1 Pol-je kɨ̀ Barnabasɨ dꞌɔw kəykəwna̰-tɨ lə jipɨ-je kɨ́ mḛḛ ɓebo Ikoniyɔm-tɨ tɔ. Dḛ ꞌndó dow-je né sar ya adɨ jipɨ-je kɨ̀ grɛkɨ-je kɨ́ ꞌtò nduy-nduy ya dꞌadɨ mḛḛ-dé Jeju. 2 Ngà dow-je kɨ́ ná̰-je dan jipɨ-je-tɨ kɨ́ ꞌto njémḛḛndə-je lé, ꞌsulə dow-je kɨ́ ꞌto jipɨ-je al kadɨ ꞌra njékadmḛḛ-je majɨ al. 3 Pol-je kɨ̀ Barnabasɨ dꞌisɨ mḛḛ ɓebo Ikoniyɔ̰m-tɨ ndɔ asɨ ta-tɨ ɓəy. Dḛ dꞌində mḛḛ-dé dɔ ꞌƁaɓe-tɨ adɨ ꞌpa ta kɨ̀ mḛḛnda ka̰y. Beɓa ꞌƁaɓe adɨ-dé tɔ́gɨ adɨ ꞌra-né né-je kɨ́ tò ɓəl-ɓəl, kɨ̀ né-je kɨ́ tɔjɨ adɨ dow-je ꞌgə kɨ́ ramajɨ lə Lubə kɨ́ Pol-je kɨ̀ Barnabasɨ dꞌilə mbḛ-é lé, to ta kɨ́ tɔgrɔ-tɨ ya. 4 Beɓa kosɨ dow-je kɨ́ mḛḛ ɓebo-tɨ ꞌgángɨ-na̰ lo joo: Dḛ kɨ́ ná̰-je dꞌa̰ go jipɨ-je-tɨ, ngà dḛ kɨ́ dan-tɨ-je dꞌa̰ go njékɔwkulə-je-tɨ tɔ. 5 Jipɨ-je kɨ̀ dow-je kɨ́ ꞌto jipɨ-je al, dꞌində ndi-dé natɨ kɨ̀ ꞌboy-je lə-dé, kdɔ kadɨ dꞌadɨ kɔ̰̀ Pol-je kɨ̀ Barnabasɨ rəm, kdɔ kadɨ ꞌtilə-dé kɨ̀ ər ꞌtɔl-dé rəm tɔ. 6 Rəmə ta-é usɨ mbi Pol-je-tɨ, adɨ dꞌa̰y dꞌɔw ꞌɓɔyɔ rɔ-dé ɓebo Listrə-tɨ, kɨ̀ ɓebo Dɛrbɨ-tɨ kɨ́ to ɓebo-je kɨ́ dɔnangɨ Likaoni-tɨ, kɨ̀ nganɓe-je kɨ́ gəə dɔ-dé. 7 Dꞌilə mbḛ Poyta kɨ́ Majɨ lo-je-tɨ kinlé tɔ.

8 Dingəm káre kɨ́ njènjakoy isɨ mḛḛ ɓebo Listrə-tɨ nɔ̰ɔ̰. Ə to dingəm kɨ́ nja-é oy lo kojɨ-é-tɨ nṵ adɨ njiyə nja káre al. 9 Ḛ isɨ oo ta kɨ́ Pol isɨ pa. Lokɨ Pol oo-é gə́rə́rə́ lé, oo kɨ́ kadmḛḛ liə lé, asɨ kadɨ adɨ-é lapiya. 10 Ngá ɓá pa siə ta kɨ̀ ndi-é kɨ́ boy panè: «ꞌḬ taá, ꞌa̰ dɔ nja-i-tɨ njururu!» Rəmə dingəm lé ubə nangɨ ratɨ ya ḭ taá njiyə. 11 Lokɨ kosɨ dow-je dꞌoo né kɨ́ Pol ra kinlé rəmə, ꞌpa ta kɨ̀ ndi-dé kɨ́ boy kɨ̀ ta Likaoni ꞌpanè: «Magɨ-je ꞌtəl rɔ-dé dow-je-tɨ, dꞌur nangɨ dan-ji-tɨ!* 14:11 Knj 28:6» 12 Dḛ ꞌɓa Barnabasɨ «Jəsɨ» ə ꞌɓa Pol «Ɛrmɛsɨ» kdɔ Pol ɓá to njèpata. 13 Njègugné lə magɨ «Jəsɨ» kɨ́ to magɨ kɨ́ kəy liə tò tarəbɨ kɔw mḛḛ ɓebo-tɨ lé, ree kɨ̀ bɔbɨ mangɨ-je, kɨ̀ putɨ kagɨ-je takəy pole magɨ-tɨ lé. Beɓa dḛ kɨ̀ kosɨ dow-je ꞌndigɨ kilə məsɨ nangɨ kun-né ta Pol-je kɨ̀ Barnabasɨ lé. 14 Ngà lokɨ njékɔwkulə-je kɨ́ joo kin dꞌoo ta-é lé, ꞌgángɨ kubɨ-je kɨ́ rɔ-dé-tɨ ə dꞌa̰y dꞌur dan kosɨ dow-je-tɨ kɨ̀ kəə ta-dé-tɨ ꞌpanè: 15 «Kama̰-je! ꞌRai né kin bè kdɔ ri? Jḛ lé, jꞌto dow madɨ-si-je ya tɔ! Poyta kɨ́ Majɨ kɨ́ jꞌilə mbḛ-é jꞌadɨ-si lé, to ta lə kadɨ in̰əi magɨ-je kɨ́ kare bè kin kɔgɨ, ə ꞌreei kɨ rɔ Lubə-tɨ kɨ́ Njèkisɨ kəm, Njèra dɔra̰ kɨ̀ dɔnangɨ, kɨ̀ babo kɨ̀ né-je lay kɨ́ tò-tɨ† 14:15 Pa 146:6. 16 Dɔgangɨ ɓal-je-tɨ kɨ́ dəə kete lé, ḛ in̰ə gin dow-je lay adɨ ná̰-ná̰ ya un rəbɨ liə-liə. 17 Bè ya kàrè, Lubə lé, in̰ə ta tɔjɨ-si rɔ-é mḛḛ ramajɨ-je-tɨ liə al: Ḛ adɨ ndi ḭ dɔra̰-tɨ ədɨ dɔnangɨ-tɨ nè, ə adɨ kandɨ né-je tḛḛ kɨ́ na̰y-é na̰y-é, ḛ adɨ-si nékuso rəm, ɓá adɨ rɔnəl rusɨ mḛḛ-si rəm tɔ.‡ 14:17 Pa 147:8» 18 Lé njékɔwkulə-je ꞌpa-né ta-je kin bè ya kàrè, lo kadɨ dꞌɔgɨ dow-je lo kilə məsɨ nangɨ kun-né ta-dé lé, nga̰ n̰a̰.

