8
Mi kovan bu prist simi kinubuits vour
1 Mi kepineits o tate vokokotie a malan ine. Giet suvuon mi kovan bu prist ese ta mogos simi riem suv si ken mogomogos ni vuor mi Raban ian ta tsiroup die i kur simi rangit. 2 Eie a tsatsang malan va eie mi kovan bu prist i aron mi korot ta tamat simi vona sel tuktuk ian mi Nguts ta nga tsana ma a kap va mi kulou gi nga tsana.
3 Vemusurie mi vinuor, bu kovan bu prist kokouk gi ta ngas tabeir ngan bu tienebeir ma bu tienebeir ni varam. Io, ine buer, mi kovan bu prist ta ngas suvuon ken ka tienebeir. 4 Sien va Eie a nga mon simi kaber, va a kap nga oit nia tsorubeit prist, simi vunan bu prist gi mon nia tabeir ngan ine bu tienebeir vemusurie bu vinuor. 5 Mi tsientsang prist gi ta tsana, eie a malan mo man puppuo misa ta mon die i kur simi rangit. Arie mi vunan, sien e Moses ta nga visi tsana mi vona sel, e Raban a nga terie mi nama ngeisngeis sien, “E ta ngas tsang vititirie va e ta tsana bu kepineits kokouk vemusurie bu puppuo o ta nga vasangan sevoi i popon mi pout.” EXO 25:40 6 Eiekesen e Iesu a te nga suvuon mi tsientsang prist ian ta tsiroup rio segie, simi vunan mi kinubuits ian ta nga tsana i kotubuon e Raban ma mi kulou eie a tsiroup. Ine mi kinubuits vour a vunan bu banga kinubuits.
7 Sien va a kap ka bienebeir a mon simi kinubuits vourvour, va a kap pinat surie ka kinubuits mene te buer. 8 Eiekesen e Raban a nga vorotan mi bienebeir simi kulou, io, a nga pevien,
“Rorong, mi Nguts a pevien, Bu ra ta beit
sien o ta tsana mi kinubuits vour
meie gie bu Israel
ma meie gie bu Iuda.
9 Ta kap malan mi kinubuits
o ta nga tsana meie mi tubugie
sien o ta nga poro gie ngan ba rimoung
nia muonge gie sorvekenan i Isip,
simi vunan gi kap nga mon tuktuk vemusurie kong kinubuits,
ma o nga vuris murien veie gie,
mi Nguts a pevien.
10 Ine mi kinubuits vour, o ta ba tsana meie bu Israel
ian sibu ra va ta nemei, mi Nguts a pevien.
O ta terie kong sar vinuor si kegi sar vienviendon
ma o ta vataro sibu arogie.
Eou o ta tsorubeit magi Raban,
ma gi ta tsorubeit kong kulou.
11 Ma gi ta kap pinat surie va ka mei mene ta vavasengei sibu turagie enamon kes
o, si ka kasien nge pevien, ‘Nga ta ngas telekiran mi Nguts,’
simi vunan egie kokouk gi ta so telekira iou,
vakaek sibu mei lili segie beit sibu mei leong.
12 O ta vodon rivie kegi sar bienebeir
ma o ta kap ba buer vodonomie kegi sar bienebeir.” JER 31:31-34
13 Sien e Raban ta vuotongie ine “mi kinubuits vour”, a te tsana mi mene vourvour va a te kebeir. Ma misa a te kebeir ma misa a te mouron, a te vatavatat mo va tate kapangan.