1 Kidoen te Sesarya, doen serhinto ngadan din si Cornelio. Sikandin se sebad diyà te menge sondalo iningedanan Gropo Italya. Sikandin se olo te sebad gatos sondalo. 2 Egpenimanem sikandin pengkey kenà Judiyo. Gayed sikandin egtolò te Timanem sipat menge doma otaw eg-ogpà diyà te balay din. Egtebangan din se menge Judiyo nelimahan, aw gayed egtawal-tawal diyà te Timanem. 3 Menge alas tris te meapon, doen kinità din ontò melowa. Migpekità diyà kandin se anghil te Timanem aw minikagi, “E Cornelio.”

4 Timengteng si Cornelio pengkey ontò nepela. Timaba, kagi din, “Sir, eden lay se ibeg no ipeinang kanak?”

Minikagi se anghil, “Dinineg te Timanem se pegtawal-tawal no kandin. Netegahan din heman se keido no diyà te menge Judiyo nelimahan. Neluba se Timanem. 5 Nayan, sogò ka te otaw domoton te Jopa amon mangay ki Simon, se doma ngadan din si Pedro. 6 Mig-ogpà sikandin medapag te dagat doton te balay te kesangay din si Simon biyasa eglanit te kindal te ayam-ayam.”

7 Peg-olì te anghil doton te langit, tinawal i Cornelio se dowa sineligan din aw sebad sondalo egpenimanem aw egkeseligan din. 8 Mig-indan kandan te kedita te neinang diyà kandin, aw insogò din dan domoton te Jopa.

9 Keeldawan niyan te agpet den alas dosi, aw medapag den dan doton te Jopa, nenayit si Pedro kidoen te atep te balay inogpaan din amon megtawal-tawal diyà te Timanem, so pantal se atep te balay sìyan. 10 Binallos si Pedro aw ibeg din komaen. Meneng dalem te wedà pa kelegà se kànen, doen impekità te Timanem diyà kandin. 11 Kinità din se langit neowang. Doen migpedanà diyà kandin iling te dakel bekas intonton lekat te langit aw inewidan diyà te epat dogong. 12 Awop niyan se ontò medita kemolò te menenanap aw ayam-ayam aw manok. 13 Doen minikagi diyà ki Pedro lekat te langit, “E Pedro, pengiyaw ka amon doen iotan nikaw.”

14 Meneng timaba si Pedro, “Sir, eked a kaen kenyan so eked a làpang te punù ingkeliwat i Moises, sìyan gayed ko egtoloen.”

15 Doen heman kagi todà dinineg din, “Ikà eg-ikagi te eked kepakay aw kànen, so minikagi se Timanem te mepakay iyan kànen.”

16 Meketelo heman iyan keinang diyà kandin iling kenyan, aw penga niyan neengat se bekas doton te langit. Meneng wedad kinaen din. 17 Mig-aneng-aneng si Pedro aw eden se kedegdagan te kinità din. Na, dalem niyan, mig-insà se menge otaw insogò i Cornelio aw kenan se balay i Simon. Telobo pa mig-aneng-aneng si Pedro, dimateng dan doton te lelebangan te balay inogpaan din. Kenà dan Judiyo. 18 Timawal dan aw mig-insà aw sìyan se balay inogpaan i Simon, se doma ngadan din si Pedro.

19-20 Dalem niyan te peg-aneng-aneng i Pedro te kinità din, minikagi se Espiritu Santo diyà kandin, “Na, tenà ka den, so doen telo otaw dimateng nengemahà kamno. Ikà egkulu te tomaking kandan, so insogò ko dan.”

21 Penga niyan, timenà si Pedro aw mig-insà kandan, kagi din, “Siaken se otaw pinengemahà niyo. Eden lay se tod niyo kanak?”

22 Timaba dan, “Insogò kay te sebad serhinto si Cornelio olo te sebad gatos sondalo. Sikandin se otaw egpenimanem aw egtolò te Timanem, aw induyun sikandin te medita Judiyo. Doen anghil te Timanem migpunù kandin te ipeangay ka din amon megtoladà ka kandin.”

23 Penga niyan, impeawop din dan aw impeidegà dan kidoen.

Keeldawan niyan, timaking si Pedro kandan. Timaking heman kandin se menge doma otaw egpemenal lekat te Jopa. 24 Keeldawan heman niyan, dimateng dan doton te Sesarya. Migpeliman si Cornelio kandan, aw tapay din pigtipon se kedomaan din aw menge sigalak din. 25 Pegdateng i Pedro doton, simongon si Cornelio aw limongken diyà ki Pedro amon megsimba kandin. 26 Meneng minikagi si Pedro, “Tindeg ka. Siaken olò otaw. Kenà a Timanem. Ikà egsimba kanak.” Yan impetindeg i Pedro si Cornelio.

