6
1 Ishi, kʉnongwa ye tʉkʉbhomba ɨmbombo peeka nʉ Mʉlʉngʉ, tukubhasundiilila kʉtɨ uwiila wa Mʉlʉngʉ we mʉposheleeye, mʉtakhaaleshe wʉteeje pabhʉʉlo. 2 Kʉnongwa ye ʉMʉlʉngʉ akʉtɨ,
“Akhabhalɨlo khe khakhondeeye, nákwimvwizye,
isiku ɨlya wuposhi, nákwavwizye.”
Tejeelezyi, akhabhalɨlo khe khakhondeeye khe khakhɨɨkha, isiku ɨlya wuposhi lye li liili!
Amayɨmba ga Paʉlo mʉ mbombo ya Mwene
3 Ishi tʉtakʉbhomba lyolyonti lye lɨngamʉpʉvwa wowonti, ɨnga ɨmbombo yɨɨtʉ yɨtakhalongwe akhabhiibhi. 4 Lyoli tʉkʉlolesya kʉtɨ twe bhabhombi bha Mʉlʉngʉ mu zyonti: mu wujimbiilizu, mʉ mayɨmba, mʉ wʉtolwe, na mʉ malabha. 5 Tʉkʉkhomwa, tʉkʉkʉngwa mwɨ jeela, khabhɨlɨ bhakʉtʉsʉʉpɨzya pa mbɨmbɨlɨ ya bhantʉ, twabhomba ɨmbombo ingomu paka twalita, tʉkʉgona amiiso, khabhɨlɨ sita kulya. 6 Khabhɨlɨ tʉkʉlolesya twe bhabhombi bha Mʉlʉngʉ kʉ mwoyo umuzelu, mʉ wʉbhaazye, uwujimbiilizu, nu wuteti, kwɨ dala ɨlya kʉlongolwa nu Mupepu uMufinjile, kʉ lʉgano lwe lʉtalɨ ni shisa ɨshɨ lenga. 7 Khabhɨlɨ tʉkʉlolesya kwɨ dala ilyi ntumi ɨzya nalyoli, na kʉ makha ga Mʉlʉngʉ. Uwugolosu, she shɨlwɨlo shɨɨtʉ, kʉmbalɨ ɨya kʉndɨɨlo na kʉmongo. 8 Tuyilinganyiinye kʉposheela ulushindikho, awe kʉshoolanywa, kubhunwa, na kʉpaalwa. Tʉkʉlolekha ngatɨ tʉlɨ nɨ lenga, fwanɨ tʉkʉlonga zya nalyoli. 9 Tʉkʉlolekha ngatɨ tutamanyishile, fwanɨ tumanyishile ku bhonti, tʉkʉlolekha ngatɨ tufuuye, ɨleelo twe bhuumi. She poope tukhomiilwe nhaani ɨleelo tutagogiilwe. 10 She poope tʉswɨmɨlɨɨye, ɨleelo tʉkʉseshela insiku zyonti, she poope twe bhapɨɨna, ɨleelo tubhapiiye uwudumbwe abhantʉ abhinji. Tʉkʉlolekha ngatɨ bhantʉ bhe bhatalɨ nakho naakhamu, fwanɨ tʉlɨ navwo vwonti.
11 Bhanholo bhɨɨtʉ Bhakolinso, tulonjile nɨɨmwe apazelu, khabhɨlɨ tulonjile kʉ lʉgano ʉlʉpɨtɨ. 12 Ɨtwe tutakuyidinda kʉbhagana, lyoli ɨmwe, mwe mudindile kʉtʉgana ɨtwe. 13 Ishi ɨnkʉlonga nɨɨmwe ngatɨ ɨnkʉlonga na bhaana bhaanɨ: mʉbhe nʉ lʉgano ʉlʉpɨtɨ, anzɨɨtwe she tʉlɨ.
Kʉsangaana na bhantʉ bhe te Bhakilisiti
14 Mwɨmaje apatali na bhantʉ bhe bhatitishile. Bhʉlɨ, uwugolosu nu wubhiibhi vɨngakhola kʉbha peeka? Awe ʉlʉkhozyo na khiisi vɨngakhola kʉbha peeka? 15 Khabhɨlɨ uKilisiti angimvwana bhʉlɨɨbhʉlɨ nu Seetani? Awe we ayitishile alɨ na lwɨmvwano bhʉlɨ na we atitishile? 16 INyumba iMfinjile ɨya Mʉlʉngʉ yɨngakhola bhʉlɨɨbhʉlɨ kʉbha nʉ wʉpeeka ni vifwani ɨvwa bhamʉlʉngʉ? Kʉnongwa ye ɨtwe twe Nyumba iMfinjile ɨya Mʉlʉngʉ we mwumi! Anza she ʉMʉlʉngʉ álonjile átɨlɨ,
“Ɨntɨyɨɨkhale pakaasi yaabho
na kʉjenda peeka nabho.
Ɨntɨbhe ne Mʉlʉngʉ waabho,
bhoope bhatɨbhe bhantʉ bhaanɨ.”* 6:16 Bhaazya Bhalaawi 26:12; Yelemiya 32:38; Ezekieli 37:27.
17 Pe shɨnɨɨsho ʉMwene akʉtɨ,
“Mwepe pakaasi yaabho,
mʉyɨsaabhʉle nabho!
Mʉtalemaje akhantʉ akhakhandamanu!
Nɨɨne ɨntɨbhaposheele.”† 6:17 Bhaazya Yeesaya 52:11; Ezekieli 20:34, 41.
18 Khabhɨlɨ ʉMwene ʉMʉlʉngʉ ʉwa makha gonti akʉlonga akʉtɨ,
“Ɨne ɨntɨbhe ne Taata wiinyu,
nɨɨmwe mʉtɨbhe mwe bhaana bhaanɨ
abhasakhaala na bhalɨndʉ.”‡ 6:18 Bhaazya 2 Samweli 7:14.