18
Rem a lumlumnga a Babilon i vulthepu.
1 Lamako tho thopol mun ensel mun e ako i esu a Pen a Urvet me. Na ile engenging i aolonga rintet, na ile tolilisong i to a ulue me, mako pen elonga i lala. 2 Na i presa viringa ve,
“Rem a lumlumnga a Babilon i vulthepu lale.
Na i velpol ranga ve ini
tamata kerengare ole pen ol
tomo nge men kerengare.
3 Na rem aken i vulthepu,
eneke i ranga ve ini seng sovengalo anga
na toko alavusnga ake ru a ulue
o ngo tomo nge i,
na o lel okime nge a God.
Na i ranga ve ako
o thin thei engenga pulua
ma otheki vaisis,
mako God i paomelal or
nge ole vothung kerenga areken.
Na nepes puluanga ake ru a ulue
o ngo tomo nge i,
na o lel okime nge a God.
Na toko alavusnga ake ru a ulue
ako or ini lulu paesngare
o velpol ini toko le urngare.
Eneke toko pulua ako a Babilon
ako o men a ole ur sivesivenga we,
o ol ole lulu.”
4 Lama tho nongpol presing mun e ako i espot a Pen a Urvet me ma i ria ve,
“Lek tokokoere aro o lopot nge pen aken,
aro vene mo thomu o panes ile vothung kerenga,
naro thomu o el mun kerengaing aken.
5 Eneke ile vothung kerenga i pom rintet
na i ranga ve ini ree ako o ases tomoal i,
na i esa esa mo i toth a Pen a Urvet,
na God ilemi simikal
ile vothung kerenga areken avele.
6 Aro thomu o olal i a i nge
ranga ve ako i oma i a tokokoere nge lale.
Naro thomu o rong esa kerengaing a i nge
ranga ve ako i oma i.
Naro thomu o sung thei engenga
ako i engeng rintet a i nge
mo i thin i.
7 Na i papomnga isivenga,
na i men a ile ur sivesivenga we,
maken aro thomu o sung kerengaing a i nge,
i pavurvur nge ile vothung kerenga aken.
Naro thomu o pasisis i mo aro i wal,
eneke isivenga i risea i ve,
‘Tho men ranga ve ini nepes,
na tho ini basu avele,
na i pavurvur avele ako aro tho el matheong
mo aro tho wal nge.’
8 Na i venen aken, mako aro ile kerengaing
aro i velpoltun i nge nang omole inga,
ranga ve ini rinong na matheong na mesi.
Naro won sesenga aro i ongtun i,
eneke Toko Pomnga a God
ako aro i sung paomelaling a i nge,
kene ile engenging i aolonga rintet.
9 “Na nepes alavusnga ake ru a ulue ako o ngo tomo nge i, na o lel okime nge a God, kene o men a ole ur sivesivenga we ranga ve ini i, naro o thopol won sesenga na won klunga ako o ongtun i nge, naro olemi kerere mo o wal nge i. 10 Naro o mit mela nge i, eneke o ngeip ve aro paomelaling aken aro i eso mun a or nge, naro o ria ve,
“ ‘Patong a Babilon
ong ini rem alumlumnga
ako lom engenging i aolonga,
aveto nge aua omole inga
ong el paomelaling na ong vus.’
11 “Na toko alavusnga ake ru a ulue ako or ini lulu paesngare, aro olemi kerere naro o wal nge i, eneke toko ol e avele ako aro i olol ole lulu, 12 ranga ve ako ini gol na silva, na um ako iolonga i roro, na pengep otoli,* O thepol pengep otoli ia sei nge a Matiu 13:45 pes 36. na neong sivesivenga ako i veleles na i selele na i vuvav, nako i melongal mun na neong areken iolonga i roro. Na won areko i una vro, na ur puluanga ako o oma i nge mekerem wo pupo, na won ako iolonga i roro, na bras,† Bras ini ur ako o oma tang a tap nge na ur pelie mun. na ain, na um ako a wating i ut kolol. 13 Na ur ako i una vro ranga ve ini madan, na sanda, na vain, na wel ako o apet i ve ini oliv, na plaua, na luvo monnga, na bulmakau, na sipsip, na hos tomo nge karis, na toko um polpolonga tomo mun nge tokokoere, na ur alavusnga areken ini ole lulu na oolonga i roro.
14 “Na areko or ini lulu paesngare aro o ria Babilon ve, ‘Ur sivesivengare ako lomum i vurpol nge, i vus lale na lom ur sivesivenga areko ong men a we, kene i vus mun lale, naro ong thopol werer ol i avele.’ 15 Na lulu paesnga areko o el ole umtun pulua a i nge, aro o mit mela, eneke o ngeip ve aro paomelaling aken i eso mun a or nge. Na olemi kerere ma o wal. 16 Na o ria i ve,
“ ‘Patong rem a lumlumnga a Babilon,
nomenga ong ne neong sivesivengare
ako ini velelesnga na selelenga, na vuvavnga,
na ong pamalmal num peti
nge nanaing ako o oma i nge gol,
na um areko iolonga i roro,
na pengep otoli.‡ O thepol pengep otoli ia sei nge a Matiu 13:45 pes 36.
17 Aveto nge aua omole inga,
lom ur elonga pom rinnga aken i penthal.’
“Na imot thealngare tomo nge ole mukalingare tomo mun nge areko o esu esa a imot nge, aro o mit melanga nge a Babilon. 18 Naro o thopol won sesenga klunga ako i antun i naro o tang ve, ‘Rem alumlumnga ol e avele ako i ranga ve ini a Babilon.’ 19 Naro olemi kerere naro o vor vor vuvus a opounga naro o wal naro o ri ve,
“ ‘Patong a Babilon,
nomenga wong ini rem alumlumnga
ako areko o patho imot
o el ole umtun pom
nge lom ur elonga ako i pom.
Na nge aua omole inga,
lom ur alavusnga i vus.
20 Aveto thomu Pen a Urvet angare
tomo nge toko lemioongare,
na God ile pakekere,
na ile riong elngare,
Aro thomu o risea,
eneke God i paomelal a Babilon lale
nge ile vothung kerenga
ako i oma i a thomu nge.’ ”
21 Lamako ensel engenga omole i ela um ako i aolonga rintet ma i ultet i viringa a rua stha na i ria ve,
“Rem alumlumnga a Babilon
aro ong vulthepu viringa
ranga ve ini um ake tho ultet i a rua stha.
Na toko ol e avele aro i thopol werera mun ong.
22 Na toko e avele aro i nongpol ol
won agolu le tanging,
eve kuth le avvuvong,
eve moku le tanging,
eve tokokoe areko o vo voing
a ong nge.
Na toko e avele
aro i oma ol ile omaing e
a ong nge.
Na toko mun e avele
aro i monsi ol aning
a ong nge.
23 Na theki lalainga e avele
aro i to ol
a ong nge.
Na toko e avele
aro i nongpol ol peangeong a riong
a ong nge.
Na ong vulthepu venen aken,
eneke lom tokokoe areko or ini lulu paesngare
o mukal nge toko alavusnga ake ru a ulue ole,
na ong nong tungtang
na lom apaltet toko alavusnga
ake ru a ulue.
24 God i pakerenga a Babilon,
eneke i pun rin ile riong elngare
na ile toko lemioongare
nge pen elonga ake ru a ulue.”
*18:12: O thepol pengep otoli ia sei nge a Matiu 13:45 pes 36.
†18:12: Bras ini ur ako o oma tang a tap nge na ur pelie mun.
‡18:16: O thepol pengep otoli ia sei nge a Matiu 13:45 pes 36.