18
Conto janda deng hakim
1 Satu kali begini Yesus crita satu conto sama De pu murid-murid, supaya dong pu smangat tra hilang untuk slalu doa sama Tuhan. 2 Yesus bilang,
“Di kota satu ada hakim satu. De ni tra takut sama Allah, de juga tra peduli sama orang lain. 3 Di kota itu juga ada janda satu, yang dapa kas rugi, de ulang-ulang pigi sama hakim trus de bilang, ‘Bapa, bantu sa pu masala deng sa pu lawan.’ 4 Lama skali hakim de tra mau tolong janda itu. Tapi karna janda de datang ulang-ulang, jadi hakim ni de pikir dalam hati, ‘Biar sa ni tra takut Allah trus tra peduli sama orang lain, 5 tapi dari pada de datang ulang-ulang ganggu saya, lebi baik janda ini pu masala sa kas slesai deng baik.’ ”
6 Trus Tuhan bilang,
“Kam coba pikir baik-baik apa yang hakim jahat itu bilang! 7 Jadi kalo hakim yang jahat itu saja bisa tolong janda itu, lebi lagi Allah nanti De tolong orang-orang yang De pili, kalo dong mo datang minta tolong sama Allah siang deng malam. Allah trakan lama untuk tolong dorang. 8 Kam dengar eh! Allah pasti kas slesai dong pu masala. Tapi kalo Sa, Anak Manusia yang Allah utus, datang kembali, masi ada orang di bumi yang percaya sama Sa ka?”
Conto Farisi yang rajin ikut hukum Musa sama tukang tagi pajak
9 Yesus crita conto ini untuk orang-orang yang anggap diri benar trus dong anggap orang lain tra baik. 10 Yesus De bilang,
“Satu kali begini, ada dua orang dong pigi doa di Tempat Ibada Pusat. Yang satu de dari klompok Farisi yang rajin ikut hukum Musa, baru yang satu lagi de dari tukang tagi pajak. 11 Orang Farisi de bediri sendiri saja baru de doa, ‘Ya Allah! Sa ni mo trima kasi banyak karna sa ni beda deng orang lain, sa tra curi-curi, tra bikin jahat, tra main serong, sa ni juga tra sperti tukang tagi pajak itu. 12 Sa puasa satu minggu dua kali, sa kasi seperspulu dari sa pu hasil smua.’
13 Tapi tukang tagi pajak ni de bediri jau-jau, de tra brani angkat muka. De pukul-pukul de pu dada baru bilang, ‘Ya Allah, kasian saya, sa ni orang yang banyak sala!’ ”
14 Yesus bilang,
“Kam dengar eh! Waktu dua orang ini pulang ke dong pu ruma, tukang tagi pajak pu doa yang Allah su trima, bukan Farisi yang rajin ikut hukum Musa. Sapa saja yang angkat diri nanti de jatu. Tapi kalo sapa yang rasa diri renda nanti de dapa angkat.”
Yesus berkati anana kecil
15 Satu kali begini ada orang-orang yang datang bawa dong pu anana kecil sama Yesus, supaya Yesus bisa taru De pu tangan deng berkati dorang. Liat begitu, De pu murid-murid dong langsung mara orang-orang itu. 16 Tapi Yesus panggil anana kecil trus De bilang,
“Kas tinggal anana kecil itu datang ke Saya, jang kam larang-larang dong, karna orang-orang sperti begini yang punya Allah pu krajaan. 17 Ingat baik-baik! Sapa yang tra mo Allah jadi Raja di de pu hidup sperti anak kecil, de tra bisa masuk dalam Allah pu krajaan.”
Crita orang yang kaya
18 Ada orang Yahudi pu pemimpin satu de tanya sama Yesus, “Guru yang baik, sa harus bikin apa supaya sa bisa hidup trus sampe trada akir?”
19 Yesus jawab, “Knapa ko bilang Sa baik? Trada satu orang yang baik hanya Allah saja. 20 Ko pasti tau Allah pu printa-printa, ‘Jang main serong, jang bunu, jang curi, jang bicara yang tra benar, juga hormati ko pu bapa deng mama.’ ”✡ 18:20 Keluaran 20:12-16
21 Orang itu bilang, “Allah pu printa smua sa su bikin waktu sa muda.”
22 Dengar begitu Yesus bilang, “Masi ada satu yang kurang dari ko. Jual smua yang ko punya trus bagi-bagi itu sama orang miskin, deng begitu ko nanti dapat harta di surga, habis itu baru ko datang ikut Saya.”
23 Waktu de dengar begitu, de rasa sedi skali karna de kaya skali.
24 Waktu Yesus liat orang itu de sedi skali trus bilang, “Susa skali orang yang pu harta banyak masuk dalam Allah pu krajaan. 25 Karna lebi gampang satu ekor unta masuk lewat lobang jarum dari pada satu orang kaya masuk dalam Allah pu krajaan.”
26 Dong yang dengar itu bilang, “Kalo begitu, sapa yang bisa slamat?”
27 Yesus bilang, “Apa yang tra bisa untuk manusia, itu bisa untuk Allah.”
Hasil orang yang ikut Yesus
28 Petrus bilang, “Liat, tong su kas tinggal apa yang tong punya, trus ikut Bapa.”
29 Yesus bilang sama dorang,
“Dengar ini baik-baik, orang-orang yang su kas tinggal de pu ruma, de pu maitua, de pu sodara, de pu orang tua ato juga de pu anana karna de mo Allah jadi Raja di de pu hidup, 30 di waktu skarang ini orang itu pasti dapat lebi banyak skali dari yang de su kas tinggal. Juga di jaman yang datang nanti de hidup trus deng Allah sampe trada akir.”
Yesus De kastau yang ketiga kali kalo nanti De mo sengsara
31 Yesus panggil dua blas murid, baru bilang sama dong,
“Skarang tong pigi ke Yerusalem, trus smua yang nabi-nabi dong tulis tentang, Anak Manusia, su mo jadi. 32 Karna De nanti dapa kasi ke orang-orang bukan Yahudi, dapa ejek, dapa hina deng dapa luda. 33 Dong nanti cambuk deng bunu Dia, tapi pas hari ketiga De nanti hidup.”
34 Biar begitu dong tra mngerti smua itu, arti dari kata-kata itu tasembunyi, trus dong tra tau Yesus pu maksud.
Yesus kas sembu orang buta
35 Waktu Yesus dong mo masuk kota Yeriko, di situ ada orang buta satu de duduk minta-minta di pinggir jalan. 36 Waktu de dengar banyak orang dong lewat, de tanya, “Eee, ada apa ka?”
37 Dong jawab, “Yesus orang Nasaret De ada lewat.”
38 Dengar begitu, orang buta itu bateriak, “Yesus! Daud pu turunan, kasian sa ka!”
39 Dong yang jalan di depan, tegur supaya de diam. Biar begitu de batariak lebi kras lagi, “Daud pu turunan, kasian sa ka!”
40 Trus Yesus brenti baru suru dong bawa orang yang buta itu sama Dia.
Waktu de su ada dekat, trus Yesus tanya dia, 41 “Ko mo Sa bikin apa untuk ko?”
De bilang, “Tuhan! Sa mo supaya sa bisa liat.”
42 Trus Yesus bilang ke dia, “Skarang ko liat suda! Karna ko percaya Saya, ko sembu.”
43 Waktu itu juga de bisa liat. De langsung ikut Yesus puji-puji Allah. Waktu orang banyak liat yang jadi, dong smua juga kas tinggi-tinggi Allah.