1 Penga niyan, doen dinineg ko iling te pegtawal te ontò medita otaw kidoen te langit. Timawal dan, “Aliloya. Iduyun se Timanem, so sikandin se egpelowà, aw melangkaw, aw metolos. 2 Ontò neketotok aw metòlid se peg-okom din, so impelumun din den se kepoyun nedengeg, sìyan migpeakop te kedita te otaw te keneyonan diyà te medaet inang din. Impelumun sikandin te Timanem so nengimatay te menge otaw timolò te Timanem.”

3 Todà dan timawal, “Aliloya. Iduyun se Timanem. Gayed mebel se apoy te pegsonog te lonsod sìyan te wedad temanan.”

4 Penga niyan, limongken se kedita te kelowan teg epat obanen aw epat ayam-ayam metolos, aw migsimba dan te Timanem nenenoo kidoen te onsedanan te peglowan. Minikagi dan, “Metoman iyan. Aliloya. Iduyun se Timanem.”

5 Penga niyan, doen minikagi kidoen medapag te onsedanan te peglowan, kagi din, “Kedita niyo egtolò te Timanem tadon aw kedita niyo egsagman kandin, pengkey sagkep aw melangkaw, duyuni niyo se Timanem.”

6 Penga niyan, doen dinineg ko iling te pegtawal te ontò medita otaw, iling te elok te medita wayeg aw eleg-eg te kilat. Timawal dan, “Aliloya. Iduyun se Timanem, so limowan den se Pengolo tadon Timanem diyà te kedita te otaw. 7 Keilangan ontò kidon meluba aw iduyun tadon sikandin, so dimateng den se peipid te Karniro, aw neketagad den se ipeipid kandin. 8 Doen dagom imbegay kandin ininang te sapot ontò mepotì aw wedad kelipà niyan.” Se kedegdagan te sapot, yan se metòlid inang te menge sakop te Timanem.

9 Penga niyan, minikagi se anghil, “Solat ka den kani. Ontò meluba se kedita dan tinawal diyà te peipid te Karniro.”

Penga niyan, minikagi heman sikandin, “Yan se benal kagi te Timanem.”

10 Penga niyan, limongken a diyà kandin amon simbahen ko, meneng minikagi sikandin, “Ikà egsimba kanak, so pengkey siak, aw sikona, aw kedita heman te doma no nemenal te kebenalan intoladà i Jesus, tomalag egtolò te Timanem. Yan keilangan Timanem olò se simbahen nikaw.”

Yan se inikagi din, so se intoladà i Jesus, yan heman se kebenalan intoladà te menge telekeliwat te kagi te Timanem.

11 Penga niyan, kinità ko se langit neowang, aw doen kodà mepotì. Se otaw simakay kenyan, yan se doen doma ngadan din si Keseligan, aw si Kebenalan. Metòlid se kedita te pegpelumun din aw peglompak din te poon din. 12 Iling te apoy se mata din. Medita se korona insangkob kidoen te olo din. Doen ngadan insolat kandin, meneng olò sikandin se netaga-taga te kedegdagan niyan. 13 Iling te in-agem se saol din diyà te dipanog, aw egtewalen sikandin “Kagi te Timanem.” 14 Tinekingan sikandin te ontò medita sondalo lekat te langit. Nenaol dan heman te sapot ontò mepotì aw wedad kelipà, aw simakay dan heman te menge kodà mepotì. 15 Lekat te bahà din, eglowà se sondang megalang, aw yan se kekamang din idaeg te kedita te eglowan kidoen te keneyonan. Aw lomowan sikandin, keilangan tomolò se kedita te otaw kandin. Inangen din se poon din iling te paras emegen te otaw meg-inang te bino, so ipekità din kandan se keopal te Timanem metolos. 16 Doen gulal din insolat kidoen te saol din aw bobon din, “Selotan eglowan diyà te kedita te selotan,” aw “Pengolo te kedita te pengolo.”

17 Penga niyan, kinità ko se anghil kidoen te aldaw. Timawal sikandin diyà te kedita te manok eglayang kidoen te tengà-tengà te langit aw tanà, aw dakel se kagi din, “Ayas kaw. Pegtipon kaw, so doen ipekaen te Timanem kenyo. 18 Komaen kaw te onod te menge selotan, aw kapitan, aw sondalo. Kànen niyo se lawa te kodà aw lawa te otaw simakay te kodà. Kànen niyo se lawa te kedita te otaw pengkey allang aw kenà allang, pengkey sagkep aw melangkaw.”

19 Penga niyan, kinità ko se menenanap mebolot aw menge selotan te keneyonan sipat kedita te sondalo dan. Netipon dan amon megbolaw te otaw simakay te kodà mepotì aw kedita te sondalo lekat te langit. 20 Pegbolaw dan, dinakep se menenanap mebolot. Dinakep heman se telekeliwat te kebolalaw, sìyan tapay mig-inang te menge kepelahan pineokit te tolos te simogò kandin, amon meg-akal te kedita te otaw pinengilelaan te menenanap mebolot aw otaw migsimba te inotaw impeinang din. Penga niyan, in-agbel se menenanap aw telekeliwat din doton te lanaw apoy doen esopri eglegdeg. 21 Penga niyan, inimetayan se kedita te sondalo dan pineokit te sondang eglowà lekat te bahà te otaw simakay te kodà mepotì. Ontò nebesog se kedita te manok kimaen te lawa dan.