10
1 Turau tar, aya Negur ĩ Israel kel gei fediyouf nigin wau iro ken, Negur bun kosẽ audig. 2 Aya idi nigin kurõ afeis eig auf, idi Negur nigin kisi totol dinodig, anĩ ere, idi neid kisi totol are keleĩ bunem sã. 3 Ere nigin, idi madur bagai Negur bunem isif anĩ to kelei ken, dogo neid madur bagai anĩ dalouf nigin dimiren, age dife fen, idi, Negur tamo kayau yogon mala bun madur bagai inenẽdiya nẽ naab anĩ ditoron. 4 Kristus ĩ, idi momoi def ganan madur bagai wowã douf nigin, lo nẽ idikeleya wõ yen.
5 Moses ĩ madur bagai lo ganan dõ fiya bunem isif nigin eig ye itoton, “Tamo ĩ lo enei dõ fef, ĩ anĩ bunem mata ibodõf.”* Levitikas 18:5 6 Anĩ ere, madur bagai momoiya bunem isif anĩ eig ye irok, “Õ waũ bun to eig wo urõf, ‘Aim anĩ saa ilun iselauf?’† Diuteronomi 30:12 ” (are, Kristus irou isiyouf nigin) 7 “oo ‘Aim anĩ teneub kur bagai isilauf?’‡ Diuteronomi 30:13 ” (are, tamo gare den bun tamal Kristus irou isauf nigin). 8 Anĩ ere, ĩ ere ye irok? “Od anĩ õ wagen ibodok, are ogon sigor bun, ogon waũ bun ibodok,”§ Diuteronomi 30:14 are momoiya nẽ od amã wogõ maudig anĩ. 9 Are õ ogon sigorom, “Jesus ĩ Odug,” wo fen, õ waũ bun, Negur ĩ Jesus tamo gare den bun tamal kel turĩ fiyen anĩ, momoi wouf are, õ kel yaleyõf. 10 Are, taka ĩ wau bun momoi ye di, Negur ĩ madur bagai yef, age fe di, taka ĩ sigorom momoi auf ye di, Negurem ĩ kel yalouf. 11 Are Negur nẽ Itotoya bun ibodok kilei, “Taka ĩ, ĩ nigin momoi youf, ĩ mama to bagai yalouf.”* Asaia 28:16 12 Juda ado haiden bun fire fire sã, Odug de tekelei anĩ ganan nẽ Odug, ĩ idi diweignek ganan bun el fiya fatuk bagai ifenẽdidig, 13 are Negur nẽ Itotoya bun ibodok kilei, “Idi Odug nẽ yana dale diweignek ganan, Negurem kel gei fediyouf.”† Joel 2:32
14 Age fiyauf are, naig fe di, idi ĩ nigin to momoi den ani diweignẽf? Naig de fen, idi to karĩ den anĩ nigin momoi douf? Taka nem to irokenẽdiyouf are, naig de fen, idi karĩ douf? 15 Idi to sur fediyouf are, idi naig de fen, od wogõ douf? Are Negur nẽ Itotoya bun ibodok kilei, “Idi biya od diroulef anidi, yeid gai meli bagai!”‡ Asaia 52:7
16 Anĩ ere, Israel tunĩ biya od anĩ to dalen. Idi age difen nigin, Asaia eig ye iron, “Odug, aim anĩ nemã od nigin momoi yen?”§ Asaia 53:1 17 Anĩ nigin, momoiya anĩ biya od karĩya bunem isidig, biya od karĩya are Kristus nẽ od bunem isidig. 18 Anĩ ere, aya to afef; Idi to karĩ dedig de? Momoi, idi karĩ den, are Negur nẽ Itotoya bun ibodok kilei,
“Neu arũ tamo neid aiteid, teneub ganan bun iyokelen,
dogo neid od teneub idikeleya bun ilen.”* Sam 19:4
19 Baban aya to afef: Israel idi to kelein de? Uruwa bun, Negur Moses bunem iron,
“Aya tamo kayau yeneid sã idi bun age afe di, idi nigin ã kiyeĩ unogouf.
Aya tamo kayau keleĩ sã idi bun age afe di, idi nigin ã nameĩ saneuf.”† Diuteronomi 32:21
20 Takag, Asaia kukĩya sã eig ye iron,
“Idi aya to dimirnan, aya dileyauf.
Idi aya nigin to fiya san anidi bun, aya yug yaor afouf.”‡ Asaia 65:1
21 Anĩ ere, Israel nigin ĩ eig ye iron,
“Naa tekelei adok, aya tamo kayau dõ fiya sã, fe temeleid bun
imau dõ au fen, tari afedif abodon.”§ Asaia 65:2