Ali mbeti á Polo sú
fœ azu Tesalonike
Tshatshu o'o
Asœke kœdœ ali mbeti á Polo sú fœ ayindœ Yisu ɓa lœ Tesalonike. Polo na lima ga zœ yé œ yisœ Ɔtshɔ O'o nœ Yisu Kristu fœ endje. Endje za awa Kristu kashe kolœ manda olo teasho, anga azu ugurutœ Ayuda á endje sœ lima kpœtœmœ sœ kœbɨlɨ azu adœke endje oma dœ Polo. Ayindœ Kristu ko Polo dœ anganœ yiwa tœnœ. Dœ butshɔ, endje ko endje wuta tœnœ lœ ongbo ga ushu, á endje ro ga lœ Bere.
Ungu bisha manda nœ, Polo vwa Timote mbœrœ kœna kœwu mara á ayindœ Kristu ɓa lœ Tesalonike sœ dœ tœnœ. Timote gu œ pa fœ Polo adœke endje sœ kœshi gbɨ lœ kœyindœrœ zœ, kashe anga ata endje sœ kœvwaratœ endje kœmbœrœ akwa. Endje sœ kœpa adœke Yisu œ kwatœ ye lœ ondonœ asœ, yé ádánœ nœ kœmbœrœ akwa gugu nene. Anga endje sœsœ lima dœ lɔsu endje zɨtɨ nene. Mbœrœ tœnœ ataa, Polo sú mbetinœ asœke mbœrœ kœto gbɔgbɔ fœ endje, á pa ndje ndœ mara á Kristu œ kwa bala tœ ye dœ tœnœ; endje za lɔsu endje ga pa Gbozu.
Mbetinœ kurutshelœtœ ye atake:
- Abala (1.1)
- Mara á Atesalonike yindœ Ɔtshɔ O'o (1.2–3.13)
- Soro á ga tœ ala Ndjaba (4.1-12)
- Kœza lɔsu ga pa kœkwa Kristu (4.13–5.11)
- Kœmɨ upu œdœ ndɔngɔlɔ abala (5.12-28)
1
Abala
1 Œmœ Polo, Silase œdœ pe Timote, 'a vwa abala asœke fœ 'e dœ́ ayindœ Yisu lœ Ikrizia ɓa lœ Tesalonike. Kaka Aba dœ Ndjaba œdœ Gbozu Yisu Kristu má ɔtshɔ lɔsu nœ endje ga ndœ 'e yé œ za kœsœ gee fœ 'e.
Kœyindœrœ nœ Atesalonike
2 Ɔlɔ dœ ɔlɔ 'a sœ kœza mershe fœ Ndjaba mbœrœ 'e kɔ, yé œ sœ kœgbe kolœ dœ 'e lœ avwala nœ 'a. 3 'A sœ kœgbe dœ kœyindœrœ œdœ kœyindœsho nœ 'e á sœ kœmbœrœ akwa, dœ pe kœshi gbɨ lœ kœza lɔsu nœ 'e ga pa Gbozu nœ azœ dœ Yisu Kristu, ɓa utshu Aba azœ dœ Ndjaba.
4 Alaya, 'a wusœ nœ adœke Ndjaba yindœ 'e waa, yé á ke 'e. 5 Mbœrœ tœnœ ataa, lɔkɔ á 'a yi lima œsœ Ɔtshɔ O'o fœ 'e, œ sœsœ kolœ ɓata o'o gbambanœ nene, kashe œ sœ dœ gbɔgbɔ, lœ awa nœ Ɔtshɔ Ɨshirɨ yé 'a yisœ nœ adœke Ɔtshɔ O'onœ asœmœ kœdœ adjapu. 'E wusœ mara á 'a sœ lima kœmbœrœtœ 'a ugurutœ 'e mbœrœ ɔtshɔrœ nœ 'e.
6 Yé ataa, 'e mbœrœtœ 'e lindœ mara œrœ nœ 'a œdœ œnœ Gbozu. Ataa 'e sœ lima dœ oyo gbaa, 'e yindœ o'o ama Ndjaba dœ yanga á to lœ Ɔtshɔ Ɨshirɨ. 7 Mbœrœ tœnœ ataa, 'e fa azu á ayindœ Yisu lœ Masedwane dœ pe lœ Akayi li kœmbœrœtœ endje lindœ ɔtshɔ 'e. 8 Yé o'o ama Gbozu to ɓa ndœ 'e, œ wuwuta kolœ ɓa lœ Masedwane œdœ pe ɓa lœ Akayi nene, kashe o'o tœ upu kœyindœrœ nœ 'e ga ndœ Ndjaba za osho djigi dœ mara adœke 'a kpa gugu dœ o'o kœpa mbœrœ tœnœ nene. 9 Gbambanœ nene, uzu dœ uzu pandœ mara á 'e za osho kœsœ fœ 'a dœ tœnœ lɔkɔ á 'a na ga ndœ 'e œdœ mara á 'e katœ andjaba nœ 'e tɨ yé á fatœ 'e ga ndœ Ndjaba mbœrœ kœmbœrœ akwa fœ she á tshe dœ́ Ndjaba nœ soro yé á dœ́ ndje adja Ndjaba. 10 'E sœ kœkate adœke Yisu, Gbolo nœ ye to ɓa lafo œ na; œshe á Ndjaba she she lœ akuzu, œshe dá ko azœ lœ ama ókó nœ Ndjaba á sœ kœna tœnœ.