1 Nayan, menge kedowa ko egkedekelan ko te pedowan, sikiyo se egpemegay te luba kanak, aw sikiyo se pengilala te doen ontong te peg-inang ko. Dimela a kenyo, aw dakel se pedowan ko kenyo. Ibeg ko eked kealin se pegsalig niyo diyà te Pengolo tadon.

2 Memoyò a kenyo Eyodia aw Sintike te megpelebetay kaw, so telekedowa kaw diyà te Pengolo tadon. 3 Memoyò a heman kamno ontò sigalak ko te keilangan megtabang ka te didowa bayi sìyan amon megsebad dan, so ontò dan migtelaban kanak te pegtoladà ko te Mèpiya Indan tepad ki Cristo. Migpedomaay dan si Clemente aw menge doma otaw migtelaban kanak. Insolat se ngadan te menge otaw sìyan kidoen te libro sinolatan te ngadan te kedita te otaw binegayan te kaling pedowan wedad temanan.

4 Keilangan gayed kaw meluba tandà te pegpesakop niyo diyà te Pengolo tadon. Todà a megpunù kenyo te keilangan meluba kaw.

5 Pekitai niyo diyà te kedita te otaw te medalem se pedowan niyo. Lomikò se Pengolo tadon te eked kenamay. 6 Pengkey eden se domateng kenyo, ikà niyo palos egketetana. Meneng pegtawal-tawal kaw tepad te kedita diyà te Timanem. Pemoyoi niyo diyà kandin se kedita te kelidoan niyo. Pegpesiontong kaw heman kenyan diyà kandin. 7 Aw yan se eg-inangen niyo, inangen te Timanem ontò melinaw se pedowan niyo igsà eked iyan kelebeti te otaw. Yan se ikelasag din te pedowan niyo aw aneng-aneng niyo tandà te pegsebad niyo ki Jesu Cristo.

8 Nayan, menge kedowa ko, sebad mendad se ikegiyen ko kenyo. Keilangan wedad palos eneng-enengen niyo singed aw benal iyan, aw doen ontong, aw metòlid, aw wedad salà, aw ikeluba, aw mèpiya dengeg. Pengkey eden se mèpiya, aw mepakay iduyun, yan se keilangan gayed niyo eneng-enengen. 9 Tolò kaw te kedita te intoladà ko kenyo. Peg-iling kaw te kedita te inikagi ko aw ininang ko, aw yan egdomaan kaw te Timanem egpemegay te kelinaw te pedowan.

10 Ontò a neluba aw egpesiontong a diyà te Pengolo tadon, so todà kaw den migtabang kanak. Netegahan ko te doen gayed ibeg niyo megtabang kanak, meneng wedad aldaw te pegtabang niyo. 11 Ikà niyo eg-aneng-aneng te migbelisì a tandà te kelimahan ko, so netegahan ko den te pengkey eden se domateng kanak, gayed mèpiya se pedowan ko. 12 Miglumun a den te keogpà te sagkep aw meyaman. Pineokit te pegtoladà te Timanem kanak, netegahan ko den te meketayod a pengkey eden se domateng kanak, pengkey dakel se kànen ko, pengkey bellosen a, pengkey meyaman a, pengkey wedad kedònan ko. 13 Pengkey eden se domateng kanak, meketayod a te kedita niyan so egtebangan a i Cristo.

14 Meneng egpesiontong a te intabang niyo kanak tandà te kelimahan ko. 15 Sikiyo menge tege Filipos, netegahan niyo den te pegkesayo ko lekat te probinsya te Masidonya, te kaling ko intoladà kenyo se Mèpiya Indan tepad ki Cristo, wedad doma otaw egpemenal nenogpò kanak, meneng olò sikiyo se nenogpò kanak. 16 Pengkey dalem te peg-ogpà ko doton te Tesalonika, gayed kaw egpenogpò kanak. 17 Kenà te intabang niyo kanak se egkeibegan ko, meneng ibeg ko begayan kaw te Timanem te ontong tandà te pegtabang niyo kanak. 18 Wedad den kepulukan ko so nekekinawà a den te kwarta impeibing niyo kanak, igsà doen pa samà. Wedad den kepulukan ko so binegayan a den i Epafrodito te impeibing niyo kanak. Iling iyan te metinadeg ipegbegay diyà te Timanem, so kinità din iyan aw neluba sikandin kenyan. 19 Wedad temanan te keyemanan te Timanem egseligan ko, aw begayan kaw din te kedita te kelidoan niyo tandà te pegpesakop niyo diyà ki Jesu Cristo. 20 Yan keilangan iduyun se Timanem Amay tadon te wedad temanan. Metoman iyan.

21 Indani niyo se teg sebad-sebad sakop te Timanem egpemenal ki Jesu Cristo te eg-aneng-aneng a kandan. Eg-eneng-enengen kaw heman te menge otaw doma ko dini. 22 Pengkey kedita te menge sakop te Timanem dini, aw labi pa se menge otaw egterbaho doton te balay te selotan, ibeg te kedita dan metaga-taga kaw te eg-aneng-aneng dan kenyo.

23 Ibeg ko megtabang se Pengolo tadon si Jesu Cristo te teg sebad-sebad kenyo.