15
1 Nayan, sikitadon menge otaw netaga-taga te kebenalan, keilangan medalem se pedowan tadon diyà te menge doma tadon wedà pa ontò ketaga-taga te kebenalan. Eked kepakay aw olò kenitadon ibeg se inangen tadon. 2 Keilangan meg-aneng-aneng se teg sebad-sebad kenitadon aw eden se meketabang te doma otaw, amon melobos se pegsalig dan diyà ki Cristo. 3 Pengkey si Cristo, wedà sikandin peg-aneng-aneng tepad te kandin ibeg, so doen kagi te Timanem insolat tepad kandin,
“E Timanem, siak se nekegamak te kedita te tompuyus te doma otaw kamno.”
4 Netegahan tadon te insolat se kedita te kagi te Timanem gebii amon peg-ilingan tadon, so pineokit te kagi te Timanem, meketayod kidon te kelimahan, aw megkagsen se pedowan tadon dalem te pegpeliman tadon te aldaw domateng. 5 Timanem se eglekatan te pegtayod tadon te kelimahan aw pegkagsen te pedowan tadon. Ibeg ko tebangan kaw din amon meinang sebad se pedowan te kedita niyo, iling te ibeg i Jesu Cristo. 6 Yan megsebad kaw heman domuyun te Timanem Amay te Pengolo tadon si Jesu Cristo.
Iduyun se Timanem te menge otaw kenà Judiyo
7 Yan, pegpeidoway kaw iling te pegkeido i Cristo te kedita niyo amon iduyun se Timanem. 8 Ipeaneng-aneng ko den kenyo te insogò te Timanem si Cristo diyà kenami menge Judiyo amon ipetaga-taga din te ontò keseligan se kagi te Timanem, so tinoman i Cristo se impakang te Timanem diyà te menge kemonaan day gebii. 9 Impetaga-taga heman i Cristo te menge otaw kenà Judiyo te neidowan dan te Timanem amon domuyun dan heman kandin, so doen kagi te Timanem insolat, kagi din,
“E Timanem, pengkey doton te menge otaw kenà Judiyo, megpesiontong a diyà kamno doma dan. Iduyun day sikona pineokit te pegdelangan day.”
10 Doen heman doma kagi te Timanem insolat,
“Sikiyo menge otaw kenà Judiyo, doen den keluba niyo doma te menge Judiyo tapay pinemallì te Timanem.”
11 Doen heman doma kagi te Timanem insolat,
“Kedita niyo menge otaw kenà Judiyo, duyun kaw te Pengolo tadon. Keilangan domuyun se kedita te otaw kandin.”
12 Doen heman insolat i Isaias gebii,
“Lekat te menge bowad-bowad i Isai, doen sebad otaw domateng amon lomowan diyà te menge otaw kenà Judiyo, aw sikandin se seligan dan.”
13 Timanem se eglekatan te kedita te egpelimanan tadon. Ibeg ko, begayan kaw din te ontò keluba aw kelinaw te pedowan niyo tandà te pegsalig niyo ki Cristo, amon melobos se pegpeliman niyo pineokit te tabang te Espiritu Santo kenyo.
Menge inang i Pablo
14 Menge kedowa ko, netegahan ko den te gayed mèpiya se eg-inangen niyo, aw tinoledaan kaw te kebenalan tepad te Timanem, aw mekebatog kaw heman megpetoledaay. 15 Meneng wedà a pegketalaw te pegsolat ko kenyo amon eked niyo kelibeli se kagi ko. Tandà te tabang te Timanem kanak, 16 ininang a din sogounun i Jesu Cristo, aw insogò a din doton te menge otaw kenà Judiyo, so pineokit kanak dimateng den kandan se Mèpiya Indan lekat te Timanem. Yan kininawà den dan te Timanem, so ininang dan egpenimanem pineokit te Espiritu Santo. 17 Tandà te tabang i Jesu Cristo kanak, wedad ingkeyàyà ko tepad te pegtolò ko te Timanem. 18 Olò a meg-indan kenyo tepad te ininang i Cristo pineokit kanak. Doen den menge otaw kenà Judiyo egtolò te Timanem pineokit te pegtoladà ko aw peg-inang ko, 19 aw pineokit te menge kepelahan egkeinang, aw pineokit te tolos te Espiritu Santo. Yan migtoladà a te Mèpiya Indan tepad ki Cristo doton te kedita te ogpeanan lekat te Jerusalem taman te Ilirico. 20 Doen gayed ibeg ko megtoladà te Mèpiya Indan doton te menge ogpeanan te otaw wedà pa ketaga-taga tepad ki Cristo, so eked a keibeg todà megtoladà te otaw tapay tinoledaan te doma otaw tepad ki Cristo. 21 Ibeg ko, metoman se kagi te Timanem insolat,
“Komità se menge otaw wedà pa indani tepad kandin, aw metaga-taga se menge otaw wedà pa dineg tepad kandin.”
Ibeg i Pablo domoton te Roma
22 So gayed a migtoladà doton te menge ogpeanan sìyan, yan se doun te wedà ko pa tomani se ibeg ko te lomaoy a kenyo doton te Roma. 23 Meneng songkani, nepenga den se ininang ko dini te menge ogpeanan seini. So nenamay den te doen ibeg ko lomaoy kenyo, 24 ibeg ko, mapit a doton kenyo te pegpesalo ko doton te Espanya. Ontò a meluba aw mekeogpà a doton kenyo te eked kenamay, aw penga niyan, meketabang kaw kanak te pegdeleg ko doton te Espanya. 25 Meneng te eked a pa doton kenyo, onà a domoton te Jerusalem amon ibingen ko se kwarta itabang te menge sakop te Timanem doton, 26 so ibeg te menge otaw dini te probinsya te Masidonya aw Gresya, megtabang dan te menge sakop te Timanem nelimahan doton te Jerusalem. 27 Yan se ibeg dan megtabang te menge Judiyo. Doen heman ontong dan kandan, so pineokit te menge Judiyo, dimateng den se kagi te Timanem doton te menge otaw kenà Judiyo. Yan mèpiya aw megtabang se menge otaw kenà Judiyo te menge Judiyo nelimahan. 28 Penga te pegtoman ko te peg-ated ko te kwarta itabang kandan, mokit a doton kenyo te pegpesalo ko doton te Espanya. 29 Aw domateng a doton kenyo, netegahan ko te ontò mèpiya se ibegay i Cristo kenitadon.
30 Menge kedowa ko, doen pemoyoen ko diyà kenyo tandà te pegsebad tadon diyà te Pengolo tadon si Jesu Cristo, aw tandà te pegpedekelay tadon te pedowan imbegay te Espiritu Santo kenitadon. Ibeg ko, megtawal-tawal kaw heman diyà te Timanem tepad kanak. 31 Pemoyò kaw diyà kandin te eked a peelegi te menge otaw kenà egpesakop diyà ki Cristo doton te Judiya. Pegtawal-tawal kaw heman te megpesiontong se menge sakop te Timanem doton te Jerusalem tandà te peg-ated ko te kwarta itabang kandan. 32 Penga niyan, aw meibeg se Timanem, ontò a meluba aw domoton a kenyo, aw megkagsen se pedowan ko aw komità a kenyo. 33 Ibeg ko, tebangan se kedita niyo te Timanem egpemegay te kelinaw te pedowan.