Jemes
Nalob̃ulat napisulan aJemes totosi
Ase itos nalob̃ulat napisulan egai?
AJemes, aṽan aYesu matmat, toil a m̃o hǝn alat siYesu len naut a Jerusalem, gai itosi.
Itos nalob̃ulat napisulan egai hǝn nǝsa?
Itosi hǝn b̃ikel mai naKristen gail naṽide tovoi hǝn lǝb̃ikade hǝn lǝb̃idaŋ len nadǝlomian len aYesu.
AJemes itos nalob̃ulat napisulan egai m̃os ase?
Itosi m̃os naKristen gail len naut p̃isi.
AJemes itosi ŋais?
Hum ma totosi pǝpadaŋ hǝn nasihau A.D. 48.
1) AJemes ikel na-ke-ivoi-an mai naJu gail (1.1)
2) Nǝboŋ nǝmauran b̃idaŋ, daŋ b̃uri. Gǝb̃ike gǝb̃igol nǝsaan, savi aGot totaltal hǝn gaiug, nalǝŋonian sam̃ igol ke gotogol nǝsaan (1.2-18)
3) Nasǝsǝloŋan mai nagolean (1.19-27)
4) Sagipatpat nǝvanuan galevis mǝhat sǝhor galit am. Asike gǝb̃ilolosa hǝn nǝvanuan gail, asike aGot ilolosa hǝn gaiug (2.1-13)
5) Nǝsa gotogole eṽusani ke gukad nadǝlomian len aGot o eb̃uer (2.14-26)
6) Alat lotokad nadǝlomian mai namealito. Naṽide avan ideh tokade eṽusani ke namitisau hǝn nǝmauran san togǝm len aGot o eb̃uer (3.1-18)
7) Len nǝb̃alkabaŋan mǝtomǝtahun aGot. Pair dan naṽide enan tosa, riŋ gamito len navǝlan aGot. Samtisor mǝdas avan ideh, samit sor patpat gamit mǝhat. Mǝtb̃elǝboi nǝsa tovoi be asike mǝtb̃igole, mǝtugol nǝsaan (4.1-17)
8) Alat lotopul hǝn natite lotogol mǝttolǝŋon tosa, dereh lipanis, be ipat len aGot hǝn b̃igole. Samtikoblen mǝdas gamit gabag. Toh mǝdau, daŋ b̃ur na-lǝŋon-isa-vǝsa-an (5.1–5.11)
9) Kel nakitinan. Kel kot nǝsaan samit mai gamit gabag. Sor tuṽ m̃os gamit gabag. Dereh aGot tevi tarhǝt samito (5.12-18)
10) Gamit ideh b̃ipal sob dan nakitinan, vireh tǝlmam hǝni hǝn aGot b̃erub̃at nǝsaan san dani (5.19-20)
1
Na-ke-ivoi-an
1 Ginau aJemes notovi naslev siGot mai siNasub̃ aYesu Kristo, nuke, “Ivoi,” van hǝn nahǝmar tosǝŋavur pisan eru, nǝvanuan gail lototoh ṽisusua len navile a pan.* Mat 13.55; Mak 6.3; Uman 15.13; Kal 1.19
Susumar nǝboŋ nǝmauran todaŋ
2 Bathudud nadǝlomian sagw, nǝboŋ mǝtb̃etut len natit tiltile lǝb̃igol kitev nadǝlomian samito ke timabe, mitikemkem hǝni ŋai. 3 Bathut mǝtolǝboii ke nǝboŋ natgalenan lotogol kitev nadǝlomian samito ke imabe, na-gol-kitevi-an galenan lugol nǝ-daŋ-b̃uri-an len gamito. 4 Nauman hǝn nǝ-daŋ-b̃uri-an timasvan van vǝhav, hǝn ke nab̃oruan samit b̃inor buni, asike nǝdaŋan hǝn nab̃oruan samito b̃em̃idol boŋ ideh. 5 Gamit ideh b̃ipar mitisau hǝn nǝmauran tonor mai naṽide tovoi, ivoi ke teus aGot hǝni,* Pro 2.3-6 gai toviol masuṽ mai nǝvanuan p̃isi, ale dereh teviol hǝni mai gaiug, asike inau isa hǝn gaiug sile. 6 Nǝboŋ gǝb̃eusi, usi len nadǝlomian, nǝlom̃ sateuri. Nǝvanuan nǝlon touri ehun nǝtas tokud tabtab, sǝpat mǝdau. Nǝlan eṽuvi vi mǝhat, epus, evi pan.* Nǝvanuan nǝlon touri egǝgel tabtab hum nahit togǝgel hǝn nǝtau han. 7 Nǝvanuan tomagenan satinau ke Nasub̃ b̃ilav natideh maii, 8 ikad nǝnauan toru, edǝdas b̃ehusur nap̃isal tosua ŋai, nǝmauran san ipat lavǝlav.
