1 Nayan, pegpesalo dan doton te Jerusalem, migpedapag dan kidoen te lonsod te Bitpahi doton te ongan te bontod te Olibo. Insogò i Jesus se didowa tinoledaan din, 2 kagi din, “Onà kaw doton te lonsod sida peselowan tadon. Aw domateng kaw doton, ketelaan niyo se ayam-ayam iling te kodà iningedanan asno sipat nati niyan. Iniketan iyan, meneng lebadi niyo, aw ibingi niyo dini. 3 Aw doen otaw meg-insà te nengà lay linebad niyo iyan, ikegihi niyo te keilangan sekayan iyan te Pengolo niyo, aw yan ipeibing din iyan kenyo.”

4 Pineokit kenyan, tinoman din se kagi te telekeliwat te kagi te Timanem gebii,

6 Nesayo se didowa tinoledaan din aw timolò dan te impunù din kandan. 7 Inibing dan se asno aw nati niyan doton ki Jesus. Menge saol dan se in-ampal dan diyà te getan te nati, aw simakay si Jesus kenyan. 8 Inladlad te keditaan te otaw se saol dan doton te dalan peselowan din, aw sinagpì te doma otaw se menge pelapà te palmera aw insawol dan doton te dalan, so yan se ketanem dan aw segmanen dan se otaw meinang selotan. 9 Migpegais se kedita te otaw timaking ki Jesus, pengkey nekeonà aw timetondog. Migpegais dan, “Iduyun se bowad-bowad i David. Iduyun se insogò te Pengolo tadon Timanem. Iduyun se Timanem.”

10 Pegdateng i Jesus doton te Jerusalem, nepela se kedita te otaw, so migpeinsaay dan, “Sinu lay sikandin?”

11 Timaba se otaw timaking ki Jesus, “Sikandin se telekeliwat te kagi te Timanem si Jesus. Lekat sikandin te lonsod te Nasarit sakop te probinsya te Galiliya.”

12 Nayan, dimoton si Jesus te dakel simbahan te Timanem doton te Jerusalem, aw impekadas din se kedita te otaw egpemeligyà aw egbayad kidoen te dowangen niyan. Impelias din se lemisa te menge otaw egliwan te kwarta, aw impelias din heman se bangkò te otaw egpemeligyà te selepati ibegay diyà te Timanem. 13 Minikagi sikandin, “Doen kagi te Timanem impesolat din gebii,

14 Dimoton se menge otaw bota aw kapig te dakel simbahan, aw pinegolian dan i Jesus. 15 Meneng neopal se menge pengolo te simbahan aw menenoladà te punù ingkeliwat i Moises, so kimità dan te menge kepelahan ininang i Jesus, aw dinineg dan heman se mengisù migpetewalay kidoen te dakel simbahan, kagi dan, “Iduyun se bowad-bowad i David.”

16 Yan se doun te minikagi dan diyà ki Jesus, “Tay law. Aw dinineg no se kagi dan, nengà lay wedà no dan segdahi?”

Timaba si Jesus, “Dinineg ko dan, meneng mepakay iyan diyà kanak. Wedà niyo besi besahi se kagi te Timanem seini,

17 Penga niyan, nesayo si Jesus lekat kidoen aw dimoton te lonsod te Bitanya aw minidegà kidoen.

18 Pegkeiselem niyan, limikò si Jesus doton te Jerusalem. Te wedà pa dateng doton, binallos sikandin. 19 Kinità din se kayo igira medapag te dalan, aw dimoton sikandin amon mahà te pongo niyan. Meneng wedad palos pongo kinità din, olò menge dawen. Minikagi sikandin diyà te kayo, “Eked den palos pongo se kayo seini.”

Wedà kenamay, nelanes se kayo sìyan. 20 Pegkità te menge tinoledaan din kenyan, nepela dan aw minikagi dan, “Nelanes den se kayo igira te wedà kenamay.”

21 Minikagi si Jesus, “Eneng-enengi niyo se kagi ko kenyo seini. Aw somalig kaw diyà te Timanem aw eked kaw pegdowa-dowa, meg-inang kaw te kepelahan labi pa metolos diyà te ininang ko diyà te kayo seini. Aw mikagi kaw diyà te bontod seini te meabat iyan aw mealin doton te dagat, metoman iyan meinang. 22 Aw megtawal-tawal kaw diyà te Timanem, aw somalig kaw diyà kandin, metoman kaw din begayan te kedita te pemoyoen niyo.”

23 Nayan, limikò si Jesus doton te dakel simbahan te Jerusalem aw migtoladà. Wedà kenamay, doen menge pengolo te simbahan aw menge obanen te Judiyo dimoton kandin, aw mig-insà dan, “Nengà lay eg-inang ka te kedita nini? Sinu lay se simogò kamno?”