27 Nayan, migpebelaw-belaway dan aw minawop dan te balay. Medita se otaw netipon kidoen. 28 Minikagi si Pedro diyà kandan, “Netegahan niyo te eked kepakay aw megdoma se otaw Judiyo diyà te otaw kenà Judiyo. Eked heman kepakay aw gomemaw se otaw Judiyo diyà te balay te otaw kenà Judiyo. Siaken se Judiyo. Sikiyo se kenà. Meneng impetaga-taga a den te Timanem te eked a den peg-eked se megdoma te otaw kenà Judiyo. 29 Peg-angay dan kanak, timolò a aw dimini a. Na, nengà lay impeangay a no?”

30 Minikagi si Cornelio, “Netelowan pa, migtawal-tawal a diyà te Timanem te alas tris te meapon. Pegketà migpekità diyà kanak se anghil nenaol te mepotì, 31 aw minikagi diyà kanak, ‘E Cornelio, dinineg te Timanem se pegtawal-tawal no kandin, aw netegahan din heman se keido no diyà te menge Judiyo nelimahan. 32 Na, sogò ka te otaw domoton te Jopa amon mangay ki Simon, se doma ngadan din si Pedro. Mig-ogpà sikandin dapag te dagat diyà te balay te kesangay din si Simon biyasa eglanit te kindal te ayam-ayam.’ 33 Yan se doun te ayas ta impeangay. Mèpiya so dini ka den. Na, elew, netipon se kedita day amon menenalan kay te kagi te Pengolo ikeliwat no kenami.”

34 Nayan, migtebò si Pedro migtoladà kandan, kagi din, “Ontò ko netegahan te kenà olò Judiyo se otaw egkeidowan te Timanem. 35 Meneng keidowan din se kedita te otaw egtolò kandin aw eg-inang te mèpiya, pengkey otaw Judiyo aw pengkey otaw kenà Judiyo. 36 Netegahan niyo te insogò te Timanem si Jesus diyà kenami menge bowad-bowad i Israel amon megtoladà kenitadon te mèpiya indan tepad te kelinaw te pedowan ibegay din diyà te otaw memenal ki Jesu Cristo, so sikandin se Pengolo te kedita tadon. 37 Netegahan niyo se neinang doton te Judiya, so pegkepenga te pegtoladà i Juan tepad te pegbonyag, migtebò si Jesus tege Nasarit migtoladà doton te Galiliya. 38 Simogò se Timanem kandin aw egbeyà-beyaan te Espiritu Santo. Pengkey peglegeb din, tinebangan din se menge otaw, aw pinegolian din se menge doma dinetengan te bosaw, so migtabang se Timanem kandin. 39 Kinità day se kedita te ininang din doton te menge lonsod te Judiya aw doton te Jerusalem. Penga niyan, inlansang dan si Jesus diyà te kros aw yan inimetayan. 40 Meneng inantay sikandin te Timanem lekat te nematay te iketelo te aldaw. Impekità te Timanem si Jesus diyà kenami. 41 Wedà sikandin kitai te kedita te otaw, meneng sikami pinemallì te Timanem se kimità kandin, aw kimaen kay doma kandin penga te pegkeantay din lekat te nematay. 42 Insogò kay din amon megtoladà kay te Mèpiya Indan tepad kandin diyà te menge otaw, aw amon meg-indan kay te benal si Jesus se pinemallì te Timanem meg-okom te kedita te otaw, pengkey nematay aw wedà pa kematay. 43 Kedita te telekeliwat te kagi te Timanem simolat te pegwedaden se salà te kedita te otaw memenal ki Jesus.”

44 Telobo pa minikagi si Pedro, dimateng se Espiritu Santo diyà te otaw nenenalan kandin. 45 Ontò nepela se kedita te Judiyo timaking ki Pedro, so dimateng heman se Espiritu Santo diyà kandan pengkey kenà dan Judiyo, 46 so dinineg dan se menge otaw kenà Judiyo nekeikagi te medita kemolò kagi te doma otaw, aw dimuyun dan heman te Timanem. Penga niyan, minikagi si Pedro diyà te menge Judiyo timaking kandin, 47 “Dimateng den heman se Espiritu Santo diyà kandan onawa te pegdateng din diyà kenitadon. Wedad den belabag te pegbonyag kandan.”

48 Penga niyan, minikagi si Pedro te bonyagan dan, so nemenal dan ki Jesu Cristo. Penga niyan, tinemengan dan si Pedro, aw mig-ogpà sikandin kidoen kandan te wedà kenamay.