19 Go-tɨ gogɨ rəmə, jipɨ-je kɨ́ dꞌḭ ɓebo Ikoniyɔm-tɨ rəm, ɓá ɓebo Antiosɨ-tɨ kɨ́ dɔnangɨ Pisidi-tɨ ꞌree ꞌsulə dow-je, adɨ ꞌtilə Pol kɨ̀ ər, ə ꞌndɔr-é dꞌɔw dꞌilə-é gidɨ ɓebo-tɨ, adɨ dḛ ꞌgɨr tokɨ ḛ oy ngá. 20 Ngà lokɨ njéndó né-je ꞌkəw-na̰ kɨ́ dɔ-é-tɨ lé, ḛ ubə nangɨ ḭ taá təl ɔw mḛḛ ɓebo-tɨ gogɨ. Lo aa go-tɨ lé, dḛ kɨ̀ Barnabasɨ dꞌɔw ɓebo Dɛrbɨ-tɨ.

21 Pol-je kɨ̀ Barnabasɨ dꞌilə mbḛ Poyta kɨ́ Majɨ mḛḛ ɓebo Dɛrbɨ-tɨ, adɨ dow-je n̰a̰ ya ꞌtəl njéndó né-je. Beɓa dḛ ꞌtəl ꞌree ɓebo Antiosɨ kɨ́ dɔnangɨ Pisidi-tɨ, kɨ̀ ɓebo Listrə-tɨ, kɨ̀ ɓebo Ikoniyɔm-tɨ gogɨ. 22 Dḛ dꞌulə dingəm mḛḛ njéndó né-je-tɨ kadɨ dꞌuwə rɔ-dé nga̰ ə dꞌa̰ dɔ nja-dé-tɨ mḛḛ kadmḛḛ-tɨ lə-dé rəm ꞌpanè: «Jꞌa kindəi dan kɔ̰̀ kɨ́ n̰a̰ gangi ɓəy ɓá, jꞌa tḛḛi kɔ̰ɓe-tɨ lə Lubə.» 23 Dan njékəwna̰-je-tɨ kɨ́ rá-rá kɨ́ dꞌɔw-tɨ lé, dḛ mbətɨ ꞌngatɔ́gɨ-je dꞌadɨ-dé ə ꞌpa ta kɨ̀ Lubə kɨ̀ kɔgɨ rɔ nékuso kɨ̀ man ka̰y dꞌulə-dé-né mḛḛ ji ꞌƁaɓe-tɨ kɨ́ dꞌadɨ-é mḛḛ-dé lé.

24 Beɓa dḛ dꞌində dɔnangɨ Pisidi ꞌgangɨ ꞌree dɔnangɨ Pampili-tɨ.§ 14:24 Knj 13:14 25 Dḛ dꞌilə mbḛ Poyta kɨ́ Majɨ lə Lubə mḛḛ ɓebo Pɛrje-tɨ, ngá ɓá dꞌɔw mḛḛ ɓe-tɨ kɨ́ Atali. 26 Lo-é-tɨ kinlé, dḛ dꞌal mḛḛ bato-tɨ ꞌtəl dꞌɔw ɓebo Antiosɨ-tɨ gogɨ, lo-tɨ kɨ́ ndɔkɨ dꞌulə-dé mḛḛ ji Lubə-tɨ adɨ ramajɨ liə ra sə-dé adɨ ꞌtɔl-né ta kullə lə-dé lé. 27 Lokɨ ꞌree ꞌtḛḛ mḛḛ ɓebo Antiosɨ-tɨ lé, dḛ mbɔ̰ njékəwna̰-je ə dꞌɔr-dé poy né-je lay kɨ́ Lubə ra kɨ̀ takul-dé rəm, ɓá dꞌɔr-dé poy tarəbɨ kɨ́ Lubə tḛḛ adɨ dow-je kɨ́ ꞌto jipɨ-je al kàrè dꞌadɨ mḛḛ-dé lé tɔ. 28 Pol kɨ̀ Barnabasɨ dꞌisɨ nṵ dɔkaglo asɨ tatɨ kɨ̀ njéndó né-je.