Namǝsal mai nǝvanuan topul hǝn natite
9 Nǝvanuan nadǝlomian ideh b̃evi ut kǝmas o b̃evi mǝsal len nabunusian sinǝvanuan gail, ivoi ke tehǝhaṽur, husur aGot eputsani tia. 10 Be nǝvanuan tokad natite; aGot b̃igol gai b̃evi ut kǝmas, ivoi ke tehǝhaṽur hǝni, husur dereh nǝmauran san tem̃idol hum napusit naliol. 11 Namityal togǝm vi mǝhat, esun naliol; imasmas, napusit iteh; nǝkaban han imasig. Imagenan nǝvanuan tokad natite, tehis sob̃uer hǝni van vǝmat, imasig maii.† Hǝn naves 10-11, ris Isa 40.6-7
Nǝtaltalan hǝn nǝsaan
12 AGot tivoi hǝn nǝvanuan toil gǝgat naut kǝmas nate sasa gail lotogǝm hǝn lǝb̃igol kitev nadǝlomian san ke imabe. Nǝboŋ b̃idaŋ b̃ur gail, dereh aGot tilav nǝprais hǝn nǝmauran kitin maii, nǝprais aGot tokel gati tia ke teviol hǝni mai alat lotolǝmas buni. 13 Avan ideh, natit b̃italtal ke tigol nǝsaan, satike, “Evi aGot totaltal ke nisa.” Bathut natideh tosa edǝdas b̃italtal ke aGot tigol nǝsaan, mai aGot gabag sǝtaltal ke nǝvanuan gail lǝb̃isa boŋ ideh. 14 Avil nǝvanuan ṽisusua, nalǝŋonian san tosa gail lutaltal ke tigol nǝsaan. Losǝhari, loliv gargari vi tut. 15 Beti nǝboŋ nalǝŋonian tosa totian, ipas nǝsaan. Nǝboŋ nǝsaan enan togǝm tibau, ipas nǝmatan.
16 Bathudud sagw notolǝmas bun gamit p̃isi, samtedǝlom nagǝgǝrasan husur aGot! 17 Naviolan p̃isi lotovoi, naviolan p̃isi lotonor buni, logǝm len aGot a mǝhat togol nam̃ial p̃isi len nǝmav. AGot sagǝgel hun nǝm̃ol torusǝrus. 18 Ilekis ke, len nasoruan hǝn nakitinan, eviol hǝn nǝmauran veveu mai gidato, hǝn datb̃ehum naṽit metǝkav len natit p̃isi gai toum hǝni.
Nasǝsǝloŋan mai nagolean
19 Bathudud sagw notolǝmas bun gamit p̃isi, mǝtelǝboi sǝhot nategai: Gamit p̃isi mǝteutaut tabtab hǝn mǝtb̃esǝsǝloŋ, samtisaṽsaṽut hǝn mǝtb̃isor, samtisaṽsaṽut hǝn nǝlomit b̃ipaŋpaŋ* Ecc 7.9 20 bathut nǝlol paŋpaŋ sinǝvanuan edǝdas b̃igol sǝhot nanoran aGot tolǝŋoni. 21 Imagenan, bubulan nab̃iŋb̃iŋalan mai nǝsaan topat sal, dan nǝmauran samito. Nǝlomit temǝdau ale sǝsǝloŋ husur nasoruan aGot toriŋi len nǝlomito, husur elǝboi b̃ilav kuv gamito dan nǝsaan samito.
22 Mitigol nǝsa nasoruan tokele, samtesǝsǝloŋ kǝmas hǝni ŋai. Mǝtb̃esǝsǝloŋ hǝni be asike mǝtb̃igol husuri, mǝtogǝras sǝb̃omit hǝn gamito. 23 Avan ideh tosǝsǝloŋ hǝn nasoruan be sagol nǝsa tokele, esum̃an nǝvanuan toleleduŋ, ris nǝhon len nakǝlas. 24 Nǝboŋ toris nǝhon tonoŋ, ipair dani: vǝha-sua ŋai nǝlon iboŋboŋ hǝn nǝnahǝnah han. 25 Avil nǝvanuan tobunus vahvahur nalo tonor buni siGot, nalo togol ke nǝsaan satǝgau gat nǝlon am, atenan b̃ebunus tabtab hǝni, asike nǝlon b̃iboŋboŋ hǝn nǝsa tobunusi, tosǝsǝloŋ hǝni, be b̃igol nǝsa nalo tokele, dereh aGot tigol tivoi buni hǝn atenan, len nǝsa togole.‡ Nalo aJemes tosor husuri savi nalo p̃isi siMoses, be isor husur nalo hǝn na-lǝmas-buni-an aYesu todaŋ ke datimashusur tabtab hǝni.
26 Avan ideh b̃inau ke aGot tohǝhaṽur hǝn nalotuan san, avil asike b̃iwol hǝn nasoran san b̃ivoi, egǝras gai gabag ale nadǝlomian san evi naut kǝmas. 27 Naṽide hǝn nalotuan aGot Tata tonau ke tovoi mai tonor masuṽ, imaiegai: Kǝtkǝta tǝban nǝbatunau pǝhaṽut gail mai namilesw gail lotolǝŋon tosa. Ale gelǝlǝgau hǝn gaiug, hǝn nǝmauran navile a pan satidos nǝmauran sam̃.* Isa 1.17, 23
*1:1: Mat 13.55; Mak 6.3; Uman 15.13; Kal 1.19
*1:5: Pro 2.3-6
*1:6: Nǝvanuan nǝlon touri egǝgel tabtab hum nahit togǝgel hǝn nǝtau han.
†1:11: Hǝn naves 10-11, ris Isa 40.6-7
*1:19: Ecc 7.9
‡1:25: Nalo aJemes tosor husuri savi nalo p̃isi siMoses, be isor husur nalo hǝn na-lǝmas-buni-an aYesu todaŋ ke datimashusur tabtab hǝni.
*1:27: Isa 1.17, 23