19
Pen a Urvet angare o risea nge a Babilon ile vulthepong.
1 Lamako tho nongpol pulua pomnga ole presing a Pen a Urvet me, ma o prespot ve,
“Te risea a God,
eneke ile engenging
na ile Pen a Urvet a malmaling
i aolonga rintet,
na ienga inga i el werer tokokoere.
2 Na ile avrumong nge tokokoere
i vengveng na i nunganga.
Na i paomelal seng sovengalo anga aken
ako iion i kima,
eneke i paleklek toko alavusnga
ake ru a ulue
nge ile vothung kerenga omanga ako nge eve eling.
Na i olal ile umongare oa mla a i nge.”
3 Na o presa mun ve,
“Te risea a God,
eneke won sesenga klunga
ako i antun rem alumlumnga aken
aro i klung evelelnga
ako aro ile vusonga avele.”
4 Na mukalinga or mule paini pothoi or penel tomo mun nge ur miminga or penel aken, o koru oeve na o lotual a God ako i men a nepes a menonga aken nge, na o ri ve,
“I nunganga.
Te risea a God.”
5 Lama tho nongpol mun presing ako i espot a nepes a menonga aken nge me ve,
“Thomu areko ini a God ile umongare
tomo nge areko o papomnga i,
tova iomu kima eve iomu kima avele,
Aro thomu o risea ler God.”
Sipsip Tun isungalnga a aning i velpol.
6 Lamako tho nongpol presing ako i ranga ve ini pulua pomnga ole presing, ma i ranga ve ini thei awonga ile alululong, na pen le akrungong aolonga ma o presa ve,
“Te risea a God,
eneke ler God ako ini Toko Pomnga
ako ile engenging i aolonga rintet
i velpol ini nepes lale.
7 Aro te risea,
na te voth vos,
na te papomnga i,
eneke i toth lale
ako aro Sipsip Tun i peange,
na iewo sengenga i monsi lale
nge ole peangeong.
8 Na God isa wom seng aken
ve aro i ne neong velelesnga
ako i riri na i tolilis.”
(Na neong velelesnga aken
i paateal a God ile tokokoere
ole vothung vengvenga.)
9 Na ensel aken i ria tho nge ve, “Ong wat i vene: Sapase areko God i pasong ikei a or nge mo o es nge Sipsip Tun isungalnga a aning.” Na i ria mun tho ve, “Riong ake ini a God ile riong nunganga.”
10 Lama tho koru evek totho a ensel aken ieve nge mo aro tho lotual i, aveto i ria tho nge ve, “Mothong tova oma venen aken, tho mun ini a God ile umonga ranga ve ini wong tomo nge titeumre, it ini areko te panes riong nunganga ako Jisas i pavelpol i. Aro ong lotual inga a God, eneke riong nunganga ako Jisas i pavelpol i, i pavurpola mun a God ile riong elngare olemi.”
Jon i thopol toko ako i men roro a hos velelesnga nge.
11 Lama tho thepol ako Pen a Urvet i thep na hos velelesnga omole ako i mit nge. Na o apet toko ako i men a iwe ve ini “Riong Nunganga Tepun” na “Toko Ako i Panes Senu a God” na ile vothung elonga i vengveng tova ve i pun tomo nge tokokoere eve i avrum ole vothung. 12 Na itheki ile toong i ranga ve ini won sesenga ile anlileling. Na i ur vevea posposenga pulua a ipounga, na o wato ioning a i nge ako ienga inga ilemi mire nge. 13 Na teunong ako i teun i, i vual nge mla, na iion ve, “God Ile Riong.” 14 Na Pen a Urvet a punongare o panes i na o men men roro a hos velelesngare nge, na o teun teunong velelesnga ako i riri rintet. 15 Na bainat wowonga i oselpot a toko aken iwo me, mo aro ile mong toko alavusnga ake ru a ulue nge. Naro i theal toko alavusnga ake ru a ulue. “Na ile thealing aken aro i engeng ranga ve ini ain.” * Buk Song 2:9 Naro i sung a God ako ile engenging i aolonga rintet ile lemi klingong a tokokoere nge, ranga ve ini vain monnga ako o tepiplas i. 16 Na wating ako i voth a ile tekruk seltunnga epee ako i pasopal ia olu i vene:
Nepesre ole Nepes na Pompomere Oa Pomnga.
17 Lamako tho thopol ensel omole ako i mit a nang nge, na i presa viringa a menre nge ako o rer a malang po ve, “O velilo pel me nge a God ia aning aolonga 18 mo aro thomu o an nepesre osivanga tomo nge punongare na ole mukalingare osivanga na hosre tomo nge opathongare osivanga tomo mun nge toko alavusnga osivanga. Or ini areko o um polpol eve o el oolonga, na areko oion i kima eve oion i kima avele.”
19 Lama tho thopol mun mekerem tevivinga aken tomo nge nepes alavusnga ake ru a ulue tomo mun nge ole punongare, kene o velilo pel mo aro o pun tomo nge toko aton i men roro a hos velelesnga nge, ome ile punongare. 20 Na o rere mekerem tevivinga aken tomo nge riong le apaltetonga elnga ako i oma pathepolongre a mekerem tevivinga itheki. Na pathepolong areken i paleklek areko o el mekerem tevivinga ile paatealing tomo mun nge areko o lotual mekerem tevivinga ia sei. Na God i asesu mekerem tevivinga ome riong le apaltetonga elnga aken alamimmia a pen ako won sesenga tomo nge uk ako ini misep anga o anlilel nge. 21 Na toko ako i men roro a hos nge i pun rin ole punonga alavusngare nge bainat ako i oselpot a iwo me, na men alavusngare o an osivanga ma osa pup rintet.