1 Doen menge telekeliwat te kagi te Timanem aw menenoladà te otaw egpemenal kidoen te Antyokya. Sikandan si Bernabe, aw si Simeon, se doma ngadan din si Meitem, aw si Lucio tege Sirene, aw si Saulo, aw si Manaen doma i Herod migpetillesay.

2 Doen aldaw migpowasa se otaw egpemenal kidoen te Antyokya, aw megsimba dan te Pengolo. Dalem niyan, minikagi se Espiritu Santo diyà kandan, “Teniyi niyo kanak si Bernabe aw si Saulo, so doen ipeinang ko kandan.”

3 Penga niyan, migpowasa dan aw todà dan migtawal-tawal, aw pinemàdan dan si Bernabe aw si Saulo, aw penga niyan impekesayo dan.

4 Insogò se didowa dan te Espiritu Santo aw yan timegbeng dan pesalo doton te Silusya, aw simakay dan te dakel belangay pesalo doton te polò iningedanan Sipro. 5 Pegdateng dan doton, timenà dan doton te lonsod te Salamina, aw migtoladà dan te kagi te Timanem doton te menge simbahan te Judiyo. Timaking heman si Juan, se doma ngadan din si Marcos, so migtelaban kandan. 6 Peglegeb dan doton te menge lonsod te polò sìyan, timaman dan te Papos. Kinità dan se sebad otaw Judiyo si Barjesus. Biyasa ekon sikandin egdelikmata. Migpelingo-lingo sikandin telekeliwat te kagi te Timanem. 7 Egdoma sikandin te gobirnador te polò sìyan si Sergio Paulo. Ontò biyasa se gobirnador aw impeangay din si Bernabe aw si Saulo, so ibeg din menenalan te kagi te Timanem. 8 Meneng migsamok kandin se otaw biyasa egdelikmata si Elimas, so yan se gulal din kagi te Griego. Ibeg din megsagda te gobirnador amon eked sikandin pemenal. 9 Penga niyan, tinebangan te Espiritu Santo si Saulo, doma ngadan din si Pablo. Timengteng sikandin ki Elimas 10 aw minikagi, “Sikona se sakop i Satanas, so sikona se poon te kedita te metòlid. Biyasa ka eg-akal. Eg-ikagi ka te kebolalaw se benal kagi te Pengolo. 11 Na, mebota ka te menamay-namay, so ipelumun ka den te Pengolo. Eked ka kità.”

Pegketà nebota sikandin. Wedad kinità din. Yan migkawà-kawà sikandin nengemahà te doma otaw meg-agak kandin. 12 Pegkità te gobirnador kenyan, ontò neleseb se pedowan din nenenalan te kagi te Pengolo, aw yan nemenal sikandin.

13 Penga niyan, simakay si Pablo aw menge doma din te dakel belangay lekat te Papos pesalo doton te Pampilya. Dimeleg dan doton te Perga. Meneng simoway si Juan kandan so minolì doton te Jerusalem.

14 Nesayo si Pablo aw si Bernabe lekat te Perga aw dimeleg dan doton te Antyokya kidoen te Pisidya. Aldaw te Sebado, dimoton dan te simbahan te Judiyo. Minawop dan aw nenenoo. 15 Migbasa se egpengibing te simbahan te kagi te Timanem insolat i Moises aw menge doma telekeliwat te kagi te Timanem. Penga niyan, nemoyò se egpengibing te simbahan diyà ki Pablo aw si Bernabe, kagi dan, “Menge kedowa day, aw doen itoladà niyo diyà te kedita day netipon, mepakay aw megtoladà kaw den.”

16 Yan timindeg si Pablo aw intakyaw din se belad amon mepenek dan. Minikagi sikandin, “Menge kedomaan ko bowad-bowad i Israel aw kedita niyo kenà Judiyo egtolò heman te Timanem, penenalan kaw te kagi ko. 17 Timanem se egseligan tadon aw sikandin se nemallì te kemonaan tadon. Peg-ogpà dan doton te mediyò ogpeanan te Ehipto, migtabang se Timanem kandan aw migkedita dan. Pineokit te inang metolos, migtabang se Timanem kandan amon mekelowà dan lekat te Ehipto. 18 Dalem te kepatan se omay, inipat dan te Timanem doton te kebigtilan. 19 Dinaeg te Timanem se pito pongan te otaw doton te Canaan, aw imbegay din se tanà diyà te menge Judiyo amon meg-ogpà dan kidoen 20 dalem te epat gatos keliman se omay. Penga niyan, doen menge otaw insogò te Timanem teg sebad-sebad amon mengibing kandan lamig te peg-ogpà te sebad telekeliwat te kagi te Timanem, si Samuel. 21 Penga niyan, ibeg dan doen selotan mengibing kandan. Yan insogò te Timanem se batà i Cis si Saulo, sebad sakop te pongan i Benjamin. Limowan si Saulo diyà kandan dalem te kepatan se omay. 22 Penga niyan, impelowà te Timanem si Saulo aw inselilin din si David limowan kandan, so minikagi se Timanem,

23 “Sebad bowad-bowad i David si Jesus. Sikandin se insogò te Timanem amon megpelowà te otaw lekat te salà. Sikandin se tapay din impakang diyà kenitadon, so sikitadon se bowad-bowad i Israel. 24 Te wedà pa pegtoladà si Jesus, migtoladà si Juan diyà te menge bowad-bowad i Israel te keilangan megselsel dan te salà amon bonyagan din dan. 25 Te wedà pa kematay si Juan, minikagi sikandin, ‘Kenà ko se pinelimanan niyo, meneng doen pa domateng mekeselilin kanak. Kenà botong se kelangkaw ko amon megtelaban a kandin pengkey meglebad a te sepatos din, so ontò sikandin melangkaw diyà kanak.’

