŋa maday la lela la abà, kà uwana baŋa adàsa à waŋ kà, kadàgaw la tataka la abà kokuɗa mawi­siga, ŋgaha ləv aŋa madz à ahəŋ la titi la abà la huma Zəzagəla. 15 Awulla à akul à gəl kà mana mi kagoɗaw ay? Uwana Sufəl Yesu Kristu atsa à waŋ katskats aw kà! Kà uwana asal kà akul kaɓəzaw tetəvi kà aŋa maɓəlay dadàŋ. Tatak uwana Pol, uwana akə̀s ləv gami, atsetsèr à akul, ata­pà­kulla kiya uwanay babay. Atsetsèr kà la matsi­hila, uwana Zəzagəla avàl, 16 la azla­wa­kità aŋha la abà gesina, baŋa atsetsèr kà lakəl aŋa azla­tatak uwanay, kiya uwanay à uwana apə̀h. Azla­tatak anik la ahəŋ la wakità uwanay la abà, uwana zla­zlaɗa kà matsənəŋ. Azladza uwana la matsi­hila aw, azla­uwana tawàɗ ləv ala aw, uwana gay uwanay asal mapəhay kà tagola à tetəvi anik à tsəh, bokuba taɓəɗla azlagay anik anik la wakità Zəzagəla la abà babay. La maɗehəŋ kiya uwaga kà, tabiy seriya aŋa Zəzagəla à gəl aŋatà.

17 Azlaməna gay ləv gulo, tatak uwanay kà kasəlaw adagay. Kà uwaga à uwana gəgoɗ à akul kà: Ɗahàw haŋkəli, kà azladza uwaga takəs gay aŋa Zəzagəla aw, aŋa madukw akul, ŋgaha aŋa mazəɓa­kulla la slaka uwana katsìzlàw à afik aw. 18 Kà aŋa uwaga kà: Dàw à huma la manəf Sufəl gami Yesu Kristu, masla maɓəl anu, ŋgaha masla aŋa mapi­sa­kulla gay à vok kaykay, ŋgaha aya, kà akul aŋa masəl masla kaykay aya suwaŋ. Delga kà, azladza tazləɓ masla lagonay, ŋgaha aŋa tsəràh à awtày. Amen.