21
Nǝmav veveu mai navile a pan veveu
1 Beti noris nǝmav veveu mai navile a pan veveu, husur nǝmav metǝkav mai navile a pan metǝkav arumasig, ale nǝtas am eb̃uer.* Isa 65.17, 66.22; 2Pit 3.13 2 Ale noris nab̃iltivile siGot, naut a Jerusalem veveu togǝm vi pan dan nǝmav tǝban aGot. Nab̃iltivile enan ikab hum navensus topǝhas buni m̃os naulum̃an b̃ilah maii.* Isa 52.1, 61.10; KelV 3.12 3 Nosǝsǝloŋ hǝn nab̃iltidoldol togǝm len nab̃iltihai bǝtbǝtah toke, “Mǝteris! Naut a im siGot ipat tǝban nǝvanuan gail, ale aGot m̃au dereh titoh mai galito. Ale aGot, gai gabag dereh titah mai galito, ale tevi Got salito.* Lev 26.11-12; Eze 37.27 4 Dereh tigar kuv namǝtarur p̃isi dan namǝtalito. Asike ikad nǝmatan am; asike ikad nalolosaan o nǝtaŋan o napǝŋasan am. Husur natit gail ta m̃o, lomǝkaskas tia.”* Isa 25.8, 35.10, 65.19
5 Ale gai tobǝtah len nab̃iltihai bǝtbǝtah ike, “Mǝteris! Gagai nugol natit p̃isi luveveu!” Beti ikel mai ginau ke, “Gitos gat natenan, husur nasoruan galenan lokitin, golǝboi gǝb̃eil gǝgat len gail.”
6 Ale ikel mai ginau ke, “Natit p̃isi ihav ta bolai! Novi alfa mai omeka, natub̃atan mai nanoŋan. Avan ideh tomaduh, dereh neviol kǝmas maii hǝn nǝwai dan nabǝko toṽuv vi mǝhat, nǝkadhut nǝwai hǝn nǝmauran.* Isa 55.1; KelV 1.8 7 Avan ideh towin sǝhor nǝdaŋan hǝn nǝsaan, dereh tikad natgalenan. Dereh ginau nevi aGot san, ale gai tevi anatugw.* 2Sam 7.14; Psa 89.26-27 8 Be alat lǝsǝkad na-il-b̃uri-an, alat lǝsǝkad nadǝlomian, alat lotogol natit aGot tomǝtahun bun gail, alat lotogol nǝmatan, alat lotogol naitian tosa, alat lotogol nabehi, alat lotolotu hǝn nǝlablab gail mai alat lotolibliboŋ, ikad naut topat vir galito len nab̃iltimetduŋduŋ nǝhab tolavurvur, nǝsalfa topaŋ lan. Enan evi nǝmatan na-vǝha-ru-an.”* Salfa: ris Luk 17.29; nǝmatan na-vǝha-ru-an: ris KelV 2.11.
Naut a Jerusalem veveu
9 Beti sua len aŋel lotomǝlevru lotokad nasiloh lotomǝlevru lotopul hǝn navilesir namǝkot gail, egǝm kel mai ginau ke, “Gegǝmai. Dereh neṽusan gaiug hǝn navensus tomadhalah, asoan aTuhsipsip.” 10 Ale len nǝdaŋan seNunun aGot, aŋel enan ilav ginau vi lan nab̃iltiṽehuh tosahsah vi mǝhat. Ale eṽusan ginau hǝn nab̃iltivile siGot, naut a Jerusalem togǝm vi pan dan nǝmav tǝban aGot.* Eze 40.2 11 Ikad namǝnas siGot. Em̃ial hum nǝvat gǝlgǝlan, hum nǝvat jaspa tomasil hum nakristal.† Jaspa evi nǝvat sua gǝsalǝboi gǝb̃ekǝta tur lan, nǝtau han tomial o tokǝsan o toyaŋyaŋ. Nakristal evi nǝvat tomasil hum nakǝlas ale sǝkad nǝtau ideh. 12 Nǝṽod nǝvat hǝn nab̃iltivile emǝtortor, isahsah vi mǝhat. Ikad nametlǝkau tovi 12, aŋel lotovi 12 loil husur nametlǝkau galen ṽisusua. Len nametlǝkau galenan, lutos gat nahǝsan nahǝmar tovi 12 seIsrael. Nǝhes esua len nametlǝkau esua. 13 Len naist ikad nametlǝkau itor, len nanot ikad itor, len nasaut ikad itor ale len nawes ikad itor.‡ Hǝn naves 12-13, ris Eze 48.30-35 14 Nǝṽod hǝn nab̃iltivile ikad nǝpaudesen tovi 12 lotokad nahǝsan ahai pispisul seTuhsipsip lotovi 12 len gail. Nǝhes esua len nǝpaudesen esua.
