Mbeti á endje sú
fœ Aebre
Tshatshu o'o
Uzu á tshe sú mbetinœ asœke œdœ endjeneke á endje vwa fœ endje, a wuwusœ endje nene. Kashe tœ kœdɨ tœnœ, endje sú fœ Ayuda á endje wuta lima ayindœ Yisu. Anga azu mbœrœ lima œrœ kanga fœ endje yé œ bɨlɨ endje tœ kœkatœ kœyindœrœ.
Mbœrœ tœnœ ataa, mbetinœ asœke ma adœke Yisu kœdœ Gbolo nœ Ndjaba nœ soro. Tshe ropa azu kɔ yé œ za soro á ka nene fœ azu. Tshe za undu ye tœ tokóró mbœrœ kœdjerœndœ ekperœ nœ azu. Mbetinœ gbota ndje gbetshelœ nœ ayindœ Yisu kœgbe dœ œnœ anga azu utshunœ lœ Ongboro Ayo. Ataa endje wuwu lima œrœ tshangba kœyindœrœ nœ endje nene gbaa, endje sœ lima dœ kœyindœrœ ga ndœ Ndjaba.
Mbetinœ kurutshelœtœ ye atake:
- Kristu yisœ mara nœ Ndjaba (1.1-3)
- Kristu ropa aandjelu (1.4–2.18)
- Kristu ropa Ayosuwa dœ Moyize (3.1–4.13)
- Akwa nganga nœ Yisu ropa œnœ anganga Ndjaba lœ Ongboro Ayo kɔ ye (4.14–7.28)
- Ayo nœ Kristu ropa œneke ala Ongboro Ayo ye (8.1–9.28)
- Mokɔ á Kristu má ropa œneke lœ Ongboro Ayo ye (10.1-39)
- Anga agbangba kœyindœrœ lima utshunœ (11.1–12.29)
- Mara kœza yanga fœ Ndjaba (13.1-19)
- Avwala œdœ ndangba abala (13.20-25)
1
Ndjaba pa o'o lœ awa nœ Gbolo nœ ye
1 Utshunœ lima, Ndjaba pa o'o fœ aata azœ, tshe pa o'o lœ awa nœ aayi kœgbara o'o; tshe pa o'o fœ endje kpalakpala œdœ pe lœ tshelœ aka mara ndjoro, 2 yé ngɔngɔ tœ ndɔngɔlɔ oshonœ asœke á a sœ lœ nœ, tshe pa o'o fœ azœ lœ awa nœ Gbolo á tshe za she kœsœ tœ ayengɔ œrœ kɔ, lœ awa nœ ye ndje dá tshe mbœrœ tshapashɔ. 3 Gbolo kœdœ kœtshi nœ mokɔ nœ ye, tshe kœdœ adja angwa ye. O'o ama ye sœ dœ gbɔgbɔ yé œtœnœ dá mbœrœ adœke œrœ tshapashɔ para kɔkɔ sœ zœ. Mangba kœdjutɔ ekperœ nœ azu, tshe sœ ga pa kuni Ndjaba á tshe sœ dœ gbɔgbɔ kœropa nœ kɔ ɓa lafo.
Gbolo nœ Ndjaba ropa aandjelu
4 Gbolo ropa aandjelu ye. Dœ tœnœ ataa á Ndjaba za ɨ'ɨrɨ kpi á rosœ œnœ endje fœ she. 5 Atamœ, Ndjaba papa fœ anga andjelu nœ ye bale nene adœke:
«Ɓœ kœdœ Gbolo nœ mœ,
yé kœto kpesheke, œmœ kœdœ Aba zœ.»
Yé tshe papa ndje o'o tœ upu nœ anga andjelu bale nene adœke:
«Mœ dœ bala Abanœ,
yé tshe dœ bala Gbolo nœ mœ.»
6 Kashe dœ lɔndɔ á Ndjaba vwa lima eya Gbolo nœ ye ga pa tshapashɔ, tshe pa adœke:
«Œ li adœke aandjelu nœ Ndjaba kɔ gote ga tshatshu ye.»
7 Tshe kpa pa o'o tœ upu nœ aandjelu adœke:
«Mœ mbœrœ adœke aandjelu nœ mœ sœ ɓata ɨshirɨ,
yé mœ mbœrœ adœke aayi akwa nœ ye sœ ɓata laɓa owo.»
8 Kashe tœ upu nœ Gbolo, tshe pa adœke:
«Uu Ndjaba, ngande tshagbozu nœ zœ sœ waa dœ waa.
Ɓœ sœ kœmbœrœ akwa tshagbozu nœ zœ dœ mara á sœ ndjii.
9 Ɓœ sœ kœyindœ œrœ á sœ ndjii, yé ɓœ sœ kœyiangba ekperœ,
mbœrœ tœnœ ataa, uu Ndjaba, Ndjaba nœ zœ dá ke ɓœ adœke ɓœ sœ dœ yanga,
yé tshe ma adœke œne yindœ zœ kœropa anga zœ.»
10 Tshe kpa pa ndje adœke:
«Gbozu, œɓœ dá mbœrœ ɔshɔ pe tœ alinœ utshunœ,
tshalafo kœdœ tshangba akwa ndœ kane zœ.
11 Œrœnœ asœke kɔ œ yiwa bala ye, kashe œɓœ, ɓœ sœpe zœ.
Tshalafo œdœ tshaatɨ œ wuta ɓata ongboro lœba;
12 ɓœ vwele œtœnœ bala ga tœnœ ɓata á endje vwele yɔgbɔdɔ lœba,
yé endje yapa œtœnœ ɓata lœba.
Kashe œɓœ, ɓœ sœ kolœ ɓata á ɓœ sœ asœmœ yé ndɔngɔlɔ zœ œ sœ tœnœ nene.»
13 Ndjaba papa fœ anga andjelu nœ ye bale nene adœke:
«Na œ sœ ga pa kuni mœ,
mœ ko ayingba zœ ga tshakudu ada zœ.»
14 Aandjelu kœdœ aɗe e? Endje para kɔkɔ kœdœ ɨshirɨ á sœ kœmbœrœ akwa fœ Ndjaba: Tshe sœ kœvwa endje adœke endje tɨ kane azu á endje li kœgbɔ kœshe.