9
Ken vivviel e Raban sibu Israel
1 O vokokotie mi tuktuk simi vunan eou se Karisito. O kap bit. Kong baivinakier meie mi Moromoruo Tamat guor vara tuktuk ngan va 2 o suvuon mi aor tsak leong ma a munu ta mi aroung 3 surie kong sar nama kes. A oit va o ta mon i pakien mi sinubirei nge tampaek sorvekenan e Karisito sien va ine ta kulie bu patsoung va gi ta suvu vavato. 4 Egie mi kulu Israel. Ma e Raban a nga tour natuon nge gie ma a nga vasangan segie man matvinavaso. Ma a nga tsana ken sar kinubuits meie gie nge teir vunie nge gie mi Vinuor, ma gi suvuon mi duis nia rengeir simi Vona rengeir leong meie bu vakavakariem se Raban. 5 Egie bu tubuon mi kulou asna. Ma e Karisito a nga tubunie gie vemusurie mi dar. Ma eie mi Raban ese ta vuortie bu kepineits kokouk. Mi tietienengei ta rakot seie sibu ra bu ra! Amen.
6 O kap pevien va e Raban a kap nga tsang vaotie ken nama, simi vunan a kap va egie kokouk bu Israel egie bu Israel tuktuk. 7 Ma a kap va bu tubuon kokouk e Abaraam, egie bu natuon tuktuk. E Raban a nga kukubuits meie ngan e Abaraam malan mi Pakpak Leong ta pevien, “Mi tubu ta kovuni se Isak.” GEN 21:12 8 Ine a malan ine, a kap va bu tubuon kokouk e Abaraam vemusurie mi daran, egie bu natuon e Raban eiekesen bu natuon gi ta beit vemusurie ken kinubuits e Raban, arie egie bu natuon e Abaraam. 9 Ine arie misa ine mi kinubuits ta pevien, “Simi ra malan ine simi avareit ian, o ta muerengei ma e Sera ta suvuon ka madar tamat.” GEN 18:10
10 Ma mi namani vakavakariem a nga beit buer se Rebeka sien tate nga kour ngan ba ruoruo simi tam kes, e tubugiet e Isak. 11-12 I muan e Rebeka ta nga kava ba ruoruo ma i muan guor ta kap ngas nga tsana ka sinavei kalei o, tsokor, e Raban a nga pevien se Rebeka, “Mi muariem ta tsatsang se kesen lili.” Ine a vasangan va e Raban a ko viviel vemusurie ken vienviendon kesen, a kap va vemusurie mi vuovuan mi tsinatsangan. GEN 25:23 13 Arie mi vunan mi Pakpak Leong ta pevien, “O tovie e Iakop eiekesen o karto e Esau.” MAL 1:2,3
14 Vasa, giet oit nia pevien? Mi sinavien e Raban a kap duis, nge? A kap rovoriu! 15 Simi vunan a nga oeng se Moses, EXO 33:19
“O ta vasangan kong aor molous simi mei o ta lalaro vasangan kong aor molous sien,
ma o ta vasangan kong tentoiv simi mei o ta lalaro vasangan kong tentoiv sien.”
16 Ken vakavakariem e Raban a kap vunan si kegi lalaron mi kulou o, simi tsinatsangagie, eiekesen a vunan si ken aor molous. 17 Io, simi Pakpak Leong e Raban a nga pevien se Parao, “O nga tsuok voturie no, terengien va o ta mang tsatsang nge no nia vasangan mi ngisingisiung, ma mi asoung ta mang rorongovei simi kaber kokouk.” EXO 9:16 18 Io, e Raban a ko vasangan ken aor molous simi mei vemusurie ken lalaron, ma a ko vara aor teng ngan mi mei vemusurie ken lalaron.
19 Ka mei senga ta oit nia vereie iou, “Surie misa e Raban a ngas vorotan bu bienebeir segiet? Kap ka mene a oit nia suereren ken lalaron.” 20 Madar! E vodon va evoi ese va e ta vuvurisei veie e Raban? Vasa, mi bua pier a oit nia pevien simi tunumar, “Surie misa e ta toik malan nge iou ine?” ISA 29:16; 45:9 21 Sien mi tunumar ta tokie bu koi ngan simi bua pier kes, vasa, a kap suvu duis va ta tokie mi koi nian mi tsientsang ian ta potokivout ma mi koi mene nian mi tsientsang ian ta kap potokivout?
22 Io, e Raban a nga lalaron nia vasangan ken aor rarap ma mi ngesengesien. Eiekesen a nga onvidit nge por vururutie ken aor rarap veie gie ese gi ta sogove mi miensei ma ken aor rarap. 23 Ma a nga lalaron buer nia vasangan man matvinavaso ian ta tsiroup simi kulou kegi tino ta sogove ken aor molous, egie ese ta nga muna vile gie va gi ta suv si man matvinavaso. 24 Arie egiet ine mi kulou, ese ta nga viel tsana giet i kotubuon bu Iuda ma i kotubuon buer bu Kibang, 25 malan mo e Raban ta nga vorotsoruo ine mi nama i ngutsuon e Osea, HOS 2:23
“Egie ese a kap va mi kuloung,
o ta vuotongie gie va mi kuloung.
Ma o ta tovie gie
ese o ta kap nga muna tovie gie.
26 Ma HOS 1:10
“Vourvour, a nga oeng segie,
‘Enga a kap va mi kuloung.’
Eiekesen, ine, eie ta oeng segie,
‘Enga bu natuon e Raban ta tino.’ ”
27 Surie bu Israel, e Isaia a nga koup pevien, ISA 10:22,23
“Misasien mi aesaes simi kuoluon i Israel ta palan malan bu pide koen,
ka ba mei mo segie, gi ta suvuon mi vavato.
28 Mi Nguts ta lalapus nge vaton vititirie ken namani vuor i popon mi kaber.”
29 Ine a malan mo e Isaia tate nga muna pengan, ISA 1:9
“Sien va mi Nguts ngeisngeis beitsak a kap nga vatoa ka ba mei simi tubugiet,
va giet te tsorubeit malan mi kuoluon i Sodom ma i Gomora.”
A kap kegi ka vodovodon tuktuk bu Israel
30 Vasa giet ta oit nia pevien? Bu Kibang ese gi ta kap nga vengeis nia tino simi sinavei duis, e Raban a nga vuotongie gie va egie mi kulou duis surie kegi vodovodon tuktuk. 31 Eiekesen bu Israel ese gi ta nga vengeis nia tino vemusurie mi vinuor nia tsorubeit duis, gi kap nga tsang vaotie. 32 Surie misa? Simi vunan gi kap nga vengeis nia tino ngan mi vodovodon tuktuk, eiekesen gi si nga vengeis nia vemusurie mo mi Vinuor. Ma gi nga tsuomtsuom nge gie ine simi vunavout nia tsuotsuobakei. 33 Malan mi Pakpak Leong ta pevien, ISA 28:16
“Pare, o vuturungie mi vunavout nia tsuotsuobakei i Sion
ma mi vunavout leong nia tsana gie va gi ta kor,
ma eie ese ta vodovodon tuktuk sien, ta kap oit va ta mengemengeir.”