1 Bhʉlɨ, mʉkʉsɨɨbha kʉtɨ twanda winza kʉyɨpaala tʉneetwe? Tʉtakʉyɨpaala. Ɨtwe tʉtalɨ anza bhantʉ abhanjɨ bhe bhakʉbhaleetela ɨmwe amakalaata aga kʉyɨmanyɨsya kukwinyu awe kʉlaabha amakalaata kufuma kukwinyu kʉtʉmanyɨsya kʉ bhantʉ abhanjɨ. 2 Ɨmwe ngatɨ lɨkalaata lyɨtʉ, lye lisimbiilwe mʉ mooyo gɨɨtʉ. Abhantʉ bhonti bhakʉlɨmanya na kʉlɨbhaazya. 3 Mʉkʉlolesya kʉtɨ ɨmwe mwe lɨkalaata lye lisimbiilwe nu Kilisiti, lye lɨkʉlolesya ɨmbombo ye twámʉbhombeeye kukwinyu. Ɨkalaata lɨnɨɨlyo litasimbiilwe nu wiino, lyoli lisimbiilwe nu Mupepu wa Mʉlʉngʉ we mwumi. Khabhɨlɨ litasimbiilwe mʉ vɨbeeza ɨvwa mawe, lyoli lisimbiilwe mʉ vɨbeeza vwe mooyo ga bhantʉ.

4 Tʉkʉlonga zɨnɨɨzyo kʉnongwa ye lʉnʉʉlwo lwe lʉsʉʉbhɨlo lwɨtʉ lwe tʉlɨ nalwo kwa Mʉlʉngʉ kwɨ dala ɨlya Yeesu Kilisiti. 5 Te kʉtɨ tʉkʉsɨɨbha kʉtɨ tʉngakhola kʉbhomba lyolyonti kʉ makha gɨɨtʉ tʉneetwe, lyoli amakha gɨɨtʉ gakufuma kwa Mʉlʉngʉ. 6 Ʉweene we atupiiye amakha aga kʉbha twe bhabhombi abha lufingo ulupwa,* 3:6 Ulufingo ulupwa Bhaazya ulufingo mu Wilulanyo ʉwa mazwi amajeni. lwe lukufuma kwa Mupepu uMufinjile. Ulufingo lʉnʉʉlwo te ndajɨzyo zye zisimbiilwe, kʉnongwa ye ɨndajɨzyo zye zisimbiilwe zɨkʉleeta uwufwe, lyoli uMupepu uMufinjile akʉleeta uwuumi.

7 Ɨndajɨzyo zya Moose† 3:7 Ɨndajɨzyo zya Moose Izi ndajɨzyo zye ʉMʉlʉngʉ ábhapiiye aBhaisilaeli mu shilozu kʉshɨlɨla kwa Moose. Bhaazya ʉMoose mu Wilulanyo ʉwa mazwi amajeni. zye zyásimbiilwe mʉ mawe zyáleetile uwufwe. Zyínzile mu wumwamu wa Mʉlʉngʉ, poope na Bhaisilaeli bhakhapootwa kʉmwenya ʉMoose kumiiso, kʉnongwa ye akhalamaga kumiiso, she poope kʉlama kwakwe kwámɨle kʉ khabhalɨlo khashe bhʉʉlo.‡ 3:7 Bhaazya Kufuma 34:29-30. Ishi, ɨnga ɨmbombo yɨ ndajɨzyo zye zɨkwazya uwufwe zyínzile mu wumwamu anza wʉnʉʉwo, 8 pe ɨmbombo ya Mupepu uMufinjile yɨlɨ nu wumwamu nhaani. 9 Ɨnga ɨmbombo yɨ ndajɨzyo zya Moose ye yɨkʉbhalonga abhantʉ yáamɨle nu wumwamu, nalyoli ɨmbombo ya Mupepu uMufinjile ye yɨkʉʉbhapa uwugolosu abhantʉ pamiiso ga Mʉlʉngʉ, te yitishile kʉbha nu wumwamu nhaani? 10 Kʉnongwa ye uwumwamu ʉwa lufingo ʉlwa khalɨ wʉtakʉlɨngaana nu wumwamu ʉwa lufingo ulupwa ngakheeka, kʉnongwa ye uwumwamu ʉwa lufingo ulupwa, lwe lʉpɨtɨ nhaani. 11 Ɨnga khaala khe kháamɨle kha khabhalɨlo khashe, kháamɨle nu wumwamu, bhʉlɨ, uwumwamu ʉwa lufingo ulupwa lwe lʉkʉdɨɨla wiila lʉtakʉbha nu wumwamu nhaani?

12 Kʉnongwa ye ulu lwe lʉsʉʉbhɨlo lwɨtʉ, ɨtwe tʉkʉlonga ku wudandamazu. 13 Khabhɨlɨ ɨtwe tʉtakʉbhomba anzʉ Moose we áyigubishiiye kumiiso nɨ shɨtambaala, ɨnga aBhaisilaeli bhatakhaalole ʉwʉmalɨlɨshɨlo ʉwa kʉlama. 14 Ɨleelo aBhaisilaeli ɨnjeele zyámɨle ngatɨ zigubishiliilwe. Kufishila akhabhalɨlo akha shiishi we bhakʉbhaazya ivitaabu ɨvwɨ ndajɨzyo zya Moose, bhatakʉwaaganya uwanalyoli, ɨnjeele zyabho zɨlɨ ngatɨ zigubishiliilwe nɨ shɨtambaala. Ɨshɨtambaala shɨnɨɨsho te sheefwe, kʉnongwa ye shɨkwepekha kwɨ dala ɨlya kʉmwɨtɨkha uYeesu Kilisiti kwene. 15 Lyoli kufishila ʉmʉsanyʉʉnʉ, we bhakʉbhaazya ivitaabu ɨvwɨ ndajɨzyo zya Moose, amooyo gaabho gagubishiliilwe, bhatakʉzyaganya. 16 Ɨleelo umuntu wowonti we akʉmʉgalʉshɨla ʉMwene, ʉMwene akʉmwefwa ɨshɨtambaala shɨnɨɨsho. 17 Kʉlonga kʉtɨ, “Mwene,” kwe kʉtɨ, Mupepu, paala pe uMupepu wa Mwene alɨɨpo palɨ nʉ wʉsatʉlwe. 18 Ishi ɨtwe twenti twe tutagubishiliilwe kumiiso ni shigubikho, tʉkʉlolesya uwumwamu wa Mwene ngatɨ mʉmʉ shɨlolelo. ɄMwene we Mupepu, we akʉtʉgalʉlanya tʉkholane nʉ weene, ɨnga abhantʉ bhalolaje nhaani ʉwʉpɨtɨ wa wumwamu waakwe. Yɨnɨɨyo ye mbombo ya Mupepu wa Mwene.