Tuju Riijilnga jijiparni nyinapayi. Riijilju wajarnulu Jayikapja, “Jijirnangku wiya kanyirni nyuntuku. Ngaangkalun tujungka Pilangka ngarriku ngayuku warrkamupurlukangka. Yiipi Pilalu jiji manku, wajalkurnalu, ngayurni yungkuraku.” Yumurringu Jayikapju Pila kanyirnu ka maa jijikurlurnu. Maayilalu Pilalu yini yungu, “Taanpa”. Palujanu Pilalu yarrarnu kaja kujupa manu. Maayila yini wajarnu “Naputali”.

Palujanu Liiyalu purtu kulirnu, “Ngurrarnalu ngarrini wiyarni jiji kujupa yungu, paki.” Kayilapalu Liiyalu yanu wajarnu Jilpangka, palumili warrkamupurlukangka, “Nyuntulun ngurra ngarriku Jayikapja. Rawapulan ngarriku Jayikapkamu. Jijiran kanyilku ngayurnin yungku.” Palujanu rawapula nyinangu maayilara Jilpalura kanyirnu murtilya yini, “Kaatpa”. Yarrarnura kaja kujupa kanyirnu murtilya, yini “Yaaja”. Palujanulu marlakulu yanu Liiyakutu, Jayikappa.

Palujanu Liiyalura kaja kujarra kanyirnu maa-pulanya yinijunu “Yijikakamu Jipiyulanpa”. Ngulanga yurntalpa manu, marlawanalu Liiyalu. Yini wajarnu “Tayina”. Palujanu Riijilju purtu kulirnu jiji kujupa mankuraku. Jilanyangku wajarnu, “Karlkinjuya jiji yarnnga kanyirni. Ngayurna jijiparni.” Kayilapalu Mamangka ngarnawarrapurlukangkalu japirnu, “Jijirna kuju kanyilkura.”

Palujanungkara Mamalu kaja kuju yungu, japinyjangkara. Kaja palu Juujappa yinijunu. Palunyajanu Liipanjura Jayikapku yungkupayi jiipukajakamu, nanikurtkaja. Yungura wajarnu, “Maniparnilurnanta yungkuninpa ngaakaja jiipu, nanikurtpalurrju, wiijij maniyuru.” Liipanjungara wulululyu yungkupayi. Jayikapjunga jumaji yarnngaminyirri nanikurtpakamu, jiipukamu, yawartakamu, tangki kamalpalurrju kanyilpayi. Warrkamupurlukalurrju-jananya kanyilpayi, yarnnga. Jayikapjungara Liipanku yarnnga kujupakaja ngampurrju kanyilpayi, karlkiluraya ngulyulu mankujakungkamarra.