3
E Iesu a tsiroup rio e Moses
1 Io, bu kasiung, enga mi kuoluon e Raban simi vunan e Raban a te nga viel tsana nga buer. Nga ta ngas teir putan mi vinavinadodonga kokouk rakot se Iesu ese giet ta vavatei katsep ngan va eie mi Aposol ma mi Kovan bu prist. 2 A nga ko tuktuk siken tsientsang se Raban ese ta nga vile, malan buer mo e Moses ta nga ko tuktuk simi tsinatsangan kokouk si ken vonuo e Raban. 3 E Iesu a kalei rio e Moses nia suvuon mi minangarei leong, malan mo mi ka tsangtsang vonuo a suvuon mi minangarei leong rio mi vonuo ta tsana. 4 Bu vonuo kokouk, bu mei mene gi tsana gie, eiekesen e Raban eie a nga tsana bu kepineits kokouk. 5 E Moses, ken petspets, a nga ko tuktuk simi tsinatsangan si ken vonuo e Raban. Ma a nga vakokoit vasangan bu kepineits va e Raban ta ba so vokokotie i muir. 6 Eiekesen e Karisito, mi Nout, a nga ko tuktuk si ken tsientsang nia vuor vakalaie bu kepineits si ken vonuo e Raban. Ma egiet ken vonuo e Raban sien va giet ta tuir ngeisngeis si kegiet vodovodon rorrois ian giet ta ko aor koits nge vakam ngan.
Mi namani venengeng surie mi tino ta kap suvu vodovodon tuktuk
7 Io, malan mi Moromoruo Tamat ta pevien,
“Nevere, sien va nga ta rongomie mi inan,
8 kian va ta papan bu aronga,
malan bu tubunga gi ta nga tsana sien gi ta nga rong tsak se Raban,
ma sien gi ta nga konon e Raban simi beir.
9 Ian en, bu tubunga gi nga terie iou simi konokonon,
ma sibu avareit ba sinangavur voveit gi nga pare mi sana o ta nga tsana.
10 Io, o nga aor rarap beitsak veie mi kuoluon ian bu ra,
ma o nga pevien, ‘Bu arogie a ko mon i pek te,
ma gi kap telekiran mi sinaviung.’
11 Io, o nga aor rarap nge tsana kong vakavakariem va,
‘Gi ta kap ba buer oit nia rubukien si kong minaes.’ ” PSA 95:7-11
12 Nga nenei kalei bu kasiung, terengien va ka mene senga ta kap mang suvu tsaka vienviendon ma ken vodovodon tuktuk ta kap mang kor sorvekenan e Raban ese ta tino. 13 Eiekesen nga ta ngas vakotsie nga ververkis sibu ra kokouk, sien va gi ngas vuotongie ngan ine mi ra va, “Nevere.” Mi sinavei tsokor ta masi bit tsana ken ka vienviendon ka mei senga ma mi aron ta masi papan. 14 Giet te me tuir pats meie e Karisito sien va giet ta tuir ngeisngeis simi vodovodon tuktuk giet tate nga muna suvuon te vourvour oit si kegiet ra vekvekitip. 15 Malan mi Pakpak Leong ta pevien,
“Nevere, sien va nga ta rongomie mi inan,
kian va ta papan bu aronga,
malan bu tubunga gi ta nga rong tsak seou.” PSA 95:7,8
16 Ese ine mi kulou gi nga rongomie e Raban nge rong tsak sien? Arie egie ese e Moses ta nga kir vorotsoruo gie i Isip. 17 Ese ine mi kulou e Raban a nga aor rarap veie gie i aron bu avareit ba sinangavur voveit? A nga aor rarap veie gie ese gi ta nga tsana mi sinavei tsokor, ma bu piripirigie a nga kor mutur simi beir. 18 Sien e Raban ta nga tsana ken vakavakariem va gi ta kap ba buer oit nia rubukien si ken minaes, ese mune ine mi kulou a nga vakokoit surie gie? Arie egie ese gi ta nga rong tsak se Raban. 19 Io, giet te pare va gi kap nga oit nia rubukien, simi vunan gi kap nga suvuon mi vodovodon tuktuk.