15 Aŋel tosor mai ginau ikad namita nagol hǝn b̃isab̃ namita hǝn nab̃iltivile mai nametlǝkau han gail mai nǝṽod han.* Eze 40.3 16 Nabǝlavan hǝn nab̃iltivile ep̃itoṽ hǝn nap̃osp̃osan han. Ale aŋel enǝnoṽ hǝn nab̃iltivile hǝn namita totǝgau. Ale isab̃i ke nabǝlavan han evi nǝstatia tovi 12,000.§ Nǝstatia evi namita tovi 185. (Nabǝlavan mai nap̃osp̃osan mai nǝsahsahan han lop̃itp̃itoṽ). 17 Ale enǝnoṽ hǝn nǝṽod hǝn nab̃iltivile, isab̃ namǝtortoran han evi nakupit tovi 144.** Nakupit evi nabǝlavan hǝn navǝlan nǝvanuan, tub̃at len nakobkob van vǝbar nagilen nǝŋarhuvǝlan. Nabǝlavan han pǝpadaŋ hǝn nahudhumita. Ale nakupit siaŋel enan ep̃itoṽ hum sinǝvanuan. 18 Nǝvat hǝn nǝṽod hǝn nab̃iltivile evi jaspa, ale nab̃iltivile evi gol toveveu hum nakǝlas tomasil toveveu. 19 Nǝvat gǝlgǝlan p̃isi lovǝhas nǝpaudesen hǝn nǝṽod hǝn nab̃iltivile. Nǝpaudesen nametǝkav evi jaspa, na-vǝha-ru-an evi safaia, na-vǝha-tor-an evi akat, na-vǝha-vat-an evi emeralt, 20 na-vǝha-rim-an evi oniks, na-vǝha-mǝlevtes-an evi karnelian, na-vǝha-mǝlevru-an evi krisolait, na-vǝha-mǝlevtor-an evi peril, na-vǝha-mǝlapat-an evi topas, na-vǝha-sǝŋavur-an evi krisopres, na-vǝha-sǝŋavur-pisan-esual-an evi jasint ale na-vǝha-sǝŋavur-pisan-eru-an evi ametist.†† Hǝn naves 18-21, ris Isa 54.11-12. Nǝvat galenan lumaiegai: jaspa emial o ekǝsan o iyaŋyaŋ, safaia iboŋboŋ ale imasil, akat epǝhapǝhw o imasiav be golǝboi gǝb̃ekǝta vi lohoim kǝkereh, emeralt ekǝskǝsan ale imasil, oniks nǝtau han etiltile be gǝsalǝboi gǝb̃ekǝta tur lan, karnelian ebisibis be sǝmasil savoi, krisolait iyaŋyaŋ ale imasil, peril ekǝskǝsan ale imasil, topas iyaŋyaŋ ale imasil, krisopres ekǝskǝsan ale imasil, jasint ebisibis ale elǝboi b̃imasil, ametist iboŋboŋ ale imasil. 21 Nabopita nametlǝkau lotovi 12 lovi b̃iltinesnes gail. Nabopita esua evi nanesnes esua. Ale nab̃iltimetp̃isal hǝn nab̃iltivile evi gol toveveu, tomasil hum nakǝlas.
