1 Seini se solat ko, si Pablo, doma ki Silas, aw si Timoteo. Simolat kay te kedita niyo egpemenal kidoen te Tesalonika menge sakop te Amay tadon Timanem aw Pengolo tadon si Jesu Cristo.

Ibeg day, tebangan kaw te Timanem aw begayan kaw din heman te kelinaw te pedowan.

2 Gayed kay egpesiontong diyà te Timanem tepad te kedita niyo, aw gayed kay heman egtawal-tawal tepad kenyo. 3 Te pegtawal-tawal day diyà te Amay tadon Timanem, kenà kay egkelibel te impetaga-taga niyo te benal nemenal kaw ki Cristo pineokit te eg-inangen niyo, aw impetaga-taga niyo te dakel se pedowan niyo kandin pineokit te pegpekeaseb niyo, aw impetaga-taga niyo te egpeliman kaw te Pengolo tadon si Jesu Cristo pineokit te pegtayod niyo te kelimahan. 4 Menge kedowa day, netegahan day te dakel se pedowan te Timanem kenyo, aw pinemallì kaw din, 5 so pegtoladà day kenyo te Mèpiya Indan tepad ki Cristo, nemenal kaw kenà pineokit olò te inikagi day, meneng pineokit te ininang te Espiritu Santo kenyo, aw yan netegahan niyo te ontò benal se intoladà day. Peg-ogpà day kidoen kenyo, kinità niyo heman se ininang day amon ketebangan kaw. 6 Netegahan day te pinemallì kaw te Timanem so neinang kaw iling kenami aw iling heman te Pengolo tadon. Pengkey pinemilang kaw tandà te pegpemenal niyo te kagi te Timanem, meneng binegayan kaw te Espiritu Santo te keluba te pedowan niyo. 7 Yan se doun te sikiyo den se gegonan pig-ilingan te kedita te doma otaw egpemenal doton te kebelad te Masidonya aw Gresya, 8 so pineokit kenyo, ingkeliwat den se kagi te Timanem tepad te Pengolo tadon kenà olò doton te Masidonya aw Gresya, meneng netaga-taga den se kedita te otaw te nemenal kaw den te Timanem. Yan se doun te wedad den keilangan te peg-indan day te menge otaw tepad te pegpemenal niyo, so netegahan den dan iyan. 9 Eg-indan se kedita dan aw eden se ininang niyo te pegdoton day kenyo. Eg-indan dan te limengà kaw den te pegsimba niyo te inotaw, aw egtolò kaw den ekon te benal Timanem wedad temanan din. 10 Egpeliman kaw den ekon te peglikò te Batà din lekat te langit. Yan si Jesu Cristo inantay te Timanem lekat te nematay. Si Jesu Cristo heman se megpelowà kenitadon lekat te pelumun te Timanem te modi aldaw.