26 “Penenalan kaw menge kedowa ko, menge bowad-bowad te kemonaan tadon si Abraham, aw kedita niyo egtolò te Timanem. Sikitadon se pinetega-tegahan te Timanem te doen den kelowaan lekat te salà. 27 Meneng se menge otaw doton te Jerusalem aw otaw limowan kandan, wedà dan ketaga-taga te sikandin se Egpelowà. Pengkey binasa dan se kagi insolat te menge telekeliwat te kagi te Timanem doton te simbahan dan te kelikit te simana, meneng wedà dan iyan kelebeti. Mig-okom dan kandin, aw yan netoman se inikagi te telekeliwat te kagi te Timanem. 28 Pengkey wedad palos salà din amon mepakay imetayan, meneng nemoyò dan ki Pilato amon imetayan sikandin. 29 Yan netoman se kedita te kagi te Timanem tapay insolat. Penga niyan, inabat dan se lawa din lekat te kros aw inlebeng dan iyan doton te ilib. 30 Meneng inantay sikandin te Timanem lekat te nematay. 31 Nenamay sikandin migpekità diyà te menge otaw timaking kandin kedengan lekat te Galiliya pesalo doton te Jerusalem. Eg-indan den dan diyà kenitadon menge Judiyo te benal kinità dan. 32 Dimini kay den amon meg-indan kenyo te Mèpiya Indan tepad ki Cristo. Pengkey kemonaan tadon se pinekangan te Timanem, 33 meneng netoman den iyan dini kenitadon, so insogò din den si Jesus. Yan se kedegdagan te kagi te Timanem insolat diyà te Delangan Ikedowa,

38-39 “Menge kedowa ko, ibeg ko ketegahan niyo den te pineokit te pegkematay i Jesu Cristo, in-indan kenyo se pegwedad te salà. Eked kaw pekelowà lekat te salà pineokit te pegtolò niyo te punù ingkeliwat i Moises, meneng pineokit ki Jesu Cristo mekelowà se kedita te otaw memenal kandin.

40 “Peg-ahà kaw amon eked kaw pelumuni iling te menge otaw in-indan te telekeliwat te kagi te Timanem,

42 Penga te pegtoladà i Pablo, nemoyò se menge otaw te todà dan megtoladà kandan te modi Sebado. 43 Pegkesayo dan, tinekingan dan te medita otaw, menge Judiyo aw menge otaw kenà Judiyo egtolò te ketanem te menge Judiyo. Migpunù si Pablo aw si Bernabe kandan te keilangan somalig dan diyà te Timanem egpenabang kandan.

44 Pegdateng te modi Sebado, netipon se kedita te tege Antyokya amon menenalan dan te kagi te Timanem itoladà dan kandan. 45 Meneng ontò miningà se menge Judiyo kenà egpemenal so kinità dan se medita otaw netipon. Yan migsawal dan ki Pablo aw migtompuyus dan heman kandin. 46 Meneng wedà pegketalaw si Pablo aw si Bernabe, so timaba dan, “Keilangan sikiyo Judiyo se onà day indanan te kagi te Timanem. Meneng wedà kaw penenalan kenyan so eked kaw keibeg te kaling pedowan wedad temanan ibegay te Timanem. Doun niyan, meg-indan kay den te kagi te Timanem diyà te menge doma otaw kenà Judiyo. 47 Yan se inangen day so doen kagi te Pengolo insolat,

48 Pegdineg te menge otaw kenà Judiyo kenyan, ontò dan neluba aw dimuyun dan te Timanem tepad te inikagi i Pablo. Nemenal se kedita te otaw neibeg te kaling pedowan wedad temanan.

49 Nedengeg se kagi te Pengolo doton te menge doma lonsod medapag te Antyokya. 50 Meneng dineliseg te menge Judiyo kenà egpemenal se menge obanen kidoen aw menge bayi melangkaw. Pinemilang dan si Pablo aw si Bernabe, aw impekadas dan lekat te lonsod sìyan aw kedepagan niyan.

51 Pegkesayo dan lekat kidoen, tinaktak dan se napò te tanà lekat te sepatos dan amon metaga-taga se otaw kidoen te doen salà dan so wedà dan penenalan te intoladà. Penga niyan, dimoton si Pablo aw si Bernabe te Ikonyo. 52 Ontò neluba se kedita te otaw egpemenal doton te Antyokya, so egbeyà-beyaan dan te Espiritu Santo.