22 Nǝsaris naim nalotuan ideh ei. Husur Nasub̃ aGot, aB̃iltidaŋan, mai aTuhsipsip arutoh tabtab ei, arovi naim nalotuan.‡‡ Naim nalotuan evi naut nǝvanuan gail lotolotu hǝn aGot lan. Be nǝboŋ aGot totoh tin mai nǝvanuan san gail, lolǝboi lǝb̃ilotu hǝni len naut p̃isi, gol ke naim nalotuan savi natideh am. Imaienan, len nab̃iltivile veveu siGot, sǝkad naim nalotuan ideh. 23 Nam̃ial hǝn namityal mai nahǝbati savi natideh ei, arob̃uer, husur namǝnas siGot em̃ias kavkav hǝn nab̃iltivile enan, ale aTuhsipsip evi nam̃ial han. 24 Naluṽoh hǝn nǝvanuan naut tiltile gail dereh liyaryar len nam̃ial han, ale nǝboŋ nakiŋ gail hǝn navile a pan lǝb̃eb̃is lan, dereh lilav nǝyalyalan salito gǝmai. 25 Nametlǝkau han gail losǝŋav len nǝmariboŋ kavkav, asike lokǝkol boŋ ideh, husur nalenmariug dereh teb̃uer ei. 26 Ale naluṽoh hǝn nǝvanuan naut tiltile gail p̃isi dereh litariv nǝyalyalan salito mai natit lotopul hǝni gǝmai. 27 Natideh tob̃iŋb̃iŋal o tosa asike eb̃is ei boŋ ideh. Nǝvanuan ideh togol nǝsa aGot tomǝtahun buni o tolibliboŋ, asike eb̃is ei boŋ ideh. Wake alat, aGot totos gat nahǝsalito len nalob̃ulat seTuhsipsip hǝn nǝmauran, galito ŋai dereh leb̃is len nab̃iltivile enan.§§ Hǝn naves 23-27, ris Isa 60.3-5, 11, 19-20, 52.1; Eze 44.9. Nalob̃ulat hǝn nǝmauran, ris KelV 3.5.
*21:1: Isa 65.17, 66.22; 2Pit 3.13
*21:2: Isa 52.1, 61.10; KelV 3.12
*21:3: Lev 26.11-12; Eze 37.27
*21:4: Isa 25.8, 35.10, 65.19
*21:7: 2Sam 7.14; Psa 89.26-27
*21:8: Salfa: ris Luk 17.29; nǝmatan na-vǝha-ru-an: ris KelV 2.11.
*21:10: Eze 40.2
†21:11: Jaspa evi nǝvat sua gǝsalǝboi gǝb̃ekǝta tur lan, nǝtau han tomial o tokǝsan o toyaŋyaŋ. Nakristal evi nǝvat tomasil hum nakǝlas ale sǝkad nǝtau ideh.
‡21:13: Hǝn naves 12-13, ris Eze 48.30-35
*21:15: Eze 40.3
§21:16: Nǝstatia evi namita tovi 185.
**21:17: Nakupit evi nabǝlavan hǝn navǝlan nǝvanuan, tub̃at len nakobkob van vǝbar nagilen nǝŋarhuvǝlan. Nabǝlavan han pǝpadaŋ hǝn nahudhumita.
††21:20: Hǝn naves 18-21, ris Isa 54.11-12. Nǝvat galenan lumaiegai: jaspa emial o ekǝsan o iyaŋyaŋ, safaia iboŋboŋ ale imasil, akat epǝhapǝhw o imasiav be golǝboi gǝb̃ekǝta vi lohoim kǝkereh, emeralt ekǝskǝsan ale imasil, oniks nǝtau han etiltile be gǝsalǝboi gǝb̃ekǝta tur lan, karnelian ebisibis be sǝmasil savoi, krisolait iyaŋyaŋ ale imasil, peril ekǝskǝsan ale imasil, topas iyaŋyaŋ ale imasil, krisopres ekǝskǝsan ale imasil, jasint ebisibis ale elǝboi b̃imasil, ametist iboŋboŋ ale imasil.
‡‡21:22: Naim nalotuan evi naut nǝvanuan gail lotolotu hǝn aGot lan. Be nǝboŋ aGot totoh tin mai nǝvanuan san gail, lolǝboi lǝb̃ilotu hǝni len naut p̃isi, gol ke naim nalotuan savi natideh am. Imaienan, len nab̃iltivile veveu siGot, sǝkad naim nalotuan ideh.
§§21:27: Hǝn naves 23-27, ris Isa 60.3-5, 11, 19-20, 52.1; Eze 44.9. Nalob̃ulat hǝn nǝmauran, ris KelV 3.5.