24 Minikagi si Jesus, “Doen heman insà ko kenyo. Aw meketaba kaw kani, meg-indan a diyà kenyo aw sinu se simogò kanak. 25 Sinu lay se simogò ki Juan amon memonyag? Timanem, aw otaw se simogò kandin?”

Penga niyan, migpebelaw-belaway dan aw eden se itaba dan kandin. Minikagi dan, “Simpana tomaba kidon te Timanem se simogò ki Juan, silahen kidon din, so wedà kidon pemenal ki Juan. 26 Meneng simpana tomaba kidon te olò otaw se simogò ki Juan, keopalan kidon te kedita te otaw netipon, so eg-aneng-aneng dan te ontò telekeliwat te kagi te Timanem si Juan.”

27 Yan se doun te minikagi dan, “Inday. Wedà day ketegahi aw sinu.”

Minikagi si Jesus, “So wedà kaw taba te insà ko, eked a peg-indan diyà kenyo aw sinu se simogò kanak.”

28 “Eneng-enengi niyo ini. Doen otaw dowa se batà din. Minikagi sikandin diyà te batà din kakay, ‘Atò, pegterbaho ka den doton te pawà te aldaw seini.’ 29 Minikagi se batà din, ‘Eked a.’ Meneng wedà kenamay, netodà se aneng-aneng din aw timolò. 30 Penga niyan, dimoton se otaw te batà din adi, aw onawa se inikagi din diyà kandin. Minikagi se batà din sìyan, ‘Ee, amà. Domoton a.’ Meneng penga niyan, wedà deleg. 31 Nayan, indani a niyo. Eden lay betai se timolò te amay din?”

Timaba dan, “Kakay se timolò.”

Minikagi si Jesus, “Eneng-enengi niyo se kagi ko kenyo seini. Medita den se otaw nekeonà kenyo migpesakop diyà te peglowan te Timanem, pengkey nelegeb dan te salà iling te menge iskribinti aw menge kepoyun. 32 Pegtoladà i Juan te keilangan megselsel kaw amon eneng-enengen te Timanem te metòlid kaw, wedà kaw pemenal kandin. Meneng medita se iskribinti aw kepoyun nemenal kandin. Pengkey kimità kaw kenyan, meneng wedà kaw pegselsel aw wedà kaw heman pemenal kandin.”

33 “Penenalan kaw den te tegdeyanan seini. Doen otaw migpawà aw nenanem te paras. Mig-inang sikandin te alad, aw tigmesanan te paras, aw layag. Penga niyan, impetonggò din iyan te menge doma otaw aw dimoton sikandin te mediyò ogpeanan. 34 Pegdateng te aldaw te peglegani, doen menge sineligan insogò te tig-apò amon doen talad din. 35 Meneng pegdateng te sineligan din doton, medaet se ininang te menge otaw migtonggò te pawà din. Nemadas dan te sebad sineligan din, aw nengimatay dan te doma, aw nemontog dan te bato diyà te doma. 36 Penga niyan, labi pa medita se doma sineligan insogò din doton kandan. Meneng onawa heman se medaet ininang te otaw migtonggò diyà te sineligan insogò din. 37 Penga niyan, insogò din se batà din, so aneng-aneng din keilangan segmanen dan se kandin batà. 38 Meneng pegdateng te batà din doton, migpebelaw-belaway dan, ‘Seini se meketig-apò te tanà seini aw matay se amay din. Mèpiya aw imetayan tadon sikandin amon sikitadon se meketig-apò te tanà seini.’ 39 Penga niyan, inewidan dan sikandin, aw ginoyod dan doton te lowà te pawà, aw inimetayan dan sikandin.

40 “Nayan, indani a niyo. Aw domoton se tig-apò te pawà, eden lay se inangen din diyà te menge otaw impetonggò din?”

41 Timaba dan, “Ipeeleg din se mededaet otaw sìyan aw imetayan din se kedita dan. Penga niyan, ipetonggò din se pawà din te doma otaw keseligan, amon begayan dan sikandin te talad te kelikit te omay.”

42 Minikagi si Jesus, “Iling te wedà kaw palos pegbasa te kagi te Timanem seini,

43 “Eneng-enengi niyo se kagi ko kenyo. Yan se doun te eked kaw sekopi te Timanem diyà te peglowan din, meneng sekopen din se menge doma otaw ontò tomolò te ibeg din. [ 44 Aw mekedogsò se otaw kidoen te bato seini, melosek se menge tòlan din. Meneng aw kedegdagan se otaw te bato sìyan, mepolpog sikandin.]”

45 Pegdineg te menge Parisiyo aw pengolo te simbahan kenyan, netegahan dan te sikandan se nesogatan te tegdeyanan din sìyan, 46 aw yan se doun te ibeg dan megdakep peden kandin. Meneng wedà dan peketoman, so nelemitan dan te menge otaw gayed egpenenalan kandin, so mig-aneng-aneng se kedita te otaw te si Jesus se telekeliwat te kagi te Timanem.